Ko Te Akonaki Fakaʼatua ʼe Ina Uga Mālohi Ia Tatou
1 ʼI pilivilesio leva ʼe tou maʼu ʼi te ako fakaʼatua, mai totatou Tupuʼaga, ko Sehova ʼAtua (Pes. 50:1; Is. 30:20b)! ʼI te ʼu fenua fuli ia ʼaho nei tokolahi te hahaʼi ʼe ʼolo ki tona moʼuga, ia te tauhi maʼa ke akoʼi ai nātou ʼe ia (Mi. 4:2). Ko ʼihi lauʼi miliona hahaʼi ʼe nātou ako ʼi te ʼu faleako ʼaē ʼe fakamuʼamuʼa ai te ʼatamai fakatagata pea mo te agapoto ʼo te mālama. Kae ko te agapoto ʼaē ʼe mole tokaga kia Sehova pea mo tana Folafola ʼe ko he meʼa vale ia ki te ʼAtua, pea ko nātou ʼaia kua nātou liliu ko te kau vavale. — Pes. 14:1; 1 Ko. 1:25.
2 ʼI tatatou fakatahi faka tisitilike ʼaē kua hili, neʼe tou vakaʼi ai te mālohi ʼo te akonaki fakaʼatua ʼo mole hona fakatatau. Ko te kupu tāfito “Akonaki fakaʼatua” neʼe ina fakatafito ia te polokalama katoa. Neʼe tou akoʼi ko te Folafola ʼa te ʼAtua mo tona laumālie ʼe nā fakatahiʼi tatou ko te famili fakatautehina faka malamanei, ʼe nā fetogi ʼotatou ʼuhiga, mo hāofaki tatou mai te ʼu akonaki ʼa te ʼu temonio, pea mo akoʼi tatou ke tou liliu ko te kau minisi lelei. Neʼe feafeaʼi koa te fua lelei ʼo te akonaki fakaʼatua kia koutou takitokotahi?
3 Tona fua ki te maʼuli faka kilisitiano: Ko te akonaki fakaʼatua ʼe ina faʼufaʼu totatou leʼo ʼo loto. Neʼe tou tutupu fuli mo totatou leʼo ʼo loto, kae ke ina taki ia tatou ʼi te ala ʼo te faitotonu pea mo te gāue ʼaē ʼe lelei kia Sehova, ʼe tonu ke akoʼi te leʼo ʼo loto (Pes. 19:7, 8; Lom. 2:15). Ko te hahaʼi ʼo te mālama ʼaenī neʼe mole nātou faka ʼalutahi tanatou fakakaukau mo te Folafola ʼa te ʼAtua, pea ko te tupuʼaga la ʼaia ʼo tanatou nonofo ʼi te maveuveu pea ʼe mole nātou ʼiloʼi lelei pe koteā te meʼa ʼe lelei mo te meʼa ʼaē ʼe kovi. Ko te ʼu fakafeagai ʼe hoko tāfito ʼo ʼuhiga mo te ʼu talanoa ʼo te ʼu aga ʼaē ʼe tonu ke fai, ʼuhi heʼe fia fai pe e te hahaʼi te meʼa ʼaē ʼe nātou leleiʼia. Tokolahi ʼe nātou loto ke nātou fili faʼitaliha te meʼa ʼaē ʼe ʼaoga ki tonatou maʼuli. ʼE mole nātou fia tokagaʼi ia te matapuna ʼaē e tahi ʼo te agapoto moʼoni (Pes. 111:10; Sel. 8:9; Tan. 2:21). Kae ko te akonaki fakaʼatua kua ina fakahoko te faʼahi ʼaia kia tatou, pea ʼe tou logo tahi ʼo tou faʼufaʼu te fale ʼo te ʼAtua koteʼuhi neʼe akoʼi tatou e ia. ʼE ia tatou te falala ki te temi ka haʼu ʼaki he leʼo ʼo loto ʼe lelei, ʼo tou maʼumaʼua ʼi totatou minisitelio.
4 Ko te akonaki fakaʼatua ʼe tokoni kia tatou ke tou tauʼi “te matagi ʼo he ʼu akonaki”. (Ef. 4:14.) ʼE mole uga ia tatou ʼe he ako faka filosofia, ʼaē ʼe ina fakaliliu te hahaʼi ʼo gutu fatufatu pea mo lotolotolua, ʼe ina fakaloto mālohiʼi tatou ke tou manatu pe kia tatou totonu, pea mo mulimuli ki te maumauʼi ʼo te ʼu aga ʼaē ʼe tonu ke fai. ʼE tou leleiʼia totatou akoʼi e Sehova, pea ʼaki te faʼahi ʼaia ʼe tou fakamamaʼo mai te lotomamahi ʼaē ʼe ʼiloʼi e ʼihi. Ko te ʼu lao ʼa Sehova pea mo tana ʼu fakamanatu ʼe hage ko ‘he palalau ʼe muli mai ia tatou’, ʼe ʼui fēnei: “Koʼeni te ala. Koutou haʼele ai.” — Is. 30:21.
5 Ko ʼatatou ʼu fono pea mo totatou minisitelio: ʼE tou vakaʼi ia Hepeleo 10:23-25 ohage he fakatotonu mai te ʼAtua. ʼI te ʼu fono ʼo te kokelekasio, ʼe akoʼi tatou e Sehova. Ko hatatou ʼu agamāhani koa tatatou kau ki te ʼu fono, peʼe hage kia tatou ko te faʼahi ʼaia ʼe mole faʼa maʼuhiga? Tou manatuʼi, ko te ʼu fono ʼe ko he koga ʼaia ʼo tatatou tauhi. ʼE mole tonu ke tou meʼa noaʼi. Ke ʼaua naʼa tou hāla ʼi he koga ʼo te meʼa kai fakalaumālie neʼe teuteuʼi e Sehova maʼa tatou.
6 Neʼe faikole ia Moisese ki te ʼAtua ʼo fēnei: “Fakahā mai kia mātou peʼe feafeaʼi te lau ʼo te ʼu ʼaho ke feala ai hamatou maʼu he loto ʼe agapoto.” (Pes. 90:12). ʼE fai fēnei koa ʼatatou faikole? ʼE tou faka maʼuhigaʼi koa te ʼu ʼaho fuli? Kapau koia ʼaia, pea ʼe “tou maʼu he loto agapoto” ʼo tou gāue ʼi te ʼaho fuli ʼi he ʼaluʼaga ʼe ʼaoga, moʼo faka kolōlia ʼo tatatou Faiakonaki lahi, ia Sehova ʼAtua. Ko te akonaki fakaʼatua ʼe tokoni mai anai kia tatou ke tou fai te faʼahi ʼaia.