Ko Te ʼu Fakatahi Faka Tisitilike: “Ko Te Akonaki Fakaʼatua”
KO NĀTOU fuli ʼaē ʼe nātou loto ke akoʼi nātou e Sehova ʼe hohaʼa tanatou fakatalitali ʼo ʼuhiga mo te ʼu fakatahi faka tisitilike, “ko te akonaki fakaʼatua”. ʼE fakahā anai ʼi te polokalama ʼaho fā ʼaia te ʼu faʼahi maʼuhiga ʼo te ako fakaʼatua ʼaia ʼe nātou hāofaki te kau kilisitiano ʼi te ʼu temi ʼaenī ʼaē ʼe tuputupu ai te ʼu fihifihia ʼo nātou takitokotahi pea mo te maveuveu ʼo te malamanei. ʼE tokoni anai te polokalama ʼaia ke nātou nonofo mālohi ʼo ʼuhiga mo te ʼu meʼa ‘kei fakafeagai pe ki te akonaki maʼuli’. (1 Timoteo 1:10.) ʼE ina toe fakaloto mālohiʼi aipe ia nātou ʼaē ʼe kau ai ke nātou liliu ko he kau faiako lelei ʼo te Folafola ʼo te ʼAtua.
ʼE ko he ʼu faʼifaʼitaki lelei ʼe tou maʼu ke tou muliʼi! Ko Sehova ʼAtua ko te Tagata fai akonaki lahi pe ʼaia e tahi! Koia, neʼe ʼui fakahagatonu ai e Eliu kia Sopo ko Sehova “ ʼe ko ia ʼe ina akoʼi lahi age tatou ʼi te ʼu manu ʼo te kele, pea ʼe ina fakaliliu tatou ke tou poto age ʼi te ʼu manu lele ʼo te lagi”. Neʼe fēnei tana fai te fehuʼi ʼo ʼuhiga mo Sehova: “Ko ai koa ʼaē ʼe faiako ohage ko ia?” (Sopo 35:11; 36:22). ʼE fakahā ia Isaia 30:20 ia te ʼAtua ohage “ko te tagata Faiako lahi”.
Ko ia ʼaē ʼe hoa kia Sehova ʼe hage ko he tagata fai akonaki ko tona ʼAlo, ko Sesu Kilisito. Neʼe ʼiloa ia ohage “ko te Tagata fai akonaki” pea ohage ko he “Faiako”, ʼaē ʼe faka ʼuhiga kia ia tuʼa 50 ʼi te ʼu Evaselio. Logope la tana fai te ʼu fakamālōlō fakaofoofo pea mo ʼihi milakulo, neʼe mole logona ia ohage ko he Tōketā, kae ohage ko he Tagata fai akonaki, peʼe Faiako. — Mateo 8:19; Luka 5:5; Soane 13:13.
Koia ʼaē, neʼe akoʼi ai e Sesu ki tana kau tisipulo pea mo tana kau ʼapositolo ke nātou liliu ko he kau fai akonaki ohage ko ia. ʼE tou maʼu te faʼahi ʼaia ia Mateo 10:5 ki te 11:1 pea mo Luka 10:1-11. Ia muʼa ʼo tana hake ki selo, neʼe foaki age e Sesu ki tana ʼu tisipulo te akonaki ʼiloa ʼo ʼuhiga mo te gāue ʼaē ʼe tuʼu ia Mateo 28:19, 20: “Koutou ʼolo pea mo koutou fai he kau tisipulo ʼi te hahaʼi ʼo te fenua fuli pe, ʼo koutou papitemaʼi ia nātou ʼaki te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou akonakiʼi ia nātou ke nātou taupau te ʼu meʼa fuli pe neʼe ʼau fakatotonu atu.” Ko te tohi ʼo Gāue, ʼo toe feiā aipe mo te ʼu tohi neʼe fakamanava ʼe hoa ki ai ʼi te ʼu Tohi faka keleka faka kilisitiano, ʼe nātou fakamatalatala te ʼaluʼaga ʼaē ʼo te faiga fakamalotoloto, pea mo te faiva, pea mo te agatonu ʼa te kau ʼuluaki tisipulo ʼo ʼuhiga mo te ʼave ʼo te gāue ʼaē ko te fai akonaki.
Kua maʼuhiga ʼaupito age te gāue akonaki ʼaia ʼi totatou temi. ʼE tou maʼuʼuli ʼi te ʼu ʼaho fakamuli ʼo te ʼu faʼahiga meʼa ʼo te tuʼu ʼaenī, pea ko tona tupuʼaga ʼaē ʼe ʼi ai te ʼu hahaʼi ke hāofaki. ʼI te mole kau ʼa te hahaʼi ki te ʼu agahala ʼa te Papiloni Lahi feiā aipe mo tona ʼu tautea, ʼe tonu ke akoʼi nātou pea mo tokoniʼi nātou ke nātou mavae mai te Papiloni Lahi pea mo nātou fakahā ʼe nātou kaugana kia Sehova pea mo tona Puleʼaga. — Fakahā 18:4.
Moʼo tokoni ki te kau Fakamoʼoni fuli ʼa Sehova ʼi tanatou ʼu faiga moʼo ʼave tanatou gāue fai akonaki, ko Sehova ʼaki tana kautahi ʼe ina foaki te ʼu fakatahi faka tisitilike ʼaē “ko te akonaki fakaʼatua”. ʼE kamata anai te ʼu fakatahi ʼaho fā ʼi te potu Tokelau ʼi te kamata ʼo te temi vevela ʼi te taʼu 1993. ʼAmusia age pe ke ʼiloʼi papau e te ʼu kaugana ʼa Sehova takitokotahi ʼe kau ki he fakatahi ʼi te ʼu fakatahi ʼaia, ʼi hanatou kau ai pea mo fakalogo ki te katiko ʼuluaki pea mo te faikole ʼi te felianima hili hoʼatā ʼo aʼu ki te faikole fakaʼosi ʼi te ʼahotapu hili hoʼatā.