Te Tohi-Tapu—Ko He Takitaki Fakaʼatua Maʼa Te Hahaʼi Fuli
1 Neʼe fakafuafua ko Tohi-Tapu ʼe fā miliale kua tā ia lea pea mo faʼahiga lea e 2 100 tupu, ʼo feala ai ki te toko 90 ʼi te teau ʼo te hahaʼi, ke nātou maʼu te Folafola ʼa te ʼAtua ʼi te kele katoa. Kae ʼe ʼi ai te hoge ʼi te malamanei, “ko he hoge ki te fagono ki te ʼu folafola ʼa Sehova.” (Amosi 8:11) Ko te tokolahi ʼo te hahaʼi ʼe nātou maʼu tanatou Tohi-Tapu, kae ʼe mole nātou lau peʼe mole nātou mahino ki te ʼu meʼa ʼaē ʼe tuʼu ʼi loto. Pea ko ʼihi ʼe mole nātou ʼiloʼi pe la kua maʼu te Tauhi Foou ʼi te temi nei ʼi te lea Fakaʼuvea. ʼE tou lava uga feafeaʼi ia nātou ke nātou tokagaʼi te Tohi-Tapu, kae tāfito ke nātou tokagaʼi te ʼu akonaki ʼa Sesu?
2 ʼI Tesepeli, ʼe tou tufa anai te tohi Te tagata ʼaē ʼe lahi tokotahi ʼo te ʼu temi fuli. ʼE tou fakahā anai tatatou loto fakafetaʼi ʼaupito ki te meʼa ʼofa ʼaia mai ia Sehova, ʼo tou tokoni fakafiafia ki te hahaʼi ke nātou tali te Tohi-Tapu ohage ko he takitaki fakaʼatua maʼa te hahaʼi fuli pe. ʼI tatatou fai faka mafola ʼi te ʼu ʼapi peʼe ʼi te fagonogono faigamālie, ʼe feala ke tou lau fakahagatonu te ʼu vaega ʼi te Tauhi Foou Fakaʼuvea.
3 ʼE feala ke koutou kamata takotou fai palalau ʼo koutou fakaʼaogaʼi te kiʼi pepa lotu “Ko Ai Koa Te ʼu Pule ʼo Te Malamanei?” ʼE feala ke koutou ʼui fēnei:
◼ “Logope la ko te toko 90 ʼi te teau ʼo te hahaʼi ʼi te malamanei, ʼe feala ke nātou lau te ʼu akonaki ʼa Sesu, kae ko te tokosiʼi ia nātou ʼe nātou ʼiloʼi moʼoni te ʼu akonaki ʼaia. Ohage ko tona ʼui e Sesu, ʼe ke ʼiloʼi koa pe ko ai ʼaē ʼe pule moʼoni ki te malamanei?” Koutou tuku ke ina tali atu, pea koutou lau te ʼu ʼuluaki palakalafe e lua ʼo te kiʼi pepa lotu, pea mo te vaega ʼo Soane 12:31. Koutou fakahā age te kapite 13 ʼo te tohi Te tagata ʼaē ʼe lahi tokotahi, pea koutou ʼui age kapau ʼe ina fia toʼo, pea ʼe 400. Kapau ʼe mole loto ia kiai, pea koutou kole age ke ina fakaʼosi te lau ʼo te kiʼi pepa lotu. Koutou faka maʼuhigaʼi te lua kupu tāfito, “Kua tala te ʼu pule ʼo te malamanei.”
4 ʼI takotou toe liliu ʼo ʼaʼahi te hahaʼi ʼaē neʼe koutou tuku ki ai te kiʼi pepa lotu “Ko Ai Koa Te ʼu Pule ʼo Te Malamanei,” ʼe feala ke koutou ʼahiʼahiʼi te faʼifaʼitaki ʼaenī:
◼ ʼI takotou ʼosi fakahā age tokotou higoa, koutou lau te ʼu ʼuluaki palakalafe e lua ʼo te pasina tolu ʼo te kiʼi pepa lotu. Koutou fehuʼi age pe neʼe mole heʼeki ina fakakaukauʼi koa la pe koʼe ʼe lahi te ʼu mamahi ʼaē ʼe hoko ʼi te malamanei. Koutou fehuʼi age peʼe ʼi tana manatu, ʼe ko te hala koa ʼa te ʼAtua peʼe ko te hala ʼa Satana. ʼI tana ʼosi tali atu, koutou fakahā age te pasina 8 ʼo te kaupepa lahi Fakamaʼua, pea koutou fakahā age kia ia ʼe koutou fia talanoa mo ia ki te ʼu tali ʼo te ʼu fehuʼi ʼaē ʼe tuʼu ai, ʼo koutou kamata ai he ako.
5 Peʼe feala ke koutou ʼahiʼahiʼi te ʼu ʼuluaki palalau ʼaenī:
◼ “ ʼE mātou fehuʼi ki te hahaʼi pe nātou manatu tahi mo te ʼui ʼaē ko Sesu Kilisito neʼe ko te tagata ʼaē neʼe lahi tokotahi. [Koutou tuku ke ina tali atu.] ʼE mahino papau, ko te tokolahi ʼo te hahaʼi neʼe nātou fetogi te ʼu gāue ʼo te tagata, pea ko ʼihi neʼe nātou tokoni ki te tuputupu ʼo te maʼuli ʼo te hahaʼi, kae koutou fakatokagaʼi te faʼahi ʼaē neʼe kehe ai ia Sesu Kilisito ʼi te hahaʼi fuli ʼaia. [Koutou lau ia Soane 17:3.] ʼE mole he tagata ʼe feala ke ina foaki te maʼuli heʼegata ki te malamanei.” Pea mo koutou fakahā age e 400 te totogi ʼo te tohi. Koutou ʼui age ʼe koutou toe liliu mai anai moʼo fakahā age pe koʼe ʼe feala ke tou falala ki te fakapapau ʼaia ʼo ʼuhiga mo te maʼuli heʼegata.
6 ʼI takotou toe liliu kia ia ʼaē neʼe koutou tuku ki ai te tohi “Te Tagata ʼAē ʼe Lahi Tokotahi,” ʼe feala ke koutou ʼui fēnei:
◼ “Neʼe moʼoni te ʼu meʼa fuli ʼaē neʼe ʼui e Sesu. ʼE koutou manatu feiā koa la? [Koutou tuku ke ina tali atu.] Ia ʼaho nei ʼi totatou ʼu tafaʼaki, ʼe feala ke tou mamata ki te hoko moʼoni ʼo te ʼu meʼa ʼaē neʼe ina fakakikite ki totatou temi. ʼI te kei maʼuli ʼa Sesu ʼi te kele, neʼe ina fakamatala te ʼu meʼa ka hoko anai ʼi muʼa ʼo te fakaʼosi ʼo te mālama ʼaenī. Kae neʼe ina toe fakaloto mālohiʼi tana ʼu tisipulo ke nātou fiafia, he ko te ʼu meʼa ʼaia ʼe nātou fakahā anai te kua vave hoko mai ʼo te Puleʼaga ʼo te ʼAtua.” ʼI takotou ʼosi palalau fakanounou ki ʼihi faʼahi ʼo te fakaʼiloga ʼo te ʼi henī ʼa Kilisito ʼi te kapite 111 ʼo te tohi Te tagata ʼaē ʼe lahi tokotahi, koutou fakahā age te kapite fakamuli, ʼaē ʼe fakahā ai te ʼu tapuakina ʼo tona Puleʼaga. Kapau ʼe ina fia ʼiloʼi te ʼu meʼa ʼaia, pea koutou fakahā age ʼe feala hana ako ʼi te tohi Te ʼAtamai Mālama, peʼe ʼi te kaupepa lahi Fakamaʼua.
7 Kapau ʼe fehuʼi atu ʼi takotou gāue peʼe ʼi te faleako te tupuʼaga ʼo takotou mole kau ki te ʼu talatisio faka lotu ʼo te Po Tapu, pea ʼe feala ke koutou fakaʼaogaʼi te faigamālie ʼaia moʼo tuku te tohi, ʼo koutou ʼui fēnei:
◼ “ ʼE mole ʼau kau ki te Po Tapu heʼe mole faka maʼuhigaʼi e te lafeti ʼaia ia Sesu, ia ia tokotahi pe ʼaē ʼe feala ke ina hāofaki tatou pea ko ia tokotahi pe ʼaē ka ina fakagata anai te ʼu tau pea mo te ʼu fihifihia ʼe hoko ʼuhi ko te fakakeheʼi ʼo te lanu ʼo te hahaʼi. [Koutou talanoa ki te vaega ʼo Gāue 4:12 peʼe koutou lau age te vaega ʼaia.] Ko Sesu ʼe mole kei tamasiʼi kae kua liliu ko te hau. Ko te tohi ʼaenī, Te tagata ʼaē ʼe lahi tokotahi ʼo te ʼu temi fuli, ʼe talanoa ki te ʼu akonaki pea mo te ʼu milakulo fuli ʼaē neʼe fai e Sesu, pea ʼe ina fakahā anai peʼe feafeaʼi tana pulihi ia te ʼu mamahi ʼo te tagata.” Pea koutou fakahā age te paki ʼo te kapite 133, pea mo koutou lau age te palakalafe lua ʼo te pasina ʼaē ʼe hoa kiai.
8 ʼI takotou fai te ʼaʼahi, ʼe feala ke koutou ʼui fēnei:
◼ “ ʼE ʼau fia fakahā atu te ʼu tapuakina ʼaē ʼe feala ke tou maʼu ʼi te temi ka haʼu, ʼi te pule ʼo Kilisito.” Koutou fakamahino age te polokalama ako Tohi-Tapu ʼaē ʼe mole totogi, pea koutou fakahā age ʼi te temi pe ʼaia peʼe feafeaʼi tona fai.
9 Tou faikole ke tapuakina e Sehova tatatou ʼu faiga fuli ʼaē ke tokagaʼi e te hahaʼi te Folafola ʼa te ʼAtua, te Tohi-Tapu, ʼaē ʼe taupau ai te ʼu akonaki ʼa Sesu pea mo te fakamatala ʼo te ʼu milakulo ʼaē neʼe ina fai.