Ko He ʼu Tohi Foʼou ʼe Maʼuhiga Ki Te Minisitelio
1 Tokolahi ia tatou neʼe tou fiafia ʼi tatatou logo ʼaē, kua maʼu te ʼu tohi foʼou ʼi te lea Fakaʼuvea. Kae koteā te ʼu tohi ʼaia pea mo tonatou ʼaoga kia tatou?
2 Ko te kaupepa Te ʼu ʼUluaki Akonaki ʼo Te Tohi-Tapu neʼe fai maʼa nātou ʼaē ʼe fia papitema. Ko te ʼu meʼa ʼaē ʼe tuʼu ʼi te kaupepa ʼaia neʼe toʼo mai te tohi Organisés ʼi te pasina 174 ki te 218. Talu mai ni ʼu taʼu, neʼe kua maʼuhiga ke maʼu te ʼu fakamahino ʼaia ʼi te lea Fakaʼuvea, pea tāfito maʼa nātou ʼaē ʼe mole faʼa poto lelei ʼi te Fakafalani. ʼI te temi nei, ka tali anai e he tahi ke kaugā fagona ʼi te kokelekasio, pea ʼe feala anai hana toʼo ʼi te kokelekasio te tohi Organisés ʼi te Fakafalani pea mo te kaupepa Te ʼu ʼUluaki Akonaki ʼo Te Tohi-Tapu. ʼE feala ai anai ke ina fakakaukauʼi te ʼu vaega faka Tohi-Tapu pea mo te ʼu fehuʼi ʼaē ʼe fakahā ʼi te kaupepa.
3 Neʼe fia ʼiloʼi e ʼihi tēhina mo tuagaʼane peʼe tonu ke nātou vakaʼi mo tanatou kau ako te ʼu fehuʼi ʼaē ki te papitema, moʼo “teuteuʼi nātou ki te papitema.” ʼE tonu ke tou manatuʼi, ko te papitema ʼe ko he tonu ʼe kita fai ʼi takita ʼosi fakakaukauʼi takitokotahi ia te faʼahi ʼaia. ʼE mahino ia, kapau ko ia ʼaē ʼe ako ʼe fia fai hana ʼu fehuʼi, pea ʼe feala pe ke ina fakalavelave ki te tēhina peʼe ko te tuagaʼane ʼaē ʼe ina fai tana ako. Kae ʼe mole tonu ke fai te ako ʼo te kaupepa ʼaia ʼi te vāhaʼa fuli, ohage ʼe ko he teuteuʼi ʼo he sivi.
4 ʼE koutou toe fiafia anai ʼi takotou ʼiloʼi ʼaē, kua maʼu ʼi te Fakaʼuvea te kaupepa Te ʼu Tokoni Ki Te ʼu Fai Palalau Faka Tohi-Tapu. ʼE maʼu ʼi te kaupepa ʼaia te ʼu koga ʼo te tohi Comment raisonner. Ka koutou vakaʼi anai te kaupepa ʼaia, ʼe koutou fakatokagaʼi ai anai, neʼe filifili te ʼu fehuʼi ʼaē ʼe fia ʼiloʼi tāfito e te hahaʼi ʼo totatou telituale. Ko te fakatuʼutuʼu ʼo te kaupepa ʼaia, ke tou poto ʼi te palalau mo te hahaʼi ʼaki te Tohi-Tapu. ʼE talanoa ai ki te ʼu faʼahi tāfito ʼaē ʼe tou fai palalau kiai mo te hahaʼi Uvea. ʼE ʼi ai te ʼu kapite ʼe fakaʼosi ʼaki te kiʼi talanoa ʼaenī, “Kapau ʼe ʼui atu e he tahi.” ʼE maʼu ai te ʼu faʼahiga tali ʼaē ʼe fai tāfito mai e te hahaʼi, pea mo he ʼu tokoni ke tou tali kiai.
5 Tahi ʼaē meʼa, ʼi te kamata ʼo te tohi ʼe ʼi ai te kapite ko tona kupu tāfito ʼaenī, “Te ʼu ʼUluaki Palalau Ki Te Fai Faka Mafola.” ʼE fakahā ai peʼe feafeaʼi te ʼu ʼuluaki palalau ʼaē ʼe fai e te kau fai faka mafola faiva ʼo te ʼu fenua kehekehe, mokā nātou kamata talanoa ki he ʼu faʼahi ʼe fia logo kiai te hahaʼi. Ei, ko te kaupepa Fai Palalau Faka Tohi-Tapu ʼe ʼaoga anai kia tatou fuli, tatau aipe peʼe kua fualoa tatatou kau ki te minisitelio peʼe tou foʼofoʼou ʼi te gāue ʼaia. ʼI te ʼu māhina ʼaē ka hoa mai, ʼe toe talanoa anai Te Minisitelio ʼo Te Puleʼaga ki te faʼahiga fakaʼaogaʼi ʼo te kaupepa foʼou ʼaia.
6 Ka fai e tatatou kau ako hanatou ʼu fehuʼi ʼo ʼuhiga mo te ʼu moʼoni faka Tohi-Tapu, pea ʼe feala ke tou tokoni age ke nātou maʼu hona tali ʼaki te kaupepa Fai Palalau Faka Tohi-Tapu. Tou foaki he kaupepa feiā kia nātou fuli; pea ʼe feala ai anai ke tou teuteuʼi nātou ke nātou maʼu te tali ki ʼanatou ʼu fehuʼi, ʼo feiā mo te ʼu fehuʼi ʼaē ʼe fai age e tonatou ʼu kaumeʼa pea mo tonatou ʼu kāiga. ʼE tou fakafetaʼi kia Sehova ʼi tana foaki mai te koloā maʼuhiga ʼaia ʼaē ka lagolago mālohi anai ki totatou minisitelio. ʼOfa pe ke tou fakaʼaogaʼi lahi te tohi ʼaia moʼo vikiʼi tona huafa!—Pes. 66:2, 8.
7 Kae ʼe maʼua ke tou fakasiosio poto ʼi tatatou fakaʼaogaʼi te kaupepa foʼou ʼaia. ʼE mālohi te ʼu fakamahino pea mo te ʼu koga tohi ʼaē ʼe fakaʼaogaʼi ai. ʼE feala pe ke tupu ai te ʼita ʼa te hahaʼi ʼaē ʼe tui fakamalotoloto mo kapau ʼe mole tou fakaʼapaʼapa kia nātou pea mo te ʼu meʼa ʼaē neʼe nātou tui kiai. ʼE mole tou fia fakaʼaogaʼi te kaupepa ʼaia ohage ko he mahafu mo maumauʼi peʼe vāʼi tanatou tui. ʼE feala ke tupu ai te fakamamaʼo ʼa te hahaʼi mai te moʼoni, kae mole nātou fakaōvi kiai. (Vakaʼi ia Loma 13:10) Ko te kaupepa foʼou ʼaia ʼe tonu ke tokoni kia tatou ke tou lagaʼi te hahaʼi, kae mole tou maumauʼi nātou.—Loma 15:1, 2.
8 ʼE fonu totatou loto ʼi te fakafetaʼi kia Sehova, he neʼe ina tuku mai he ʼu tohi taulekaleka moʼo tokoni kia tatou ke lava lelei totatou minisitelio. ʼE mahino papau ai kia tatou, ʼe takitaki e Sehova tona kautahi ke ina ‘foaki i tona temi tonu tatatou meakai’!—Mateo 24:45.