ʼE Koutou Fakahā Koa Te Ako ʼo Te Tohi-Tapu?
1 Tokolahi te kau faka mafola neʼe feala te kamata ʼo tanatou ʼu ako faka tohi-tapu ʼaki te fakahā fakahagatonu ki te ʼu hahaʼi ke fakasiosio te Tohi-Tapu. Ko he tagata neʼe tuʼa lahi tana fakafisi ki tatatou ʼu tohi neʼe ina tali te ako ʼo te Tohi-Tapu. Neʼe ina ʼui fēnei: “Neʼe ʼau holi tuʼumaʼu ke ʼau ako te Tohi-Tapu.” Neʼe kamata ai he ako, pea ko tona famili katoa neʼe vave ai tona haʼele ki muʼa.
2 ʼE tonu ke tou kumi ke tou kamata he ʼu ako faka tohi-tapu. Ke haʼele ai ki muʼa te hahaʼi ke nātou liliu ko he ʼu tisipulo ʼa Kilisito, ʼe tonu ke akoʼi nātou (Mat. 28:19, 20). Koia, ko te ako ʼo te Tohi-Tapu mo nātou ʼe feala ai hatatou akoʼi nātou. ʼE feala te kamata ʼo te ʼu ako faka tohi-tapu ʼaki te fakahā ki te ʼu hahaʼi pe ʼe feafeaʼi te fakaʼaogaʼi ʼo te Tohi-Tapu pea mo te ʼu fakapapau fakaʼatua. Ko he tēhina neʼe kamata tana ʼu ako faka tohi-tapu e nima ʼaki te kiʼi pepa lotu ʼaē Une vie paisible dans un monde nouveau. Neʼe mole feala tana taki tuʼumaʼu te ʼu ako ʼaia, koia neʼe ina foaki ai ʼihi ʼu ako faka tohi-tapu ki ʼihi kau faka mafola.
3 Kapau ʼe faigafua tatatou kamata te ʼu ako faka tohi-tapu, ʼe feala ke tou ʼaumai niʼihi kau faka mafola pea mo tokoniʼi nātou ke feala ai hanatou kamata hanatou ʼu ako faka tohi-tapu. Pe ʼe tou foaki niʼihi ʼu ako faka tohi-tapu ki niʼihi ʼi te kokelekasio. Kapau ʼe koutou fia taki he ako faka tohi-tapu, he koʼe ʼe mole koutou fakahā ki te ʼu hahaʼi fuli ʼe koutou felāveʼi ʼi te fai faka mafola? Ko he tahi ʼi te kau faka mafola neʼe liliu ʼo ʼaʼahi he tamasiʼi neʼe mole faʼa fia logo. Ko te tagata faka mafola neʼe ina fakahā age he ako faka tohi-tapu, pea neʼe ina tali. Kua papitema ia ʼi te temi nei, pea mo tona tēhina feiā foki mo tona māʼā kua nā ʼolo ki te ʼu fono. — Kal. 6:6.
4 Ko nātou fuli ʼaē ʼe kamata tanatou ako faka tohi-tapu ʼe mole hoko tuʼumaʼu anai. Ko nātou fuli ʼaē ʼe ako ʼe mole nātou hu fuli anai ki te moʼoni. Kae ko ʼihi ia nātou ʼe nātou aʼu anai ki te fahaʼi ʼaia. Ka ʼe lahi te ʼu ako faka tohi-tapu ʼe tou kamata, pea ʼe lahi anai nātou ʼaē, ʼaki tatatou tokoni, ʼe nātou liliu ko te ʼu hahaʼi ʼe ʼatolasio kia Sehova.