Neʼe Tapuakiʼi Au ʼUhi Ko Taku Talagafua Kia Sehova

ʼE KEI au manatuʼi ia te aluʼaga ʼaia ʼo ʼuhiga mo taku tamai, neʼe ko he tagata masiva pea mo faʼa gaue. Neʼe ko he tagata faitotonu ko te tupuʼaga la ʼaia ʼo tana foimo tali ai ia te logo Fakatohi-tapu ʼi te temi pe ʼae neʼe logo ai ki ai ʼi te taʼu 1953. Talu mai ai, neʼe faiga malohi ke ina akoʼi matou ko ʼana fanau ia te ʼu meʼa ʼae neʼe ina ako. ʼI te kamata, neʼe mole fia mavae taku faʼe mai te Lotu Katolika. Kaʼe ʼaki te alu ʼo te temi, neʼe ina tali leva ia te ʼu akonaki Fakatohi-tapu.

Neʼe faigataʼa ki ʼaku matuʼā ia tanā akoʼi matou, koteʼuhi neʼe mole poto ia tamatou faʼe ʼi te lautohi pea neʼe gaue kinakina ia tamatou tamai ʼi te gaueʼaga. ʼI ʼihi temi, neʼe tulemoe ʼi te lolotoga ʼo tana fai ako ʼuhi ko te lahi fau ʼo tona gaʼegaʼe. Kaʼe neʼe mole vaʼiganoa ʼana faiga. Mai tona aluʼaga ʼae ko au ʼae neʼe muʼa ʼi te fanau, neʼe au tokoni ki te akoʼi ʼo toku kiʼi tehina pea mo ʼoku kiʼi tokolua ʼe toko lua. Neʼe au akoʼi age ia te manatu ʼae neʼe talanoa tuʼumaʼu ki ai tamatou tamai ʼo ʼuhiga mo te ʼofa ʼo Noe ki tona famili, ʼae neʼe ha ʼi tana talagafua ki te ʼAtua. Neʼe au leleiʼia ʼosi ia te fakamatala Fakatohi-tapu ʼaia. Pea mole faʼa fualoa ki ai, neʼe matou kau fuli ki te ʼu fono ʼi te Fale Fono ʼo Roseto degli Abruzzi, ko he kolo ʼi Italia ʼe tuʼu ovi ki te tai ʼo Adriatique.

ʼI te taʼu 1955, neʼe kei au taʼu 11 ʼi te temi ʼae neʼe au fakalaka ai mo taku faʼe ʼi te ʼu moʼuga ke feala hamā kau ki tamā ʼuluaki fakatahi lahi ʼi Loma. Talu mai te temi ʼaia, neʼe au fakamaʼuhigaʼi ia te ʼu fakatahi lalahi ʼi toku maʼuli Fakakilisitiano.

ʼI te taʼu ʼae neʼe hoa mai ki ai, neʼe au papitema ai pea mole faʼa fualoa ki ai neʼe au kamata pionie katoa. ʼI toku taʼu 17, neʼe au liliu ai ʼo pionie makehe ʼi te kolo ko Latina, ʼe tuʼu ʼi te potu saute ʼo Loma, ʼe vaha mo tomatou ʼapi ia kilometa ʼe 300. Koteʼuhi ʼae neʼe ko he kolo foʼou, neʼe mole feiloʼiʼaki ia te hahaʼi pea neʼe mole natou ufiufi ʼi te toʼo ʼo te ʼu tohi. Koia neʼe au fiafia ai mo toku tahi kiʼi tehina pionie ʼi te lahi ʼo tamā tufa ia te ʼu tohi Fakatohi-tapu. Kaʼe ʼi taku kei tupulaga, neʼe au manatuʼi toku famili. Kaʼe neʼe au fia hoko atu pe ia te fakatuʼutuʼu ʼae neʼe au fai.

Neʼe fekauʼi au ki Milan ke au tokoni ki te teuteuʼi ʼo te Fakatahi Fakamalamanei ʼo te taʼu 1963, ʼae ko tona kupu tafitō: “Te Logo Lelei ʼe Heʼe Gata.” Neʼe au kau mo te tuagaʼane tupulaga ko Paolo Piccioli, mai Florence ki te kau gaue ʼo te fakatahi. ʼI te lua ʼaho ʼo te fakatahi, neʼe ina fai ia te akonaki ʼo ʼuhiga mo te nofo selipatea. ʼE au manatuʼi ʼi taku ui fenei: “ ʼE mahino ia, ʼe mole lagi ʼohoana anai ia te tuagaʼane ʼaeni ʼi he ʼaho.” Kaʼe neʼe ma kamata fefaitohiʼaki pea neʼe mahino ia, neʼe lahi te ʼu aluʼaga neʼe tatau ai ʼama manatu, ohage la ko ʼama fakatuʼutuʼu, toma ʼofa ʼae kia Sehova pea mo tamā lotomalohi ʼae ke ma talagafua kia te ia. Neʼe ma ʼohoana leva ʼi te taʼu 1965.

TE ʼU FAIPALALAU MO TE KAU TAKITAKI LOTU

Neʼe au pionie katoa ʼi Florence lolotoga taʼu ʼe hogofulu. Neʼe au fiafia ʼi taku sio ʼae ki te tuputupu ʼo te ʼu kokelekasio, kaʼe tafitō ia te tuputupu ʼa te kau tupulaga ʼi te faʼahi fakalaumalie. Neʼe ma fiafia ʼi tamā faipalalau mo natou ki te ʼu meʼa fakalaumalie pea mo fakafiafia mo natou ʼaki he kiʼi aka fitipolo. ʼE mahino ia, neʼe au fakaʼamu ke lahi age ia te temi ʼae ke au fakatahi ai mo toku ʼohoana, kaʼe neʼe au sio ki te fua lelei ʼo tana tokaga lelei pea mo tana fakaʼaogaʼi ia tona temi ki te kau tupulaga pea mo te ʼu famili ʼo te kokelekasio.

ʼE ko he aluʼaga fakafiafia ia taku manatuʼi ia te ʼu tuʼuga ako Tohi-Tapu ʼae neʼe ma fai. Neʼe au fai ia te ako ʼa Adriana, ʼae neʼe palalau ki te ʼu famili ʼe lua ʼo ʼuhiga mo te ʼu meʼa ʼae neʼe ina ako. Neʼe natou fakatuʼutuʼu ia he fono mo he patele ke matou faipalalau ai ʼo ʼuhiga mo te ʼu akonaki ʼo te Tahitolutapu pea mo te nefesi tuputupua. Neʼe ʼomai ia patele ʼe toko tolu ki te fono ʼaia. Neʼe mahino gataʼa ʼanatou fakamahino pea neʼe mole tasilo, koia neʼe tokagaʼi ai e ʼamatou kau ako ʼe mahino gafua age pe ia te ʼu akonaki Fakatohi-tapu. Neʼe fua lelei ia te fono ʼaia koteʼuhi ki muli age, neʼe liliu ia te toko 15 ʼo te ʼu famili ʼaia ko he kau Fakamoʼoni.

ʼE moʼoni, ia ʼaho nei ʼe mole kei tatau ʼatatou faʼahiga faifakamafola. ʼI te temi ʼaia, neʼe faiva ia Paolo ʼi te faipalalau mo te kau takitaki lotu. Neʼe lahi te ʼu aluʼaga feia neʼe hoko. ʼE au manatuʼi te tahi aluʼaga neʼe hoko ʼi te fono mo te hahaʼi. ʼE mahino ia, neʼe fakatuʼutuʼu fakatomuʼa e te kau fakafeagai ke fai e ʼihi ʼi te nofoʼaki he ʼu fehuʼi fakakaka. Kaʼe neʼe hoko ai te aluʼaga fakapunamaʼuli. Neʼe ʼi ai te tahi neʼe ina fai te fehuʼi ʼae pe ʼe tonu koa ke fai politike ia te kau takitaki lotu ohage ko tona fai talu mai fualoa. ʼI te temi ʼaia neʼe ufiufi ai te kau patele. Kaʼe neʼe matehi fakapunamaʼuli ia te hila pea neʼe vete ai te fono. Hili ki ai ni taʼu, neʼe matou iloʼi ai neʼe natou fakatuʼutuʼu ke matehi ia te hila mo kapau ʼe mole natou leleiʼia te fono.

TE ʼU FAʼAHIGA SELEVISI FOʼOU

Hili taʼu ʼe hogofulu ki tamā ʼosi ʼohoana, neʼe fakaafe toku ʼohoana ke liliu ko he taupau ʼo te siliko. Neʼe faigataʼa ia te toʼo ʼo he tonu koteʼuhi neʼe lelei te gaue ʼa Paolo. Kaʼe ʼaki te faikole, neʼe ma tali ai te faʼahiga selevisi foʼou ʼaia. Neʼe ma fiafia ʼi te fakaʼaogaʼi ʼo toma temi ki te ʼu famili ʼae neʼe ma nonofo ai. ʼI te afiafi, neʼe matou tautau fai te ʼu ako fakakutuga pea neʼe tokoni ia Paolo ki te fai ʼo te ʼu meʼa ako ʼo ʼanatou fanau, tafitō la ia te fainumelo. Neʼe leleiʼia e Paolo te lautohi pea neʼe fiafia ʼi tana vaevae ia te ʼu manatu maʼuhiga pea mo fakalotomalohi ʼae neʼe ina lau. ʼI ʼihi Monite, neʼe ma olo ʼo faifakamafola ʼi te ʼu kolo ʼe mole nofo ai he Fakamoʼoni ʼo fakaafe te hahaʼi ki te akonaki ʼe fai ʼi te afiafi.

Hili taʼu ʼe lua ki tamā gaue fakasiliko, neʼe fakaafe maua ke ma gaue ʼi te Petele ʼo Loma. Neʼe gaue ia Paolo ʼi te selevisi ʼe tokaga ki te ʼu lao ʼo te fenua kaʼe neʼe fekauʼi au ki te selevisi ʼe tokaga ki te ʼu nusipepa. Neʼe mole faigafua ia te fai ʼo te ʼu fetogi ʼaia kaʼe neʼe ma fakatotonu ke ma talagafua. Neʼe ma fiafia ʼi tamā sisio ʼae ki te tuputupu ʼo te gaue ʼo te filiale pea mo te kauga malie ʼo te ʼu tehina mo tuagaʼane ʼi Italia. Lolotoga te temi ʼaia, neʼe fakagafua e te puleʼaga ia te gaue ʼa te kau Fakamoʼoni ʼa Sehova ʼi Italia. ʼE mahino ia, neʼe ma fiafia ʼi te selevisi ʼaia.

ʼI tamā gaue ʼi te Petele, neʼe kamata iloʼi e te hahaʼi tamatou manatu ʼo ʼuhiga mo te fakaʼaogaʼi ʼo te toto. ʼI te ʼu taʼu 1980, neʼe ʼi ai te aluʼaga neʼe hoko neʼe fakatupu tokakovi. Neʼe tukugakoviʼi ia te taumatuʼa ʼi te kau Fakamoʼoni ʼuhi ko te mate ʼo tanā taʼahine, logo la neʼe mate ʼuhi ko te mahaki ʼo te toto ʼe tautau maʼu e te hahaʼi ʼe maʼuʼuli ʼi te potu Metitelanea. Neʼe lagolago ia te ʼu tehina mo tuagaʼane ʼo te Petele ki te ʼu avoka ʼae neʼe natou fakafofoga ia te taumatuʼa Kilisitiano ʼaia. Neʼe ta ia te pepa lotu pea mo te nusipepa ʼe talanoa tafitō ki te aluʼaga ʼaia moʼo tokoni ki te hahaʼi ke natou mahino katoa ki te manatu ʼa te Folafola ʼa te ʼAtua ʼo ʼuhiga mo te fakaʼaogaʼi ʼo te toto. Lolotoga te ʼu mahina ʼaia, neʼe tautau gaue ia Paolo lolotoga ni hola ʼe 16 ʼi te ʼaho. Neʼe au lagolago malohi ki ʼana faiga.

HE TAHI FETOGI ʼI TOMA MAʼULI

Hili taʼu ʼe 20 ki tamā ʼosi ʼohoana, neʼe hoko te aluʼaga fakapunamaʼuli. ʼI toku taʼu 41 kaʼe neʼe taʼu 49 ia Paolo, neʼe au fakaha age ki ai ʼe lagi kua au faitama. Neʼe au lau te ʼu palalau ʼaeni neʼe ina tohi ʼi tana kaupepa ʼi te ʼaho pe ʼaia: “Faikole: Kapau ʼe moʼoni, tokoni mai ke ma nonofo ʼi te selevisi temi katoa ke ʼaua naʼa ma vaivai ʼi te faʼahi fakalaumalie pea ke ma liliu ko he faʼifaʼitakiʼaga lelei ʼi toma ʼuhiga matuʼā. Kaʼe tafitō tokoni mai ke au maʼuliʼi ia he kiʼi faʼahi pe ʼo te ʼu tokoni ʼae neʼe au akonakiʼi lolotoga te ʼu taʼu ʼe 30 kua hili atu.” ʼE mahino ia, neʼe tali e Sehova ʼama faikole.

Neʼe lahi te ʼu fetogi neʼe hoko ʼi toma maʼuli ʼi te tupu ʼa Ilaria. ʼE moʼoni, neʼe ʼi ai te ʼu temi neʼe ma lotovaivai ai, ohage pe ko tona ui fenei ia Taaga Lea 24:10: “Kapau e ke vaivai i te aho o te mamahi, ko tou malohi e veliveli pe.” Kaʼe neʼe ma felagolagoʼaki ʼo ma manatuʼi te maʼuhiga ʼae ʼo te fefakalotomalohiʼaki.

ʼE tautau fakaha e Ilaria tana fiafia koteʼuhi ko ʼana matuʼā neʼe ko he ʼu Fakamoʼoni ʼa Sehova ʼe maʼumaʼua ʼi te selevisi temi katoa. Neʼe mole ina logoʼi ʼi he temi neʼe tuku keheʼi, neʼe lahilahi ake ʼi he famili ʼe mole hona kehekehe mo te ʼu famili fuli. Neʼe au nofo mo ia ʼi te ʼaho fuli. Pea ʼi te afiafi, ʼi te temi neʼe tau mai ai ia Paolo ki fale ʼi tana ʼosi gaue, neʼe ina toʼo he kiʼi temi ke gaoʼi mo ia pea mo tokoni ki ai ki te fai ʼo ʼana meʼa ako. Pea neʼe ina fai te faʼahi ʼaia tatau aipe pe ʼe tonu ke gaue ʼo aʼu ki te hola lua peʼe ko te hola tolu mafoata moʼo fakaʼosi ia tana gaue. Neʼe tautau ui fenei e Ilaria: “ ʼE makehe ʼaku felogoʼi mo taku tamai.”

ʼE mahino ia, neʼe ʼaoga ke ma fakapotopoto pea ʼi ʼihi temi ke ma palalau fakahagatonu moʼo tokoni kia Ilaria ke nofo ʼi te moʼoni. ʼE au manatuʼi te aluʼaga neʼe hoko ʼi tana gaoʼi mo tona kiʼi kaumeʼa pea neʼe agakovi ki ai. Neʼe ma fakamahino age ki ai ʼaki te Tohi-Tapu pe ko ʼe ʼe mole tonu ke ina fai ia te taʼi aga ʼaia. Pea neʼe ma fakatotonu age ki ai ke alu ʼo faifakalelei ki tona kiʼi kaumeʼa kaʼe ma sisio.

ʼE tautau ui e Ilaria ʼe fiafia ʼi te leleiʼia e ʼana matuʼā ia te gaue fakaminisitelio. ʼI te temi leva ʼaeni kua ʼohoana ai, kua mahino lelei ki te maʼuhiga ʼae ʼo te talagafua kia Sehova pea mo te mulimuli ki tana takitaki.

NEʼE KEI AU TALAGAFUA LOGO LA TAKU LOTOMAMAHI

ʼI te taʼu 2008, neʼe fakaha age kia Paolo ʼe kau ʼi te kōsea. ʼI te kamata neʼe ui e Paolo ʼe feala ke faitoʼo tona mahaki pea neʼe ina fakalotomalohiʼi au. Neʼe mole gata ʼaki pe tamā kumi he faitoʼo ʼe lelei kaʼe neʼe ma faikole mo Ilaria kia Sehova ʼo kole ki ai ia tana tokoni moʼo tauʼi ia te ʼu fihifihia ʼo te temi ka hoko mai. Neʼe ko he tagata neʼe malohi ʼi te ʼu temi ki muʼa atu pea kua liliu ʼo vaivai. Neʼe ko he aluʼaga fakaʼofaʼofa tana mate ʼi te taʼu 2010. ʼE ko he fakalotofimalie ia taku manatuʼi te ʼu gaue fuli neʼe ma fakahoko fakatahi lolotoga te ʼu taʼu ʼe 45 ʼaeni kua hili atu. Neʼe ma gaue fakamalotoloto kia Sehova. Pea ʼe au iloʼi ʼe maʼuhiga ʼo heʼe gata ʼama gaue. ʼE au fakaʼamu ʼe au toe sio anai kia Paolo ʼi te fakatuʼu ake ohage ko tona ui e Sesu ia Soane 5:28, 29.

Logope la kua au finematuʼa ʼi te temi nei kaʼe ʼe kei au leleiʼia pe te hisitolia ʼo Noe. Neʼe heʼeki fetogi taku fakatuʼutuʼu ʼae ke au talagafua kia Sehova tatau aipe pe ʼe kotea ʼae ʼe tonu ke au fai. ʼE au tui papau ʼe lahi age te ʼu tapuakina taulekaleka ʼae ʼe foaki mai e totatou ʼAtua ʼofa ʼi te ʼu fihifihia peʼe ko te ʼu sakilifisio fuli ʼe tou fakalaka ai. Neʼe au maʼuliʼi te ʼu aluʼaga fuli ʼaia, koia ʼe au fakamoʼoni ai, ʼe ʼi ai tona ʼuhiga moʼoni.