Tohi Fakahā: Tona ʼu Misitelio Kua Hā
1 Ko te tohi Fakahā neʼe fualoa tana tuʼu ko he misitelio. Lolotoga te ʼu sekulo, ko te ʼu tagata fai tohi-tapu neʼe nātou faigaʼi ke nātou ʼiloʼi te fahaʼi ʼaia, ka neʼe mole nātou aʼu ki te faʼahi ʼaia. Kae, ko te ʼu manatu ʼa te ʼAtua ʼaē ʼi te tohi Fakahā neʼe mole tonu ia ke nofo ko he misitelio heʼe gata. ʼE ko he tohi ʼo te Tohi-Tapu ʼe tonu ke tou mahino ki ai (2 Tim. 3:16, 17). Ko he meʼa lelei foki, ko te ʼAtua ʼe ina fakahāhā te tohi ʼo te Fakahā ʼo mulimuli pe ki te hoko ʼo tana ʼu lea faka polofeta fakatalakitupua ʼi totatou temi. Ohage ko te fakaʼaogaʼi e te ʼAtua ia Soane moʼo fakahā tana ʼu moemisi ki tana ʼu kau feʼao, ʼo feiā foki mo te temi nei, ʼe ina fakaʼaogaʼi ‘te tagata kaugana mo poto’ moʼo fakahā te ʼuhiga ʼo te lea faka polofeta fakatalakitupua ʼaia. — Mat. 24:45-47; Fakahā 1:1-3.
2 Tufa ʼo malesio: Ko te tohi La Révélation: le grand dénouement est proche! neʼe ina fakamālama lelei pea mo fakaloto mālohiʼi te hahaʼi ʼa te ʼAtua. Kae he koʼe ʼe maʼuhiga ia ki te ʼu hahaʼi ʼaē ʼo tokotou telituale? Koteʼuhi e ko te tohi maʼuhiga ʼaia ʼe palalau ai ki te ʼu faʼahiga meʼa maʼuhiga ʼe tuʼu ʼi te tohi Fakahā, te ʼu faʼahiga meʼa ʼaia ʼe hoko ʼi totatou temi. Ko te ʼu hahaʼi ʼaē ʼe fakakaukau ʼe mole nātou holi koa ki te maʼuli fiafia ʼaē ʼe fakahā mai e te ʼAtua ki te temi ka haʼu? Ko ia, ko te tohi ʼo Fakahā ʼe ina fakamahino mai te ʼu fakamāu faitotonu ʼa te ʼAtua, kae ʼe tuʼu ai foki mo te fakapapau fakatalakitupua ʼo ʼuhiga mo te ʼu tapuakina ki te temi ka haʼu (Fakahā 21:1-5). Ko te mahino ki te logo ʼaia mai te ʼAtua ʼe ina tokoniʼi ai tatou ke tou ʼiloʼi te temi ʼaenī ʼe tou nonofo ai pea ke tou mahino lelei ai ki te maʼuhiga ʼaē ʼo te fai ʼo te finegalo ʼo te ʼAtua.
3 Ko te tohi Révélation: dénouement ʼe loloto koa tona ʼu fakamatala ʼo mole feala ke mahino ki ai te hahaʼi? ʼIo, tokolahi nātou ʼaē neʼe mole nātou faigataʼa ia te tohi ʼaia. Koʼeni he ʼu manatu ʼanatou neʼe lau ia te tohi Fakahā. Neʼe ʼui fēnei e te tagata: “ ʼE ʼi ai te ʼu manatu kehekehe pea ʼe ko he tohi leleiʼia. ʼE ʼau leleiʼia ʼaupito te tohi ʼaia.” Neʼe fēnei te ʼui e te tagata lotu: “Neʼe heʼeki ʼau ʼiloʼi he tohi, pe ʼe mo lau he tohi lelei pea mo moʼoni fēnei.” Koʼeni te manatu ʼa te tahi neʼe ina lau te tohi ʼo mole vahaʼa katoa: “ ʼI te temi nei, kua ʼava lelei toku ʼu mata ʼo ʼuhiga mo te moʼoni. ʼE ʼau loto ke fetogi toku maʼuli katoa .” ʼIo, tokolahi nātou ʼaē ʼe nātou fiafia ʼi tanatou lau te tohi Fakahā, ʼo mahino ki ai ʼi tonatou maʼuli, mo nātou maʼuliʼi te ʼu folafola ʼaia.
4 Fakahā fakafiafia te tohi Révélation: dénouement ki te hahaʼi: Kapau ʼe kamata ha kotou fai palalau faka tohi-tapu ʼi malesio, ʼaua naʼa koutou tuʼania ʼo fakahā te tohi Révélation: dénouement ʼi te fahaʼi fuli. Koutou ʼui age kia nātou ʼaē ʼe fia lau ki te tohi ʼaia ke nātou fakaʼiloga te ʼu meʼa ʼaē ʼe mole nātou mahino ki ai pea ʼe koutou palalau ānai mo nātou ʼo ʼuhiga mo te ʼu fahaʼi ʼaia mokā koutou toe ʼaʼahi mai nātou. ʼE ko te fakatafito ʼaia ʼo he toe ʼaʼahi.
5 Tokolahi neʼe iku lelei tanatou tufa te tohi Révélation: dénouement ʼi te fai faka mafola ʼi te ʼu ʼapi, feiā foki ki tonatou ʼu kaumeʼa, tonatou ʼu kāiga pea mo te ʼu hahaʼi ʼi te gāue ʼaki te faka mafola faiga mālie. Koutou fakahā te ʼu tapuakina neʼe koutou maʼu takitokotahi ʼi te ʼu fakatā maʼuhiga, te ʼu paki ʼaoga pea mo ʼihi atu pe ʼu faʼahiga meʼa maʼuhiga ʼo te tohi ʼaia. Ko te fakaloto mālohiʼi ʼaia ki ni hahaʼi ke nātou fakasiosio te tohi ʼo te Fakahā, logope pe ʼe nātou ʼui ʼe faigataʼa te tohi ʼaia kia nātou.
6 ʼE ko he meʼa lelei ia kia tatou, tatatou ʼiloʼi te ʼu faʼahiga meʼa ki te temi ka haʼu neʼe kua hā ʼi te tohi ʼo Fakahā pea mo te ʼu fakamatala ʼe fai mai e te tagata kaugana mo poto ʼe fakaʼaogaʼi e te ʼAtua ʼi te temi nei! ʼAki tatatou lotomālohi mai te mālama ʼaia, ʼo kehe mo te kau sekelipa ʼi te temi ʼo Sesu pea mo te hahaʼi takitaki ʼo te lotu hala ʼi te temi nei, ʼaua naʼa galo ia tatou te fakahā pe ʼe ko te fakamālamaʼi ʼo te ʼuhiga ʼo te Folafola ʼa te ʼAtua kia nātou ʼaē ʼe fia logo mai (Luka 11:52). ʼE fēnei ānai tatatou aga ʼaki he fakaʼamu ʼe tokolahi te ʼu hahaʼi ʼaē ʼe nātou maʼu ānai te falala ʼo te maʼuli heʼe gata ʼi te mālama foʼou ʼa te ʼAtua pea mo nātou kau fakatahi ʼo muli ia tatou ki te fai ʼo te finegalo ʼo totatou Tupuʼaga. — Fkhā. 4:11.