Tou Fakahā Tatatou Fakafetaʼi ʼo ʼUhiga Mo Te Totogi
1 Logope totatou lanu, ko te tagata ʼi te agamahani ʼe holi pe ke ina fakahā tona ʼofa ki hona kaumeʼa peʼe ko hona kāiga kua mate. Ko te holi ʼaia ʼe lagi ʼe makehe age ia mokā ko he tahi neʼe mate ʼuhi he neʼe ina hāofaki te maʼuli ʼo niʼihi hahaʼi. Ko nātou fuli ʼaē ʼe ia nātou te ʼamanaki ki te maʼuli heʼegata ʼi te kele ʼe ʼi ai tanatou ʼu tupuʼaga lelei moʼo fakahā ʼo tanatou fakafetaʼi ki te totogi ʼo ʼomai ki te Fakamanatu ʼo te mate ʼo Kilisito ʼi te ʼaho 6 ʼo ʼapelili. — 2 Ko. 5:14; 1 Soane 2:2.
2 Ke tou leleiʼia te maʼuhiga katoa ʼo te ʼofa ʼo Sehova: ʼE ko he meʼa lelei te fakahā katoa ʼo tatatou fakafetaʼi ki te Foaki lahi ʼo te malamanei, ia Sehova ʼAtua, ʼaē neʼe ina foaki ia te totogi (1 Soane 4:9, 10)! Ko te loloto ʼo te ʼofa ʼo Sehova ʼe hā ʼi tona meʼa ʼofa mole hona tatau neʼe ina fai ʼaki tana foaki te totogi: ʼe mole ko he tahi pe ʼi te kau ʼaselo agatonu ʼaē neʼe ina foaki, kae ko tona ʼAlo ʼulu tokotahi, tona ʼAlo ʼofaina (Taag. 8:22, 30). Ko te ʼAlo ʼaia, ia ia ʼaē ʼe ina ʼiloʼi lelei ia Sehova, neʼe ina toe fakamanatuʼi fēnei: “Ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa faka ʼauha, kae ke ina maʼu te maʼuli heʼegata.” — Soane 3:16.
3 Ke tou leleiʼia te maʼuhiga katoa ʼo te ʼofa ʼo Sesu Kilisito: ʼO tatau aipe, ʼe tonu ke ia tatou te fakafetaʼi ʼo lahi age kia Sesu Kilisito, ʼaē neʼe ina foaki tona nefesi maʼa te tokolahi (Mat. 20:28). Ko tona ʼofa neʼe hā ʼi tana fakalogo mo te loto lelei ki te finegalo ʼo Sehova ʼo ʼuhiga mo te totogi. Tou manatuʼi tona tuʼulaga pilivilesio neʼe ina maʼu ia tafa ʼo tana Tāmai pea mo te ʼu ‛myriade’s ʼaselo faitotonu, pea neʼe ina tuku ia meʼa fuli kae liliu ia ko totatou totogi. Ko te manatu ʼaē ke maʼuli mo te hahaʼi heʼe haohaoa pea mo fakalogo kia nātou, peʼe ko te mate moʼo foaki ʼo he totogi neʼe mole fakatupu holomuli ai ia. Kailoa, kae neʼe “ina toʼo te kakano ʼo he kaugana, pea neʼe hā ia ʼi te ʼata ʼo te ʼu tagata. Pea, (...) neʼe agavaivai ia pea neʼe liliu ia ʼo fakalogo ʼo aʼu ki te mate, ʼio, ki te mate ʼi te pou mamahi”. — Filp. 2:5-8.
4 ʼE feafeaʼi te fakahā ʼo tatatou fakafetaʼi ki te totogi: Ko tatatou fakafetaʼi ki te totogi ʼe mole gata pe ki he fakamālo. ʼE ʼaoga ke tou akoʼi pe koteā te ʼu fakatuʼutuʼu neʼe fai e Sehova ʼo ʼuhiga mo totatou fakamaʼuli ʼaki ia Sesu Kilisito (Soane 17:3). ʼOsi ʼaia, ʼe tonu ke tou haga tui ki te totogi (Gāue 3:19). ʼE tonu ke tou uga ia tatou moʼo foaki ʼo totatou sino maʼa Sehova ʼaki tatatou gāue kia te ia tokotahi pea ke tou papitema (Mat. 16:24). Kapau ʼe tou maʼuli ʼo ʼalu tahi mo te ʼuhiga ʼo tatatou fakapapau, ʼe tou faigaʼi anai te ʼu faʼahi fuli ke tou palalau ai ki te totogi, te fakatuʼutuʼu fakatalakitupua ʼaia neʼe fai ki totatou fakamaʼuli. — Lom. 10:10.
5 ʼE feala tatatou tali fuli ki te ʼu fakatuʼutuʼu ʼaia. ʼE mole ko he meʼa ʼe mole tou lavaʼi. Neʼe ʼui fēnei ia Mikea 6:8: “Koteā ʼe kole atu e Sehova kia te koe, mo kapau pe ko hau haga fai te faitotonu, pea mo manako ki te agalelei, pea mo haʼele fia mālalo mo tou ʼAtua?” ʼI te faʼahi ʼaia, neʼe tala fēnei e Tavite kia Sehova: “Ko meʼa fuli ʼe haʼu mai ia te koe pea ko meʼa ʼe mātou foaki atu ʼe haʼu mai ʼou nima.” — 1 Fa. 29:14.
6 ʼI muʼa ʼo te ʼaho Fakamanatu, he koʼe, ʼe mole lau pea mo fakasiosio faka famili te ʼu kapite 112 ki te 126 ʼo te tohi Le plus grand homme? Ko te faka fealagia ʼaia kia tatou ke tou taupau he fakafetaʼi ʼo mālohi ki te ʼu fakatuʼutuʼu fakatalakitupua neʼe fai e Sehova. ʼI te faʼahi ʼaia, ʼe feala ai ke tou teuteu katoa ke tou fakahā ai tatatou fakafetaʼi ki te totogi mokā hoko mai te ʼaho Fakamanatu ʼi te ʼaho 6 ʼo ʼapelili 1993.