Tou Ako Mai Te Folafola ʼa Te ʼAtua

ʼE Tonu Ke Tou Fakamanatu Feafeaʼi Ia Te Mate ʼa Sesu?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai tona ʼu tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. ʼE tonu ke fakamanatu feafeaʼi ia te mate ʼa Sesu?

Koteʼuhi neʼe foaki e Sesu ia tona maʼuli ko he totogi moʼo haofaki ia te mālamanei mai te agahala pea mo te mate, neʼe ina kole ki tana kau tisipulo ke natou fakamanatu ia tona mate. Neʼe natou fai ia te faʼahi ʼaia ʼaki he taumafa fakatā ʼo ina fakaʼaogaʼi ia te pane pea mo te vino. ʼE fakatā ia te pane ki te sino ʼo Sesu pea ko te vino ki tona taʼataʼa.—Lau ia Luka 22:19, 20.

Neʼe fakaʼaogaʼi e Sesu ia he pane neʼe mole hona meʼa fakatupu. ʼI te Tohi-Tapu neʼe fakatā ia te meʼa fakatupu ki te agahala. Koia, ko te pane neʼe ina fakatā lelei ia te sino haohaoa ʼo Sesu. Neʼe ina momoli tona sino ko he sākilifisio ʼaē neʼe ina fakagata ai leva ia te ʼu fai sākilifisio manu ʼi te Lao ʼa Moisese. (Hepeleo 10:5, 9, 10) Neʼe fakatā ia te vino ki te taʼataʼa maʼuhiga ʼaē neʼe liligi e Sesu ko he sākilifisio maʼa ʼatatou agahala.—Lau ia 1 Petelo 1:19; 2:24; 3:18.

2. Ko te temi fea ʼaē ʼe tonu ke tou fakamanatu ai ia te mate ʼa Sesu?

Neʼe fai te ʼAho Fakamanatu ʼo te mate ʼa Sesu ʼi te Pāsikate ʼi te ʼaho 14 ʼo Nisani. Ko te ʼaho Fakasutea ʼaia ʼe kamata ʼi te tō ʼo te laʼā. ʼI te afiafi ʼaē ʼi muʼa ʼo tona mate neʼe kai mo ʼana ʼapositolo ia te taumafa ʼo te Pāsikate, pea mo ina fakatuʼu leva ia te taumafa foʼou ʼaē kā ina fakamanatu tona mate.—Lau ia Luka 22:14, 15.

Iā ʼaho nei ʼe fakamanatu e te hahaʼi ʼa te ʼAtua, ia te fakatuʼutuʼu ʼaē neʼe fai e te ʼAtua ʼaki ia Sesu, moʼo fakaʼāteaina ia te mālamanei kātoa mai te agahala pea mo te mate. Ko te toʼotoʼoga ʼaia ʼe fai tuʼa tahi ʼi te taʼu, ʼe fai anai mokā ʼosi tō te laʼā, ʼi te ʼaho ʼaē ʼe ʼalutahi mo te ʼaho 14 ʼo Nisani ʼo te kaletalio ʼi te Tohi-Tapu.—Ekesote 12:5-7, 13, 17; lau ia Soane 1:29.

3. Ko ai ʼaē ʼe tonu ke kai ki te pane pea mo ʼinu ki te vino?

ʼI temi ʼaē neʼe foaki ai e Sesu ia te ʼipu vino ki ʼana tisipulo neʼe ina ʼui fēnei: “Ko te ipu aeni o te hai foou.” (1 Kolonito 11:25) Ko te “hai foou” ʼaia, ʼe ko te fuakava foʼou ʼaē kā ina fetogi ia te fuakava ʼo te Lao ʼa Moisese, ʼaē neʼe fakapapau e te ʼAtua ki te kau Iselaele mo kapau ʼe natou fakalogo lelei kiā te ia, pea mo natou liliu ko tana hahaʼi. (Ekesote 19:5, 6) Kae ʼi te mole fakalogo ʼa Iselaele, neʼe fai ai e Sehova ia he fuakava foʼou.—Lau ia Selemia 31:31.

ʼAki te fuakava foʼou ʼaia, neʼe fakafealagia ki te tokolahi ke natou maʼu he ʼu tapuakina. Ko nātou ʼaē ʼe kau ki te fuakava foʼou ʼaia, ʼe ko te toko 144 000. ʼAki ia nātou ʼaia, ʼe tapuakinaʼi anai ia te toko lauʼi miliona hahaʼi mai te ʼu puleʼaga kehekehe ʼaki te maʼuli heʼegata ʼi he palatiso ʼi te kele. Ko ʼihi ʼi te kau 144 000 ʼe natou lolotoga tauhi nei kiā Sehova ʼi te kele. Ko nātou pē ʼaia ʼe tonu ke natou kai ki te pane pea mo ʼinu ki te vino, koteʼuhi neʼe fai e Sehova ia he fuakava foʼou mo nātou ʼaia, ʼaē neʼe fakamoʼoni ʼaki te taʼataʼa ʼo Sesu.—Lau ia Luka 12:32; Apokalipisi 14:1, 3.

4. He koʼē ʼe maʼuhiga ia te ʼAho Fakamanatu kiā tātou?

Ko te fakamanatu ʼo te mate ʼa Sesu ʼi te taʼu fuli, ʼe ina uga ke tou loto fakafetaʼi ki te manavaʼofa ʼo Sehova. Neʼe ina fekauʼi mai tona ʼAlo ke haʼu ʼo mate ʼuhi ko ʼatatou agahala. Koia ʼi tatatou kau ʼi te ʼaho fakamanatu e tonu ke tou fakakaukauʼi te tupuʼaga ʼo te mate ʼa Sesu maʼa tātou. E tonu ke tou fakahā totatou loto fakafetaʼi ki te meʼa ʼofa ʼaia ʼa Sehova mo Sesu.—Lau ia Soane 3:16; 2 Kolonito 5:14, 15.

[Paki ʼo te pāsina 9]

Kapau ʼe kotou fia maʼu he tahi ʼu fakamahino, vakaʼi te ʼu pāsina 206 ki te 208 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.