Ko Apalahamo—Ko He Tagata ʼOfa

Neʼe faigataʼa kiā Apalahamo hana tali tona lotomamahi. Neʼe kua mate ia tona ʼohoana ʼofaina, ia Sala. Neʼe manatuʼi e te tagata pule matuʼa ʼaia ia te ʼu tuʼuga suvenia lelei ʼi te temi ʼaē neʼe nā tauʼinē fakaʼosi ai. ʼI te mamahi ʼo tona loto, neʼe tagi ai leva. (Senesi 23:1, 2) ʼI tana mole ufiufi, ko tona ʼu loʼimata, neʼe mole fakaʼuhiga leva ko he tagata fula kae neʼe fakahā moʼoni e Apalahamo ia he kalitātē maʼuhiga, ia tona ʼofa.

KOTEĀ IA TE FAKAʼUHIGA ʼO TE ʼOFA? Ko te ʼofa, ko te pipiki ki he tahi ʼaki he agaʼofa peʼe ko he ʼofa loloto. Ko he tahi ʼe ʼofa ʼe ina fakahā ʼaki tana aga ʼi te ʼu meʼa ʼaē ʼe ina logoʼi ʼo ʼuhiga mo nātou ʼaē ʼe ʼofa ki ai, tatau aipē mokā ʼe tonu ke ina fai he ʼu sākilifisio.

NEʼE FAKAHĀ FEAFEAʼI E APALAHAMO IA TONA ʼOFA? Neʼe fakahā e Apalahamo ʼe ʼofa ki tona fāmili. ʼE mahino ia, ko Apalahamo neʼe ko he tagata maʼumaʼua. Kae, neʼe tokaga tuʼumaʼu ki te ʼu meʼa ʼaē ʼe ʼaoga ʼi te faʼahi ʼo te loto ʼo tona fāmili pea tonatou ʼaluʼaga fakalaumālie. Koia, neʼe fakatokagaʼi e Sehova totonu neʼe tokaga ia Apalahamo ki tana tauhi ohagē pē ko tana tokaga ki tona fāmili. (Senesi 18:19) Neʼe tuʼa lahi ia te talanoa tāfito ʼa Sehova ki te ʼofa ʼo Apalahamo. ʼI tana palalau ʼo ʼuhiga mo Apalahamo, neʼe talanoa kiā Isaake ko tona ‘foha ʼaē ʼe ʼofa ai.’—Senesi 22:2.

ʼE feala ke tou mahino lahi ki te ʼuhiga ʼo te ʼofa ʼo Apalahamo ʼi tona agaaga ʼi te temi ʼaē neʼe mate ai ia tona ʼohoana ʼofaina ko Sala. Neʼe tagi ia Apalahamo ʼo ʼuhiga mo ia. Logolā neʼe ko he tagata mālohi, neʼe mole mataku ʼi te fakahā ia tona lotomamahi. Neʼe fakahā e Apalahamo ia tona lotomālohi pea mo tana agalelei.

Neʼe fakahā e Apalahamo ia tona ʼofa ki tona ʼAtua. ʼI tona maʼuli kātoa, neʼe ina fakahā ia te taʼi ʼofa ʼaia. ʼO feafeaʼi? ʼE feala ke tou manatuʼi ia te faʼahi ʼaē ʼe ʼui ʼi te Tohi-Tapu iā 1 Soane 5:3: “Koeni ki te ofa o te Atua, ko te fai o ana fakatotonu.” ʼAki te fakamahino ʼaia, ko Apalahamo neʼe ko he faʼifaʼitaki maʼuhiga ʼo te ʼofa ʼaē ki te ʼAtua.

ʼI te ʼu lakaga fuli neʼe fai ai e Sehova ia te fakatotonu kiā Apalahamo, neʼe fakalogo atu aipē ia Apalahamo. (Senesi 12:4; 17:22, 23; 21:12-14; 22:1-3) Tatau aipē peʼe faigafua peʼe kailoa ia te fakatotonu ʼaē neʼe fai age kae neʼe fakalogo, tatau aipē peʼe ʼiloʼi e Apalahamo pe koʼē neʼe kole age e Sehova ia te faʼahi ʼaia kiā te ia kae neʼe ina fakahoko kātoa. Kiā Apalahamo, ko te ʼu ʼaluʼaga ʼaia neʼe mole faʼa maʼuhiga. Kapau neʼe loto e tona ʼAtua ia meʼa fuli ʼo ʼuhiga mo ia, ʼe lotolelei anai ke ina fai ia te faʼahi ʼaia. Neʼe sio ia Apalahamo ko te ʼu fakatotonu fuli neʼe fai age ʼe ko he fealagia ʼaia ke ina fakahā ia tona ʼofa ʼaē kiā Sehova.

KOTEĀ HE ʼU AKO MAʼA TĀTOU? ʼE feala ke tou faʼifaʼitakiʼi ia Apalahamo ʼo tou fakahā ia totatou ʼofa loloto ki ʼihi, tāfito ia nātou ʼo totatou fāmili. ʼE mole tou loto ke tou tuku ia te ʼu tuʼania ʼo te maʼuli ke ina toʼo ia te temi ʼaē ʼe tou fakaʼaogaʼi kiā nātou ʼe tou ʼoʼofa ai.

ʼE toe ʼaoga ke tou gāueʼi ia te lotoʼofa kiā Sehova. Ko te taʼi ʼofa ʼaia ʼe tonu ke liliu ko he mālohi ʼe ina takitaki ia totatou maʼuli. Ohagē lā, ʼe feala ke tou faigaʼi ke tou fai he ʼu fetogi ʼi tatatou faʼahiga manatu, mo ʼatatou palalau pea mo tatatou aga ke ʼalutahi mo te faʼahi ʼaē ʼe loto kiai ia te ʼAtua.—1 Petelo 1:14-16.

Koia, ʼe mole faigafua tuʼumaʼu ia tatatou fakalogo ki te ʼu fakatotonu ʼa Sehova. Kae ʼe tou tui papau ko Ia ʼaē neʼe tokoni kiā Apalahamo, pea ko Ia ʼaē neʼe ina fakahigoaʼi “toku kaumeʼa,” ʼe toe feala ke tokoni mai kiā tātou. (Esaia 41:8, MN) ʼE fakapapau fēnei ʼi tana Folafola, ia te Tohi-Tapu: “Mo fakamalohii koutou i te ofa, pea mo fakatuu mau koutou i te amanaki lelei.” (1 Petelo 5:10) ʼI fakapale taulekaleka leva ʼaē ʼe ʼamanaki kiai ia Tona kaumeʼa ko Apalahamo!

[Talanoa ʼo te pāsina 10]

Mokā Tagi He Tagata ʼe Fakaʼuhiga Koa ʼe Fula?

Tokolahi ʼe natou ʼio ki te faʼahi ʼaia. ʼE lagi natou punamaʼuli ʼi tanatou ʼiloʼi ʼaē ko Apalahamo neʼe ko he tagata mālohi, mo agatonu ʼaē ʼe talanoa kiai ʼi te Tohi-Tapu neʼe tagi ʼi te ʼu temi mamahi. Neʼe toe tagi mo ʼihi atu, ohagē lā ko Sosefo, mo Tavite, mo te ʼapositolo ko Petelo, mo te kau tagata ʼāfea ʼo te kōkelekāsio ʼo Efeso, ʼo toe fēia aipē kiā Sesu. (Senesi 50:1; 2 Samuele 18:33; Luka 22:61, 62; Soane 11:35; Gaue 20:36-38) ʼE hā lelei ai, ʼe mole fakahā mai ʼi te Tohi-Tapu mokā tagi he tagata ʼe mole fakaʼuhiga leva ʼe fula.