Tou Fai He ʼu Ako Faka Tohi-Tapu
1 E feafeaʼi te fai ʼo he ako faka tohi-tapu ʼe lelei? Koteā te faʼifaʼitaki tāfito ʼe tou maʼu? E feafeaʼi te fakatokagaʼi ʼo te ʼu vaega faka tohi-tapu ʼi te ako ʼaia? Ko ai koa ʼaē ʼe tonu anai ke ina lau te ʼu palakalafe? ʼO mole gata ʼaki pe ʼi te ʼaluʼaga ʼaē ʼo te fai māhani ʼo te ako faka tohi-tapu, koteā koa te tahi age meʼa ʼe ʼaoga moʼo tokoni kia ia ʼaē ʼe ako ke ina maʼuliʼi totonu te moʼoni? Koteā koa te ʼu hele ʼe tonu ke tou tekeʼi?
2 E feafeaʼi te fai ʼo he ako faka tohi-tapu: ʼI te agamāhani, ko te ako faka tohi-tapu ʼe mulimuli ki te ako ʼo Te Tule Leʼo. ʼUluaki, ʼe tonu muʼa ke lau ia te palakalafe ʼaē ka vakaʼi. Pea ko ia ʼaē ʼe ina fai te ako faka tohi-tapu, ʼe ina fai te ʼu fehuʼi ʼaē ʼe tuʼu ʼi ai ʼo ʼuhiga mo te palakalafe pea ina tuku he faigamālie kia ia ʼaē ʼe ako mo ia, ke ina tali ki te fehuʼi. Kapau ʼe lotolotolua ia ia ʼaē ʼe ako, ko ia ʼaē ʼe ina fai te ako ʼe tonu anai ke teuteu ke ina fai he ʼu fehuʼi ʼaoga moʼo uga ʼo ia ʼaē ʼe ako ke ina fakakaukauʼi lelei te manatu pea ke ina maʼu hona fakamatala ʼaoga.
3 Koutou vakaʼi peʼe feafeaʼi te fakapipiki ʼo te ʼu vaega ʼo te Tohi-Tapu ki te talanoa ʼo te palakalafe. Koutou fakahā kia ia ʼaē ʼe ako peʼe feafeaʼi te ʼiloʼi ʼo te ʼu vaega ʼaē kua ʼosi tohi ʼi te palakalafe, pea mo fakamahinohino ki ai peʼe feafeaʼi tona fakaʼaogaʼi ʼi te maʼuli. Kapau ʼe tuʼu ʼi te palakalafe te ʼu vaega faka tohi-tapu kae ʼe mole talanoa ki tana ʼu manatu, ʼe lelei hona kumi ki te Tohi-Tapu, kae vakaʼi naʼa loa fau. Pea ʼui age ki ai ke ina lau pea mo fakamahino peʼe feafeaʼi tana ʼalutahi pea mo tana fakamahino te manatu ʼaē ʼe tuʼu ʼi te palakalafe.
4 Tou tokoni kia ia ʼaē ʼe ako ke ina maʼuliʼi te moʼoni: Tou fakaloto mālohiʼi te kau ako ke nātou teuteuʼi lelei tanatou ako. Tou fakamahino age ʼe maʼuhiga te lautohi ʼo ʼuhiga mo te ako. Ka e lahi te lau ʼe ia ʼaē ʼe ako te faʼahi ʼaē ʼe ina akoʼi pea mo metitasio kiai, ʼe hikihiki tana mahino. Ko ʼihi kau faka mafola ʼe nātou fakalau te ʼu palakalafe fuli kia ia ʼaē ʼe ako lolotoga te ako faka tohi-tapu. Ko ʼihi ʼe nātou lau mo tanatou kau ako te ʼu palakalafe. ʼE tonu ke tou fakaʼaogaʼi he fakasiosio lelei, moʼo taupau maʼu ʼi tatatou fakakaukau te tuputupu fakalaumālie ʼo ia ʼaē ʼe ako.
5 Ko te fai ʼo te ako ʼaki pe te ʼu fehuʼi pea mo te ʼu tali, ʼe feala ko he tokoni ke maʼu ʼe ia ʼaē ʼe ako he ʼatamai mālama, kae ʼe fakamoʼoni koa ia ki te ʼu meʼa ʼaē ʼe ina lolotoga ako? Kapau ʼe ina maʼuliʼi totonu ia te moʼoni, ʼe tonu ke ina fakatokagaʼi peʼe lave feafeaʼi te ako ʼaia ki tona maʼuli. Koteā tana manatu ʼo ʼuhiga mo te meʼa ʼaē ʼe ina lolotoga ako? E feafeaʼi hana fakaʼaogaʼi te meʼa ʼaē neʼe ina ako? Tou fakaʼaogaʼi he ʼu fehuʼi ʼe loloto ke malave ki te loto ʼo ia ʼaē ʼe ako.
6 Tou tekeʼi te ʼu hele: ʼE ʼi ai te hele ʼe tonu ke tou tekeʼi mokā tou fai he ako faka tohi-tapu. Kapau ʼe lagaʼi he fai palalau ʼe mole ʼalutahi mo te alatike ʼaē ʼe akoʼi, ʼe lelei age ke palalau ki te faʼahi ʼaia ʼi te ʼosi ʼo te ako peʼe ʼi he tahi temi. Koia, ʼe maʼuhiga ai kia ia ʼaē ʼe ako, ke tali ʼaki tana ʼu palalau māhani kae ʼaua leva naʼa ina lau pe te ʼu manatu ʼaē ʼe tuʼu ʼi te tohi. Ko te faʼahi ʼaia ʼe tokoni anai kia koutou ke koutou fakasiosioʼi peʼe mahino ia ia ʼaē ʼe ako ki te ʼu meʼa ʼaē ʼe ina ako.
7 He koʼe koa ʼe mole koutou fakatuʼutuʼu ke kamata hakotou ako faka tohi-tapu? ʼE mole faigataʼa te faʼahi ʼaia mokā ʼe koutou falala kia Sehova pea ke koutou fai ʼo mulimuli ki te fai māhani ʼaē ʼo te ako ʼo Te Tule Leʼo. Ko te ala ʼaē ʼe lelei moʼo ako ʼo te moʼoni ki niʼihi pea mo fai ʼo he ʼu tisipulo ʼe ko te fai ʼo te ʼu ako faka tohi-tapu. Kapau ʼe koutou fai te faʼahi ʼaia, ʼe feala pe foki ke koutou fiafia koteʼuhi ʼe koutou kau fakamalotoloto ki te fakahoko ʼo te fakatotonu ʼaē ʼa Sesu ia Mateo 28:19, 20.