Tou Tokoni Ki Niʼihi Ke Nātou ʼIloʼi Te Koloā Maʼuhiga
1 Ka tou faka mafola ki niʼihi te logo lelei ʼo te Puleʼaga, ʼe tou fakatuʼutuʼu ke tou tokoni te hahaʼi ʼaē ʼe loto agatonu ke nātou leleiʼia te māʼoluga ʼo te Folafola ʼa te ʼAtua (Filp. 3:8). Ko ʼatatou tohi faka tohi-tapu ʼe ina fai he gāue maʼuhiga ʼo ʼuhiga mo te faka mafola ʼaē ʼo te logo ʼo te Puleʼaga. Ohage la, ko te tohi Mauli O Heegata neʼe ina tokoni ki te toko lauʼi teau afe hahaʼi ke nātou kaugana kia Sehova ʼaki te ʼu moʼoni ʼo te Tohi-Tapu ʼaē neʼe nātou akoʼi.
2 Ko totatou minisitelio ʼe mole gata pe ia ʼi hatatou tuku he tohi ki he tahi. ʼE ʼaoga ke tou fakahā te logo ʼaki hona faʼahiga fai ʼe lelei, tou fakalogo ki te meʼa ʼaē ʼe palalau ia kiai ʼaki he fakasiosio poto, pea ke tou teuteu ʼo ‘fakakaukau ia mo ia ʼaki te Tohi-Tapu’. — Gāue 17:2.
3 E feafeaʼi te fai ʼo te faʼahi ʼaia? Ko ʼatatou ʼuluaki palalau ʼe feala ke faka fealagia ki te hahaʼi ke nātou fakahā mai peʼe nātou fia logo moʼoni ki te logo ʼo te Tohi-Tapu.
ʼE feala anai ke koutou ʼui age:
◼ “ ʼE mātou ʼaʼahi te hahaʼi ʼo palalau mo nātou ki te ʼu meʼa ʼe hoko ʼi te mālama ia ʼaho nei. Tokolahi ia nātou ʼaia kua tahitahiga tanatou fia logo ki te ʼAtua pea mo tana ʼu fakatuʼutuʼu ʼo ʼuhiga mo tona maʼuliʼi ʼaē ohage ko tona tuʼu ʼaē ʼi te Tohi-Tapu. Ko he faʼahi neʼe malave mālohi ki te felogoi ʼa te hahaʼi ki niʼihi. Neʼe kua koutou fakatokagaʼi koa te faʼahi ʼaia? [Tuku he kiʼi temi ke fai mai hana tali. ʼE feala ke koutou fakaʼaogaʼi he ʼu faʼahiga meʼa neʼe hoko.] Fakatokagaʼi mai muʼa te aga ʼa nātou ʼaē ʼe tuʼu ia 2 Timoteo 3:1-5, pea ke ke fakahā mai peʼe ʼi tau manatu ʼe tatau mo te aga ʼi te mālama ʼaenī. [Koutou lau age; tuku he kiʼi temi ke fai mai hana tali.] ʼE ʼi ai koa he tupuʼaga mālohi ʼo hatatou ʼamanaki ki he ʼu ʼaluʼaga ʼe lelei age ʼi he temi ka haʼu?” Koutou fakaʼaogaʼi te paki ʼo te pasina 12 pea 13 ʼo te tohi Mauli O Heegata pea ke koutou lau age te ʼu palakalafe 12 pea mo te 13.
4 Kapau ko he tahi ʼi te ʼu mātuʼa ʼaē ʼe ina avahi te matapā, ʼe feala ke kamata fēnei tatatou palalau:
◼ “ ʼE mātou palalau mo te hahaʼi ʼaē ʼe fia logo peʼe feafeaʼi tatatou tauʼi fakalelei te ʼu faigataʼaʼia ʼi te maʼuli faka famili. ʼE tou faiga fuli pe ke tou fai te meʼa ʼaē ʼe lelei kia tatou, kae kapau ʼe ʼi ai he meʼa ʼe feala ke tokoni kia tatou ke tou maʼu he ʼu fua ʼe lelei, ʼe tonu ke tou fakatokaga kiai, ʼe mole koia koa la ʼaia? [Tuku ke fai mai hana tali.] Ko te Tohi-Tapu ʼe ina foaki mai te taki ʼi te faʼahi ʼaia ohage ko tona tuʼu ʼaē ia Kolose 3:12-14. [Koutou lau.] Koteā koa ʼaē ʼe maʼuhiga moʼo maʼu ʼo he maʼuli faka famili manuʼia? Fakatokagaʼi te manatu ʼaē ʼe tuʼu ʼi te tohi ʼaenī ʼi te kapite ʼaē ko tona kupu tāfito ‘Kohe mau ohota mauli faka famili fimalie’.” Tou lau te palakalafe 3 ʼo te pasina 238 ʼo te tohi Mauli O Heegata. Kapau ʼe maʼumaʼua ia ia ʼaē ʼe fai palalau mo tatou peʼe mole ina tali lelei, tou ʼahiʼahi fakahā ki ai he nusipepa foʼou ʼe palalau ki te maʼuli faka famili peʼe ko te kiʼi pepa lotu Fiafia ʼi he maʼuli faka famili.
5 Ke ʼaua naʼa galo ia tatou ʼi he lakaga, ʼe tou fakatuʼutuʼu ke tou faka mafola fakalelei te Puleʼaga (Mat. 24:14). ʼAki tatatou fakaʼaogaʼi fakalelei te Tohi-Tapu pea mo te ʼu fakatuʼutuʼu taulekaleka ʼaē ko te ʼu tohi faka teokalatike ʼe tou maʼu, ʼe feala ai ke tou falala kia Sehova ʼo ʼuhiga mo tana ʼu tapuakina ʼo tou fakahoko tona finegalo lolotoga te ʼu temi faigataʼa ʼaenī. — Kal. 6:9.