Koteā Te Palalau Moʼo Taupau ʼo Te Fia Mahino?
1 Lolotoga tatatou ʼolo ʼo faka mafola te logo lelei, ko totatou maʼua ko te fai ʼo he ʼu tisipulo, kae mole gata ʼaki pe ki te tufa ʼaē ʼo te ʼu tohi. Kapau ʼe tou sisio ki he tahi ʼe fia logo, ʼe tonu ke tou to pea mo fakavai te ʼu fua kua ʼosi to, ʼo fai totatou maʼua ʼaē ko te fakatupu ʼo he ʼu ʼaluʼaga lelei ke feala ai kia Sehova ke ina fakatuputupu he tahi ʼi te faʼahi fakalaumālie (1 Ko. 3:6). Koteā koa ha koutou ʼui ʼo ʼuhiga mo te ʼu ʼuluaki palalau ʼaenī ʼe tuʼu ʼi ʼoluga? Koʼeni te ʼu tokoni ʼo ʼuhiga mo te ʼu faʼahi kehekehe ʼe koutou felāveʼi ānai ʼi te fai faka mafola.
2 Moʼo taupau ʼo te fia mahino: “Lolotoga tata felōgoʼi fakamuli, neʼe ke maʼumaʼua foki, kae neʼe ke fakahā mai tau tuʼania ʼaē ʼo ʼuhiga mo te temi ka haʼu. ʼE lagi kei ke manatuʼi neʼe tā lau ʼi te Tohi-Tapu, ia Fakahā 1:3, ko te ‘temi neʼe faka tuʼakoi ki ai kua ōvi mai. ʼE ʼi ai ānai tona ʼu ikuʼaga kia tatou ʼi te temi ka haʼu. Sio mai ki te manatu ʼo te tohi ʼo ʼuhiga mo te vaega ʼaenī. [Lau he manatu ʼo te palakalafe 11, pasina 17, ʼo te tohi Révélation: dénouement.] Ko te tohi ʼaia ʼe tuʼu fuli ai te ʼu polofesia ʼo te tohi Fakahā pea ʼe ina fakahā mai pe ʼe feafeaʼi hatatou maʼu hona ʼu lelei takitokotahi. ʼE lahi koa takotou fia ʼiloʼi te fahaʼi ʼaia? ”
3 Moʼo kamata he ako faka tohi-tapu ʼaki te tohi Révélation: dénouement: “ ʼE ko he meʼa fakafiafia tata toe felāveʼi. ʼE ʼau fia fakahā atu te tahi manatu fakaloto mālohi ʼo te tohi ʼaē neʼe ʼau tuku atu. ʼO ʼuhiga mo nātou ʼaē ka maʼuli ānai ʼo heʼe gata, ʼe palalau te Tohi-Tapu ki te ‘takaiga tohi ʼo te maʼuli’. ʼE koutou fia ʼiloʼi koa te ʼu higoa ʼaē ʼe tuʼu ʼi te takaiga tohi ʼaia.” Koutou avahi te tohi Révélation: dénouement ʼi te pasina 298. Koutou lau te palakalafe 11, ʼosi ʼaia pea fai te ʼu fehuʼi ʼe tuʼu ʼi ai. ʼI te ʼosi ʼo te fakasiosio ʼo he ʼu kiʼi palakalafe, koutou ʼui age ki ai ʼe koutou toe liliu mai ʼo hoko atu te fai palalau.
4 Moʼo kamata he ako faka tohi-tapu ʼaki he tahi atu tohi: “ ʼE ʼau fiafia ʼi tata toe felāveʼi ʼi te ʼaho nei. ʼI tata palalau fakamuli, neʼe tā lau fakatahi ai te fakapapau ʼa te Tohi-Tapu ia Fakahā 1:3. [Toe lau te vaega.] ʼE ke fakatokagaʼi ai ko te maʼuli fiafia ʼe mole haʼu tokotahi. Ko te ʼu meʼa e lua ʼe tonu ke fai: ʼe tonu muʼa ke tou lau te Tohi-Tapu, pea ʼosi ʼaia ke tou maʼuliʼi, peʼe tou taupau te ʼu meʼa ʼaia neʼe tohi. Ko te kaupepa, ‘Voici, je fais toutes choses nouvelles’, ʼe ina faigaʼi ānai ke lelei te lau ʼo te tohi ʼaē neʼe ʼau tuku atu, heʼe fakamatala ai te meʼa ʼe kole mai e te ʼAtua ke tou fai. ʼI te pasina 30 ʼe tuʼu ai te lisi ʼo te ʼu fehuʼi e 12 ʼe tau fai e te hahaʼi tokolahi. Ko te fehuʼi fea koa ʼaē ʼe koutou loto ke tali atu?” Mokā ʼosi fai atu hana tali, koutou avahi takotou kaupepa ʼi te pasina ʼaē ʼe tuʼu ai te tali pea mo kamata he ako faka tohi-tapu.
5 Faigaʼi ke nātou fia mahino ʼaki te ʼu fakatā: Ko te tohi Révélation: dénouement ʼe ʼi ai te ʼu fakatā e lahi ʼe ko he meʼa fakaofoofo. ʼE feala ha kotou fakahāhā te ʼu faʼahi ʼaia moʼo taupau te fia mahino. Ohage la, ko te lolotoga fai ʼo te ʼaʼahi, ʼe feala ha kotou fakahā te pasina 7, te paki ʼo Soane ʼi te motu ʼo Patmos. Ia Fakahā 1:3 ʼe ina fakahā mai ko te fakahā ʼaia neʼe foaki age kia Soane ʼe ko te logo fakafiafia. ʼE feafeaʼi te hoko ʼo te fahaʼi ʼaia, heʼe palalau ʼi te tohi Fakahā ki te ʼu manu fakamanavahe pea mo fakatupu ʼauha? Koutou vakaʼi te ʼu palakalafe 1 pea mo 2, ʼi te pasina 6 ʼo te tohi. ʼE feala ha kotou fakahā he ʼu fakamatala ʼo te ʼu fakatā ʼo te ʼu ʼuluaki pasina, feiā foki mo te ʼu fakatā ʼe hā ai te Palatiso ʼi te kele ʼi te ʼu pasina 302, 308 pea mo te 309.
6 Lolotoga ʼo tatatou ʼu ʼaʼahi, ʼe tonu ke tou faiʼaki te meʼa ʼaē neʼe tou fakatuʼutuʼu ki ai ʼi tatatou ʼuluaki felōgoʼi. Tou fakatokaga lelei ʼo ʼuhiga mo te fahaʼi ʼaia ʼo totatou minisitelio: ʼe lahi ānai te ʼu tapuakina ʼe foaki mai e Sehova maʼa tatou pea mo nātou ʼaē ʼe fakalogo mai kia tatou. — 1 Tim. 4:16.