Ke Ke Fai He ʼu Tonu ʼe Fakapotopoto ʼi Tau Kei Tupulaga

1. Kotea ni aluʼaga fakafiafia ʼe hoko ki te tokolahi ʼo te kau tupulaga?

ʼE TOU lolotoga maʼuʼuli nei ʼi te ʼu temi makehe. Ko te hoki fakatahitahi ʼae ʼo te toko lau ʼi miliona hahaʼi mai te ʼu puleʼaga kehekehe ke natou tauhi kia Sehova. (Apk. 7:9, 10) ʼE hoko ki te tokolahi ʼo te kau tupulaga ni aluʼaga fakafiafia ʼi tanatou fakaafe te hahaʼi ke natou ‘toʼo noa te vai ʼo te maʼuli.’ (Apk. 22:17) ʼE tokoni ia te kau tupulaga ʼaia ki te hahaʼi ke natou ako ia te Tohi-Tapu pea mo fetogi tonatou maʼuli ke lelei age. Ko ʼihi atu, ʼe natou lotolelei ke natou ako he tahi age lea ke feala hanatou faifakamafola ʼi he tahi telituale ʼe lea matapule. (Pes. 110:3; Esa. 52:7) Kotea ʼae ʼe tonu ke ke fai ke feala ai hau kau ki te gaue fakafiafia ʼaia?

2. ʼE ha feafeaʼi ʼi te faʼifaʼitaki ʼo Timoteo ʼe loto e Sehova ke foaki ki te kau tupulaga he ʼu pilivilesio? (Vakaʼi te ʼuluaki pakī.)

² ʼE feala ke ke fai he ʼu tonu ʼi te temi nei ʼe ina fakafealagia ki ʼamuli ke ke gaue maʼa Sehova. Ohage la, neʼe toʼo e Timoteo ia te ʼu tonu ʼe lelei pea ʼi tona teitei taʼu 20, neʼe liliu ai ko he misionea. (Gaue 16:1-3) Hili pe ki ai ni mahina, pea neʼe kole age e Paulo kia Timoteo ke toe liliu ki te kokelekasio foʼou ʼo Tesalonika, ʼae neʼe fakatagaʼi ai te ʼu tehina mo tuagaʼane. Neʼe maʼua ke mavae ia Paulo mai te kolo ʼaia, kaʼe neʼe falala ia ʼe feala anai ke fakalotomalohiʼi e Timoteo ia te kokelekasio. (Gaue 17:5-15; 1 Tes. 3:1, 2, 6) Ke ke fakakaukauʼi age muʼa ia te toe fiafia ʼa Timoteo ʼi te foaki age ʼo te pilivilesio ʼaia.

TE TONU ʼAE ʼE MAʼUHIGA ʼAUPITO ʼI TOU MAʼULI

3. Kotea ia te tonu ʼae ʼe maʼuhiga tafitō ʼi tou maʼuli? Pea ko te temi fea ʼae ʼe tonu ke ke toʼo ai ia te tonu ʼaia?

³ ʼE ko te temi nei, ʼi tau kei tupulaga ʼae ʼe tonu ke ke toʼo ai ia te ʼu tonu ʼae ʼe maʼuhiga. Ko te tonu ʼae ʼe maʼuhiga tafitō, ʼe ko tau iloʼi peʼe ke tauhi anai kia Sehova peʼe kailoa. ʼE kole atu e Sehova ke ke manatuʼi ia ia ʼi tou temi tupulaga. (Ekl. 12:3) Pea ʼe feala tau manatuʼi ia Sehova mo kapau ʼe ke tauhi kia te ia ʼaki tou loto katoa. (Tet. 10:12) Ko te tonu pe ʼaia ʼe tahi ʼe maʼuhiga tafitō ʼi tou maʼuli. ʼE fakalogo ia tou ka haʼu ki te tonu ʼaia.—Pes. 71:5.

4. Kotea ia te ʼu tonu maʼuhiga ʼe feala ke ʼi ai tona fua ki tau tauhi ʼae ki te ʼAtua?

⁴ ʼE moʼoni, ʼe mole ko te tonu pe ʼaia ʼe tahi ʼe tonu ke ke toʼo ʼo ʼuhiga mo tou ka haʼu. Ohage la ʼe tonu ke ke fakakaukauʼi pe ke ʼohoana anai peʼe kailoa. Pea kapau koia, ko ai ʼae ʼe ke ʼohoanaʼi anai, pea ko te gaue fea ʼae ʼe ke filifili anai. ʼE maʼuhiga ʼaupito te ʼu tonu ʼaia, kaʼe ʼe tonu muʼa ke ke toʼo ia te tonu ʼae ke ke tauhi kia Sehova ʼaki tou loto katoa. (Tet. 30:19, 20) Kotea tona tupuʼaga? Koteʼuhi ko te ʼu tonu fuli ʼaia ʼe ʼi ai tona pikipikiga. Ohage la, ko te tonu ʼae ka ke toʼo anai ʼo ʼuhiga mo te nofo ʼohoana peʼe ko te gaue ʼe ʼi ai anai tona fua ki tau tauhi ʼae ki te ʼAtua. Pea ko tau fia tauhi ʼae ki te ʼAtua, ʼe feala ke ina uga koe ke ke toʼo ia te ʼu tonu ʼae ʼe lelei ʼo ʼuhiga mo te ʼu aluʼaga ʼaia. (Vakaʼi ia Luka 14:16-20.) Koia ʼe lelei ke ke iloʼi pe kotea ʼae ʼe maʼuhiga tafitō ʼi tou maʼuli.—Filp. 1:10.

KOTEA ʼAE KA KE FAI ʼI TOU TEMI TUPULAGA?

5, 6. ʼAki te faʼifaʼitaki ʼo Yuichiro, ʼe ha feafeaʼi mai ʼe lahi te ʼu faigamalie ke tou tauhi kia Sehova mo kapau ʼe tou toʼo he ʼu tonu ʼe lelei? (Vakaʼi te alatike “Neʼe Au Fai He Tonu Maʼuhiga ʼi Taku Kei Veliveli” ʼi te nusipepa ʼaeni.)

⁵ Toʼo te tonu ʼae ke ke tauhi kia Sehova, faigaʼi ke ke iloʼi pe kotea ʼae ʼe ina loto ke ke fai, ʼosi ʼaia pea ke fakatuʼutuʼu pe ʼe feafeaʼi anai tou maʼuli. ʼE tohi fenei e te tehina ʼi Saponia: “ ʼI taku kei taʼu 14, neʼe au faifakamafola mo te tagata ʼafeā ʼo te kokelekasio, neʼe ina tokagaʼi taku mole kei fiafia ʼi te minisitelio. Neʼe ina ui fenei mai ʼaki he agalelei: ‘Sio mai Yuichiro, ʼe lagi lelei ke tā fakagata he, kaʼe ke alu ʼo fakakaukauʼi fakalelei pe kotea ʼae neʼe fai e Sehova maʼa koe.’ Neʼe au fai ia te meʼa ʼae neʼe ina ui mai. Neʼe au fakakaukauʼi pea mo faikole lolotoga ni ʼaho. Neʼe au fetogi mamalie taku faʼahiga manatu. Mole faʼa fualoa ki ai, neʼe au tokagaʼi toku fiafia ʼi taku tauhi ʼae kia Sehova. Neʼe au leleiʼia ia te lau ʼo te ʼu fakamatala ʼo ʼuhiga mo te kau misionea, pea neʼe au manatu ke lahi age taku gaue maʼa Sehova.”

⁶ Neʼe kamata fai e Yuichiro he ʼu tonu ʼe lelei. Koia neʼe feala ai leva ke alu ʼo faifakamafola ʼi te tahi age fenua. Neʼe ina ui fenei: “Neʼe au kamata ako ia te lea Fakapilitania. ʼI te ʼosi ʼo toku temi ako, neʼe au filifili he kiʼi gaue faiako ʼi te lea Fakapilitania ke feala ai haku liliu ʼo pionie. ʼI toku taʼu 20, neʼe au kamata ako ia te lea ʼa te kau Mongole pea mo ʼaʼahi te kiʼi kutuga faifakamafola ʼe palalau ʼi te lea ʼaia. Hili ki ai taʼu ʼe lua, ʼi te taʼu 2007, neʼe au faifolau ki Mongolie. ʼI taku faifakamafola mo ʼihi kau pionie, pea mo tokagaʼi ʼe tokolahi te hahaʼi ʼe natou kumi te moʼoni, neʼe au fia maʼuli ʼi te koga meʼa ʼaia pea mo tokoni kia natou. Neʼe au toe liliu ki Saponia ʼo teuteuʼi ia te faʼahi ʼaia. Talu mai te mahina ʼo Apelili 2008 mo taku pionie ʼi Mongolie. ʼE mole faigafua ia te maʼuli ʼi te fenua ʼaia. Kaʼe ʼe tali lelei e te hahaʼi ia te logo lelei pea ʼe feala haku tokoni ke natou fakaovi kia Sehova. ʼE au iloʼi papau neʼe au filifili ia te faʼahiga maʼuli ʼae ʼe lelei tokotahi.”

7. Kotea te ʼu tonu ʼae ʼe tonu ke ke fai, pea kotea te ako ʼe feala ke tou maʼu mai te faʼifaʼitaki ʼo Moisese?

⁷ ʼE tonu ke ke fai e koe ia te ʼu tonu ʼo ʼuhiga mo te ʼu gaue ʼae ka ke fai maʼa Sehova. (Sos. 24:15) ʼE mole feala ke matou ui atu pe ʼe tonu ke ke ʼohoana, pea mo ke ʼohoana mo ai. ʼE mole feala ke matou ui atu pe kotea te gaue ʼe tonu ke ke filifili. ʼE ke filifili anai koa he gaue ʼe fakamaʼua ki ai he kiʼi temi ako? Ko ʼihi ia koutou ʼe kotou maʼuʼuli ʼi he ʼu kolo masiva pea ko ʼihi atu ʼi he ʼu kolo koloaʼia. ʼE kehekehe tokotou ʼulugaaga, mo ʼokotou fealagia, mo te faʼahiga ako, mo te ʼu meʼa ʼae ʼe kotou leleiʼia pea mo ʼakotou fakatuʼutuʼu fakalaumalie. ʼE lagi kehekehe ʼokotou maʼuli ohage pe ko te kehekehe ʼo te maʼuli ʼo Moisese pea mo ʼae ʼo te kau tupulaga Hepeleo ʼi Esipito. ʼI tona ʼuhiga tama ʼo te fineʼaliki, neʼe maʼu koloa ia Moisese kaʼe maʼuli popula ia te kau tupulaga Hepeleo. (Eke. 1:13, 14; Gaue 7:21, 22) Neʼe natou maʼuʼuli ʼi te ʼu temi makehe ohage pe ko koe. (Eke. 19:4-6) Kaʼe neʼe tonu ke natou tahi filifili peʼe natou tauhi anai kia Sehova ʼaki tonatou loto katoa. Neʼe filifili e Moisese ke ina fai ia te finegalo ʼo Sehova.—Lau ia Hepeleo 11:24-27.

8. Kotea ʼae ʼe feala ke tokoni atu ke ke toʼo he ʼu tonu ʼe lelei?

⁸ ʼE foaki atu e Sehova he ʼu tokoni ke feala ke ke toʼo he ʼu tonu ʼe lelei. ʼE ina akoʼi atu he ʼu pelesepeto Fakatohi-tapu ʼe feala ke ke mulimuli ki ai ʼi te ʼu aluʼaga fuli ʼo tou maʼuli. (Pes. 32:8) Kapau ʼe mole ke iloʼi lelei te faʼahiga fakaʼaogaʼi ʼo te ʼu pelesepeto ʼaia, kumi tokoni ki ʼau matuʼā peʼe ko te kau tagata ʼafeā. (Taag. 1:8, 9) Tou vakaʼi he ʼu pelesepeto Fakatohi-tapu ʼe tolu ʼe feala ke tokoni atu ke ke toʼo he ʼu tonu ʼe lelei ʼi te temi nei.

KO PELESEPETO FAKATOHI-TAPU ʼE TOLU MOʼO TOKONI ATU

9. (1) ʼE fakamaʼuhigaʼi feafeaʼi tatou e Sehova ʼaki tana foaki mai ia te fealagia ʼae ke tou toʼo he ʼu tonu? (2) Kotea te ʼu faigamalie ʼe feala ke ke maʼu mo kapau ʼe ke ʼuluaki kumi muʼa te Puleʼaga?

⁹ Ke ke ʼuluaki kumi muʼa te Puleʼaga ʼo te ʼAtua pea mo tana faitotonu. (Lau ia Mateo 6:19-21, 24-26, 31-34.) ʼE fakamaʼuhigaʼi koe e Sehova ʼaki tana foaki atu ia te fealagia ʼae ke ke filifili peʼe ke fakaʼaogaʼi feafeaʼi anai tou temi. ʼE mole ina ui atu ke ke fakaʼaogaʼi fuli tou temi ki te faifakamafola. Kaʼe neʼe akoʼi mai e Sesu ia te maʼuhiga ʼae ke tou ʼuluaki kumi muʼa ia te Puleʼaga. Ka ke fakamuʼamuʼa ia te Puleʼaga, ʼe lahi anai ia te ʼu faigamalie ʼe feala ke ke maʼu. Ohage la, ʼe lahi ia te ʼu aluʼaga ʼe feala anai ke ke fakaha ai tou ʼofa kia Sehova pea mo tou tatau, pea mo fakaha ia tau loto fakafetaʼi ʼo ʼuhiga mo te ʼamanaki ki te maʼuli heʼe gata. ʼE ha anai koa ʼi te ʼu tonu ʼae ʼe ke toʼo ʼo ʼuhiga mo te nofo ʼohoana pea mo te gaue, ʼe ke fakamuʼamuʼa ia te ʼu koloa fakamalama kaʼe mole ke ʼuluaki kumi muʼa ia te Puleʼaga?

10. Kotea ʼae neʼe fiafia ai Sesu pea kotea ʼae ʼe tonu ke ke fai ke feala hau fiafia?

¹⁰ Ke ke fiafia ʼi tau tokoni ki ʼihi. (Lau ia Gaue 20:20, 21, 24, 35.) Neʼe iloʼi e Sesu te moʼoni ʼo te faʼahi ʼaia, koia neʼe tauhi ai ki tana Tamai ʼo fakahoko tona finegalo pea mo tokoni ki te hahaʼi ʼaki tana akoʼi age ia te logo lelei. Neʼe fiafia ʼuhi ko tana fai ia te faʼahi ʼaia. (Luka 10:21; Soa. 4:34) Neʼe lagi kua ke logoʼi ia te fiafia ʼaia ʼi tau tokoni ki ʼihi. Koia ʼe lelei ke ke mulimuli ki te ʼu pelesepeto ʼae neʼe akoʼi e Sesu moka ke toʼo he ʼu tonu. Kapau ʼe ke fai ia te faʼahi ʼaia, ʼe ke fiafia anai pea mo ke fakafiafiaʼi ia te loto ʼo Sehova.—Taag. 27:11.

11. He ko ʼe neʼe mole kei fiafia ia Paluke pea kotea te tokoni neʼe foaki age e Sehova?

¹¹ ʼE tou maʼu ia te fiafia moʼoni mai tatatou tauhi ʼae kia Sehova. (Taag. 16:20) Neʼe hage ia neʼe ʼi ai te temi neʼe mole kei fiafia ai ia Paluke, ia te sikalaipe ʼa Selemia. Neʼe kamata fakamuʼamuʼa e Paluke ia te ʼu meʼa ʼae neʼe loto ki ai kaʼe mole ko te meʼa ʼae neʼe loto ki ai ia Sehova. Neʼe tokagaʼi e Sehova ia te faʼahi ʼaia, koia neʼe ina ui age ai kia Paluke ke tuku tana kumi ni meʼa lalahi maʼa ia. Pea kapau ʼe fakalogo ki ai, ʼe hao anai mai te fakaʼauha ʼo Selusalemi. (Sel. 45:3, 5) Kotea ʼae neʼe feala ke fiafia ai ia Paluke? Ko tana fai ia te meʼa ʼae ʼe loto ki ai pea mo mate ai, peʼe ko tana fai ia te meʼa ʼae ʼe loto ki ai ia Sehova pea mo hao mai te fakaʼauha ʼo Selusalemi.—Sakp. 1:12.

12. Kotea te ʼu tonu neʼe toʼo e Ramiro pea neʼe fiafia ai?

¹² Neʼe fiafia ia te tehina ko Ramiro ʼi tana tokoni ki ʼihi. Neʼe ina ui fenei: “Neʼe au lahilahi ake ʼi he kiʼi famili ʼe masiva ʼi te kiʼi kolo ʼi te ʼu moʼuga ʼo Bolivie. Koia ʼi te ui mai e toku taʼokete ʼe ina totogi taku ako ʼi te univelesite, neʼe ko he faigamalie lahi ʼaia kia au. Kaʼe neʼe hoki au papitema age pe pea neʼe fakaafe au e he pionie ke ma kaugā olo ʼo faifakamafola ʼi he kiʼi kolo. Neʼe au alu ki te koga meʼa ʼaia, ʼo ako faikosi pea neʼe avahi ai toku fale faikosi moʼo totogi ʼaki te ʼu meʼa ʼae neʼe ʼaoga mai.” Tokolahi ʼi te kolo ʼaia neʼe natou tali ke natou ako ia Tohi-Tapu. Ki muli age, neʼe fakatuʼu ia te kokelekasio foʼou ʼe natou palalau ʼi he tahi lea ʼo te fenua, pea neʼe toe palalau ia Ramiro ʼi te lea ʼaia. Koia neʼe ina fakatuʼutuʼu ai ke kau ki te kokelekasio ʼaia pea kua taʼu hogofulu ia tana kau ki ai. Neʼe ina ui, ʼe mole he tahi age gaue ʼe feala ke ina maʼu ai ia he toe fiafia ʼi tana tokoni ʼae ki te hahaʼi ke natou ako ia te Tohi-Tapu ʼi tanatou lea.

13. He ko ʼe ʼe lelei ke ke tauhi kia Sehova ʼaki tou loto katoa ʼi te temi nei?

¹³ Ke ke fiafia ʼi te tauhi kia Sehova ʼi tau kei tupulaga. (Lau ia Ekelesiasi 12:3.) ʼAua naʼa ke manatu ke ke ʼuluaki maʼu muʼa hau gaue lelei pea hoki ke pionie leva. ʼE lelei ke ke kamata tauhi atu nei kia Sehova ʼaki tou loto katoa, ʼi muʼa ʼo te faʼufaʼu ʼo hou kiʼi famili. ʼE kei ke malohi ke feala hau fakahoko ia te gaue ʼaia. ʼE ke lagi fakaʼamu ke ke pionie peʼe ke fia faifakamafola ki te hahaʼi ʼi he tahi age lea. ʼE lagi ʼe ke fia lagolago malohi ki tau kokelekasio. Tatau aipe pe kotea ʼau fakatuʼutuʼu kaʼe ʼe maʼua ke ke gaue ke feala hau totogi ia te ʼu meʼa ʼae ʼe ʼaoga kia koe. ʼE feala ke ke feʼekeʼaki: Ko te gaue fea ʼae ʼe au filifili anai? Pea kotea anai ia te loaloaga ʼo toku temi ako ʼe fakamaʼua ki ai?

VAKAʼI TE ʼU PELESEPETO ʼI TE TOHI-TAPU KE KE FAI AI HE ʼU TONU ʼE FAKAPOTOPOTO

14. Kotea ʼae ʼe tonu ke ke tokaga ki ai moka ke kumi hau gaue?

¹⁴ Ko te ʼu pelesepeto Fakatohi-tapu ʼaia ʼe tolu, ʼe tokoni atu anai ʼi te temi ʼae ʼe ke filifili ai ia te ʼu gaue ʼae ʼe lelei maʼa koe. ʼE lagi iloʼi e te ʼu hahaʼi faitokoni ʼi tau fale ako peʼe ko te ʼu pilo kumi gaue ia te ʼu gaue ʼae ʼe feala ke ke maʼu ʼi te koga meʼa ʼae ʼe ke nofo ai peʼe ko te koga meʼa ʼae ʼe ke fia alu ʼo faifakamafola ai. ʼE feala ke tokoni atu ia te ʼu hahaʼi ʼaia, kaʼe ʼe tonu ke ke nofo tokaga. ʼE faigaʼi anai e natou ʼae ʼe mole ʼoʼofa kia Sehova ke ke leleiʼia ia te ʼu meʼa ʼo te malama. (1 Soa. 2:15-17) Ka ke tokagaʼi ia te ʼu meʼa ʼae ʼe foaki atu e te malama, ke ke manatuʼi ʼe feala ke kakaʼi koe e tou loto.—Lau ia Taaga Lea 14:15; Sel. 17:9.

15, 16. Ko ai ʼae ʼe feala ke ina foaki atu he ʼu tokoni fakapotopoto ʼo ʼuhiga mo te filifili ʼo he gaue?

¹⁵ ʼE ʼaoga ke fai atu he ʼu tokoni ke feala hau filifili he gaue. (Taag. 1:5) Ko ai ʼae ʼe feala ke tokoni atu ke ke filifili he gaue ʼo mulimuli ki te ʼu pelesepeto Fakatohi-tapu? Fakalogo kia natou ʼae ʼe ʼoʼofa kia Sehova pea mo ʼofa kia koe pea mo natou ʼae ʼe natou iloʼi lelei ia koe pea mo te aluʼaga ʼo tou maʼuli. ʼE natou tokoni atu anai ke ke iloʼi lelei te meʼa ʼae ʼe feala ke ke fai pea mo te meʼa ʼae ʼe ke loto ki ai. ʼE lagi natou tokoni atu anai ke ke toe fakakaukauʼi ʼau fakatuʼutuʼu. Kapau ʼe ʼoʼofa ʼau matuʼā kia Sehova, ʼe feala ke nā tokoni atu. ʼE feala ke toe foaki atu e te ʼu tagata ʼafeā ʼo te kokelekasio he ʼu tokoni ʼe lelei. Fehuʼi ki te kau pionie pea mo te ʼu taupau feʼoloʼaki pe ko ʼe neʼe natou fia fakaʼaogaʼi tonatou temi pea mo tonatou malohi moʼo tauhi kia Sehova. Neʼe natou kamata feafeaʼi ia tanatou selevisi? Ko te gaue fea ʼae neʼe natou filifili? Pea kotea te ʼu tapuakina ʼae neʼe natou maʼu?—Taag. 15:22.

¹⁶ Ko natou ʼae ʼe natou iloʼi lelei ia koe, ʼe feala ke natou foaki atu he ʼu tokoni fakapotopoto. Ohage la, ʼe ke fia mavae mai te lise ke feala hau pionie heʼe ke piko ʼi te ako. Ko he tahi ʼe ʼofa kia koe ʼe feala ke ina iloʼi ia te faʼahi ʼaia. Koia ʼe feala ke tokoni atu ke ke mahino kapau ʼe ke faʼa kataki ʼi te fale ako, ʼe tokoni atu anai ke ʼaua naʼa ke lotovaivai moka hoko he ʼu fihifihia ki muli age. ʼE ʼaoga ia te faʼa kataki mo kapau ʼe ke fia tauhi kia Sehova ʼo talu ai.—Pes. 141:5; Taag. 6:6-10.

17. Ko te faʼahiga gaue fea ʼae ʼe mole tonu ke ke filifili?

¹⁷ Ko natou fuli ʼae ʼe tauhi kia Sehova ʼe natou tau anai mo he ʼu aluʼaga ʼe feala ke vaivai ai tanatou tui pea mo fakamamaʼo natou mai ia Sehova. (1 Ko. 15:33; Kol. 2:8) ʼE ʼi ai te ʼu gaue ʼe feala ke tuʼutamakiʼia ai tau tui. Neʼe lagi ke tokagaʼi te mole kei tui ʼa ʼihi ʼuhi ko tanatou filifili he faʼahiga gaue. (1 Tim. 1:19) ʼE ko he aga fakapotopoto tau mole filifili he faʼahiga gaue ʼe feala ke tuʼutamakiʼia ai ʼau felogoʼi mo Sehova.—Taag. 22:3.

KE KE FIAFIA ʼI TOU ʼUHIGA KILISITIANO

18, 19. Kapau heʼeki ke fia pionie, kotea ʼae ʼe feala ke ke fai?

¹⁸ Kapau ʼe ke fia tauhi fakamalotoloto kia Sehova, toʼo ia te ʼu faigamalie ʼae ʼe ina foaki atu ʼi tau kei tupulaga. Toʼo ia te ʼu tonu ʼae ʼe ina fakafealagia atu anai ke ke tauhi fiafia ki te ʼAtua ʼi te ʼu temi makehe ʼaeni.—Pes. 148:12, 13.

¹⁹ Kaʼe ʼe feafeaʼi mo kapau ʼe mole heʼeki ke fia gaue maʼa Sehova? Faigaʼi ke ke fakatuputupu tau tui ʼae kia Sehova. Neʼe fakamahino e Paulo pe kotea ʼae neʼe ina fai ke feala hana maʼu ia te ʼu tapuakina ʼa Sehova. Neʼe ina ui fenei: “Kapau ʼe kehe takotou manatu ki he faʼahiga meʼa pe, pea ʼe fakaha atu anai e te ʼAtua te manatu pe ʼaia kia koutou. Logope he faʼahi kua tou aʼu ki ai ʼi ʼatatou faiga, tou haga haʼele fakalelei ʼi te fai pe ʼaia.” (Filp. 3:15, 16, MN) Manatuʼi ʼe ʼofa ia Sehova ia koe. Ko tana tokoni ʼe lelei tukupau. Tuku ke tokoni atu ia Sehova ke ke fai ia te ʼu tonu ʼae ʼe lelei ʼi tou temi tupulaga.