Te ʼu ʼUluaki Palalau Ke ʼEkenaki Ai He Felōgoʼi
1 Ko te ʼu ʼuluaki palalau ke ʼekenaki ai he felōgoʼi ʼe fakahā lelei ai kia ia ʼaē ʼe palalau mo tatou pe koteā te ʼuhiga ʼo te fahaʼi ʼaenī kia ia, ke faiga ia ʼo mahino ki ai pea ʼe feala tana maʼu hona lelei. Lolotoga ʼo te felōgoʼi, ʼe feala leva ke feneī tana manatu: “Ko te meʼa ʼaenī ʼe ʼaoga kia te ʼau”.ʼI te temi ʼe tou teuteu ai, tou fai te ʼu fehuʼi ʼaenī: ‘Koteā koa te ʼu faʼahiga talanoa ʼaē ʼe ʼaoga tāfito ki te hahaʼi ʼo toku telituale? Koteā koa te ʼu meʼa ʼe ʼaoga kia nātou? ʼE feafeaʼi koa te fakahā kia nātou te logo ke feala ai hanatou mahino lelei ko Sehova ʼe tokaga kia nātou?’ Ko te alatike ʼaenī ʼe palalau ki ni ʼu manatu ʼe ʼaoga tāfito ki te hahaʼi ʼi te temi nei. ʼE feala koa ha kotou fakaʼaogaʼi he manatu ʼi heni, pe ʼe ko he manatu ʼe tatau, ʼi takotou ʼu ʼuluaki palalau? Koutou vakaʼi foki pe ʼe feafeaʼi hatatou fakahā te ʼu manatu ʼo te tohi Révélation: dénouement.
2 Ko te puli ʼo te fiafia: “ ʼE tou palalau mo te hahaʼi ʼaē ʼe nātou tuʼania fakamalotoloto te maʼuhiga ʼo te maʼuli ʼi totatou sosiete. Tokolahi te hahaʼi ʼe nātou maʼu katoa te ʼu koloā fakamālama; kae, tokolahi ʼe mole fiafia ʼi tonatou maʼuli. ʼI takotou manatu ʼe feala koa ke maʼu te maʼuli fiafia moʼoni? [Tuku ke fai mai hana tali.] Ko te Tohi-Tapu ia Fakahā 1:3, ʼe ina fakahā mai he meʼa tāfito ʼo te fiafia. [Koutou lau.] ʼAki tatatou mahino ki te fakahā mai ia Fakahā ʼo ʼuhiga mo te temi ka haʼu, ʼe feala tatatou maʼu te fiafia. Koutou fakatokagaʼi te manatu ʼe fakahā mai e te lea faka polofeta ʼo te tohi ʼaia.” Koutou lau ia Fakahā 21:3, 4, pea koutou fakahā ki ai te fakatā ʼo te pasina 302 ʼo te tohi Révélation: dénouement.
3 Ko te tuʼania ʼo te temi ka haʼu: “ ʼE mātou faigaʼi ke mātou vaevae mo tomatou ʼu vahaʼa fale he manatu ʼe ʼaoga ʼo ʼuhiga mo te temi ka haʼu. ʼE fēnei koa takotou fakasiosio ki te maʼuli? [Tuku ke fai hana tali.] Mai te manatu ʼa te Tohi-Tapu, ʼe ia tatou he ʼu fakaʼamu lelei mo kapau ʼe tou muliʼi te fakatuʼutuʼu ia Fakahā 1:3.”
4 Ko te fakaʼamu ki te maʼuli haohaoa: “Tokolahi te hahaʼi ʼi totatou vahaʼa fale ʼe nātou fakaʼamu ki te maʼuli haohaoa. Kae, logope te ʼu faitoʼo ʼaē ʼe tou fai ʼo ʼuhiga mo tatou, ʼe tou mamahi ānai tuʼumaʼu ʼi te mahaki. ʼE koutou fia maʼuli ānai koa ʼi he kele ʼe maʼuli haohaoa ai te hahaʼi fuli pea mo mālolohi? Logope ko te meʼa ʼaia ʼe faigataʼa te tui ki ai, ka ko te tohi ʼo Fakahā ʼe ina fakahā mai kua vave pe tatatou maʼu te ʼu lelei ʼaia.” Koutou lau ia Fakahā 21:3, 4. ʼE feala takotou fakahā te paki ʼo te ʼu pasina 308 pea mo 309 ʼo te tohi Révélation: dénouement, pea mo fakahā pe ʼe feafeaʼi, lolotoga te Hau ʼa Kilisito ʼi te ʼu taʼu ʼaē ʼe afe, ʼe fakafiafia ānai te hahaʼi ki te ʼu fakatuʼutuʼu neʼe fai ʼo ʼuhiga mo te maʼuli.
5 Te tefu ʼo te kele pea mo te ʼaluʼaga ʼo tona ʼu faʼahi fuli: “ ʼI tamatou felōgoʼi mo tomatou ʼu vahaʼa fale, neʼe mātou fakatokagaʼi ʼe tokolahi ia nātou ʼaia ʼe nātou tuʼania te tefu ʼo te ʼaele pea mo te vai pea ko te meʼa kai ʼe mole lelei. ʼI takotou manatu ʼe feala koa ke pulihi e te ʼu puleʼaga fakatagata te tefu? [Tuku ke fai mai hana tali.] ʼE ko he meʼa fakaloto mālohi te fakatokagaʼi ʼo te meʼa ʼe fakahā mai ʼi te Tohi-Tapu ʼo ʼuhiga mo nātou ʼaē ʼe nātou maumauʼi te kele.” Koutou lau ia Fakahā 11:18b. Fakahā te manatu ʼaē ko te finegalo ʼo te ʼAtua ʼe mole gata ʼaki pe tana pulihi ia nātou ʼaē ʼe nātou maumauʼi te kele, kae ʼe ina tuku mai he fealagia kia nātou ʼe agavaivai ke nātou fakaliliu te kele ko he palatiso ohage ko te ʼui mai ia Pesalemo 37:10, 11 pe ʼe ko Isaia 65:21, 22.
6 Te ʼu hahaʼi ʼaē ʼe fia logo ki te ʼu fehuʼi faka lotu: “ ʼE mātou fai te fehuʼi ki tomatou ʼu vahaʼa fale: ʼI takotou manatu ʼe feala koa hatatou mahino ki te tohi ʼo te Fakahā, pe ʼe tuʼu ānai ia ko he misitelio? [Tuku ke fai mai hana tali.] Tokolahi ʼe manatu tahi mo koe. Koutou vakaʼi te meʼa ʼe fakahā mai ʼe te Tohi-Tapu ia Fakahā 1:3.”
7 Kapau ʼe tou faiga fakamalotoloto ke logo ʼi te ʼu loto ʼonatou ʼe palalau mo tatou, ko nātou ʼaē ʼe pakupaku ʼo ʼuhiga mo te moʼoni pea mo te faitotonu ʼe nātou tali lelei ānai te logo lelei. — Mat. 5:3, 6.