ʼAʼahi Fakavilivili Ia Nātou Neʼe Fia Logo
1 “ ʼAua naʼa koutou tuku ki he tahi ʼaho te meʼa ʼaē ʼe feala ke koutou fai ʼi te ʼaho pe ʼaia.” Tokolahi ʼe nātou ʼiloʼi te tāʼaga lea ʼaia, ʼe ina fakaloto mālohiʼi ke fai fakavilivili te ʼu meʼa tāfito. Ko te faʼifaʼitaki ka hoko mai ʼe hā mai ai ʼe feala tatatou maʼuliʼi te faʼahi ʼaia ʼi totatou minisitelio.
2 Ko te tuagaʼane neʼe ina tuku te tohi ki te tagata pea neʼe ina fakapapau age ki ai ʼe toe liliu mai ʼo ʼaʼahi ia ia. Ko he tahi tuagaʼane ʼi tana mole ʼiloʼi te fahaʼi ʼaia neʼe ʼalu ia ʼo fisi te matapā ʼaia, kae neʼe hoki mavae mai pe te tahi tuagaʼane mai ai. Neʼe avahi mai e te tagata ʼaia tona matapā, mo ina toʼo te tohi ʼi tona ʼu nima pea ina ʼui age: “ ʼI tau ʼui mai ʼaē ʼe ke toe haʼu neʼe mole ʼau manatu ko he meʼa fakavilivili; kae hu mai, kua tonu ke fai taku ako faka tohi-tapu.”
3 Logope mole ko he meʼa māhani te fai fakavilivili ʼaē ʼo te ʼu ʼaʼahi, ka ko te faʼahi ʼaia ʼe hā mai ai te maʼuhiga tāfito ʼo te muliʼi fakavilivili ʼo te faʼahi ʼaia ʼi totatou minisitelio. ʼI malesio, ʼe tou fakahā ānai te tohi Révélation: dénouement. ʼE fakamoʼoni e te ʼu logo ʼo te malamanei ia te felōgoʼi tahi ʼo te tohi ʼaia, pea mo te ʼu logo ʼaē ʼe tala ʼi te ʼu sulunale, pea mo te latio, pea mo te televisio ʼo ʼuhiga mo te ʼu meʼa faka malamanei ʼaē ʼe tau tāfito ki te maʼuli ʼo te malamanei.
4 Ko te holi ki he tahi atu tokoni: Moʼo tokoniʼi te hahaʼi ke nātou mahino ki te ʼu manatu ʼo te tohi ʼaia pea ke nātou ʼiloʼi ʼe kau ki ai tonatou maʼuli ʼi te temi nei pea mo te temi ka haʼu, ʼe tonu ke tou fai he ʼu fakatuʼutuʼu moʼo fai he ʼu ʼaʼahi, ʼo hili kiʼi aho ʼi tatatou ʼuluaki felāveʼi mo nātou. ʼE feafeaʼi ānai koa tona fai? Fakahā age kia ia ʼaē ʼe palalau mo tatou ʼe tou toe ʼōmai, ʼe feala ke tou ʼiloʼi ai pe ʼe fia logo moʼoni ia ki te logo lelei.
5 Tou teuteuʼi te ala ki he toe ʼaʼahi: Ia ʼaho nei, ʼe mole faigafua he fakatuʼutuʼu ʼo he ʼaho totonu, pea ʼe lagi galo ānai te ʼaho ʼaia ia ia ʼaē neʼe palalau mo tatou. Ko ia, kapau ʼe koutou tohi fakalelei te temi ʼaē ke fai ai te ʼaʼahi ʼaia pea ʼe koutou faigaʼi ʼo fai fakavilivili mokā ʼe feala, ʼe kotou fai fakamalotoloto ānai tokotou maʼua. Kapau ʼe mole nofo ia ʼi tona ʼapi, ke hoholo atu pe takotou faigaʼi ke koutou maʼu ia ia. ʼE lagi ko he tokoni ʼaia kia ia ke ina tokagaʼi takotou ʼaʼahi ʼi tana sio ʼaē ki takotou faiga fakamalotoloto ke koutou felāveʼi mo ia.
6 Pea ko tatatou mole ʼiloʼi papau ki te fia logo mai ʼo he tahi ʼi tatatou ʼuluaki ʼalu atu, ko ia ʼaē ʼe tonu ai ke tou tohi te meʼa ʼaē neʼe tou sisio ʼe ʼaoga kia ia ke feala ai hatatou toe liliu mai. ʼE lelei ke muliʼi te fahaʼi ʼaia fakavilivili. ʼE lagi neʼe koutou faigaʼi ke holi ia ki te tohi Révélation: dénouement, pea ʼi takotou toe liliu mai, ʼe koutou puna’maʼuli ānai ʼi tana tali lelei koutou. Ko ia ʼaua naʼa galo ʼo muliʼi fakalelei te fahaʼi ʼaia fakavilivili!