Ko Apalahamo—Ko He Tagata Agavaivai

Neʼe nofo ia Apalahamo ʼi te falelā, pea neʼe ina leleiʼia ia te malumalu ʼaē ʼe ina maʼu ʼi te ʼu temi vevela ʼo te ʼaho. ʼI tana sio ki te mamaʼo, neʼe ina fakatokagaʼi ia tagata e toko tolu ʼe ʼomai ʼo mamata ia te fenua.a Koia, neʼe lele atu aipē ʼo fakafelāveʼi ki te ʼu tagata mamata ʼaia, ʼo fakaafe nātou ke natou nonofo muʼa pea neʼe natou tali lelei ia tana fakaafe. Neʼe ina foaki kiā nātou ia “te kii moi pane,” pea hoko ʼaki te teuteuʼi ʼo te toe meʼa kai lahi, ko te foʼi pane neʼe hoki taʼo age pē, mo te foʼi potilo, mo te moʼi huʼa pipi, pea mo ina filifili ia te moʼi pipi ʼe kano malū. ʼI tana heu age ia te meʼa kai ki tana ʼu tagata mamata, neʼe mole gata ʼaki pē ia te makehe ʼo tana tali kāiga, kae ʼe tou toe sisio ai ki tana agavaivai moʼoni.—Senesi 18:1-8.

KOTEĀ IA TE FAKAʼUHIGA ʼO TE AGAVAIVAI? Ko te agavaivai ʼe mole maʼu ai ia te fialahi peʼe ko te fiatuʼu. Ko he tahi ʼe agavaivai ʼe ina fakamaʼuhigaʼi ia nātou fuli ʼe māʼoluga age iā te ia ʼi he ʼaluʼaga pē. (Filipe 2:3) ʼE fakalogo ki te ʼu manatu ʼa ʼihi, pea ʼe lotolelei ke ina fai ia he ʼu gāue ʼe mole fiahā ai.

NEʼE FAKAHĀ FEAFEAʼI E APALAHAMO IA TANA AGAVAIVAI? Neʼe fiafia ia Apalahamo ʼi tana tokoni ki niʼihi. Ohagē ko tona fakahā ʼi te kamataʼaga, ʼi te temi ʼaē neʼe sio ai ki te ʼu tagata mamata e toko tolu, neʼe ina foaki atu aipē ia te ʼu meʼa ʼaē ʼe ʼaoga kiā nātou. Neʼe kamata teuteuʼi atu aipē e tona ʼohoana, ia Sala ia te meʼa kai. Koia, ʼe tou tokagaʼi neʼe lahi ia te ʼu gāue neʼe ina fai: Neʼe lele ia Apalahamo ʼo fakafelāveʼi ki te ʼu tagata mamata, neʼe ina foaki age ia he meʼa kai kiā nātou, neʼe ʼalu ki te faga manu pea ina filifili ia he manu ke ina matehi, pea neʼe ina teuteuʼi ia te ʼu meʼa kai fuli maʼa nātou. Koia, neʼe mole ina fakatotonu ki tana ʼu kaugana ke natou fai ia te faʼahi ʼaia, neʼe fakahoko pē e te tagata agavaivai ʼaia ia te ʼu gāue māhani ʼaia. Neʼe mole mata lainoa ki tona ʼuhiga ia tana gāue maʼa ʼihi.

Neʼe fakalogo ia Apalahamo ki te ʼu manatu ʼa ʼihi iā nātou ʼaē neʼe pule ki ai. ʼI te Tohi-Tapu ʼe talanoa pē ki te ʼu felōgoi ʼa Apalahamo pea mo Sala. Koia, tuʼa lua ʼe tou lau ai neʼe fakalogo ia Apalahamo ki te ʼu manatu ʼa Sala pea neʼe ina fai ʼo mulimuli kiai. (Senesi 16:2; 21:8-14) ʼI te tahi ʼaluʼaga, neʼe ʼi ai tana manatu “nee mamahi osi . . . kia Apalahamo.” Kae ʼi te temi ʼaē neʼe palalau ai ia Sehova kiā Apalahamo, ke ina vakavakaʼi peʼe lelei ia tana manatu, neʼe tali ʼaki he agavaivai e Apalahamo pea neʼe mulimuli kiai.

KOTEĀ HE ʼU AKO MAʼA TĀTOU? Kapau ʼe tou agavaivai moʼoni, ʼe tou fiafia anai ʼi hatatou tokoni ki niʼihi atu. ʼE tou maʼu anai ia te fiafia ʼi te fai ia meʼa fuli ʼe feala ke tou maʼuli fīmālie ai.

ʼE feala ke tou toe fakahā ia te agavaivai mokā tou tali ia te ʼu manatu ʼa ʼihi atu hahaʼi. ʼE mole ʼui ke tou fakafisi ki te manatu ʼa ʼihi ʼuhi pē ʼe mole tou manatu tahi mo nātou, ʼe tou tali fakapotopoto anai ki te ʼu palalau ʼa ʼihi. (Taaga Lea 15:22) ʼE ʼaoga ia te taʼi faʼahiga manatu ʼaia kiā nātou ʼe natou takitaki niʼihi. ʼE ʼui fēnei e te tagata takitaki faiva ʼe higoa ko John: “Ko he tagata takitaki lelei ʼe ina faigaʼi ke maʼu he ʼu felōgoi ʼe feala ai ki te hahaʼi ke natou palalau faʼifaʼitaliha.” Pea ina toe ʼui fēnei: “ ʼE tonu ke tou tokagaʼi ʼaki he agavaivai ko he tahi ʼe fakalogo kiā tātou ʼe feala ke ina fai fakalelei age he ʼu gāue ʼe tou fai. Koia, ʼe mole feala ki he tahi tatau aipē peʼe ko he tagata takitaki, ke ina maʼu tokotahi pē ia te ʼu manatu ʼaē ʼe lelei.”

ʼI te temi ʼaē ʼe tou faʼifaʼitaki ai ia Apalahamo ʼo tou fakalogo ki te ʼu manatu ʼa ʼihi pea mo fakahoko he ʼu gāue ʼe mata lainoa, ʼe tou maʼu anai ia te ʼofa ʼo te ʼAtua. Pea tahi, “e tau te Atua ki te kau fiamealahi, kae e ina foaki tona kalasia [“ ʼofa makehe,” MN] ki te kau fiamalalo.”—1 Petelo 5:5.

[Nota]