Tou Fakatuputupu Te Fia Logo Ki Te Puleʼaga Tokalelei ʼo Te ʼAtua
1 ʼI te māhina ko Fepualio, ʼe tou tufa anai te tohi E Feala Keke Mauli O Heegata Ite Palatiso Ite Kele. ʼE tou loto anai ke tou tokoni ki te hahaʼi faitotonu ke nātou fakatuputupu tanatou fakafetaʼi ki te Puleʼaga ʼo te ʼAtua pea mo te gāue ka ina fakahoko anai. Ko te ʼu fehuʼi ʼaē ke tou ʼiloʼi ai te manatu ʼa te hahaʼi ʼe tokoni kia tatou ke tou aʼu ki tona ikuʼaga.
2 ʼI te ʼosi ʼo tatatou fakamālo, ʼe feala ke tou ʼui age fēnei:
◼ “ ʼE lahi te ʼu fetogi fakaofoofo ʼi te ʼu puleʼaga ʼaē ʼi te kele, pea ʼe nātou tautau talanoa ki te tokalelei. ʼI tau manatu ʼe hoko anai koa te tokalelei moʼoni? [Tuku ke fai mai hana tali.] Logope la te falala ʼa te tokolahi ki te ʼu puleʼaga fakatagata ke nātou ʼaumai te tokalelei, koutou vakaʼi muʼa peʼe feafeaʼi te fakapapau mai e te ʼAtua ʼe ina fakatuʼu anai te tokalelei ohage ko tona tuʼu ia Pesalemo 46:9. [Lau.] ʼI takotou manatu koteā anai te ʼu fetogi ka ʼaumai anai e te ʼAtua? [Koutou fakalogo ki tana tali ka fai mai, ʼosi ʼaia pea koutou fakahā age te kiʼi pepa lotu Une vie paisible dans un monde nouveau. (Ko he maʼuli fīmālie ʼi he mālama foʼou)] ʼE feala koa hakotou fakakaukauʼi te paki ʼaenī?” Koutou vakaʼi te manatu ʼi te kupu “La vie dans le monde nouveau de Dieu.” (Ko te maʼuli ʼi te mālama foʼou ʼo te ʼAtua). Kapau ʼe fealagia te temi, ʼe lahi te manatu ʼi te ʼu pasina 336 ki te 341 ʼo te tohi Comment raisonner ʼe feala ke koutou vakaʼi, ʼi te fehuʼi ʼaē “Que fera le Royaume de Dieu?” (Koteā te meʼa ka fai anai e te Puleʼaga ʼo te ʼAtua). ʼE feala hatatou fakaʼosi te fai palalau ʼaki te fehuʼi ʼaenī: “ ʼI tau manatu la ʼe feala koa te foaki mai e te Puleʼaga ʼo te ʼAtua ia te ʼu fetogi ʼaia?” ʼOsi ʼaia ʼe feala hakotou fakahā age te tohi Mauli O Heegata pea mo fakamahino age peʼe feafeaʼi te fakaʼaogaʼi ʼo te tohi ʼaia moʼo maʼu ʼo he tali ki te fehuʼi ʼaia. ʼI te fakaʼosi ʼo te fai palalau koutou fai he fakatuʼutuʼu moʼo fai ʼo he ʼaʼahi.
3 Peʼe feala ke tou ʼui age:
◼ “Neʼe ʼui e te tokolahi ʼe nātou tau mo te ʼu faigataʼa fakatupu tuʼania ʼi te ʼaho fuli. ʼI tau manatu la ʼe ʼi ai koa he ʼamanaki moʼo faka ʼāteaina ʼo tatou mai te ʼu faigataʼa ʼaia? [Tuku ke fai mai hana tali.] ʼE ʼui ʼe ʼihi ʼe mole tokaga te ʼAtua kia tatou. Kae, koutou vakaʼi, pe koteā te fakapapau ʼe tuʼu ia Fakahā 21:3, 4.” Koutou lau te ʼu vaega. Kapau ʼe maʼumaʼua ia ia pea ʼe feala ke tuku age te kiʼi pepa lotu ʼaē Ko te malamanei ʼo te temi ʼaenī ʼe hāo anai koa? Kapau ʼe koutou fakahā te kiʼi pepa lotu, ʼe feala hakotou vakaʼi te manatu ʼi te ʼu pasina 2 pea mo te 3 ʼi te kupu ʼaē “Te ʼapogipogi ʼo te mālama ʼaenī.” Kapau ʼe fia logo ia ia ki te moʼoni, ʼe feala ke koutou tuku ake leva te tohi Mauli O Heegata. ʼE feala ke koutou lagaʼi te fehuʼi ʼaenī: “He koe nee fakagafua ete Atua te mamahi?” Koutou fakahā age te kapite 11 ʼo te tohi, pea koutou fai he fakatuʼutuʼu ke feala ai he fai palalau ki te tohi ʼi he ʼaʼahi ka hoko mai.
4 ʼE feala hakotou fili ke koutou kamata ʼaki he alatike ʼo he nusipepa foʼou ʼo fakahāhā he puani tāfito neʼe koutou tāʼofi ʼi te alatike.
Koutou fakahā te nusipepa, ʼo koutou ʼui age:
◼ “Ko te alatike ʼaenī ʼe lahi tana talanoa ʼo ʼuhiga mo te faʼahi ʼaia. [Koutou lau he talanoa e tahi peʼe lua neʼe koutou tāʼofi.] Ko te alatike ʼe ina tuku mai he ʼu manatu ʼe feala anai ke fakaloto mālohiʼi ai koutou pea mo tokotou famili. ʼE ʼau ʼiloʼi papau ʼe koutou leleiʼia anai ia te lau ʼo te ʼu nusipepa ʼaia, ʼe mātou fiafia ʼi te tuku atu ʼo te ʼu nusipepa ʼaenī ko tona totogi fakaʼofa ko te foʼi 100.”
5 ʼE mole ʼiloʼi tuʼumaʼu e te hahaʼi ia ʼaho nei pe ko te faʼahi fea ʼaē ʼe nātou maʼu ai te ʼu tali moʼo tauʼi ʼo te ʼu faigataʼaʼia ʼo te malamanei. ʼE tou maʼu te pilivilesio ʼaē ko te vaevae mo nātou ia te ʼamanaki ki te temi ka haʼu. (Gāue 17:27) ʼOsi ʼaia, ʼe feala hatatou fakatokagaʼi fakalelei te fia logo ʼa te hahaʼi ki te Puleʼaga ʼo te ʼAtua, te matapuna moʼoni ʼo te tokalelei.