Tou Tokoni Kia Nātou Ke Nātou Maʼuli ʼo ʼAlutahi Mo Te Logo
1 Ko tatatou gāue fai faka mafola ʼe ina faka fealagia ki te hahaʼi ke nātou ‘fagono ki te ʼu palalau ʼo te lea faka polofeta ʼo te tohi Fakahā.’ (Fkhā. 1:3) Kae kapau ʼe nātou fia maʼuʼuli ʼi “te mamahi lahi,” ʼe tonu ke ʼalutahi tonatou maʼuli mo te logo ʼaia. (Fkhā. 7:14) Ko te maʼuli ʼo te hahaʼi ʼe fakalogo ki tanatou tali te logo ʼaia! Koia ʼe tonu ke koutou toe ʼaʼahi te hahaʼi ʼaē neʼe fia logo ki he faʼahi neʼe koutou fakaʼaogaʼi ʼi te māhina ʼaenī.
2 Kapau neʼe koutou tuku te tohi “Révélation: dénouement,” ʼe feala ke koutou ʼui age:
◼ “ ʼE ko he meʼa fakafiafia taku toe felāveʼi mo koe. ʼI tata fai palalau fakamuli, neʼe tā vakaʼi te lea faka polofeta ʼo te tohi Fakahā, pea neʼe ʼau tuku atu he tohi ʼe fakamahino ai. E lagi neʼe ke fakatokagaʼi logope la te loloto ʼo te tohi fakahā, kae ʼe feala ke tou mahino kiai ʼaki te ʼu faʼahiga meʼa ʼe hoko ʼi te temi ʼaenī ʼo faka ʼalutahi mo te ʼu moʼoni tāfito ʼo te Tohi-Tapu. ʼE ʼau fia fakaʼaogaʼi anai he ʼu kiʼi minuta moʼo fakahā atu ʼo he ʼu meʼa ʼe fakahā mai e te Tohi-Tapu ʼo ʼuhiga mo totatou temi.” ʼOsi ʼaia pea koutou fakahā age he tohi ʼe ʼaoga ʼe feala hakotou fakaʼaogaʼi moʼo kamata ʼo he ako faka Tohi-Tapu.
3 Kapau neʼe koutou tuku te kiʼi pepa lotu “Ko Te Malamanei ʼo Te Temi ʼAenī ʼe Hāo Anai Koa” ʼi takotou ʼuluaki fai palalau, ʼe feala ke koutou ʼui age fēnei:
◼ “ ʼE ʼau fiafia ʼi taku maʼu mai koe ki tou ʼapi ʼi te ʼaho ʼaenī. ʼI taku ʼaʼahi talu mai, neʼe tā palalau ki te ʼu faʼahiga meʼa ʼe kau ki te fakaʼiloga ʼaē ʼe hoko anai ia muʼa ʼo te fakaʼosi ʼo te malamanei. [Toe vakaʼi te ʼu faʼahi ʼaoga ʼo te fakaʼiloga ia Mateo 24:3-14.] Neʼe ke tokagaʼi koa he faʼahiga meʼa neʼe hoko ʼi he koga meʼa ʼo te malamanei peʼe ʼi te kolo ʼe ina fakahoko he faʼahi ʼo te fakaʼiloga?” Koutou fakaʼaogaʼi te ʼu paki ʼo te kapite 16 ʼo te tohi Révélation: dénouement, mo fakamahino he ʼu lea faka polofeta ʼo te Tohi-Tapu. ʼI te fakaʼosi ʼo te ʼaʼahi, koutou fakahā age ki ai te kupu ʼo te akonaki ʼo te vāhaʼa, pea koutou fakaafe ia ia ki te akonaki ʼi te Fale ʼo te Puleʼaga.
4 Kapau neʼe koutou fakaafe mai ia ia ʼaē ʼe fai palalau mo koutou ki te Memoliale, koutou ʼui age:
◼ “ ʼI taku haʼu fakamuli, neʼe tā palalau ki te maʼuhiga ʼo te mate ʼa Sesu maʼa te malamanei. Neʼe ʼau fakaafe foki koe ki te Toʼotoʼoga ʼo tona mate, ʼaē ʼe fakamanatu anai e te kau Kilisitiano ʼi te malamanei katoa ʼi te ʼaho 26 ʼo Malesio. ʼE ʼau haʼu ʼi te ʼaho ʼaenī ʼo fakamanatu atu te fakaafe ʼaē neʼe fai atu ki te toʼotoʼoga maʼuhiga ʼaia. [Koutou fakahā te hola pea mo te koga meʼa ʼe fai ai te toʼotoʼoga.] ʼE tokoni ai kia koe ke ke mahino ki te ʼuhiga ʼo te toʼotoʼoga ʼaia mokā ʼe ke vakaʼi he ʼu tapuakina ʼe tou maʼu ʼi te temi nei ʼuhi ko te meʼa neʼe fai e Sesu maʼa te malamanei, ʼo feiā aipe mo te ʼu tapuakina ki te temi ka haʼu.” ʼOsi ʼaia pea koutou faiga ke koutou palalau ki te ʼu puani ʼaoga ʼo te kapite 41 ʼo te tohi Révélation: dénouement. ʼE feala foki ke koutou fakahā te ʼu paki ʼo te ʼu pasina 294, 299, pea mo te 308. Kapau ʼe feala, koutou fai he ʼu fakatuʼutuʼu moʼo tokoni kia ia ʼaē ʼe fia logo ke haʼu ki te Memoliale.
5 Kapau ko he tahi neʼe fia logo feiā pe, ʼe feala ke koutou fakaʼaogaʼi te manatu ʼaenī:
◼ “Neʼe ʼau leleiʼia ʼaupito tata fai palalau talu mai ʼo ʼuhiga mo te Tohi-Tapu. Neʼe ʼau toe haʼu koteʼuhi ʼe ʼau loto ke ke maʼu te fua lelei ʼo te fakapapau ʼa te ʼAtua kia nātou ʼaē ʼe nātou fia ako he ʼu meʼa lahi ʼo ʼuhiga mo ia.” Koutou lau ia Soane 17:3, ʼosi ʼaia pea koutou fakaʼaogaʼi te kiʼi pepa lotu Une vie paisible dans un monde nouveau.
6 Ke ʼekenaki koutou e tokotou ʼofa ʼaē ki te maʼuli pea mo takotou mahino ki te totogi ke koutou ʼaʼahi te hahaʼi ʼaē neʼe fia logo. Koutou tokoni kia nātou ke nātou maʼuli ʼo ʼalutahi mo te logo fakaloto fiafia ʼo te Fakahā. Koutou manatuʼi, “ko te temi ʼaē neʼe fakakatofa kua ōvi mai”!—Fkhā. 1:3.