Tou Liliu ʼo Uga Te Fia Logo Ki Te Tohi-Tapu
1 ʼI ʼihi temi ʼe tou felāveʼi mo ni hahaʼi ʼi te gāue fai faka mafola ʼe fia logo kae ʼe nātou maʼumaʼua ʼo mole feala ai tanatou fai palalau mo tatou ʼi te temi pe ʼaia. ʼE tou toe liliu koa ʼi he tahi lakaga ʼo vaevae te logo ʼo te Puleʼaga mo nātou? Peʼe lagi neʼe lelei hatatou fai palalau mo he tahi, kae neʼe mole ina tali he tohi. ʼE tou toe liliu koa ʼo palalau mo ia ʼo ʼuhiga mo te moʼoni?
2 ʼE maʼuhiga te fai fakalelei ʼo totatou telituale pea mo tokaga ki te fia logo ʼa te hahaʼi ʼaē ʼe tou maʼu. ʼE tou toe liliu pe koa tatou ʼo ʼaʼahi ia nātou ʼaē neʼe nātou tali he tohi peʼe ko he ʼu nusipepa? Kapau koia ʼaia, ʼe mole tou tokagaʼi te fia logo ʼa te hahaʼi. ʼE mole tou loto anai ke tou fakamāu he tahi ʼo tou ʼui ʼe mole tāu mo ia he ʼu tokoni fakalaumālie ʼuhi pe he neʼe mole ina tali he tohi (Vakaʼi ia Loma 14:4). ʼE lagi ʼi te ʼosi ʼo tatatou ʼaʼahi, ʼe feala ke fakakaukau ia ia ʼaē neʼe palalau mo tatou ʼo ʼuhiga mo te meʼa neʼe tou ʼui age peʼe ina leleiʼia tatatou faiga ʼaē ʼo ʼaʼahi ia ia. ʼO feala ai leva hana loto lelei mokā tou toe liliu age.
3 Mokā koutou toe liliu ʼo ʼaʼahi he tahi neʼe maʼumaʼua, ʼe feala hakotou ʼui age:
◼ “ ʼE ʼau fiafia ʼi taku toe sio kia te koe. ʼI taku haʼu talu mai ai, neʼe mole tā palalau ʼuhi he neʼe mole maʼu hou temi. ʼE ʼau sio atu ʼe ke maʼumaʼua, pea ʼe fakanounou anai taku palalau. ʼE lagi ʼe ke fia maʼu he maʼuli mālōlō ʼo feiā foki kia nātou fuli ʼaē ʼe ke ʼofa ai. Lagi, neʼe ke ʼiloʼi te fakapapau ʼaē ʼa te ʼAtua ke ina fakagata te mahaki fuli? ʼE mole koa la ko he meʼa fakafiafia? [Tuku ke fai mai hana tali.] Fakatokagaʼi te puani ʼi te palakalafe 4 ʼo te kaupepa ʼaenī, ko tona kupu ‘Voici, je fais toutes choses nouvelles’. ” Kapau ʼe fealagia te temi, lau te palakalafe pea ʼosi ʼaia pea vakaʼi he vaega ʼi lalo ʼo te pasina 4 ʼaē ʼe tuʼu ai te ʼu ʼaluʼaga ʼo te maʼuli ʼi te mālama foʼou. Kapau ʼe lotolelei ia, ʼe feala ke kamata he ako tohi-tapu ʼi tona ʼapi.
4 Mokā koutou toe ʼaʼahi he tahi neʼe ina tali he kiʼi pepa lotu, ʼe feala hakotou ʼui age:
◼ “ ʼI tata felāveʼi talu mai, neʼe ke tali te kiʼi pepa lotu ko tona kupu Ko ai koa te ʼu pule ʼo te malamanei? ʼI tau manatu ʼe faigataʼa koa te tui ʼaē ko te pule ʼo te mālama ʼaenī ko Satana? [Tuku ke fai mai hana tali.] Fakatokagaʼi te ʼuluaki palakalafe ʼi te pasina 6.” Lau te palakalafe, ʼosi pea fehuʼi age: “He koʼe koa ʼe loto ia Satana ke ina fakahalaʼi tatou?” ʼI tana ʼosi tala mai tana manatu, vakaʼi fakatahi te palakalafe fā ʼi te pasina 3. ʼE feala ke hoko atu te fai palalau ʼo vakaʼi fakalelei te kiʼi pepa lotu, peʼe feala pe ke koutou fakahā age te kaupepa ʼE tokaga moʼoni koa te ʼAtua kia tatou? pea vakaʼi te palakalafe 8 ʼo te pasina 13.
5 ʼE ʼi ai te ʼu tupuʼaga lelei ʼaē ke ia tatou te manatu tonu pea mo tokaga lelei ki te fia logo ʼa te hahaʼi ʼe felāveʼi mo tatou ʼi te gāue faka mafola tatau aipe peʼe faka tuʼakoi. ʼE maʼuhiga ke tou tokaga ki niʼihi, ke ia tatou he loto lelei ʼo tokoni kia nātou ke nātou ako te moʼoni. Ko te kautahi ʼa Sehova ʼe ina faka fealagia te ʼu tohi pea mo te ʼu faʼahiga fakahāhā ʼe tokoniʼi ai tatou ke tou tokoniʼi niʼihi ke nātou mahino katoa ki tonatou ʼu meʼa fakalaumālie. — Mat. 5:3.
6 Kapau neʼe lelei hakotou fai palalau mo he tahi neʼe siʼisiʼi tana fia logo, ke ʼaua naʼa tou meʼa noaʼi ʼo toe liliu ʼo faigaʼi tana fia logo. ʼE feala aipe ke kamata he ako faka tohi-tapu pea mo taki he tahi ki te ala ʼo te maʼuli. ʼE tou fakaloto mālohiʼi ia tatou fuli ke hoko atu tatatou kau fakalelei ki te gāue ʼaia ʼe ina hāofaki te maʼuli. — 1 Tim. 4:8.