Te Tohi ʼAē ʼe Ina Foaki Mai Te Takitaki Moʼoni
1 Neʼe fakamataku te fetogi ʼo te mālama lolotoga te 20 sēkulō. Logope la te tuputupu ʼo te ʼu meʼa fai felogoi, te ʼu faitoʼo, pea mo te meʼa haʼele, kae hoholo atu pe te haʼele kovi ʼo te maʼuli faka famili. ʼE lauʼi miliona te hahaʼi ʼe nātou tuku ia nātou ke taki e te filosofia fakatagata ʼaē ʼe mole gata tona fetogi.
2 ʼI te fetogi fakavilivili ʼo te agaaga ʼo te mālama, ʼe maʼu e te hahaʼi ʼa Sehova he ʼu fua lelei ʼi tanatou maʼuliʼi tana Folafola. Ko te Tohi-Tapu neʼe mole fetogi ia talu mai te ʼu taʼu ʼe lauʼi afe, pea ko tana ʼu tokoni ʼe kei lahi tona ʼaoga moʼo tauʼi ʼo te ʼu faigataʼaʼia ʼe tau mo tatou ia ʼaho nei. E feafeaʼi tatatou tokoni ki te hahaʼi ʼaē ʼe fia logo ke nātou fakafetaʼi ki te Tohi-Tapu ʼaē ʼe tou maʼu ai te taki moʼoni ki totatou temi?
3 Kapau neʼe koutou tuku te kiʼi pepa lotu “Pourquoi avoir confiance en la Bible” (He koʼe ʼe falala ki te Tohi-Tapu) ʼi takotou ʼuluaki felogoi, ʼe feala ke koutou liliu pea koutou ʼui age:
◼ “ ʼE tala fakalelei mai e te Tohi-Tapu koia ko te logo ʼe haʼu mai te ʼAtua pea ʼe ina foaki mai te maʼuli heʼegata mo kapau ʼe tou tui pea mo maʼuliʼi te ʼu meʼa ʼaē ʼe ina fakahā mai, ʼi takotou manatu ʼe ʼaoga anai koa ke lahi tatatou mahino ki te ʼu talanoa ʼaia? [Tuku ke fai mai hana tali.] Fakatokagaʼi te fakakikite ʼa te Tohi-Tapu ʼo ʼuhiga mo te faʼahiga meʼa ʼo te tuʼu ʼaenī. [Lau ia 2 Timoteo 3:1-5 ʼi te pasina 5 ʼo te kiʼi pepa lotu.] ʼI tau manatu ko te talanoa ʼaenī ʼe hoko koa ia ʼaho nei? [Tuku ke fai mai hana tali.] ʼE ʼi ai te ʼu tupuʼaga tāfito ʼo tatatou ʼamanaki ki te ʼu ʼaluʼaga lelei ʼi te temi ka haʼu?” ʼE feala ke koutou fai he fakatafito ʼo ʼuhiga mo he tahi ʼaʼahi ʼo vakaʼi te ʼu palakalafe fakaʼosi e lua ʼo te kiʼi pepa lotu peʼe fakaʼaogaʼi te pasina 161 ʼo te tohi La Bible: Parole de Dieu ou des hommes? (Te Tohi-Tapu: Folafola ʼa te ʼAtua peʼe ʼa te tagata), ʼo fakamahino te ʼamanaki fakaofoofo ʼe foaki e te Tohi-Tapu ki te malamanei.
4 Kapau neʼe fia logo ia ia ʼaē neʼe fai palalau mo koutou ki te maʼuhiga ʼo te Tohi-Tapu pea neʼe koutou fakahā age te ʼu manatu tāfito ʼo te kapite 12 ʼo te tohi “La Bible: Parole de Dieu ou des hommes?” (Te Tohi-Tapu: Folafola ʼa te ʼAtua peʼe ʼa te tagata), ʼe feala hakotou ʼui age:
◼ “ ʼE tou fia fai ki te ʼu meʼa ʼaē ʼe ʼaoga kia tatou ia ʼaho nei, koia koa la? ʼE mole koutou leleiʼia anai mokā ʼe fakagata ia te tau? [Tuku ke fai mai hana tali.] Kapau neʼe ako e te hahaʼi ke nātou maʼuli ʼi te tokalelei mo nātou fuli ʼaē mai te ʼu ʼatu puleʼaga, ko te meʼa ʼaia ʼe ko he kamataʼaga lelei, kaeā koa la? [Tuku ke fai mai hana tali.] Neʼe fakakikite fakaleleiʼi mai te faʼahi ʼaia e te Tohi-Tapu. [Lau ia Isaia 2:2, 3.] Neʼe mole heʼeki koutou fehuʼi koa peʼe feafeaʼi pea ko ʼafea ʼaē ka hoko anai te faʼahi ʼaia?” Fakamahino age ki ai ʼe koutou fia palalau anai mo ia ki te fehuʼi ʼaia ʼi he temi ʼe faigamālie ki ai.
5 Kapau neʼe koutou tuku te Tohi-Tapu “Traduction du monde nouveau”, ʼe feala hakotou liliu pea koutou ʼui age:
◼ “ ʼI tau lau te Tohi-Tapu ʼaē neʼe ʼau tuku atu, ʼe lagi neʼe ke tokagaʼi ʼe fakaʼaogaʼi ai te huafa ʼo te ʼAtua ʼi te faʼahi fuli. Ko te faʼahi ʼaia ʼe tuputupu maʼuhiga ai ia ʼi ʼihi ʼu fakaliliu ʼo te Tohi-Tapu. Logope la te lotolotolua ʼa ʼihi ʼi te fakaʼaogaʼi ʼo te huafa ʼo Sehova, ʼe tonu ke tou taupau maʼu ʼi totatou ʼatamai neʼe ina fakahā tona huafa kua fualoa pea neʼe ina fakaloto mālohiʼi tana ʼu kaugana ke nātou fakaʼaogaʼi moʼo fakaʼiloga ʼo ia ko te ʼAtua moʼoni pea mo maʼuli. Fakatokagaʼi te meʼa neʼe tohi e te tagata fai pesalemo ia Pesalemo 83:18.” Lau te vaega, pea faka fealagia ki ai ke fakahā mai tana manatu. ʼE feala ke koutou toe fakaʼaogaʼi he ʼu manatu ʼe fakatafito ki te kupu tāfito ʼaē “Jéhovah”, ʼo kamata ʼi te pasina 195 ʼo te tohi Comment raisonner.
6 Gata pe ki te Tohi-Tapu ʼe ina foaki mai te taki ʼe ʼaoga ki te tagata (Sel. 10:23). Ko te ako ʼo te Folafola ʼa te ʼAtua ʼe ko te ala pe ʼaia e tahi moʼo ako ʼo Tana ʼu fakatuʼutuʼu pea mo maʼu ʼo Tona ʼofa. Koia, ke tou fakaafe fakalelei niʼihi ke nātou maʼu he fua lelei mai tana ʼu tokoni fakapotopoto pea mo ʼaoga.