ʼE Ke Fakafetaʼi Koa Ki Te Tokaga ʼOfa ʼa Sehova?

1, 2. Kotea ʼae ʼe kehekehe ai te leʼoleʼo ʼo tatou e Sehova mo ʼae ʼo te ʼu kamela?

ʼE LAHI te ʼu fenua neʼe fakatuʼu e te kau faikoloa te ʼu kamela moʼo leʼoleʼo ia te kau faifakatau ʼi tonatou fale koloa. ʼE tokoni te ʼu kamela ki te puke ʼo te kau kaihaʼa. Koia ʼae kua faigataʼa age ai ki te kau kaihaʼa hanatou hao mai te ʼu nunuʼa ʼo tanatou aga.

² ʼE fakamahino mai ʼi te Tohi-Tapu ko te ʼu mata ʼo Sehova ʼe “i te potu fuli pe.” (Taag. 15:3) ʼE fakaʼuhiga koa ʼe ina leʼoleʼo tuʼumaʼu pe tatou naʼa tou maumauʼi ʼana lao? ʼE talitali pe koa ke ina fakatuʼā tatou ʼi te temi pe ʼae ʼe tou laka hala ai? Kailoa ia! (Sel. 16:17; Hep. 4:13) ʼE leʼoleʼo tatou e Sehova koteʼuhi ʼe ʼofa ia tatou pea ʼe ina loto ke tou maʼuli fimalie pea mo fiafia.—1 Pet. 3:12.

3. Kotea te ʼu faʼahi ʼe nima ʼae ʼe tokaga ai Sehova kia tatou?

³ ʼE tou lava maʼu feafeaʼi he mahino ʼe loloto age ʼo ʼuhiga mo te ʼofa ʼo Sehova kia tatou? ʼE tou palalau anai kia faʼahi ʼe nima ʼe ha ai ia te tokaga ʼa Sehova kia tatou. (1) ʼE fakatokaga tatou e Sehova ʼi muʼa ʼo hatatou fai ia he faʼahi ʼe kovi. (2) ʼE ina fakatonutonuʼi tatou moka tou fai ia he faʼahi ʼe mole lelei. (3) ʼE ina takitaki tatou ʼaki te ʼu pelesepeto Fakatohi-tapu. (4) ʼE tokoni mai moka tou tau mo he ʼu fihifihia. (5) ʼE ina fakapale tatou moka tou fai ia te meʼa ʼae ʼe totonu.

ʼE FAKATOKAGA TATOU E SEHOVA

4. He ko ʼe neʼe fakatokaga e te ʼAtua ia Kaino ʼi muʼa ʼo tana agahala?

⁴ ʼUluaki, ʼe tou palalau anai pe ʼe fakatokaga feafeaʼi tatou e Sehova ʼi muʼa ʼo hatatou fai he meʼa ʼe kovi. (1 Klk. 28:9) Ohage la, ko Kaino neʼe “ita [lahi] leva” ʼi te mole tali e Sehova tana molaga. (Lau ia Senesi 4:3-7.) Neʼe fakatokaga e Sehova ia Kaino, kapau neʼe mole ina “fai te mea ae e totonu,” pea ʼe agahala anai. Neʼe hage pe ʼe ‘moe te agahala ʼi tona muʼa matapa,’ ʼo talitali ke ina puke ia ia. Neʼe ui fenei e Sehova kia ia: “Ke ke pulei ia ia.” Neʼe loto e Sehova ke toe maʼu e Kaino tona ʼofa. Kapau neʼe fakalogo ia ki te fakatokaga ʼaia, ʼe ina haga maʼu aipe he ʼu felogoʼi lelei mo te ʼAtua.

5. ʼE fakatokaga feafeaʼi tatou e Sehova?

⁵ ʼE toe feia pe mo tatou ia ʼaho nei. ʼE feala ke sio Sehova ki totatou ʼuhiga moʼoni ʼi loto. ʼE ina iloʼi ʼatatou manatu pea mo te ʼu faʼahi ʼae ʼe tou leleiʼia. ʼE mole feala ke tou fufu ia he meʼa kia te ia. ʼE ʼofa ia tatou pea ʼe ina loto ke tou fai ia te meʼa ʼae ʼe totonu, kaʼe ʼe mole ina fakakinauʼi tatou. Koia kapau ʼe sio ifo ki he meʼa ʼe kovi ia tatou, pea ʼe ina fakatokagaʼi mai. ʼO feafeaʼi? Moka tou lau tuʼumaʼu te Tohi-Tapu, mo ʼatatou tohi Fakatohi-tapu, pea mo tou kau ki ʼatatou fono, ʼe tou lava maʼu ai te ʼu fakatokaga ʼa te ʼAtua. Neʼe kua ke lau mo logoʼi koa he faʼahi neʼe tokoni atu moʼo tauʼi he fihifihia neʼe iloʼi pe e Sehova? Ko te ʼu fakatokaga ʼaia mai ia Sehova ʼe tou maʼu ʼi tona temi totonu.

6, 7. (1) ʼE tou iloʼi feafeaʼi ʼe tokaga ia Sehova ki ʼana kaugana takitokotahi? (2) ʼE feala ke fua lelei feafeaʼi kia tatou takitokotahi te tokaga ʼa Sehova?

⁶ ʼE fakaha lelei mai ʼi te ʼu fakatokaga fuli ʼae ʼi te Tohi-Tapu, ʼe ʼofa Sehova kia tatou takitokotahi. ʼE moʼoni ko te Tohi-Tapu, mo ʼatatou tohi Fakatohi-tapu, pea mo ʼatatou fono ʼe ʼaoga ki te toko lau ʼi miliona hahaʼi. Kaʼe ʼe kole atu e Sehova ke ke fakalogo lelei ki ʼana fakatokaga ʼi te Tohi-Tapu ke feala hau fai te meʼa ʼae ʼe totonu. ʼO ha ʼaki mai ai foki tana tokaga ʼae kia koe.

⁷ ʼE fua lelei feafeaʼi kia tatou te ʼu fakatokaga ʼa te ʼAtua? ʼUluaki, ʼe tonu ke tou tui ʼe tokaga moʼoni te ʼAtua kia tatou pea mo tou maʼuliʼi tana Folafola. Koia kapau ʼe tou maʼu he ʼu manatu ʼe mole leleiʼia e te ʼAtua, ʼe tonu ke tou foimo lituʼa ki ai. (Lau ia Esaia 55:6, 7.) Kapau ʼe tou vave ʼi te fakalogo, pea ʼe tou hao anai mai he ʼu aluʼaga fakalotomamahi. Kaʼe, ʼe feafeaʼi mo kapau ʼe mole tou fakalogo? ʼE haga tokaga aipe koa ia Sehova kia tatou?

ʼE FAKATONUTONUʼI TATOU E TATATOU TAMAI ʼOFA

8, 9. ʼE ha feafeaʼi te tokaga ʼa Sehova kia tatou moka foaki mai e he tahi he tokoni Fakatohi-tapu? Tuku mai he faʼifaʼitaki.

⁸ Moka ʼe fakatonutonuʼi tatou e Sehova, pea ʼe tou iloʼi ai ʼe tokaga Sehova kia tatou. (Lau ia Hepeleo 12:5, 6.) ʼE moʼoni ʼe mole tou leleiʼia moka tokoniʼi tatou, mo akonakiʼi peʼe fakatonutonuʼi tatou. (Hep. 12:11) Kaʼe moka foaki mai e he tahi he tokoni mai te Tohi-Tapu, ʼe maʼuhiga ʼaupito ke tou mahino ki te tupuʼaga ʼo tana fai te faʼahi ʼaia. ʼE mole ina fia fakamamahiʼi totatou loto kaʼe ʼe ina fai la he neʼe sio ʼe feala ke fua kovi tatatou aga ki ʼatatou felogoʼi ʼae mo Sehova. Pea neʼe lotolelei ia ke ina toʼo he temi pea mo faiga ke ina fakaha mai ʼi te Tohi-Tapu pe ʼe tou lava fetogi feafeaʼi tatatou aga ke leleiʼia tatou e te ʼAtua. ʼE tou fakaʼapaʼapa ki te tokoni ʼaia koteʼuhi ko te Matapuna ʼo te tokoni ʼaia ʼe ko Sehova.

⁹ Ohage la ko te tehina ʼi muʼa ʼo tana haʼu ki te moʼoni, neʼe ko tana agamahani ko te sioʼi ʼo te ʼu pakī mo te ʼu ʼata heʼe ʼaoga. Pea ʼi tana ako leva te moʼoni, neʼe ina tuku tana agamahani ʼaia. Kaʼe ki muli age, neʼe ina toʼo he telefoni toʼotoʼo foʼou, pea neʼe toe to pe ki tana agamahani ʼaia. (Sakp. 1:14, 15) ʼE mahino ia, ko tana holi ʼaia ʼi muʼa atu, neʼe kei maʼu pe ʼi tona loto ohage ko he ʼu mamala kakaha. ʼI te tahi ʼaho neʼe ina fakatoʼo age tana telefoni toʼotoʼo ki he tagata ʼafeā lolotoga tanā faifakamafola ʼi te telefoni ke ina kumi ni tuʼasila. Pea neʼe sio ai te tagata ʼafeā ki te ʼu tuʼasila heʼe ʼaoga ʼae neʼe alu ki ai te tehina ʼi te Neti. Neʼe tokoniʼi atu aipe e te tagata ʼafeā ia te tehina. Neʼe fakalogo te tehina ki te tokoni pea neʼe ina fakagata tana agamahani kovi ʼaia. Koia ʼe sio Sehova ki te ʼu agahala ʼae ʼe tou fai fakafufu pea ʼe ina fakatonutonuʼi tatou ʼi muʼa ʼo tatatou maumauʼi ʼatatou felogoʼi ʼae mo ia. Pea ʼe tou lotofakafetaʼi kia Sehova ʼi tana tokaga kia tatou.

ʼE TAKITAKI TATOU E TE ʼU PELESEPETO FAKATOHI-TAPU

10, 11. (1) ʼE tou fakaha feafeaʼi ʼe tou “falala” ki te takitaki ʼa te ʼAtua? (2) Fakamatala mai te aluʼaga ʼo he famili neʼe natou mulimuli lelei ki te takitaki ʼa Sehova.

¹⁰ Neʼe hiva fenei te tagata faipesalemo kia Sehova: “E ke taki anai au i tou poto.” (Pes. 73:24) ʼE feala ke tou “falala” ki te tokoni ʼa Sehova ʼaki tatatou vakaʼi tana Folafola. ʼE tou iloʼi ai tana faʼahiga manatu, mo mulimuli ki tana takitaki, pea mo haga maʼu he ʼu felogoʼi lelei mo ia. ʼE toe ʼaoga te tokoni ʼa Sehova ki totatou maʼuli fakasino mo ʼae ʼo totatou famili.—Taag. 3:6.

¹¹ Ohage la, ko he tagata gaue kele, mo tona ʼohoana pea mo tanā fanau kaugā malie neʼe maʼuʼuli ʼi he koga kele neʼe nā lue ʼi Filipine. Ko ia mo tona ʼohoana neʼe nā pionie katoa. Pea fokifa pe neʼe momoli age te tohi e te tagata ʼaʼana te kele ʼe mole kei feala hanatou nonofo ai. Neʼe natou punamaʼuli ʼosi pea ki muli age neʼe natou logo neʼe lau ko natou ko te ʼu hahaʼi agakakā. Neʼe tuʼania te tehina pe ʼe natou maʼuʼuli anai ʼifea. Kaʼe neʼe ina tuku tana falala kia Sehova ʼo ina ui fenei: “ʼE tokaga mai anai Sehova. ʼE ina foaki tuʼumaʼu mai pe te ʼu meʼa ʼae ʼe ʼaoga kia matou ʼi he faʼahiga aluʼaga pe.” Neʼe mulimuli te famili ki te ʼu pelesepeto Fakatohi-tapu, pea neʼe natou aga fakaʼapaʼapa pea mo maʼuliʼi te tokalelei logo la te ʼu lalau neʼe fai kia natou. ʼI ni ʼaho ki muli age, neʼe toe ui age e te tagata ʼaʼana te kele, ʼe feala pe hanatou nonofo ai. Koteʼuhi neʼe malave ʼaupito ki te tagata ʼaʼana te kele ia tanatou faʼahiga aga hili tonatou tukugakoviʼi, koia ʼae neʼe ina fetogi ai tana faʼahiga manatu ʼo ina foaki age te tahi koga kele ke natou gaueʼi. (Lau ia 1 Petelo 2:12.) ʼE ha lelei mai kapau ʼe tou maʼuliʼi te ʼu pelesepeto Fakatohi-tapu, pea ʼe takitaki anai tatou e Sehova ʼi te ʼu temi faigataʼa.

KO HE KAUMEʼA ʼE TOKONI MAI KE TOU KATAKIʼI ʼOTATOU FIHIFIHIA

12, 13. Ko te ʼu aluʼaga fea ʼae ʼe feala ai ke faigataʼa hatatou tui ʼe tokaga te ʼAtua kia tatou?

¹² ʼI totatou ʼuhiga kaugana ʼa Sehova, ʼe lahi te ʼu fihifihia ʼe tou tau mo ia. Pea ko ʼihi fihifihia ʼe tou lagi katakiʼi ʼi he temi loaloaga, ohage la ko te mahaki, te fakataga, peʼe ko te fakafeagai ʼo te famili. Pea ko te aluʼaga ʼae ʼe faigataʼa ʼaupito ke tou ʼutakiʼi, ʼe ko tatatou tokakovi mo he tahi ʼi te kokelekasio ʼuhi ko te kehekehe ʼo totatou ʼuluagaaga.

¹³ Ohage la, ʼe lagi mamahi tou loto ʼuhi ko te ʼu palalau neʼe fai atu e he tehina. Pea ʼe feala ke ke manatu fenei: ‘ ʼE mole tonu ke hoko he faʼahi feia ʼi te kautahi ʼa te ʼAtua!’ Kaʼe ko te tehina ʼae neʼe ina fakamamahiʼi koe ʼe lahi ʼona pilivilesio pea ʼe ʼofainaʼi ʼi te kokelekasio. Lagi ʼe ke feʼekeʼaki fenei: ‘ ʼOiaue kotea tona tupuʼaga? ʼE mole koa sio Sehova ia? Pea mole koa gaugaue ia ʼo fai he meʼa?’—Pes. 13:2, 3; Hap. 1:2, 3.

14. He ko ʼe ʼe fakafealagia e Sehova ke tuku mai e ʼotatou tehina he tokoni ʼe fefeka?

¹⁴ ʼE sio Sehova ki te ʼu aluʼaga fuli, pea lagi ʼe ina fakagafua he aluʼaga ʼo ʼuhiga mo tatou he ʼe ʼi ai ʼona tupuʼaga maʼuhiga. Ohage la, ʼe lagi tokoniʼi tatou e he tahi, pea kia tatou ʼe mole hona ʼaoga, pea ʼe lave kovi te tokoni ʼaia kia tatou. Kaʼe ko te faʼahiga sio ʼa te ʼAtua ʼe kehe ia koteʼuhi ʼe lagi ʼaoga te tokoni ʼaia kia tatou. Neʼe ui e te Tehina ko Karl Klein ʼi te fakamatala ʼo tona maʼuli, neʼe fai age e te Tehina ko Rutherford ia he tokoni ʼe fefeka. Pea ki muli age, neʼe fakaʼalofa age ia Rutherford, kaʼe neʼe mole fiafia ia Klein. Neʼe sio ia Rutherford neʼe kei ita ia Klein ʼi tona tokoniʼi. Neʼe fakatokaga fenei ia Rutherford kia Klein: “Tokaga, naʼa maʼu koe e te Tevolo.” Neʼe ʼaoga moʼoni te tokoni ʼaia kia Klein. ʼI tana kau leva ki te Kolesi Pule ʼo te kau Fakamoʼoni ʼa Sehova, neʼe mahino ai kia Klein ʼe feala ke tokoniʼi tatou e ʼotatou tehina. Kaʼe kapau ʼe tou fehiʼa ʼi ʼotatou tehina ʼuhi ko te faʼahi ʼaia, pea ʼe maʼu anai tatou e te Tevolo.a

15. Kotea ʼae ʼe tonu ke tou manatuʼi moka tou tau mo he ʼu fihifihia?

¹⁵ ʼE tou fakaʼamu ke fakagata vave ʼotatou fihifihia. Kaʼe ʼe maʼuhiga ke tou ako ia te kataki fualoa. Ohage la ʼe feala ke fakatatau te ʼu fihifihia ki te tuʼu ʼo tau motoka ʼi te atu fua motoka ʼi te ala. ʼE feala ke ke atalitali ki te toe fakahoahoa lelei ʼo te ʼu motoka. Kaʼe ʼaki tau kua fiu ʼi te atalitali, ʼe ke toʼo leva te tahi age ala. Ki muli age, kua ke hehe pea ke tauhala ki te koga meʼa ʼae ʼe ke alu ki ai. Kapau la neʼe ke maʼu te kataki fualoa ʼo tuʼu maʼu ʼi tou kau ala, ʼe mahalo ia ʼe ke tautonu anai. Pea ʼe toe feia pe moka tou tau mo he ʼu fihifihia. Kapau ʼe tou maʼu ia te kataki fualoa pea mo maʼuliʼi te ʼu pelesepeto Fakatohi-tapu, pea ʼe tokoni mai anai ia Sehova ke tou katakiʼi ʼotatou fihifihia.

16. He ko ʼe ʼe feala ke fakagafua e Sehova te ʼu fihifihia?

¹⁶ ʼE feala ke fakagafua e Sehova te ʼu fihifihia koteʼuhi ʼe ina loto ke ina akoʼi tatou. (Lau ia 1 Petelo 5:6-10.) ʼE mole tonu ke tou manatu ʼe tupu ʼotatou fihifihia ʼuhi ko te ʼAtua. (Sakp. 1:13) Kaʼe ʼe ko totatou fili “te tiapolo,” ʼae ʼe tupu mai ai ʼihi fihifihia ʼe tou tau mo ia. Koia ʼe maʼuhiga ke tou iloʼi ʼe sio Sehova ki ʼotatou mamahi pea ʼe ʼofa ia tatou. ʼE tokaga anai ia ke mole hoko ʼotatou fihifihia ʼo talu ai, kaʼe “i he kii temi siisii pe.” Koia ke ke falala ʼe tokaga Sehova kia koe pea ʼe ina foaki atu anai te malohi ke ke kataki ʼo kaku ki te fakaʼosi.—2 Ko. 4:7-9.

TE FAKAPALE MAI IA SEHOVA

17. He ko ʼe ʼe sivisivi e Sehova te loto ʼo te hahaʼi fuli?

¹⁷ ʼE sivisivi e Sehova te loto ʼo te hahaʼi fuli moʼo vakaʼi pe ko ai ʼae ʼe ʼofa moʼoni ia te ia. Neʼe palalau fenei ia te polofeta ko Anani ki te Hau ko Asa: “E taka te u mata o [Sehova] i te kele katoa, o tupu ke tokoni kia natou ae e tuku katoa onatou loto kia ia.” (2 Klk. 16:9) ʼE “tokoni” anai Sehova kia koe, ko tona fakaʼuhiga ʼe ina puipui pea mo fakapale anai koe.

18. He ko ʼe ʼe tonu ke tou falala ʼe fakapale anai tatou e Sehova moka ʼe tou fai te meʼa ʼe lelei? (Vakaʼi te ʼuluaki pakī.)

¹⁸ ʼE loto e Sehova ke tou “kumi te lelei,” mo “oofa ki te lelei,” pea mo “fai te lelei” ke feala ai hana fakaha mai tona “ofa” kia tatou. (Amo. 5:14, 15; 1 Pet. 3:11, 12) ʼE fakapale e Sehova te kau faitotonu, maʼia pe la ʼe mole sio he tahi ki te ʼu gaue lelei neʼe natou fai. (Pes. 34:16) ʼE feala ke tou mahino ki te faʼahi ʼaia ʼi te ʼu faʼifaʼitaki ʼo te ʼu fafine faifanau Iselaele ʼe tokolua, ko Sifela mo Pua. Neʼe fakatotonu e Falaone kia naua ke nā matehi te kau toe tagata fuli ʼo Iselaele ʼae neʼe hoki tupu. Neʼe mole fakalogo leva te ʼu fafine ʼaia kia Falaone kaʼe ki te ʼAtua, ʼo nā tuku ke maʼuʼuli te ʼu toe meamea. Neʼe sio Sehova ki te ʼu gaue lelei ʼae neʼe nā fai pea neʼe ina tapuakinaʼi naua ʼo ina fakafealagia ke maʼu hanā fanau. (Eke. 1:15-17, 20, 21) ʼIhi temi, ʼe hage mai ʼe mole tokagaʼi e he tahi ia te ʼu gaue lelei ʼae ʼe tou fai, kaʼe ʼe sio Sehova kia meʼa lelei fuli neʼe tou fai. Pea ʼe ina fakapale anai tatou.—Mat. 6:4, 6; 1 Tim. 5:25; Hep. 6:10.

19. Kotea te aluʼaga neʼe hoko ki he tuagaʼane?

¹⁹ Kia tatou, lagi ʼi ʼihi temi, ʼe mole tokagaʼi e Sehova ʼatatou faiga ʼi te gaue faifakamafola, kaʼe ʼi tona fakahagatonu ʼe tokagaʼi e Sehova. Ko te tuagaʼane Hongroise ʼi Autriche neʼe ina maʼu te tuʼasila ʼo he fafine ʼe palalau ʼi te lea Hongrois. Neʼe alu atu aipe te tuagaʼane ki te ʼapi ʼo te fafine, kaʼe neʼe mole he tahi. Neʼe liuliuga ki te ʼapi ʼaia lolotoga he taʼu katoa mo mahina ʼe ono pea neʼe ina tuku he ʼu tohi mo tona numelo telefoni pea mo faitohi ki ai. ʼI ʼihi temi, neʼe hage kia ia ʼe ʼi ai he tahi ʼi te loto fale, kaʼe neʼe mole avahi mai te matapa. ʼI tana tahi alu ki te ʼapi, neʼe avahi mai leva te matapa e he fafine agalelei ʼo ina ui fenei: “Fakalelei siou loto, haʼu. Ko te ʼu tohi fuli ʼae neʼe ke tuku mai ʼe au lau pea neʼe au talitali atu.” Neʼe faitoʼo te fafine ʼaia ki te chimiothérapie koia ʼae neʼe mole fia faipalalau ai mo he tahi. Pea neʼe ina tali leva ke fai hana ako Tohi-Tapu. Neʼe logoʼi ai e te tuagaʼane neʼe tokagaʼi e Sehova ʼana faiga pea neʼe ina fakapale ia ia.

20. Kotea ʼae ʼe ke logoʼi ʼo ʼuhiga mo te tokaga ʼa Sehova kia koe?

²⁰ Neʼe tou ako ʼi te alatike ʼaeni, ʼe mole pulipuli he meʼa kia Sehova, pea ʼe ina sivisivi te loto ʼo te hahaʼi fuli. ʼAua naʼa tou manatu ʼe ina faigaʼi ke ina maʼu he hala ia tatou peʼe ke ina fakamaʼumaʼu ʼatatou laka hala fuli. Kaʼe ʼe tou fia fakaovi kia Sehova he ʼe tou iloʼi ʼe tokaga ia mo fia tokoni kia tatou pea mo fia fakapale moʼoni tatou ki ʼatatou gaue lelei.