Tou Ako Mai Te Folafola ʼa Te ʼAtua

ʼE Fakakikite Koa ʼi Te Tohi-Tapu Ia Te Kā Haʼu?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega ʼe feala ke kotou lau ʼi takotou Tohi-Tapu ʼo kotou maʼu ai tona ʼu tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. ʼE totonu koa ia te ʼu lea fakapolofetā ʼo te Tohi-Tapu?

ʼE gata tokotahi pē ki te ʼAtua Mafimafi ʼe feala ke ina ʼiloʼi fakatomuʼa ia te ʼu ʼaluʼaga kehekehe ʼo te kā haʼu. (Amosi 3:7) Ohagē lā, talu mai te temi muʼa, neʼe ina fakakikite ia te haʼu ʼo he tahi ʼe higoaʼi anai ko te Mēsia peʼe ko Kilisito. Ko te Mēsia neʼe ko he tahi ʼi te hōloga ʼo te tagata agatonu ko Apalahamo. Neʼe ko he tagata takitaki neʼe ina faigaʼi ke toe maʼu e te hahaʼi fakalogo ia te tapuakina ʼaē ko te maʼuli haohaoa ʼe ʼāteaina mai te mahaki. (Senesi 22:18; Esaia 53:4, 5) Ko te Mēsia ʼaia neʼe Fakapapauʼi mai ʼe haʼu anai mai Petelehemi.—Lau ia Mikea 5:2.

Ko te Mēsia ʼe ko Sesu. ʼI te ʼu taʼu e 700 ki muʼa atu, ʼe fakakikite ʼi te Tohi-Tapu ʼe tupu anai ia te Mēsia ʼi he taʼahine tāupoʼou pea ʼe manukinukiʼi anai. ʼE ina foaki anai ia tona maʼuli maʼa te ʼu agahala ʼo te tokolahi, pea ʼe ʼavaifo anai ʼi he falemaka ʼo he tagata maʼu koloa. (Esaia 7:14; 53:3, 9, 12) Neʼe toe fakahā ʼi te Tohi-Tapu ʼi te ʼu sēkulō e nima ki muʼa atu, ʼe hū anai ki Selusalemi ʼi he ʼāsino pea ʼe lavakiʼi anai ia ki he ʼu foʼi piesi siliva e 30. Neʼe hoko moʼoni ia te ʼu faʼahi fuli ʼaia.—Lau ia Sakalia 9:9; 11:12.

2. Koteā ia te ʼu taʼu ʼaē neʼe fakakikite e te ʼAtua?

ʼI te ʼu sēkulō e nima ki muʼa atu, neʼe fakakikite ʼi te Tohi-Tapu ia te taʼu totonu ʼaē kā hā ai ia te Mēsia. Ko te temi ʼo kaku ki tana haʼu ʼe fakafuafua ki te ʼu vāhaʼa taʼu, ko tona fakaʼuhiga ko te “vahaa” e tahi ko tona loaloaga ko taʼu e fitu. Ko vāhaʼa e 7 ʼo hilifaki mai kiai ia vāhaʼa e 62 pea maʼu ia vāhaʼa taʼu e 69. Pea kapau ʼe 7 tuʼa 69 pea maʼu ia te ʼu taʼu e 483. Neʼe kamata ʼi te temi fea ia te vāhaʼa taʼu? ʼO fakaʼalutahi mo tona ʼui ʼi te Tohi-Tapu, ko te temi ʼaia ʼe kamata anai ʼi te temi ʼaē kā toe liliu mai ai ia te kaugana ʼa te ʼAtua ko Selemia ki Selusalemi pea mo toe laga ia te kolo. Neʼe kamata ia te hisitolia ʼo te kau Pelesia ʼi te taʼu 455 ʼi muʼa ʼo totatou temi. (Neemia 2:1-5) ʼI te ʼu taʼu 483 ki muli age, neʼe papitemaʼi ai ia Sesu ʼo liliu ai ko te Mēsia, ʼo tō tonu ʼi te taʼu 29 ʼo totatou temi.—Lau ia Taniela 9:25.

3. ʼE hoko moʼoni koa ia te ʼu lea fakapolofetā ʼo te Tohi-Tapu ʼi te temi nei?

Neʼe fakakikite e Sesu ia te ʼu ʼaluʼaga makehe ʼe hoko ʼi totatou temi. ʼE talanoa ia tana lea fakapolofetā ʼaia ki te logo lelei ʼo te Puleʼaga ʼo te ʼAtua, pea mo te fīmālie ʼaē kā ina foaki anai ʼi te mālamanei kātoa ki te hahaʼi ʼaē ʼe ʼoʼofa ki te ʼAtua. ʼE pulihi anai e te Puleʼaga ia te tuʼu ʼo te ʼu faʼahiga meʼa agakovi ʼaenī ʼe tou māʼuʼuli ai.—Lau ia Mateo 24:14, 21, 22.

ʼI te ʼu lea fakapolofetā ʼo te Tohi-Tapu ʼe fakahā lelei ai ia te temi ʼaē ʼe fakaʼosi ai ia te tuʼu ʼo te ʼu faʼahiga meʼa ʼaenī. ʼE fakahā ʼi te Tohi-Tapu ia te ʼaluʼaga ʼe mole ʼalutahi mo te haʼele ki muʼa ʼo te temi, ʼe maumauʼi anai e te hahaʼi ia te kele. Ko te ʼu mamahi neʼe tupu mai te ʼu tau, mo te ʼu hoge, mo te ʼu mafuike, pea mo tuputupu ʼo te ʼu taʼi mahaki. (Luka 21:11; Apokalipisi 11:18) ʼE fakakovikovi anai ia te aga ʼa te hahaʼi. ʼI te ʼu temi faigataʼa ʼaia, ʼe fakamafola anai e te ʼu tisipulo ʼa Sesu ia te logo lelei ʼo te Puleʼaga ʼo te ʼAtua ki te ʼatu puleʼaga fuli.—Lau ia Mateo 24:3, 7, 8; 2 Timoteo 3:1-5.

4. Koteā anai ia te kā haʼu ʼo te mālamanei?

ʼE kei toe lahi ia te ʼu meʼa lelei ke foaki e te ʼAtua Māfimāfi ki te hahaʼi agatonu. Ko Sesu Kilisito, ia te Mēsia pea mo nātou ʼaē neʼe ina filifili, ʼe natou puleʼi anai mai te lagi ia te kele. ʼE natou faʼufaʼu te Puleʼaga ʼaia ʼaē kā takitaki anai lolotoga taʼu e afe. ʼE fakatuʼuake anai ia te kau mate pea ʼe natou maʼu anai ia te fealagia ʼe tuha mo tāu mo te maʼuli heʼegata. Pea tahi, ʼi te moʼi temi ʼaia, ʼe fakamālōlō anai e te Puleʼaga ia te hahaʼi fuli. ʼE pulihi anai ʼo talu ai ia te mahaki pea mo te mate.—Lau ia Apokalipisi 5:10; 20:6, 12; 21:4, 5.

[Paki ʼo te pāsina 12]

Kapau ʼe kotou fia maʼu he tahi ʼu fakamahino, vakaʼi te ʼu pāsina 23 ki te 25 pea mo te ʼu pāsina 197 ki te 201 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu?