Te Maʼuhiga ʼo Te Tohi-Tapu ʼi Te Mālama ʼAenī
1 Tokolahi ia ʼaho nei ʼe ʼui maʼa nātou ko te Tohi-Tapu ko he tohi kua ʼāfea pea ʼe mole totonu. Logope la te lahi ʼo tona tufa pea mo tona fakaliliu lolotoga te hisitolia, ʼe tokosiʼi ia nātou ʼaē ʼe nātou lau pea ʼe toe siʼisiʼi age ia nātou ʼaē ʼe nātou mulimuli ki tana takitaki.
2 ʼE kehe ia mo tatou, heʼe tou faka maʼuhigaʼi te Tohi-Tapu ohage ko te Folafola ʼa te ʼAtua. Ko te ʼu faʼahiga meʼa ʼe hoko ʼe hā mai ai ko te ʼu fakamatala ʼa te Tohi-Tapu ʼe moʼoni. Pea, ko tana felogoi tahi fakaofoofo, tana ʼu lea faka polofeta, tana agapoto, pea mo tona mālohi ʼaē ʼe ina uga ai te hahaʼi fuli ki te meʼa ʼaē ʼe lelei ʼo nātou fakahā ai ko te Tohi-Tapu ʼe “haʼu mai te ʼAtua”. (2 Tim. 3:16.) Ko tatatou māhani takitokotahi pea mo tatatou fakafetaʼi ki te meʼa ʼofa fakatalakitupua ʼaia ʼe tonu anai ke nā uga tatou ke tou fakaloto mālohiʼi niʼihi ke nātou maʼu tona ʼaoga moʼoni.
3 ʼE feala hakotou ʼui age fēnei:
◼ “ ʼI te ʼu faigataʼaʼia ʼaē ʼe tau mo te mālama ʼaenī, tokolahi te hahaʼi ʼe ʼui maʼa nātou ʼe faigataʼa te tui ki te ʼAtua, peʼe nātou feʼuiʼaki peʼe feala ke fakatokatoka e te ʼAtua ʼotatou ʼu faigataʼaʼia. Koteā koa la tau manatu ki te faʼahi ʼaia? [Tuku ke fai mai hana tali.] Sio mai muʼa ki te kupu tāfito ʼo te kiʼi pepa lotu ʼaenī, Pourquoi avoir confiance en la Bible (He koʼe ʼe falala ki te Tohi-Tapu).” Koutou fakatokagaʼi ia ia ki te paki ʼaē ʼi te tuʼaʼi pasina, ʼosi ʼaia pea koutou lau age te ʼuluaki pea mo te lua palakalafe ʼo te pasina 2. Kapau ʼe ina fakahā atu tana fia logo, ʼe feala ke koutou lau pea mo fai palalau ki te ʼu vaega ʼaē ʼe tuʼu ʼi te palakalafe lua. ʼOsi ʼaia pea koutou fakahā te tohi “La Bible: Parole de Dieu ou des hommes?” (Te Tohi-Tapu: Folafola ʼa te ʼAtua peʼe ʼa te tagata?) ki tona totogi.
4 ʼE feala hakotou fakaʼaogaʼi he tahi faʼahiga palalau:
◼ “ ʼE mole ʼe ke tonu tahi koa mo ʼau, ʼe ʼaoga he taki ki te malamanei moʼo tauʼi ʼo te ʼu faigataʼaʼia ʼo te maʼuli? [Tuku ke fai mai hana tali.] ʼI te temi muʼa, neʼe tautau kumi tokoni te hahaʼi ki te Tohi-Tapu, kae kua fetogi te temi ia. ʼI tau manatu la ʼe maʼuhiga koa ia te Tohi-Tapu ia ʼaho nei? [Tuku ke fai mai hana tali.] Koutou fakatokagaʼi te manatu ʼe tuʼu ia 2 Timoteo 3:16. [Lau.] Ko te Folafola ʼa te ʼAtua ʼe mole ina tokoniʼi pe tatou ke tou fai he ʼu tonu fakapotopoto kae ina foaki mai foki he ʼamanaki mālohi ki te temi ka haʼu.” Koutou lau ia Soane 17:3. ʼOsi ʼaia pea koutou fakahā he ʼu puani tāfito e tahi peʼe lua neʼe koutou tāʼofi ʼi te tohi La Bible: Parole de Dieu ou des hommes? (Te Tohi-Tapu: Folafola ʼa te ʼAtua peʼe ʼa te tagata?) ʼe fakamahino ai te maʼuhiga ʼo te Tohi-Tapu.
5 ʼE feala ke koutou maʼu he tokoni ʼo fakaʼaogaʼi te ʼu ʼuluaki palalau ʼaē ʼe tuʼu ʼi te ʼu pasina 10 mo te 11 ʼo te tohi Comment raisonner ʼi te ʼu kupu ʼaē “Bible/Dieu” (Tohi-Tapu/ʼAtua). ʼE feala ke ʼaoga kia koutou te talanoa ʼaē ʼe tuʼu ʼi te ʼu pasina 51 ki te 60 ke faigamālie ai hakotou tali ki te ʼu fehuʼi peʼe ko te ʼu faʼahiga palalau ʼe fai atu.
6 Ko te tufa ʼo te Tohi-Tapu Traduction du monde nouveau: ʼI takotou ʼuluaki fai palalau ʼe feala hakotou fakahā age te Tohi-Tapu Traduction du monde nouveau. ʼE feala ke koutou fehuʼi age peʼe ʼi ai hana Tohi-Tapu pea ʼi tana manatu ʼe faigafua ia tona lau. ʼO mulimuli ki tana tali, koutou fakahā age he ʼu faʼahi ʼaoga ʼo te Tohi-Tapu Traduction du monde nouveau. ʼE feala ke koutou fakahā age he puani e tahi peʼe lua ʼo te pasina 408 ki te 411 ʼo te tohi Comment raisonner.
7 Ke tou tokaga ki te ʼu faigamālie moʼo fakaloto mālohi ʼo te hahaʼi ke nātou lau ia te Tohi-Tapu. Tou tokoni ki te hahaʼi ʼaē ʼe fia logo ke nātou fakatafito tanatou fakaʼapaʼapa pea mo tonatou ʼofa ki te Folafola ʼa te ʼAtua. ʼAki te maʼuliʼi ʼo te ʼu fakatuʼutuʼu ʼi tonatou maʼuli takitokotahi pea mo nātou maʼu ia te ʼatamai mālama ʼo te moʼoni, ʼe nātou maʼu anai he ʼu tapuakina lahi ʼi te temi nei pea mo te temi ka haʼu. — Pes. 119:105.