Tou Tokoni Ki Te Hahaʼi ʼAē e Hage Ko He ʼu Ōvi Ke Nātou Fakatafito Ki He Tuʼulaga Mālohi
1 Ko te laga ʼo he fale ʼe maʼua ke ʼi ai he ʼu fakatuʼutuʼu lelei pea mo he faiga fakamalotoloto. ʼI te ʼosi hinoʼi ʼo te faʼahi ʼaē ke fakatuʼu ai, ʼe tonu ke teuteuʼi te koga meʼa ʼaē ʼe laga ai pea mo fai he fakatafito mālohi. Ko te fakatuʼutuʼu ʼaia ʼe tuputupu ʼo aʼu ki te temi ʼe ʼosi katoa ai te fale. ʼO tatau aipe, ʼe tonu ke tou tokoni ki te hahaʼi ʼaē e hage ko he ʼu ōvi ke nātou fakatuputupu ia te ako ʼo te moʼoni. ʼE tou faiga ʼo uga te fia logo ʼi tatatou ʼuluaki fai palalau. Ki muli age, ʼe tou fai te ʼu ʼaʼahi, ko he fakatafito ʼaia ʼo hatatou akoʼi kia nātou te ʼu moʼoni tāfito ʼo ʼuhiga mo te ʼAtua pea mo tana ʼu fakatuʼutuʼu ki te malamanei. — Luka 6:48.
2 Kae ia muʼa ʼo te fai ʼo te fakatafito, ʼe tonu ke tou teuteuʼi te koga meʼa ʼaē ʼe laga ai, ʼo mulimuli pe ki te ʼu ʼaluʼaga ʼo ia ʼaē ʼe fai palalau mo tatou. Ko te manatu fea ʼaē neʼe tou ʼuluaki talanoa kiai? Ko te ʼu vaega fea ʼo te Tohi-Tapu ʼaē neʼe tou fakaʼaogaʼi? Neʼe koteā tona tali? Koteā te tohi ʼaē neʼe tou tuku ki ai? ʼI tatatou toe liliu ki ai, ʼe tonu ke ia tatou te ʼu manatu ʼaē ʼe ʼaoga, pea ke tou fakatafito mamalie te tuʼulaga. ʼAki te ʼu ʼaʼahi fuli ʼaē ki ai, ʼe toe tuputupu ai tona ʼatamai mālama pea mo tana tui ki te ʼAtua.
3 Kapau neʼe tou tuku te tohi “Mauli O Heegata”, ʼe feala anai ke tou ʼui age:
◼ “ ʼE ʼau fiafia ʼi taku toe maʼu mai koe. E lagi ʼe ke manatuʼi ʼi tatā fai palalau fakamuli, neʼe tā fakatokagaʼi kua tahitahiga te fia logo ʼa te hahaʼi ki te ʼAtua ʼi tota telituale. ʼE fakahā fakalelei mai e te Tohi-Tapu ʼe tokaga ia te ʼAtua ki te malamanei pea ko te hahaʼi faitotonu ʼe tapuakiʼi anai nātou ʼaki tona Puleʼaga. [Koutou lau age ia Mateo 6:9, 10.] ʼAki te Puleʼaga ʼaia, ko te kau faitotonu pea mo te kau agatonu ka tuʼu anai.” Koutou lau age ia Isaia 11:3-5, pea tou fakatokagaʼi age kia ia te ʼuluaki palakalafe ʼo te kapite 1 ʼo te tohi Mauli O Heegata. Tou fakahā age ki ai peʼe feafeaʼi te ako ʼo te alatike ʼaia.
4 Kapau neʼe tou tuku te kiʼi pepa lotu Une vie paisible dans un monde nouveau ʼi te ʼuluaki fai palalau, ko te ʼu puani tāfito ʼaē neʼe fakatokagaʼi ʼo ʼuhiga mo te ʼu ʼaluʼaga ʼe lelei age pea mo te ʼu fakapapau ʼa te Tohi-Tapu, ʼe feala ke toe vakaʼi. Koutou fakahā fakalelei age kapau ʼe tou fia maʼuli ʼi te mālama foʼou, ʼe tonu ke tou maʼu ia he ʼatamai mālama totonu. Tou lau ia Soane 17:3. Tou fakamahino age ʼi te ʼosi maʼu ʼo te ʼatamai mālama ʼaia, ʼe tonu ke tou fai te finegalo ʼo te ʼAtua. Tou lau ia 1 Soane 2:17. Tou fakahā age he ʼu manatu ʼe ʼaoga ʼi te pasina 5 ʼo te kiʼi pepa lotu.
5 Kapau neʼe lagaʼi te fai palalau ki te maʼuli faka famili ʼi tatatou tuku age ʼaē ʼo te tohi “Mauli O Heegata” ʼi tatatou ʼuluaki ʼaʼahi, ʼe feala anai ke tou ʼui age:
◼ “ ʼI tatā felogoi talu mai, neʼe tā fai palalau ʼo ʼuhiga mo te maʼuli faka famili. Neʼe tā manatu tahi ʼo ʼuhiga mo te maʼu ʼaē ʼo he maʼuli faka famili fīmālie, ʼe tonu ke tou muliʼi te ʼu takitaki ʼe tuʼu ʼi te Tohi-Tapu. ʼI tau manatu koteā koa ʼaē ʼe ʼaoga moʼo maʼu ʼo he nofo ʼohoana manuʼia?” Tuku ke fai mai hana tali. Koutou fakahā age te ʼu manatu ʼaē ʼe ʼaoga ʼe tuʼu ʼi te ʼu pasina 243 ki te 246 ʼo te tohi Mauli O Heegata. Koutou fehuʼi age ki ai pe koteā tana manatu ki te ʼu paki pea ke koutou taupau te ʼu manatu ʼaē ʼe ʼaoga ki te felogoi. Koutou fakatokagaʼi tāfito ki te maʼuhiga ʼaē ʼo te maʼuliʼi ʼo te ʼu fakatuʼutuʼu ʼo te Tohi-Tapu.
6 Kapau neʼe tou tuku te kiʼi pepa lotu Fiafia ʼi he maʼuli faka famili, koutou toe vakaʼi te ʼu fakatuʼutuʼu tāfito ʼa te Tohi-Tapu ʼaē ʼi te ʼu pasina 4 pea mo te 5. Kapau ʼe hā mai tana fia logo, koutou fakahā age ki ai te tohi Mauli O Heegata. Koutou fakahā age te kapite 29, “Kohe mau ohota mauli faka famili fimalie”, pea koutou fakahā age peʼe feafeaʼi hona vakaʼi ʼe ia ʼaē ʼe fai palalau mo koutou pea mo tona famili.
7 Ko tatou fuli ʼe tonu anai ke tou kau tuʼumaʼu ʼo fai te ʼu ʼaʼahi. Koutou haga tokaga fakalelei kia nātou fuli ʼaē ʼe fia logo ʼaki hatatou fai he ʼu ʼaʼahi ʼe lelei ʼi te māhina ko sepetepeli.