Tou Tauʼi Te Faigataʼaʼia ʼi Te Minisitelio ʼi Te ʼu ʼApi
1 Ko te manatu ʼaē ko te ʼalu ʼi te ʼu ʼapi, ʼo palalau ki te hahaʼi kehe, ʼe ko he faigataʼaʼia ki te tokolahi ke tauʼi moʼo hikihiki ʼo te tauhi maʼa. Kae ko te ʼofa moʼoni ʼaē kia Sehova ʼe ina tokoniʼi ai he tahi ke ina tauʼi te faigataʼaʼia ʼaia, ʼo tatau aipe mo nātou ʼaē ʼe umiuminoa ʼaupito ʼe feala hanatou tuputupu ʼo nātou liliu ko he kau fai faka mafola katoa ʼo te logo lelei.
2 ʼE hā lelei ʼi te Tohi-Tapu ko te ʼu ʼuluaki kilisitiano neʼe nātou faka mafola te logo lelei ʼo te Puleʼaga ʼo te ʼAtua ʼo nātou ʼolo ʼi te ʼu ʼapi (Gāue 5:42; 20:20, 21). Mo tatou foki, te kau kilisitiano ʼo te 20 sēkulō ʼaenī, ʼe tou kau ki te gāue ʼaia. Ko totatou ʼofa ki te ʼAtua pea mo totatou kāiga ʼe ina uga tatou ke tou fai te gāue ʼaia tatau aipe peʼe tou tau mo te heʼe fialogo, te faigataʼaʼia, te vaʼiganoa, peʼe ko te fakafeagai fakahagatonu.
3 Koteā te ikuʼaga mokā ʼe tauʼi te faigataʼaʼia: ʼI te temi fuli pe ʼaē ʼe tou ʼolo ai ki te hahaʼi, ʼe tou faigaʼi ke tūtū he ʼu fua ʼo te moʼoni, ʼaki tatatou ʼiloʼi ʼaē ko te loaloaga ʼo tatatou faiga ʼe lagi maʼu ai anai ʼi he temi he ʼu fua ʼo te Puleʼaga (Tnk. 11:6). Ko te ʼu ʼaluʼaga takitokotahi ʼe fetogi. Ko he meʼa neʼe hoko ʼe feala ai ke manatuʼi e ia ʼaē neʼe palalau mo tatou te meʼa ʼaē neʼe ʼui age ʼi tona muʼa matapā, pea ʼe lagi feala anai ke lahi age tana fia logo ʼi he temi ki ʼamuli.
4 Ko totatou minisitelio ʼi te ʼu ʼapi ʼe foaki kia nātou ʼaē ʼe holi ki te moʼoni pea mo te faitotonu te fealagia ke nātou ako ke nātou ʼiloʼi ia Sehova pea mo tana ʼu fakatuʼutuʼu, ʼonatou hu ai ki te ala ʼo te maʼuli heʼegata. Ko nātou ʼaē ʼe nātou kumi te ʼu fakafiafia fakamālama ʼe fakatokagaʼi nātou ʼaki te ʼofa ke nātou fetogi mokā ʼe nātou fia maʼu te ʼofa ʼo Sehova. Ko te minisitelio ʼaia ʼe ina fakamahino foki te huafa ʼo Sehova pea mo faka maʼuhigaʼi ia ia, tatau aipe peʼe fakalogo he tahi peʼe kailoa. — Esk. 3:11.
5 Ko te gāue ʼi te minisitelio ʼe ina tokoniʼi tatou ke tou maʼuliʼi te ʼu fua ʼo te laumālie, ohage la ko te ʼofa ʼe mole uga ke totogi, te fiafia, te fīmālie, pea mo te loto ʼutaki (Kal. 5:22). ʼE tokoni ai kia tatou ke tou agavaivai pea mo agalelei, koia ʼe tou faiga ai ʼo fai te meʼa ʼaē ʼe lelei ki niʼihi. Ko te gāue fakamālohi kia Sehova ʼe ina taupau ai tatou mai te mālama. — 1 Ko. 15:58.
6 Ko he tokoni moʼo tauʼi ʼo te faigataʼaʼia: ʼE ʼaoga kia nātou ʼaē ʼe foʼofoʼou ke nātou ako peʼe feafeaʼi tanatou kau ki te gāue fakatalakitupua ʼaia ʼo lahi ake. ʼE mole ia nātou ʼaia te falala pea ʼe feala foki ke nātou liliu ʼo lotovaivai ʼi te manatu pe ʼaē ke nātou ʼolo ʼi te ʼu ʼapi. ʼE feala hatatou vakaʼi mo nātou te ʼu faʼahiga manatu ʼe tautau lagaʼi ʼi te fai faka mafola pea mo vakaʼi peʼe feafeaʼi hatatou tali ki ai. ʼE feala ke tou fai he ʼu faʼifaʼitaki ʼo fakaʼaogaʼi te ʼu manatu ʼi te tohi Comment raisonner ʼe ʼalu tahi mo te fai palalau. He koʼe ʼe mole tou foaki age he tokoni moʼo teuteuʼi ʼo nātou ki te gāue faka minisitelio? ʼE feala foki ke nātou maʼu he tokoni mokā ʼe nātou ʼolo tuʼumaʼu ki te ʼu fono gāue pea ki muli mai ke nātou gāue mo te kau fai faka mafola ʼaē kua māhani mo faiva. Ko te gāue mo he kaugā hahaʼi ʼe feala ke fakaloto mālohiʼi.
7 Ka ʼe tou ʼolo ʼi te ʼu ʼapi, ʼe ia tatou te pilivilesio ʼaē ko te fakafofoga ʼo totatou ʼAtua, ko Sehova. ʼI meʼa maʼuhiga lahi leva te liliu ko te kaugā gāue ʼa te ʼAtua ʼi te temi nei? (1 Ko. 3:9.) Kapau ʼe tou falala kia te ia, ko tona laumālie ʼe ina tokoniʼi anai tatou ke tou tauʼi te faigataʼaʼia ʼi te minisitelio ʼi te ʼu ʼapi. — 2 Ko. 3:5.