Ko Te Temi Fea ʼAē ʼe Tonu Ai Ke Tou ʼAʼahi He Tahi Neʼe Fia Logo?
1. Koteā ʼaē ʼe kau ki te fai ʼo he ʼu tisipulo?
1 Ko te fai ʼo he ʼu tisipulo ʼe kau kiai ia te ʼaʼahi ʼo te hahaʼi ʼaē neʼe natou fakahā tanatou fia ʼiloʼi te Puleʼaga ʼo Sehova. (Mat. 28:19, 20) ʼI te agamāhani, ko te temi ʼaē ʼe lelei ai moʼo fai he ʼaʼahi ʼe fakalogo ki takotou polokalama pea mo ia ʼaē neʼe fia logo. He koʼē ʼe tonu ke tou toe foimo liliu?
2, 3. He koʼē ʼe tonu ke tou faiga ke tou toe foimo liliu ʼo fai te ʼaʼahi?
2 He Koʼē ʼe Tonu Ke Tou Toe Foimo Liliu ʼo Fai Te ʼAʼahi? Ko te gāue ʼaē ko te fakamafola ia “te logo lelei ʼaenī ʼo te puleʼaga” kua ovi mai tona fakaʼosi, pea kua toe ovi mai mo te fakaʼosi ʼo te tuʼu ʼaenī. (Mat. 24:14; 1 Pet. 4:7) Koia, ʼi te kei lava maʼu e te hahaʼi “te ʼaho ʼo te haofaki,” ʼe tonu ke tou mulimuli ki te tokoni ʼaē ke tou ‘fakamafola ia te folafola ʼaki he lotomālohi,’ ʼo kau kiai te toe foimo liliu ʼo fai te ʼu ʼaʼahi moʼo taupau te fia logo ʼa te hahaʼi.—2 Ko. 6:1, 2; 2 Tim. 4:2.
3 ʼE faiga mālohi e Satana ke ina maumauʼi ia te ʼu pulapula ʼo te Puleʼaga ʼaē neʼe tou tō ki te loto ʼo he tahi neʼe fia logo. (Mko. 4:14, 15) Ko ʼihi ʼo te fāmili, mo te ʼohoana, pea mo ʼihi atu ʼe natou tautau manukiʼi ia nātou ʼaē neʼe fia logo. Ko tatatou toe foimo liliu kiā nātou ʼaia, ʼe feala ai kiā tātou ke tou fakatuputupu te ʼu moʼoni ʼaē neʼe tou talanoa kiai ʼi tatatou ʼuluaki fai palalau, ʼi muʼa ʼo te haga ʼa ʼihi ʼo fakavaivaiʼi ia tanatou fia ʼiloʼi.
4. ʼI te ʼuluaki fai palalau, ʼe feafeaʼi hakotou lava fakatuʼutuʼu ia te ʼaʼahi?
4 Kotou Fakatuʼutuʼu He ʼAho Mo He Hola: Kā kotou taumāvete mo he tahi, ʼe lelei ke kotou fakatuʼutuʼu mo ia ki he ʼaho mo he hola ke kotou toe liliu mai ai ki ai. Kotou lagaʼi he fehuʼi ʼe kotou tali anai kiai ʼi takotou toe liliu mai. ʼE tonu ke kotou tohi fakalelei ia te faʼahi ʼaia ke kotou manatuʼi. ʼO mulimuli pē ki takotou polokalama, ʼe kotou lava kole age ke kotou toe liliu mai ki ai ʼi te ʼapogipogi ake peʼe hili pē he kiʼi temi nounou ki muli age. Kapau ʼi te fakaʼosi vāhaʼa ʼe kotou fai palalau mo he tahi ʼe fia logo pea kapau ʼe gāue ʼi te vāhaʼa, lagi ʼe ina loto anai ke kotou toe liliu age ʼi te fakaʼosi vāhaʼa kā haʼu. Kā kotou fakatuʼutuʼu he ʼaho mo he hola, kotou mulimuli kiai.—Mat. 5:37.
5. Kā tou ʼaʼahi fakavilivili ia te hahaʼi ʼaē neʼe fia logo, pea ʼe tokoni feafeaʼi anai kiā tātou ke tou fakahoko ia te fakatotonu ʼaē ʼa Sesu ke tou fai he ʼu tisipulo?
5 ʼE ʼi ai te ʼu tupuʼaga lelei ke tou toe ʼaʼahi fakavilivili ai ia te hahaʼi ʼaē neʼe fia logo. Koia, kotou fakatuʼutuʼu he ʼaho mo he hola pea kotou toe foimo liliu ki ai, heʼe “kua nounou te temi.” (1 Ko. 7:29) Kapau ʼe tou ʼaʼahi vave ia nātou ʼaē neʼe fia logo ki te logo ʼo te Puleʼaga, pea ʼe mahino ia ʼe fua lelei anai tatatou ʼu gāue.