Neʼe Hoko Moʼoni Koa Te ʼu Fakakikite Fuli?

ʼE mahino ia ʼe tou fia iloʼi fuli totatou ka haʼu. Tokolahi ʼe natou fai he ʼu fakakikite ʼo ʼuhiga mo te ka haʼu, kaʼe ʼe mole hoko fuli. Kotou tokagaʼi te ʼu faʼahi ʼaeni:

• KO TE KAU POPOTO ʼe natou fakaʼaogaʼi he toe paʼaga pea mo he ʼu masini ke feala hanatou tala fakatomuʼa ia te ʼu aluʼaga ʼae ka hoko, ohage la ko te agaaga ʼo te kele ʼi te ka haʼu, pe ʼe feafeaʼi anai te faʼahiga tuʼu ʼo te ʼaele ʼi te apogipogi.

• KO TE HAHAʼI SIVI ʼe natou tala fakatomuʼa pe ʼe feafeaʼi anai te faʼahi fakaekonomika pea mo fakapolitike. Ohage la ko Warren Buffett, neʼe fakahigoa ia te tagata maʼu koloa ʼaia ko he tagata faifakakikite, koteʼuhi neʼe lava lelei ʼana fakatuʼutuʼu ʼo ʼuhiga mo te gaue. Neʼe fai e te tahi tagata sivi ko Nate Silver ʼi Amelika, he ʼu fakakikite ʼo ʼuhiga mo te ʼu faʼahi kehekehe, ʼi te faʼahi fakapolitike, peʼe ko te fakapale ʼo te ʼu ʼata ʼi Hollywood.

• KO TE ʼU TOHI ʼAFEĀ neʼe manatu e ʼihi ʼe ko he ʼu lea fakakikite. Neʼe tokagaʼi ʼe ʼihi, ko te ʼu aluʼaga ʼae ʼe lolotoga hoko nei, neʼe kua tohi fakatomuʼa e Michel de Notredame (Nostradamus), ʼi te ʼu taʼu 1500. Neʼe ui e ʼihi ko te kaletalio ʼa te kau Maya, ʼae neʼe fakaʼosi ʼi te ʼaho 21 ʼo Tesepeli 2012, neʼe tonu ke iku ai ki he ʼu tuʼutamaki fakamataku.

• KO TE KAU TAKITAKI LOTU ʼi ʼihi temi ʼe natou fakakikite he ʼu aluʼaga fakamataku ʼe hoko anai ʼi te kele, moʼo fakamatakuʼi te hahaʼi pea ke natou fakalogo kia natou. Ohage la ko te polofeta loi ko Harold Camping pea mo tana kau tisipulo. Neʼe natou tala ʼi te malamanei katoa, ʼe fakaʼauha anai ia te kele ʼi te taʼu 2011. Kaʼe neʼe mole hoko te faʼahi ʼaia.

• KO TE KAU FAIFAKAKIKITE ʼe natou ui ʼe natou maʼu ia te fealagia makehe ʼae ke natou tala fakatomuʼa ia te ka haʼu. Ohage la ko Edgar Cayce pea mo Jeane Dixon, neʼe nā fakakikite he ʼu aluʼaga neʼe hoko ʼi te ʼu taʼu 1900. Kaʼe neʼe lahi te ʼu fakakikite neʼe nā fai neʼe mole hoko. Ohage la, neʼe ui e Dixon, ʼe hoko anai te Tolu Tau Fakamalamanei ʼi te taʼu 1958. Pea neʼe fakakikite e Cayce ʼe mou anai ia New York ʼi te ʼu taʼu 1970.

ʼE ʼi ai koa he tahi ʼe ina lava iloʼi moʼoni te ka haʼu? ʼE ko he fehuʼi ʼe maʼuhiga. Koteʼuhi kapau la ʼe feala ke kotou iloʼi tokotou ka haʼu, ʼe lagi feala ke mole tatau tokotou faʼahiga maʼuli ʼi te temi nei.