Ko Te ʼu Fono Gāue ʼo Maio
Vāhaʼa ʼe kamata ʼi te 3 maio
Katiko 209
10 min: Ko te ʼu logo ki te kokelekasio pea mo te ʼu Tonu ʼaoga ʼo te Minisitelio ʼo te Puleʼaga.
20 min: “Tou kau fakatahi ke fua lelei totatou minisitelio fakamaʼuli hahaʼi.” Akonaki pea mo he ʼu faʼifaʼitaki. ʼI te ʼosi ʼo he ʼuluaki palalau fakanounou, fai he ʼu faʼifaʼitaki e tolu ʼo fakatafito ki te ʼu palakalafe 2 ki te 5. ʼI te ʼosi ʼo te ʼu faʼifaʼitaki ʼaia, fehuʼi kia nātou ʼi te fono peʼe feafeaʼi te fakaʼaogaʼi ʼo te faʼifaʼitaki ʼo mulimuli ki te ʼu faʼahiga ʼaluʼaga kehekehe ʼo te telituale. Fakaʼosi ʼaki he fakaloto mālohiʼi ke nātou kau katoa ki te minisitelio ʼi te fakaʼosi vāhaʼa ʼaenī.
15 min: Te maʼuhiga ʼo te faʼahi fakalaumālie ʼo te famili. Akonaki ʼe fai e he tagata ʼāfea. Fai palalau ki te maʼuhiga ki te famili ke ina vakaʼi te Tohi-Tapu ʼi te ʼaho fuli, ʼo fakahā peʼe feafeaʼi tona fai māʼiape la mo te ʼaluʼaga kehekehe pea mo te ʼu polokalama kehekehe ʼo te famili. Toe fakatokagaʼi te famili ʼe ʼaoga ke nātou faikole fakatahi ʼo tuʼa tahi ʼi te ʼaho. ʼE feala te fai ʼo te faʼahi ʼaia ia muʼa ʼo te ʼalu ʼo moe. Ko te ʼu fakatuʼutuʼu ʼaia ʼe feala ke fai e te ʼu famili kua mavetevete, mo te famili ʼaē e ko he tokotahi pe ʼo te ʼapi moʼo ako ʼo te fānau. Ko te teuteu faka famili ʼe ina faka fealagia foki te maʼu ʼo he fua lelei ʼi te ʼu fono ʼo te kokelekasio ʼi te vāhaʼa fuli pea ke feala ai te fakaloto mālohiʼi ʼo te tui ʼa ʼihi. — Hep. 10:23-25.
Katiko 104 pea mo te faikole fakaʼosi.
Vāhaʼa ʼe kamata ʼi te 10 maio
Katiko 27
10 min: Ko te ʼu logo ki te kokelekasio. Ko he ʼu fakamatala fakafiafia ʼo te gāue ʼaki te ʼu nusipepa, te ʼu kaupepa pea mo te apone.
15 min: “Tou tauʼi te faigataʼaʼia ʼi te minisitelio ʼi te ʼu ʼapi.” ʼO fai ʼaki he ʼu fehuʼi pea mo he ʼu tali. Lau pea mo fakaʼaogaʼi te ʼu vaega ʼe hinoʼi mai.
20 min: Palalau ki te ʼu meʼa ʼe ʼaoga ki te kokelekasio.
Katiko 134 pea mo te faikole fakaʼosi.
Vāhaʼa ʼe kamata ʼi te 17 maio
Katiko 16
10 min: Ko te ʼu logo ki te kokelekasio, ʼo kau ai mo te fakahā ʼo te ʼu meʼa ʼofa. Fakamālo kia nātou fuli ʼi te fono ʼo ʼuhiga mo tanatou lagolago paʼaga ki te kokelekasio ʼo feiā foki ki te gāue faka malamanei ʼo te Sosiete.
20 min: “Tou liliu fakafiafia ʼo tokoniʼi te hahaʼi ʼaē neʼe fia logo.” Fai palalau mo nātou ʼi te fono pea mo he ʼu faʼifaʼitaki. Fakahā kia nātou ʼe ʼaoga ke toʼo he ʼu nota lelei ʼo ʼuhiga mo te fia logo. Fai he ʼu faʼifaʼitaki e lua ʼo fakaʼaogaʼi te ʼu manatu ʼaē ʼi te palakalafe 3 ki te 6. ʼE tonu ke hā mai ai ʼe ʼalu tahi mo te ʼu ʼaluʼaga ʼo te telituale pea mo ʼaoga ki te fia logo.
15 min: Akonaki ʼe fai e he tagata ʼāfea “Dieu le fait croitre...” ʼi te ʼaho 1 ʼo malesio 1993, ʼo fakatafito ki Te Tule Leʼo (fakafalani), ʼu pasina 20 ki te 23.
Katiko 54 pea mo te faikole fakaʼosi.
Vāhaʼa ʼe kamata ʼi te 24 maio
Katiko 141
10 min: Ko te ʼu logo ki te kokelekasio. Logo faka teokalatike. Fakahā te ʼu fakatuʼutuʼu makehe ʼo ʼuhiga mo te fai faka mafola ʼi te ʼaho 31 ʼo maio.
20 min: “ ʼU tūpulaga — koutou taki fakapotopoto tokotou ala.” Fai ʼaki he ʼu fehuʼi pea mo he ʼu tali ʼo fakamahino te ʼu manatu. ʼI te ʼosi ʼo te palakalafe 3, fai he faʼifaʼitaki fakanounou ko he tūpulaga kau faka mafola ʼe ina fehuʼi ki he tahi kua matumatuʼa ke nā kaugā gāue ʼi te minisitelio. Ko te kau faka mafola ʼaē kua matumatuʼa neʼe ina tali fakafiafia pea ina ʼui age ke nā toe vakaʼi fakatahi tana ʼu faʼifaʼitaki ʼi muʼa ʼo tanā ʼolo ki te gāue.
15 min: Akonaki ʼe fai e he tagata ʼāfea “He koʼe koa ʼe faigafua te loi?” ʼo te ʼaho 15 ʼo tesepeli 1992, ʼe fakatafito ki Te Tule Leʼo, ʼu pasina 27 ki te 29.
Katiko 223 pea mo te faikole fakaʼosi.
Vāhaʼa ʼe kamata ʼi te 31 maio
Katiko 207
15 min: Ko te ʼu logo ki te kokelekasio. Fakahā he ʼu puani ʼe feala ke fakaʼaogaʼi ʼi sūnio ʼi te tohi Le plus grand homme.
15 min: ʼE koutou pionie vaeluaʼi temi anai koa ʼi te ʼu māhina ka haʼu? Fakafehuʼi niʼihi neʼe pionie vaeluaʼi temi ʼi te ʼu taʼu kua hili. Fakaloto mālohi te kau tūpulaga pea mo ʼihi ʼatu ke nātou vakaʼi peʼe feafeaʼi te fakaʼaogaʼi fakalelei ʼo tonatou temi mālōlō. Ko ʼihi ʼe feala anai hanatou tokoni ʼi he faʼahi ʼe mole faʼa fai ai te gāue peʼe ko he faʼahi mamaʼo lolotoga tonatou temi mālōlō. Fakaloto mālohiʼi ia nātou ʼaē kua vave ʼosi tanatou ako ke nātou toʼo te pionie katoa peʼe gāue ke aʼu ki te ikuʼaga ʼaia. — 2 Ko. 9:6b.
15 min: ʼE fakamolemole koa e te ʼAtua ʼatatou ʼu agahala? Ko te ʼu tagata ʼāfea e lua ʼe nā teuteuʼi te ʼaʼahi ki te gāue faka tauhi ōvi. ʼE nā palalau peʼe feafeaʼi tana tokoniʼi he tēhina ʼe kei hoha ʼuhi ko tana ʼu agahala ʼi te temi ki muʼa pea ʼe ina ʼui pe neʼe kua fakamolemole age e te ʼAtua ki ai. Ko te ʼu tagata ʼāfea ʼe nā toe vakaʼi te ʼu manatu ʼo te tohi Comment raisonner, ʼu pasina 69 ki te 72, pea feiā foki mo te tohi Auxiliaire pasina 1135. ʼE nā fakasiosioʼi te meʼa ʼaē ʼe ʼaoga ki te tēhina ʼaia ʼaki te finegaloʼofa pea mo fakatokagaʼi ia ki te manavaʼofa pea mo te lotolelei ʼo Sehova ʼo fakamolemole. ʼE nā fakahā age anai foki ki te tēhina ʼaia ʼe ʼaoga ke faiga; ko te kofesio ʼe mole feʼauga aipe. Ko te ʼu tagata ʼāfea ʼe nā fakahā age anai ki te tēhina ʼe nā tautau ʼomai anai ʼo ʼahiʼahiʼi ia ia ʼi he temi, mo nā haga tokoniʼi ia ʼi te faʼahi fakalaumālie.
Katiko 214 pea mo te faikole fakaʼosi.