Ko Te ʼu Fono Gāue ʼo ʼOketopeli
NOTA: Lolotoga minuta e 30 ʼe toe vakaʼi ai te ʼu puani ʼo te fakatahi faka tisitilike ko tona kupu tāfito “Akonaki fakaʼatua” ʼi te fono gāue ʼo te polokalama ʼo ʼoketopeli. Ko te toe vakaʼi ʼo te polokalama ʼo te fakatahi faka tisitilike ʼo te ʼu ʼaho ʼaia e fā, ʼe tuku fakatomuʼa anai ki he ʼu tēhina e lua peʼe tolu ʼe faiva neʼe hinoʼi ke nātou fakahāhā te ʼu puani tāfito. Ko te teuteu lelei ʼo te toe vakaʼi ʼe tokoni anai kia nātou ʼi te kokelekasio ke nātou manatuʼi te ʼu manatu tāfito ke nātou maʼuliʼi takitokotahi pea mo fakaʼaoga ʼi te fai faka mafola. Ko te ʼu tali pea mo te ʼu fakamatala ʼa nātou ʼaē ʼi te fono ʼe fakanounou pea mo mātala.
Vāhaʼa ʼe kamata ʼi te 4 ʼoketopeli
Katiko 225
10 mn: Ko te ʼu logo ki te kokelekasio pea mo te ʼu Tonu ʼo te Minisitelio ʼo te Puleʼaga. Fai he ʼu faʼahiga fakahā ʼe feala ke fakaʼaogaʼi moʼo tufa ʼo te ʼu nusipepa foʼou ʼi totatou telituale. Fakahā te maʼuhiga ʼo te ʼaʼahi ʼonatou fuli ʼaē neʼe tou tuku ki ai te nusipepa ʼaki te fakatuʼutuʼu ʼaē ke tou apone ia nātou ʼaia.
15 mn: “Respectons-nous notre lieu de culte?” Akonaki ʼe fai ʼe he tagata ʼāfea ʼo fakatafito ki te alatike ʼo Te Tule Leʼo ʼo te ʼaho 15 ʼo sūnio 1993. Fakahā tona ʼaoga ki te ʼu ʼaluʼaga ʼo totatou telituale. Kapau ʼe tonu ke fakatotonuʼi he fihifihia tāfito, foaki fakapotopoto he tokoni ʼe ʼaoga ki te faʼahi ʼaia.
20 mn: Tou hikihiki totatou minisitelio ʼi te ʼu ʼapi lolotoga te māhina ʼo ʼoketopeli. Ko te tagata taupau ki te gāue peʼe ko he tahi tēhina ʼe faiva ʼi te faʼahi ʼaia, ʼe fai palalau mo nātou ʼaē ʼi te fono ki te maʼuhiga ʼo te minisitelio ʼaē ʼi te ʼu ʼapi. Ko te tohi ʼaē ʼe tufa ʼi ʼoketopeli ʼe faigafua heʼe ina faka fealagia hona ʼu faʼahiga fakahā kehekehe. Fai he ʼu faʼifaʼitaki: 1) Ko he kau faka mafola ʼe kamata fai palalau mo he tahi ʼaki te fakatuʼutuʼu ʼaē ke ina tuku kia ia ʼaia he alatike ʼi te nusipepa foʼou Koutou ʼaʼala! peʼe ko Te Tule Leʼo. 2) Ko he kau faka mafola ʼe palalau mo he tahi ʼaki te manatu ʼaē ke ina tuku ki ai te tohi L’humanité à la recherche de Dieu. ʼO mulimuli pe ki te ʼu ʼaluʼaga ʼaia, ko ia ʼaē ʼe fai faka mafola ʼe feala ke ina fakahā he tohi peʼe ko he ʼu nusipepa e lua. 3) Ko he kau faka mafola ʼe ina fakaʼaogaʼi he kiʼi pepa lotu moʼo kamata ʼo he fai palalau ʼi te fagonogono faigamālie pea ina tuku age leva te ʼu nusipepa foʼou kia ia ʼaē ʼe fia fagono ki te logo. 4) Ko he kau faka mafola ʼe ina fai he ʼaʼahi ʼo fakahā ki ai te apone. Ko te taʼi puleʼaki faigafua ʼaia ʼe tonu anai ke ina fakaloto mālohiʼi te kau faka mafola fuli, ke nātou hikihiki tonatou minisitelio ʼi te ʼu ʼapi lolotoga te māhina ko ʼoketopeli. ʼE mahino papau ia ko ʼihi ʼi te kokelekasio ʼe nātou pionie vaeluaʼi temi anai ʼi te māhina ʼaenī. ʼE mole heʼeki tauhala ki ʼihi ʼaē ʼe fealagia ki te faʼahi ʼaenī, ke nātou kau ki te pionie vaeluaʼi temi.
Katiko 42 pea mo te faikole fakaʼosi.
Vāhaʼa ʼe kamata ʼi te 11 ʼoketopeli
Katiko 4
10 mn: Ko te ʼu logo ki te kokelekasio. Lau ʼo te tānaki falā. Lau te ʼu meʼa ʼofa, pea mo fakamālo kia nātou ʼaē ʼi te fono ʼo ʼuhiga mo tanatou manavaʼofa ʼo lagolago ki te gāue faka malamanei ʼo feiā aipe ki te ʼu faʼahiga meʼa ʼe ʼaoga ki te kokelekasio. Toe vakaʼi fakanounou te ʼu fakatuʼutuʼu ʼo ʼuhiga mo te gāue faka mafola ʼo te vāhaʼa, pea mo fakamālo ki te kau faka mafola ʼaē neʼe nātou lagolago lahi kiai.
15 mn: “Tou fakaʼaogaʼi ʼatatou ʼu nusipepa ʼi te fai faka mafola ʼi te ʼu ʼapi.” Fai palalau mo nātou ʼaē ʼi te fono. ʼE ʼi ai te ʼu tupuʼaga tāfito ʼaē ʼe tonu ai ke tou loto fiafia ʼo fakahā te ʼu nusipepa ki te hahaʼi ʼaē ʼe felāveʼi mo tatou ʼi te fai faka mafola pea mo nātou ʼaē ʼe fai palalau mo tatou ʼi te fagonogono faigamālie. Logope la ko te ʼu nusipepa foʼou ʼaia, ʼaē ʼe tonu ke tou fakahā, ke ʼaua naʼa tou lotolotolua ʼo tufa te ʼu nusipepa ʼāfea mokā ʼe maʼu he ʼu fealagia kiai. ʼE tonu pe ke koutou tokaga ʼo ʼuhiga mo te ʼu nusipepa ʼaē ʼe koutou tufa ke maʼa pea ke mole makanuminumi. Ko he kau faka mafola faiva ʼe ina fai he faʼifaʼitaki ʼo mulimuli pe ki te palakalafe 4.
20 mn: “Ko te akonaki fakaʼatua ʼe ina uga mālohi ia tatou.” ʼO fai ʼaki he ʼu fehuʼi pea mo he ʼu tali. Lau te ʼu palakalafe pea mo te ʼu vaega ʼo te Tohi-Tapu mokā ʼe maʼu he temi. Faka fealagia kia nātou ʼaē ʼi te fono ke nātou fai he ʼu fakamatala fakanounou ʼo tanatou loto fakafetaʼi takitokotahi ʼo ʼuhiga mo te ʼu lelei ʼaē neʼe nātou maʼu ʼi tanatou kau ki te fakatahi pea mo tanatou fakaʼaogaʼi te ʼu meʼa fuli ʼaē ʼi te fakatahi ʼaia.
Katiko 44 pea mo te faikole fakaʼosi.
Vāhaʼa ʼe kamata ʼi te 18 ʼoketopeli
Katiko 65
10 mn: Ko te ʼu logo ki te kokelekasio. Logo faka teokalatike.
20 mn: “Tou tokaga lelei ki te hahaʼi ʼaē neʼe fia logo.” Ko he akonaki mo he ʼu kiʼi fehuʼi kia nātou ʼaē ʼi te fono. Fakahā pe neʼe feafeaʼi te fakatuputupu e te hahaʼi faka mafola ia te fia logo ʼi te telituale, peʼe ko he kau faka mafola ʼe ina fakamatala he meʼa neʼe ina fai moʼo fakahā ia te maʼuhiga ʼo te ʼaʼahi ʼo nātou ʼaē neʼe nātou toʼo te ʼu nusipepa Koutou ʼaʼala! pea mo Te Tule Leʼo.
15 mn: Akonaki ʼe ʼaoga ki te kokelekasio peʼe ko te akonaki ʼaē ko tona kupu tāfito “Ko te kau kilisitiano ʼo te temi muʼa pea mo te malamanei” ʼo fakatafito ki te ʼuluaki alatike ʼo Te Tule Leʼo ʼo te ʼaho 1 ʼo sūlio 1993. Fakahā ʼe ʼaoga kia tatou ʼi te temi nei ke tou mulimuli ki te faʼifaʼitaki ʼo te kau kilisitiano ʼo te temi muʼa.
Katiko 60 pea mo te faikole fakaʼosi.
Vāhaʼa ʼe kamata ʼi te 25 ʼoketopeli
Katiko 75
10 mn: Ko te ʼu logo ki te kokelekasio. Fakahā te ʼu fakatuʼutuʼu ʼo ʼuhiga mo te gāue faka mafola ʼo te vāhaʼa, pea mo fakahā he ʼu puani ʼi te ʼu nusipepa foʼou ʼe feala ke fakaʼaogaʼi e te hahaʼi fai faka mafola ʼi te fagonogono ia ʼaho nei. Kapau ʼe fealagia te temi, fai he faʼifaʼitaki fakanounou e tahi peʼe lua ʼe ʼaoga anai ki te telituale. Fakamanatuʼi kia nātou ʼaē ʼi te fono, ʼe ʼaoga ke ʼaʼahi ia nātou fuli ʼaē neʼe fia logo.
15 mn: Ke koutou teuteu moʼo fakaloto mālohiʼi ʼo te hahaʼi ʼaē ʼe putu (ʼo fakatafito ki te ʼu pasina 257 ki te 259 ʼo te tohi Comment raisonner) (minuta 3). Ko te tēhina ʼaē ʼe ina fai te akonaki ʼaia, ʼe ina fakamahino ko te kau Fakamoʼoni ʼa Sehova ʼe mole nātou fakafisi ki te ʼu agaʼi fenua fuli ʼaē ʼe fai ki te kau mate (minuta 5). Fakahā peʼe feafeaʼi anai te fakamahino ʼe he kau Fakamoʼoni ki hona kaugā gāue pe koʼe ʼe tekeʼi e te kau Fakamoʼoni ʼa Sehova ʼihi ʼu agaʼi fenua ʼo ʼuhiga mo te putu ʼaē ki te kau mate, ʼo fakatafito ki te fai palalau ki te tohi Comment raisonner, ʼi te ʼu pasina 257 ki te 258 (minuta 7). Fai palalau mo nātou ʼaē ʼi te fono ʼo mulimuli ki te kupu ʼaenī “Si quelquʼun vous dit”, ʼi te ʼu pasina 258 ki te 259.
20 mn: “Tou fai he ʼu ako faka tohi-tapu.” ʼO fai ʼaki he ʼu fehuʼi pea mo he ʼu tali ʼo te alatike. Ko te faʼifaʼitaki neʼe lelei tona teuteuʼi ʼe fai e he kau faka mafola ʼe ina tokoni kia ia ʼaē ʼe ako faka tohi-tapu ke mahino peʼe feafeaʼi te ʼalutahi ʼo te vaega ʼo te Tohi-Tapu mo te talanoa ʼaē ʼi te palakalafe. ʼI te faʼifaʼitaki pe ʼaia ʼe fai ai e te kau faka mafola he ʼu fehuʼi ʼe mole tuʼu ʼi te tohi moʼo tokoni kia ia ʼaē ʼe ako ke ina maʼuliʼi totonu te moʼoni. Fakaʼaogaʼi he manatu ʼi te tohi Unis dans le culte (Logo tahi ʼi te tauhi) peʼe ko te tohi Mauli O Heegata.
Katiko 78 pea mo te faikole fakaʼosi.