ʼE Fakaʼosi Feafeaʼi Anai Te Mālamanei?

“E mole koutou nofo i te fakapouli, ke pooki koutou e te aho aia o hage e he tagata kaihaa.”—1 TES. 5:4.

ʼE FEALA KOA HAKOTOU FAKAMAHINO?

Ko te ʼu ʼaluʼaga fea ʼaē ʼe heʼeki hoko ʼe talanoa kiai te ʼu vaega ʼaenī?

1 Tesalonika 5:3

Apokalipisi 17:16

Taniela 2:44

1. Koteā ʼaē kā tokoni mai anai ke tou nofo ʼalaʼala pea mo kātakiʼi te ʼu ʼahiʼahi?

ʼE ʼI AI te ʼu ʼaluʼaga fakamataku kā vave hoko anai ʼi te kele. ʼE feala ke tou tui heʼe fakamoʼoni kiai te Tohi-Tapu. Koia ʼe ʼaoga ke tou nofo ʼalaʼala. Koteā ʼaē kā tokoni mai anai ke tou fai te faʼahi ʼaia? ʼE fakalotomālohiʼi tātou e te ʼapositolo ko Paulo ke tou “sio, o mole ki te u mea e sio ki ai te u mata, kae ki te u mea e mole sio ki ai te u mata.” ʼE ʼaoga kiā tātou ke tou manatuʼi ʼe foaki mai anai e Sehova te maʼuli heʼegata, peʼe ʼi te lagi peʼe ʼi te kele. Neʼe tohi e Paulo te ʼu palalau ʼaia moʼo fakalotomālohiʼi te kau Kilisitiano ʼo tona temi, ke natou tokaga tāfito ki te fakapale ʼaē ʼe feala ke natou maʼu mo kapau ʼe natou nofo agatonu ki te ʼAtua. Ko te fai ʼo te faʼahi ʼaia ʼe tokoni anai kiā nātou ke natou kātakiʼi te ʼu ʼahiʼahi pea mo te ʼu fakataga.—2 Ko. 4:8, 9, 16-18; 5:7.

2. (1) Koteā ʼaē ʼe tonu ke tou fai moʼo taupau tatatou ʼamanaki ke mālohi? (2) Koteā ʼaē kā tou talanoa kiai ʼi te ʼalatike ʼaenī pea mo ʼaē kā hoa mai?

² Ko te ako maʼuhiga ʼaenī ʼe tou maʼu mai te tokoni ʼaē neʼe fai e Paulo: Kapau ʼe tou loto ke tou taupau tatatou ʼamanaki ke mālohi, ʼe mole tonu ke tou tokagaʼi pē te ʼu meʼa ʼaē ʼe tou lava sio kiai. Kae ʼe tonu ke tou toe tokagaʼi mo te ʼu ʼaluʼaga maʼuhiga ʼaē ʼe mole heʼeki tou lava sio kiai. (Hep. 11:1; 12:1, 2) ʼI te ʼalatike ʼaenī pea mo ʼaē kā hoa mai, ʼe tou talanoa anai ki te ʼu ʼaluʼaga e hogofulu ʼe hoko anai ʼi muʼa ʼo hatatou maʼu te maʼuli heʼegata.

KOTEĀ ANAI ʼAĒ KĀ HOKO ʼI MUʼA PĒ ʼO TE FAKAʼOSI?

3. (1) Koteā te ʼaluʼaga ʼaē ʼe talanoa iā 1 Tesalonika 5:2, 3 kā hoko anai ʼi te kā haʼu? (2) Koteā ʼaē kā fai anai e te kau takitaki fakapolitike? Pea ko ai ʼaē kā lagi ina toe fai fēia?

³ ʼI tana tohi ʼaē ki te kau Tesalonika, neʼe talanoa ia Paulo ki he ʼaluʼaga e tahi ʼi te ʼu ʼaluʼaga ʼaē kā hoko anai ʼi te kā haʼu. (Lau ia 1 Tesalonika 5:2, 3.) Neʼe talanoa ia Paulo ki “te aho o [Sehova].” ʼE kamata anai te ʼaho ʼaia ʼaki te fakaʼauha ʼo te ʼu lotu hala pea ʼe fakaʼosi anai ʼaki te tau ʼo Halamaketone. ʼI muʼa pē ʼo te kamata ʼo te ʼaho ʼo Sehova, ʼe ʼui fēnei anai ʼe te kau takitaki fakamālamanei: “Tokalelei mo fimalie!” ʼE feala ke hoko te faʼahi ʼaia ʼi he ʼaluʼaga e tahi peʼe ko he ʼu ʼaluʼaga ʼe fefakahoahoaʼaki. ʼE lagi manatu anai te ʼu puleʼaga kua natou vave fakatokatoka ʼonatou fihifihia lalahi. Koteā ʼaē kā fai anai e te kau takitaki lotu? ʼE natou kau ki te mālama ʼaenī. ʼE feala pē anai ke natou ʼui fakatahi mo te kau takitaki fakapolitike: “Tokalelei mo fimalie!” (Apk. 17:1, 2) ʼAki tanatou fai te faʼahi ʼaia, ʼe hagē pē anai te kau takitaki lotu ko te kau polofetā loi ʼo Suta ʼo te temi muʼa, ʼaē neʼe natou ʼui fēnei: “Tokalelei! Tokalelei!” Kae neʼe ʼui e Sehova ʼe mole ʼi ai he tokalelei.—Sel. 6:14; 23:16, 17.

4. Koteā ʼaē ʼe tou mahino kiai kae ʼe mole mahino kiai te tokolahi?

⁴ Tatau aipē pe ko ai ʼaē kā ina ʼui “Tokalelei mo fimalie!,” kae ʼe kamata ai anai ia te ʼaho ʼo Sehova. Ko te tupuʼaga lā ʼaia ʼo te ʼui fēnei ʼa Paulo: “U tehina, e mole koutou nofo i te fakapouli, ke pooki koutou e te aho aia o hage e he tagata kaihaa; ko kotou ko he u fanau fuli o te malama.” (1 Tes. 5:4, 5) ʼE tou mahino ki te ʼu faʼahi ʼaē ʼe talanoa kiai te Tohi-Tapu ʼo ʼuhiga mo te ʼu ʼaluʼaga ʼaē ʼe lolotoga hoko nei, kae tokolahi te hahaʼi ʼe mole natou mahino kiai. ʼE hoko feafeaʼi anai te lea fakapolofetā ʼo ʼuhiga mo te ʼui ʼaē “Tokalelei mo fimalie!”? ʼE tonu ke tou fakatalitali pea mo mamata. Koia tou faiga mālohi ke “tou alaala pea tou fakapotopoto.”—1 Tes. 5:6; Sofo. 3:8.

ʼE MOLE ʼILOʼI E TE ʼU LOTU HALA ʼE FAKAʼAUHA ANAI NĀTOU

5. (1) ʼE kamata feafeaʼi anai te “mamahi lahi”? (2) Ko ai ʼaē ʼe hagē ko he “fafine aliki” ʼe manatu ʼe mole feala ke hoko he meʼa kovi kiā ia?

⁵ Koteā te tahi meʼa kā hoko anai? Neʼe ʼui fēnei e Paulo: “I te temi ae e ui ai anai e te u tagata: Tokalelei mo fimalie! I te temi pe aia e fakamautoka anai natou e he [“fakaʼauha,” MN] fakapunamauli.” ʼE kamata anai te fakaʼauha ʼaia ʼaki te ʼohofi ʼo te ʼu lotu hala fuli ʼo te mālamanei. ʼE fakahigoa ʼi te Tohi-Tapu te ʼu lotu hala ko “Papilone lahi” peʼe ko “te fafine [“paomutu,” MN].” (Apk. 17:5, 6, 15) Ko te fakaʼauha ʼo te ʼu lotu hala fuli, ʼaē ʼe kau kiai te Keletiate, ʼe ko te kamataʼaga ʼaia ʼo te “mamahi lahi.” (Mat. 24:21; 2 Tes. 2:8) Tokolahi ʼe natou punamaʼuli anai mokā hoko te faʼahi ʼaia. Koteā tona tupuʼaga? Koteʼuhi ʼe kaku anai ki te temi ʼaia, ʼe ʼui anai maʼa te fafine paomutu ʼe ko ia ko he “fafine aliki” ʼaē ʼe mole feala ke ina “iloi te mamahi.” ʼE manatu ia ʼe mole feala anai ke hoko he meʼa kovi kiā ia. Kae ʼe ina ʼiloʼi anai neʼe fai hala. ʼE vave ʼaupitō anai tona fakaʼauha, ohagē pē ko “he aho e tahi.”—Apk. 18:7, 8.

6. Ko ai ʼaē kā ina fakaʼauha anai te ʼu lotu hala?

⁶ ʼE ʼui ʼi te Tohi-Tapu ʼe ʼi ai “te manu fekai” mo ʼona “tala e hogofulu” ʼe ina ʼohofi anai te fafine paomutu. ʼI te tohi ʼo te Fakahā, ʼe tou ako ai ko te manu fekai ʼe ko te ʼu Puleʼaga Fakatahi (ONU). Ko “te u tala e hogofulu” ʼe fakaʼuhiga ki te ʼu puleʼaga fuli ʼaē ʼe lagolago nei ki te “manu kula” ʼaia.a (Apk. 17:3, 5, 11, 12) ʼE feafeaʼi anai te ʼohofi fakamataku ʼaia? Ko te ʼu puleʼaga ʼaē ʼe kau ki te ONU ʼe natou toʼo anai te ʼu koloa ʼo te fafine paomutu, mo fakahā ʼana aga ʼaē ʼe kovi, mo kai tona kakano, pea mo “natou tutu anai ia ia.” Pea ko te ʼu lotu hala ʼe fakaʼauha anai ʼo talu ai.—Lau ia Apokalipisi 17:16.

7. ʼE kamata feafeaʼi anai te ʼohofi ʼaē kā fai e “te manu fekai”?

⁷ ʼI te lea fakapolofetā Fakatohi-tapu ʼe toe hā ai pe kamata feafeaʼi anai te ʼohofi ʼaia. ʼE uga anai e Sehova te kau takitaki fakapolitike ke natou “fakahoko tana fakatuutuu,” peʼe ke natou fai te meʼa ʼaē ʼe ina loto kiai, ʼaē ko te fakaʼauha ʼo te fafine paomutu. (Apk. 17:17) ʼE mafola te ʼu tau pea mo lahi te ʼu fihifihia ʼi te mālamanei ʼuhi ko te ʼu lotu. Koia, ʼe lagi manatu te ʼu puleʼaga ʼe fua lelei anai kiā nātou mo kapau ʼe natou fakaʼauha te fafine fai feʼauʼaki. ʼI te temi ʼaē ʼe ʼohofi ai e te kau takitaki ia te fafine fai feʼauʼaki, ʼe ʼui pē anai nātou kua natou fakahoko tanatou fakatuʼutuʼu. Kae, ʼe ko te ʼAtua ʼaē ʼe ina fakaʼaogaʼi anai nātou moʼo fakaʼauha te ʼu lotu hala fuli. Koia, ʼe ʼohofi anai ʼe te tahi koga ʼo te mālama ʼa Satana ia te tahi koga ʼo tona mālama, pea ʼe mole feala anai kiā Satana ke ina tāʼofi te faʼahi ʼaia.—Mat. 12:25, 26.

ʼE ʼOHOFI TE HAHAʼI ʼA SEHOVA

8. Koteā te ʼohofi ʼa “Koke, i te fenua o Makoke”?

⁸ ʼI te ʼosi fakaʼauha ʼo te ʼu lotu hala, ʼe kei nofo pē anai te ʼu kaugana ʼa te ʼAtua ʼo “fimalie i onatou nofoaga” ʼaē ʼe “hala kaupa.” (Esk. 38:11, 14) Koteā ʼaē kā hoko anai ki te kūtuga ʼaia ʼaē ʼe tauhi kiā Sehova kae ʼe hagē ʼe mole honatou puipui? ʼE mahino ia ʼe ʼohofi anai nātou e te “hahai kaugamalie.” ʼE fakamatala te ʼaluʼaga ʼaia ʼi te Tohi-Tapu ko te ʼohofi ʼa “Koke, i te fenua o Makoke.” (Lau ia Esekiele 38:2, 15, 16.) ʼE tonu koa ke feafeaʼi kiā tātou te ʼohofi ʼaia?

9. (1) Koteā ʼaē ʼe maʼuhiga age maʼa he Kilisitiano? (2) Koteā ʼaē ʼe tonu ke tou fai ʼi te temi nei moʼo fakamālohi tatatou tui?

⁹ ʼE tou ʼiloʼi ʼe ʼohofi anai te hahaʼi ʼa te ʼAtua, kae ʼe mole tou tuʼania fau. Ko te fakatapuhā ʼo te huafa ʼo Sehova pea mo te fakatonuhia ʼo tana pule faʼitaliha ʼe maʼuhiga age ia kiā tātou ʼi hatatou maʼu te haofaki. ʼI te tohi ʼa Esekiele, neʼe ʼui tuʼa 60 tupu fēnei e Sehova: “E koutou iloi anai ko au ko [Sehova].” (Esk. 6:7) Kua tou fakaʼamu lā ke tou sio pe hoko feafeaʼi anai te koga maʼuhiga ʼaia ʼo te lea fakapolofetā ʼa Esekiele. ʼE tou tui papau “e iloi e [Sehova] te fakamauli o te u tagata maonioni mai te ahiahi.” (2 Pet. 2:9) Pea ʼe tou toe fia fai ia meʼa fuli moʼo fakamālohi tatatou tui ke feala hatatou taupau maʼu tatatou agatonu kiā Sehova, logolā te ʼu fihifihia ʼaē ʼe feala ke tou tau mo ia. Koteā ʼaē ʼe tonu ke tou fai? ʼE tonu ke tou faikole, mo ako mo metitāsio ki te Folafola ʼa te ʼAtua, pea mo tala te logo lelei ʼo te Puleʼaga ki te hahaʼi. ʼI tatatou fai te ʼu faʼahi ʼaia, ʼe tokoni mai anai ke mālohi tatatou ʼamanaki ki te maʼuli heʼegata. Ko te ʼamanaki ʼaia ʼe hagē anai ko “he taula” ʼe tokoni mai ke tou nofo agatonu ki te ʼAtua.—Hep. 6:19; Pes. 25:21.

ʼE TONU ANAI KE ʼILOʼI E TE ʼU PULEʼAGA PE KO AI IA SEHOVA

10, 11. ʼE kamata feafeaʼi anai ia Halamaketone? Koteā ʼaē kā hoko anai ʼi te temi ʼaia?

¹⁰ Koteā te ʼu ʼaluʼaga fakamataku ʼe hoko anai mokā ʼohofi ia te ʼu kaugana ʼa Sehova? ʼE fakaʼaogaʼi anai e Sehova ia Sesu pea mo ʼana kautau ʼi te lagi moʼo tokoni ki te hahaʼi ʼa te ʼAtua. (Apk. 19:11-16) ʼE hoko anai “te tau o te aho lahi o te Atua Mafimafi,” ʼaē ʼe higoa ko Alamaketone, peʼe ko Halamaketone.—Apk. 16:14, 16.

¹¹ Neʼe ʼui fēnei e Sehova ʼo ʼuhiga mo te tauʼi ʼaia ʼo Koke: “E au kalagai anai te heleta kia Koke i oku mouga fuli, e ui e te Aliki, [ia Sehova]; e maliu anai te heleta a te tagata ki tona tehina.” Ko nātou ʼaē ʼe kau kiā Satana ʼe mole kei natou ʼiloʼi anai he meʼa ke natou fai mo mātataku, pea mo natou kamata fematematehiʼaki anai. Neʼe ʼui fēnei e Sehova: “E au fakato anai te afi pea mo te sufele kia [Koke] pea mo ana kau solia katoa pea mo te hahai kaugamalie ae e kau mo ia.” (Esk. 38:21, 22) ʼE iku anai ki teā te faʼahi ʼaia ʼaē kā fai anai e te ʼAtua?

12. Koteā ʼaē ʼe tonu anai ke fai e te ʼu puleʼaga?

¹² ʼE tonu anai ke ʼiloʼi e te ʼu puleʼaga ʼe fakaʼauha anai nātou koteʼuhi he neʼe fakatotonu e Sehova. Pea ko te hahaʼi ʼaē ʼe kau kiā Satana ʼe lagi natou kalaga fēnei anai ohagē ko te kau Esipito ʼo te temi muʼa, ʼaē neʼe natou tuli te kau Iselaele ʼi te Tai Kula: “Kua kau [ia Sehova] mo ia o tau ki te kau Esipito”! (Eke. 14:25) ʼE tonu anai ki te ʼu puleʼaga ke natou ʼiloʼi pe ko ai ia Sehova. (Lau ia Esekiele 38:23.) Kua vave kamata koa te ʼu ʼaluʼaga ʼaia?

ʼE MOLE TOE ʼI AI ANAI HE TAHI AGE MĀLOHI FAKAMĀLAMANEI

13. Koteā ʼaē ʼe tou ʼiloʼi ʼo ʼuhiga mo te nima koga ʼo te fakatātā ʼaē neʼe fakamatala e Taniela?

¹³ Ko te lea fakapolofetā ʼo te tohi ʼa Taniela ʼe tokoni mai ke tou mahino ki te temi ʼaē ʼe tou māʼuʼuli ai. ʼE fakamatala ai e Taniela ia he fakatātā ʼe hagē ko he tagata pea neʼe faʼu ʼaki te ʼu ukamea kehekehe. (Tan. 2:28, 31-33) ʼE fakaʼuhiga ki te ʼu mālohi fakamālamanei ʼaē neʼe natou tauʼi te hahaʼi ʼa te ʼAtua, ʼi te temi muʼa pea mo te temi ʼaenī. ʼE kau kiai ia Papilone, Meti mo Pelesi, Keleka pea mo Loma. Pea ko te mālohi fakamālamanei fakamuli ʼe kei lolotoga tuʼu nei. ʼAki te lea fakapolofetā ʼa Taniela, ʼe tou ako ai ko te ʼu ʼuluʼulu vaʼe pea mo te ʼu kauʼi vaʼe ʼo te fakatātā ʼe fakaʼuhiga ki te mālohi fakamālamanei ʼaia. Lolotoga te ʼUluaki Tau Fakamālamanei, neʼe kamata gāue fakatahi leva ia Pilitānia mo Amelika ʼi hona ʼaluʼaga makehe. Koia ko te nima koga ʼo te fakatātā ʼaē neʼe fakamatala e Taniela ʼe ko te Mālohi Fakamālamanei ʼo Pilitānia mo Amelika. Ko te ʼu ʼuluʼulu vaʼe ʼe ko te koga fakaʼosi ʼaia ʼo te fakatātā. ʼE hā mai ai ʼe mole toe ʼi ai anai he tahi age mālohi fakamālamanei ʼe hoa kiai. Ko te ʼu ʼuluʼulu vaʼe pea mo te ʼu kauʼi vaʼe ʼe faʼu ʼaki te ukamea pea mo te kele. Ko te faʼahiga faʼu ʼaia e ina fakatā te vaivai ʼo te Mālohi Fakamālamanei ʼo Pilitānia mo Amelika.

14. Ko te mālohi fakamālamanei fea ʼaē ʼe lolotoga tuʼu anai mokā hoko mai ia Halamaketone?

¹⁴ ʼI te lea fakapolofetā ʼaia, ko te Puleʼaga ʼo te ʼAtua ʼe ina fakatā he foʼi maka neʼe mataʼaki mai he moʼuga ʼi te taʼu 1914. Ko te moʼuga ʼe ina fakatā te pule faʼitaliha ʼo Sehova, peʼe ko tona ʼuhiga pule. Kua tau ovi pē te haga ʼo te foʼi maka ʼaia ʼo tāʼi te ʼu ʼuluʼulu vaʼe ʼo te fakatātā. ʼI Halamaketone, ʼe laliki anai te ʼu ʼuluʼulu vaʼe pea mo te toega ʼo te fakatātā. (Lau ia Taniela 2:44, 45.) Koia ko te Mālohi Fakamālamanei ʼo Pilitānia mo Amelika ʼe lolotoga tuʼu anai ʼi te temi ʼaē kā hoko ai anai ia Halamaketone. ʼE ko he meʼa fakatupu fiafia anai hatatou sio ki te fakahoko ʼo te lea fakapolofetā ʼaia!b Kae koteā ʼaē kā fai anai e Sehova kiā Satana?

KOTEĀ ANAI ʼAĒ KĀ HOKO KI TE FILI LAHI ʼO TE ʼATUA?

15. ʼI te hili ʼo Halamaketone, koteā ʼaē kā hoko anai kiā Satana pea mo ʼana kau temonio?

¹⁵ ʼUluaki, ʼe sio anai ia Satana ki te fakaʼauha kātoa ʼo tana kautahi ʼaē ʼi te kele. Pea ʼe hoko anai he meʼa kiā Satana totonu. ʼE fakamatala mai e te ʼapositolo ko Soane pe koteā te faʼahi ʼaia. (Lau ia Apokalipisi 20:1-3.) “E hifo mai te lagi he aselo, ae nee ina too te kalavi o te vanu.” Ko te ʼāselo ʼaia ʼe ko Sesu Kilisito, ʼaē kā ina lī anai ia Satana mo ʼana kau temonio ki te vanu pea mo pilisoniʼi nātou lolotoga taʼu e afe. (Luka 8:30, 31; 1 Soa. 3:8) ʼE ko te kamataʼaga ʼaia ʼo te malamalaki ʼo te ʼulu ʼo te gata.c—Sen. 3:15.

16. Koteā te fakaʼuhiga anai ʼo te lī ʼaē ʼo Satana ki “te vanu”?

¹⁶ Koteā ia “te vanu” ʼaē kā lī anai kiai ia Satana pea mo ʼana kau temonio? Ko te kupu ʼaia ʼe ko tona fakaʼuhiga ʼe loloto ʼaupitō, peʼe ko he luo ʼe mole hona takele. Koia, ko te vanu ʼaia ʼe mole feala ki he tahi ke ʼalu kiai, gata pē kiā Sehova pea mo tana ʼāselo ʼaē ʼe ina maʼu “te kalavi o te vanu.” ʼE pilisoniʼi anai ia Satana ʼi ai “ke aua naa ina toe kakaai te atu puleaga.” ʼE ʼui ʼi te Tohi-Tapu ʼe hagē ia Satana ko “he laione gugulu.” Kae ʼi te loto vanu, ʼe nofo fakalogologo anai.—1 Pet. 5:8.

TE ʼU ʼALUʼAGA ʼAĒ KĀ HOKO ʼI MUʼA ʼO TE TEMI TOKALELEI

17, 18. (1) Ko te ʼu ʼaluʼaga fea ʼaē neʼe tou talanoa kiai kae ʼe heʼeki hoko? (2) Koteā ʼaē kā kamata anai hili pē te hoko ʼo te ʼu ʼaluʼaga ʼaia?

¹⁷ ʼE ʼi ai te ʼu ʼaluʼaga maʼuhiga pea mo fakamataku kā vave hoko anai. Kua tou fakaʼamu lā ke tou sio pe hoko feafeaʼi anai te ʼui ʼaē “Tokalelei mo fimalie!” Pea ʼe tou sio anai ki te fakaʼauha ʼo Papilone Lahi, te ʼohofi ʼa Koke ʼo Makoke, pea mo te tau ʼo Halamaketone. ʼE lī anai ia Satana pea mo ʼana kau temonio ki te vanu. Hili te ʼu ʼaluʼaga ʼaia, ʼe mole toe ʼi ai anai he agakovi. Ko totatou maʼuli ʼe fetogi lahi anai lolotoga te ʼAfio ʼa Kilisito Iā Taʼu e Afe. Lolotoga te temi ʼaia, e tou fiafia anai ʼi te mahu ʼo “te tokalelei.”—Pes. 37:10, 11.

¹⁸ ʼI te ʼalatike ʼaenī, neʼe tou ako ai ʼo ʼuhiga mo faʼahi e nima “e mole sio ki ai te u mata,” peʼe ko he ʼu ʼaluʼaga ʼe heʼeki hoko. ʼE toe ʼi ai mo ʼihi “mea e mole sio ki ai te u mata” ʼe ʼaoga ke tou haga sio kiai. ʼE talanoa anai te ʼalatike ʼaē kā hoa mai ki te ʼu ʼaluʼaga ʼaia.

[ʼU nota]

[Talanoa/Palalau ʼo te pāsina 9]

TE ʼU ʼALUʼAGA E NIMA KĀ HOKO ANAI:

1 Te ʼui ʼaē ʼa te kau takitaki ʼo te mālamanei “Tokalelei mo fimalie!”

2 Te ʼohofi mo te fakaʼauha ʼo “Papilone lahi” e te ʼu puleʼaga

3 Te ʼohofi ʼo te hahaʼi ʼa Sehova

4 Te tau ʼo Halamaketone

5 Te lī ʼo Satana mo ʼana kau temonio ki te vanu e Kilisito