Tou Fagonogono Te Logo Fakaloto Fiafia ʼo Te Tohi Fakahā
1 Ko te tohi Révélation: dénouement neʼe ina tokoniʼi tatou ke tou mahino ki te logo fakaloto fiafia ʼaē ʼe talanoa kiai te tohi Fakahā. Tou tokoni ki niʼihi ke nātou mahino peʼe feafeaʼi te ʼaoga ʼo te logo ʼaia kia nātou ʼo fakahā te ʼu manatu kehekehe ʼo te tohi ʼaia ʼe ʼaoga ki te minisitelio lolotoga te māhina ko Malesio. ʼE feala ke koutou mulimuli ki te ʼu manatu ʼaoga ʼaenī ʼi takotou teuteuʼi takotou faʼifaʼitaki.
2 ʼI te ʼosi ʼo takotou fakamālo, ʼe feala ke koutou ʼui age he manatu fēnei:
◼ “Neʼe kua koutou logo koa la ki te talanoa ʼaē ʼo ʼuhiga mo te ʼu tagata heka hōsi e fā ʼo te Apocalypse? [Tuku ke fai mai hana tali.] ʼE kehekehe te ʼu fakamatala neʼe fai ʼo ʼuhiga mo te ʼu tagata heka hōsi ʼaia. Kae ʼe koutou ʼiloʼi koa la ko tanatou heka hōsi fakatā ʼe ko he faʼahi ʼo te lea faka polofeta ʼa te Tohi-Tapu neʼe ina fakakikite te ʼu faʼahiga meʼa ʼe hoko ʼi totatou temi pea ʼe tou kau fuli kiai peʼe tou loto kiai peʼe kailoa? [Koutou tuku ke fai mai hana tali.] ʼE koutou fia ʼiloʼi koa te lea faka polofeta ʼaenī pea mo tona ʼuhiga katoa kia tatou?” ʼE feala ke koutou fakahā age te ʼu paki ʼi te kapite 16 ʼo te tohi Révélation: dénouement pea koutou faka ʼalutahi mo te ʼu vaega ʼaē ʼe tohi mata lalahi. Peʼe feala ke koutou fakamahino he ʼu agaaga ʼo te fakaʼaʼata ʼaki te kiʼi pepa lotu Ko Te Malamanei ʼo Te Temi ʼAenī ʼe Hāo Anai Koa? Ke ʼaua naʼa koutou lotolotolua ʼi te fakahā ʼo te tohi, peʼe ko te fakatuʼutuʼu ʼaē ke koutou liliu ʼo fai palalau ki te meʼa ʼaē neʼe hā pea mo tona faka ʼuhiga.
3 Peʼe lagi ʼe koutou fia ʼui age fēnei:
◼ “Neʼe kua koutou logo koa ki te kupu ʼaē ko ‘Halamaketone’? [Tuku ke fai mai hana tali.] ʼE ʼui e te tokolahi ko te tau faka nukelea ʼe hoko ʼi totatou temi. Kae, ko Halamaketone ʼe kehe ia mo te manatu ʼaia. ʼI te fakamatala ʼa te Tohi-Tapu, ʼe faka ʼuhiga ki te ʼu fetogi maʼuhiga, ko tona ikuʼaga ko te tokalelei heʼegata ʼi te malamanei.” ʼO mulimuli pe ki te tali ʼa ia ʼaē ʼe palalau mo koutou, ʼe feala ke koutou fakahā age he vaega ohage la ko Fakahā 16:16 peʼe ko Pesalemo 37:10, 11 pea mo fakatokagaʼi ia ia ki te kapite 39 ʼo te tohi Révélation: dénouement. ʼOsi ʼaia pea koutou tuku ki ai te tohi.
4 ʼE feala ke koutou fakatupu te fia logo ʼaki takotou fakaʼaogaʼi te manatu ʼaenī:
◼ “ ʼI te temi ʼaenī ʼo te taʼu, tokolahi ʼi te malamanei ʼe manatu ki te mate pea mo te fakatuʼuake ʼo Sesu Kilisito. Kua koutou fehufehuʼi koa pe koteā te meʼa ʼe ina fai talu tona fakatuʼuake? ʼE lahi te ʼu faʼahiga meʼa fakaloto fiafia ʼe hoko ʼi totatou temi ʼe ʼalutahi mo te tuʼulaga ʼo Sesu ʼi te temi ʼaenī ʼi te fakatuʼutuʼu ʼa te ʼAtua. Ko ʼihi neʼe talanoa ki ai te tohi Fakahā. ʼE koutou fia ʼiloʼi koa he ʼu manatu lahi ʼaupito ʼo ʼuhiga mo te fakatuʼutuʼu ʼa te ʼAtua ʼi tana tuku mai tona ʼAlo ki te kele pea mo tona ʼuhiga kia koutou pea mo nātou ʼaē ʼe koutou ʼoʼofa ai?” E lagi feala ke koutou fakatokagaʼi ia ia ki te ʼu palakalafe 1 pea mo te 2 ʼo te kapite 41 ʼo te tohi Révélation: dénouement.
5 Ke tou tokaga ʼo fakaafe mai ia nātou ʼaē ʼe fia logo ke nātou kau ki te Memoliale. ʼAki te tapuakina ʼa Sehova, e lagi feala hakotou tokoni ki he tahi ke ‘fagono ki te ʼu palalau ʼo te lea faka polofeta pea mo tauhi te ʼu meʼa ʼaē ʼe tohi ʼi ai.’—Fkhā. 1:3.