Neʼe Akoʼi Nātou e Sehova ʼo Aʼu Mai Ki Te Temi Nei

“Ko Sehova totonu neʼe ina foaki totonu mai te lea ʼo nātou neʼe akoʼi.”—Isaia 50:4.

1, 2. (a) Koteā te tupuʼaga ʼaē neʼe teuteuʼi ai e Sehova tana tagata ako ʼofaina, pea neʼe koteā tona fua? (b) Neʼe feafeaʼi te fakamoʼoni e Sesu te Matapuna ʼo tana ʼu akonaki?

KO SEHOVA ʼATUA ko te Tagata Faiakonaki talu mai tana kua liliu ko te Tāmai. ʼI te temi muʼa, ʼi te ʼosi talagataʼa ʼo tana tahi fānau, neʼe ina teuteuʼi tana tagata ako ʼofaina, tona ʼuluaki tupu, ki he minisitelio ʼi te kele. (Tāʼaga Lea 8:30) ʼE fakahā ʼi hona ʼaluʼaga fakakikite ʼi te tohi ʼo Isaia kapite 50 te tagata ako ʼaia, ʼo ʼui maʼana: “Ko te Tuʼi ʼAliki ko Sehova neʼe ina foaki totonu mai te lea ʼo nātou neʼe akoʼi, koteʼuhi ke ʼau poto ʼi te tali ʼaki he palalau ki ʼaē ʼe gaʼegaʼe.” (Isaia 50:4) ʼAki tana maʼuliʼi te akonaki ʼo tana Tāmai ʼi tana ʼi te kele, ko Sesu neʼe ko te matapuna ʼo te fakafimālie kia nātou fuli ʼaē neʼe ‘gaʼegaʼe pea mo mafasia.’—Mateo 11:28-30.

² Neʼe lahi te ʼu gāue mālohi neʼe fai e Sesu ʼi te ʼuluaki sēkulō. Neʼe ina avahi te ʼu mata ʼo te kau kivi ʼo toe feiā pe ki te fakatuʼuake ʼo te kau mate, kae neʼe ʼiloa tāfito ia e te hahaʼi ʼo tona temi, ohage ko he tagata faiako. Ko tana kau tisipulo ʼo toe feiā pe mo nātou neʼe fakafeagai kia te ia, neʼe nātou fakaʼaogaʼi te tuʼulaga ʼaia ʼo ʼuhiga mo ia. (Mateo 8:19; 9:11; 12:38; 19:16; Soane 3:2) Ko Sesu neʼe mole ina faka ʼuhigaʼi pe la ʼi he temi kia ia totonu te ʼu meʼa ʼaē neʼe ina akonaki kae ʼaki te agavaivai neʼe fakamoʼoni ia ki te meʼa ʼaenī: “Ko te meʼa ʼaē ʼe ʼau akonakiʼi ʼe mole ʼaʼaku ia, kae ʼa ia ʼaē neʼe ina fekauʼi mai ʼau.” “Ohage ko tona akoʼi mai e taku Tāmai, ʼe ʼau tala feiā te ʼu meʼa ʼaia.”—Soane 7:16; 8:28; 12:49.

Te ʼu Felogoi Lelei ʼe Maʼu e Te Tagata Faiako Mo Tana Kau Ako

3. ʼE ʼiloga feafeaʼi ʼi te lea faka polofeta ʼa Isaia te tokaga ʼa Sehova kia nātou ʼaē ʼe ina akoʼi?

³ Ko he tagata faiako lelei ʼe tokaga ia ki tana kau ako takitokotahi, ʼaki he tokaga fakalelei pea mo ʼofa. ʼE fakahā ia Isaia kapite 50, ko Sehova ʼAtua ʼe ina maʼu te taʼi faʼahiga tokaga ʼaia ʼo ʼuhiga mo nātou ʼaē ʼe ina akoʼi. ʼE ʼui fēnei ʼi te lea faka polofeta ʼaia: “ ʼE ina fakaʼala ʼi te uhu fuli; ʼe ina fakaʼala toku taliga moʼo fagono kia nātou neʼe akoʼi.” (Isaia 50:4) Ko te palalau ʼaenī ʼe ina fakahā mai ko he tagata faiako ʼe ina fakaʼala tana kau ako ʼi te kei hegihegi ʼo te ʼaho ke feala hana akoʼi ia nātou. ʼI tana fakamahinohino te fakaʼaogaʼi ʼaē ʼo te lea faka polofeta, neʼe ʼui fēnei e te tagata poto ʼi te ako faka Tohi-Tapu: “Ko te manatu ʼaē ʼi henī, ko te Tagata Faitotogi ʼe tonu ko he tahi anai neʼe kau ʼi te faleako [ko he palalau fakatātā] ʼa te ʼAtua; pea ʼe ina maʼu anai te ʼu kalitate moʼo foaki te ako ki niʼihi. . . . ʼE feala noa pe ia ki te Mesia, ʼaki te akonaki Fakaʼatua, ke ina maʼu te tuʼulaga ʼaē ko te tagata faiako ʼo te malamanei.”

4. Neʼe feafeaʼi te tali ʼa Sesu ki te akonaki ʼa tana Tāmai?

⁴ ʼO ʼuhiga mo te faʼahi ʼaia, ʼe fakalogo te kau ako ki te akonaki ʼo tonatou tagata faiako. Neʼe feafeaʼi te tali ʼa Sesu ki te akonaki ʼa tana Tāmai? ʼE ʼalutahi tana tali mo te manatu ʼaē ʼe tou lau ia Isaia 50:5: “Ko te Tuʼi ʼAliki ko Sehova totonu neʼe ina avahi toku taliga, pea ko ʼau neʼe mole ʼau talagataʼa. Neʼe mole ʼau maliu kehe mai ai ʼo fakafeagai.” ʼIo, neʼe holi ia Sesu ke akoʼi ia ia. Ohage ko te manatu ia Isaia, neʼe ko ia ko he tahi ʼe fagono lelei. Pea tahi ʼaē meʼa, neʼe lotolelei pe ia ʼo fai ia meʼa fuli ʼe kole age e tana Tāmai ke ina fai. Neʼe mole talagataʼa ia; kae neʼe ʼui maʼana: “Kaʼe, ke mole ko toku finegalo ʼaē ʼe tonu ke fai, kaʼe ʼo koe ia.”—Luka 22:42.

5. (a) Koteā ʼaē ʼe hā ʼaki mai ai neʼe ʼiloʼi fakatomuʼa e Sesu te ʼu fakataga ʼaē ka hoko anai kia te ia ʼi te kele? (b) Neʼe hoko feafeaʼi te lea faka polofeta ʼaē ia Isaia 50:6?

⁵ ʼE ʼiloga ʼi te lea faka polofeta, neʼe fakahā age ki te ʼAlo te ʼu ikuʼaga maʼuhiga ʼe feala ke hoko ʼi tana fai ʼaē ʼo te finegalo ʼo te ʼAtua. Neʼe ʼasi te faʼahi ʼaia ʼi te temi ʼaē neʼe ʼui fēnei e te tahi neʼe akoʼi: “Neʼe ʼau tuku toku tuʼa kia nātou ʼaē neʼe nātou haha ʼau, pea ko ʼoku kauʼahe kia nātou ʼaē neʼe nātou fusi toku ʼu fulu. Neʼe mole ʼau fūfū toku ʼu fofoga ki te fakalainoa pea mo te ʼu ʼanuʼanuhi.” (Isaia 50:6) Ohage ko tona fakahā e te lea faka polofeta, neʼe gaohi koviʼi ia Sesu ʼi te kele. Neʼe tohi fēnei e te ʼapositolo ko Mateo: “Neʼe nātou ʼanuʼanuhi ai tona fofoga . . . Ko ʼihi neʼe nātou fepataki ia ia.” (Mateo 26:67) Neʼe fakahoko te faʼahi ʼaia e te kau takitaki lotu ʼi te po ʼo te Pāsikate ʼo te taʼu 33 ʼo totatou temi. Ko te ʼaho ki muli mai neʼe fakalogo pe Sesu kia nātou ʼaē ka nātou haha ia ia, pea ko te kau solia Loma neʼe nātou haha fakakovi ʼosi ia ia ʼi muʼa ʼo tona haʼi ki te pou fakamamahiʼi ke mate ai.—Soane 19:1-3, 16-23.

6. Koteā ʼaē ʼe hā ʼaki mai ko Sesu neʼe falala tuʼumaʼu ki tona Tagata Faiako, pea neʼe feafeaʼi te fakapale ʼo tana falala?

⁶ Ko te ʼAlo, ʼi tona akoʼi lelei fakatomuʼa, neʼe mole puli ʼi he temi ia te ia te falala ʼaē ki tona Tagata Faiakonaki. Ko te faʼahi ʼaia neʼe hā ʼaki te manatu ʼe ina ʼui ʼo mulimuli pe ki te lea faka polofeta ʼaenī: “Ko te Tuʼi ʼAliki ko Sehova totonu ʼe ina hāofaki anai ʼau. Ko te tupuʼaga la ʼaia ʼo taku mole logoʼi te fakalainoa.” (Isaia 50:7) Neʼe lahi ʼaupito te fakapale neʼe maʼu e Sesu ʼi tana falala ʼaē ki te tokoni ʼo tana Tagata Faiakonaki. Neʼe faka maʼuhigaʼi ia ia e tana Tāmai, ʼo ina tapuakina ia ia ʼaki te tuʼulaga ʼe māʼoluga age ʼi te ʼu tuʼulaga ʼo te ʼu kaugana fuli ʼaē ʼa te ʼAtua. (Filipe 2:5-11) ʼE tou ʼamanaki ke tou maʼu mo tatou te ʼu tapuakina lahi mo kapau ʼe tou mulimuli lelei ki te akonaki ʼa Sehova ʼo mole “tou maliu kehe mai ai ʼo fakafeagai.” Tou vakaʼi muʼa pe neʼe feafeaʼi te aʼu mai ki totatou temi ia te akonaki ʼaia.

Ko Te Polokalama Faiakonaki ʼe Mafola

7. Neʼe fakahoko feafeaʼi e Sehova tana akonaki ki te kele?

⁷ Ohage ko te meʼa neʼe kua tou ʼosi vakaʼi, neʼe fakaʼaogaʼi e Sehova tana Tagata Fakafofoga fakakelekele, ia Sesu Kilisito, moʼo fakahā te akonaki fakaʼatua ʼi te ʼuluaki sēkulō. (Soane 16:27, 28) Neʼe fakahā tuʼumaʼu e Sesu ko te Folafola ʼa te ʼAtua neʼe ko te matapuna ia ʼo tana faiakonaki, pea ko he faʼifaʼitaki neʼe ina tuku kia nātou ʼaē neʼe ina akoʼi. (Mateo 4:4, 7, 10; 21:13; 26:24, 31) Ki muli age, neʼe fakahā e Sehova tana akonaki ki te kele ʼaki te minisitelio ʼa te hahaʼi ʼaē neʼe akoʼi. Koutou manatuʼi neʼe fakatotonu age e Sesu kia nātou, ʼo fēnei: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, . . . ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.” (Mateo 28:19, 20) Ka fai he ʼu tisipulo, ko nātou ʼaia ʼe nātou liliu ʼo kau ki te “fale ʼo te ʼAtua, . . . te kokelekasio ʼo te ʼAtua maʼuli.” (1 Timoteo 3:15) Neʼe toe akoʼi foki nātou ʼi te ʼu kokelekasio ʼaē ʼe akoʼi ai nātou e Sehova. (Gāue 14:23; 15:41; 16:5; 1 Kolonito 11:16) Ko te akonaki fakaʼatua neʼe hoholo feiā koa ʼo aʼu mai ki totatou temi?

8. Neʼe fakahā feafeaʼi e Sesu ko te gāue fai faka mafola ʼe fai anai ʼi te kele ʼi muʼa ʼo te hoko mai ʼo te temi fakaʼosi?

⁸ Ei! Ia ʼaho e tolu ʼi muʼa ʼo tona mate, neʼe fakakikite e Sesu ʼi muʼa ʼo te fakaʼosi ʼo te tuʼu ʼo te ʼu faʼahiga meʼa ʼaenī, ʼe hoko anai te toe gāue fagonogono lahi. Neʼe ʼui maʼana: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” Neʼe toe hoko e Sesu tana palalau ʼaki tana fakamahinohino, te meʼa gāue ʼaē ka ina fakahoko anai, te gāue fagonogono faka malamanei pea mo te polokalama faiakonaki. Neʼe talanoa ʼo ʼuhiga mo te “tagata kaugana agatonu mo poto” ʼaē ʼe fakaʼaogaʼi anai moʼo fakahoko te faʼahi ʼaia, peʼe ko he meʼa gāue, moʼo tufa ki Tana ʼu kaugana te meʼa kai fakalaumālie. (Mateo 24:14, 45-47) Neʼe fakaʼaogaʼi e Sehova ʼAtua te “tagata kaugana” ʼaia moʼo leʼoleʼo te ʼu meʼa ʼaē ʼi te kele ʼo te Puleʼaga.

9. Ko ai koa ʼaē ʼe ina faʼufaʼu te tagata kaugana agatonu mo poto?

⁹ ʼI te temi nei, ko te tagata kaugana agatonu mo poto ʼe faʼufaʼu e te toe ʼo te kau tofiʼa ʼo te Puleʼaga. Ko nātou ʼaia ko te kau Kilisitiano fakanofo, ko te toe ʼo te kau fakanofo ʼaē ʼi te kele ʼo te toko 144 000, ʼaē “ ʼe ʼa Kilisito” pea ʼe nātou kau ki te “hāko ʼo Apalahamo.” (Kalate 3:16, 29; Fakahā 14:1-3) ʼE lava feafeaʼi hakotou ʼiloʼi te tagata kaugana agatonu mo poto? ʼE feala ke tou ʼiloʼi lelei ʼaki te gāue ʼaē ʼe nātou fai pea mo tanatou mulimuli fakalelei ki te Folafola ʼa te ʼAtua, ia te Tohi-Tapu.

10. Koteā te ʼu meʼa gāue neʼe fakaʼaogaʼi e te kalasi ʼo te tagata kaugana moʼo fakahā te ʼu akonaki ʼa Sehova?

¹⁰ ʼE fakaʼaoga e Sehova te “tagata kaugana” ʼaia ohage ko he meʼa moʼo akoʼi te hahaʼi ia ʼaho nei. Ko te hahaʼi ʼo te kalasi ʼo te tagata kaugana neʼe nātou toʼo te higoa ʼaē ko te kau Fakamoʼoni ʼa Sehova ʼi te taʼu 1931. Talu mai ai, ko te toko lauʼi miliona neʼe nātou fakatahi mo nātou pea neʼe nātou tali te higoa ʼaia pea neʼe nātou kau mo nātou ki te faka mafola ʼo te Puleʼaga ʼo te ʼAtua. Ko te nusipepa ʼaenī, Ko Te Tule Leʼo ʼe Ina Kalagaʼi Te Puleʼaga ʼo Sehova, ko te meʼa gāue tāfito ʼaia neʼe fakaʼaogaʼi e te “tagata kaugana” ʼo ʼuhiga mo te gāue faiakonaki. Kae, ʼe toe fakaʼaogaʼi pe foki te tahi ʼu tohi faka Tohi-Tapu, ʼo kau ai te ʼu tohi, te ʼu kaupepa lalahi, te ʼu kiʼi pepa lotu, pea mo te nusipepa ko te Réveillez-vous!

11. Ko te ʼu ako feafeaʼi ʼaē neʼe fai e te “tagata kaugana,” pea koteā te fakatuʼutuʼu ʼo te ʼu ako takitahi ʼaia?

¹¹ Pea tahi ʼaē meʼa, ʼe fai e te “tagata kaugana” te ʼu faleako kehekehe. ʼI te ʼu faleako ʼaia, ʼe ʼi ai te Faleako Faka Tohi-Tapu ʼo Kalaate ʼo Te Watchtower, ʼe fai ia māhina nima pea ʼe ina akoʼi te kau minisi kei tūpulaga ki te gāue faka misionea ʼi te ʼu fenua tai, pea ko te Ako Ki Te Teuteu Faka Minisitelio ʼe fai ia māhina e lua, ʼe akoʼi ai te ʼu tagata ʼāfea mole heʼeki ʼohoana ʼo toe feiā aipe mo te ʼu tagata faifekau faka minisitelio ki ni ʼu gāue makehe faka teokalatike. ʼE ʼi ai pe foki mo te Ako ʼo Te Minisitelio ʼo Te Puleʼaga, ʼe akoʼi ai te ʼu tagata ʼāfea Kilisitiano pea mo te ʼu tagata faifekau faka minisitelio ʼo ʼuhiga mo tonatou ʼu maʼua ʼaē ʼi te kokelekasio, pea ko te Ako ʼo Te Kau Pionie ʼe ina akoʼi te kau fai faka mafola evaselio katoa ke lahi age tanatou faiva ʼaē ʼi tanatou gāue fagonogono.

12. Koteā te fakatuʼutuʼu ʼi te vāhaʼa fuli ʼo ʼuhiga mo te polokalama faiakonaki?

¹² Ko te tahi fakatuʼutuʼu ʼo te polokalama faiakonaki, ko te ʼu fono e nima ʼe fai ʼi te vāhaʼa fuli ʼi te ʼu kokelekasio e 75 500 tupu ʼa te hahaʼi ʼa Sehova ʼo te malamanei. ʼE koutou tokaga koa ke koutou maʼu te ʼu lelei ʼo te ʼu fono ʼaia? ʼI takotou tokaga lelei ki te ako ʼaē ʼe foaki ai, ʼe koutou fakahā koa ʼe koutou tui moʼoni kiai, ʼo feala pe ke ʼui, ʼe koutou kau ʼi te faleako ʼa te ʼAtua? ʼAki takotou tuputupu ʼi te faʼahi fakalaumālie, ʼe ʼiloga lelei koa ki ʼihi ʼe koutou maʼu “te lea ʼo nātou neʼe akoʼi”?—Isaia 50:4; 1 Timoteo 4:15, 16.

Akoʼi ʼi Te ʼu Fono ʼo Te Kokelekasio

13. (a) Koteā te ʼaluʼaga maʼuhiga ʼe fai e Sehova moʼo akoʼi tana hahaʼi ʼi te temi nei? (b) ʼE lava feafeaʼi hatatou fakahā ʼe tou leleiʼia Te Tule Leʼo?

¹³ ʼE akoʼi tāfito e Sehova tana hahaʼi ʼi te vāhaʼa fuli ʼaki te ako ʼo te Tohi-Tapu ʼo fakaʼaogaʼi Te Tule Leʼo ohage ko he meʼa moʼo tokoni ki te akonaki. ʼE koutou faka ʼuhiga koa te fono ʼaia ohage ko he faʼahi ʼe feala ai kia Sehova ke ina akoʼi koutou? Logope la ʼaē ʼe faka ʼuhiga ʼuluaki ia Isaia 50:4 kia Sesu, ʼe feala pe foki ke faka ʼuhiga kia nātou fuli ʼaē ʼe nātou maʼu te lelei ʼo te ʼu fakatuʼutuʼu ʼa te ʼAtua moʼo maʼu “te lea ʼo nātou neʼe akoʼi.” Ko he faʼahi ʼe feala ke koutou fai moʼo fakahā takotou leleiʼia ʼaē ʼo Te Tule Leʼo, ʼi te temi pe ʼaē ʼe koutou maʼu ai ke koutou foimo lau te ʼu nusipepa fuli ʼaē ʼe koutou maʼu. Pea ʼi te temi leva ʼaē ʼe ako ai Te Tule Leʼo ʼi te kokelekasio, ʼe feala ke koutou fakahā takotou leleiʼia te nusipepa ʼaia kia Sehova ʼaki takotou ʼu tali pea mo koutou teuteuʼi fakalelei pe foki ke koutou fakahā ʼi te kaugamālie takotou tui.—Hepeleo 10:23.

14. (a) He koʼe koa ko te ʼu tali ʼi te ʼu fono ʼe ko he pilivilesio maʼuhiga ia? (b) Ko te ʼu faʼahiga tali feafeaʼi ʼa te ʼu tamaliki ʼaē ʼe fakatupu lotomālohi?

¹⁴ ʼE koutou ʼiloʼi koa, ʼaki takotou ʼu tali ʼi te ʼu fono, ʼe feala ke faka ʼuhiga ʼe koutou kau ʼi te polokalama lahi ʼo te faiakonaki ʼa Sehova? ʼE mahino papau ia, ko te ʼu tali ʼaē ʼi te ʼu fono ʼe ko he faʼahi maʼuhiga ke tou tahi feʼugaʼaki ia tatou “ki te ʼofa pea mo te ʼu gāue lelei.” (Hepeleo 10:24, 25) ʼE feala koa ki te ʼu tamaliki ke nātou kau ki te polokalama ako ʼaia? Ei. ʼI te agamāhani, ko te ʼu tali fakamalotoloto ʼaē ʼe fai e te ʼu tamaliki ʼe fakaloto mālohi pe foki kia nātou ʼaē ʼe lalahi age. ʼI ʼihi ʼaluʼaga, ko nātou ʼaē ʼe foʼofoʼou mai ki ʼatatou ʼu fono neʼe uga nātou ʼaki te ʼu tali ʼa te kau tamaliki ke nātou tokakaga fakamalotoloto ki te moʼoni ʼo te Tohi-Tapu. ʼI te agamāhani, ko ʼihi ʼi te ʼu tamaliki ʼe nātou lau pe te tali ʼaē ʼe tuʼu ʼi te palakalafe peʼe nātou mulimuli ki he tali ʼe fanafana age e he tahi ʼe lahi age ia nātou. Kae, ʼe toe fakaloto mālohi mokā ko tanatou tali neʼe teuteuʼi lelei. ʼE fakavikiviki e te ʼu taʼi tali ʼaia totatou Tagata Faiako Lahi pea mo faka maʼuhigaʼi aipe tana polokalama faiakonaki.—Isaia 30:20, 21.

15. Koteā te meʼa ʼe feala ke fai e te ʼu mātuʼa moʼo tokoni ki tanatou ʼu fānau ke lelei tanatou ʼu tali?

¹⁵ ʼE ko he meʼa fakafiafia hakita sio ʼe fia kau te ʼu tamaliki ki te fakavikiviki ʼo totatou ʼAtua. Neʼe leleiʼia e Sesu te ʼu palalau fakavikiviki ʼa te ʼu tamaliki. (Mateo 21:15, 16) ʼE ʼui fēnei e te tagata ʼāfea Kilisitiano: “ ʼI taku kei veliveli, neʼe ʼau fia fai haku tali ʼi te ako ʼo Te Tule Leʼo. ʼI te ʼosi ʼo toku tokoniʼi ke ʼau teuteuʼi haku tali, neʼe loto e taku matuʼa ke ʼau liuliuga tuʼa fitu taku tali ke ʼau fakamāmāhani kiai.” E lagi ʼi te lolotoga ʼo takotou ako faka famili ʼo te Tohi-Tapu, ko koutou ʼu mātuʼa ʼe feala ke koutou tokoni ki ʼakotou ʼu fānau ke nātou teuteuʼi ni ʼanatou ʼu tali ʼi te ʼu palakalafe kua fili ʼo Te Tule Leʼo ʼaki pe tanatou ʼu palalau māhani. Koutou tokoniʼi nātou ke nātou leleiʼia te pilivilesio lahi ʼaē ko tanatou kau ki te polokalama faiakonaki ʼa Sehova.

16. Koteā te fua lelei ʼo te Ako Faka Minisitelio Faka Teokalatike, pea ko ai koa ʼaē ʼe feala ke kau ki te ako ʼaia?

¹⁶ Ko te ako ʼaē ʼe fai ʼi te tahi ʼu fono faka Kilisitiano, ʼe tonu anai pe foki ke tou tokakaga lelei kiai, ʼuhi ko nātou ʼaē ʼe nātou fai mai te akonaki pea mo nātou pe foki ʼaē ʼe fagono ki te akonaki ʼaia. Kua hili nei kiai taʼu e 50 tupu, neʼe fakaʼaogaʼi e Sehova ʼi te vāhaʼa fuli te Ako Faka Minisitelio Faka Teokalatike moʼo akoʼi te toko lauʼi miliona hahaʼi, ke ʼāsili lelei age tanatou fakahā te logo ʼo te Puleʼaga. Ko nātou ʼaē ʼe nātou fakatahi nei ki te kokelekasio, ʼe feala ke nātou kau ki te Ako ʼaia, ʼo kau ai mo te hahaʼi ʼaē neʼe hoki ʼōmai pe ʼo kau ki te ʼu fono, mokā ʼe nātou maʼuliʼi te ʼu pelesepeto faka Kilisitiano.

17. (a) Koteā te fakatuʼutuʼu tāfito ʼo te Fono Ki Te Hahaʼi Fuli? (b) Koteā te ʼu faʼahi ʼe tonu anai ke manatuʼi e te ʼu tēhina ʼaē ʼe nātou faiakonaki?

¹⁷ Ko te tahi fakatuʼutuʼu kua fualoa ʼo te polokalama faiakonaki, ʼe ko te Fono Ki Te Hahaʼi Fuli. Ohage ko tona ʼiloga mai ʼi tona higoa, neʼe fakatuʼu tāfito te fono ʼaia ke fagono te hahaʼi ʼaē ʼe mole ko ni kau Fakamoʼoni ki te ʼu akonaki faka Tohi-Tapu. Koia, ko te tēhina ʼaē ʼe ina fai te akonaki ʼe ʼaoga ke ina fai te akonaki ke mahino lelei kia nātou ʼaē ʼe ko tanatou hoki fagonoe ki te logo. Ko tona faka ʼuhiga ke fakamahinohino te ʼu kupuʼi palalau, ohage la ko te kupuʼi palalau ʼaē ko te “tahi ʼu ōvi,” ko te ʼu “tēhina,” pea mo te “toe ʼo te kau fakanofo,” ʼaē ko ni ʼu kupuʼi palalau ʼe mole feala ke mahino kiai ia nātou ʼaē ʼe mole ko ni kau Fakamoʼoni. ʼUhi ko te hahaʼi ʼaē ʼe kau ki te Fono Ki Te Hahaʼi Fuli, ʼe feala ke ʼi ai he ʼu akonaki ʼo ʼuhiga mo tanatou lotu peʼe ko tonatou faʼahiga maʼuli ʼe mole ʼalutahi mo te Tohi-Tapu—kae ʼe tali pe e te sosiete ʼo te temi nei—ʼe tonu anai ki te tēhina ke tokaga tuʼumaʼu ʼo palalau fakapotopoto pea mo ʼaua naʼa ina fakalainoaʼi te ʼu akonaki ʼa te hahaʼi ʼaia peʼe ko tonatou faʼahiga maʼuli.—Vakaʼi ia 1 Kolonito 9:19-23.

18. Koteā te tahi age ʼu fono ʼo te kokelekasio ʼe fai ʼi te vāhaʼa fuli, pea he koʼe neʼe fakatuʼu te ʼu fono?

¹⁸ Ko te Ako Tohi ʼo te Kokelekasio ʼe ko he fono ia ʼe fakaʼaogaʼi ai te ʼu tohi faka Tohi-Tapu neʼe teuteuʼi e te tagata kaugana agatonu mo poto ke akoʼi ʼi te vāhaʼa fuli ʼo mulimuli pe ki te Tohi-Tapu. Ko te tohi La Révélation: le grand dénouement est proche! ʼe ko he tohi ʼe lahi ʼi te ʼu fenua ʼe lolotoga akoʼi ai nei. Ko te Fono Gāue neʼe fakatuʼutuʼu moʼo akoʼi te hahaʼi ʼa Sehova ke nātou kau ʼaupito ki te faka mafola ʼo te logo lelei ʼo te Puleʼaga pea mo fai he kau tisipulo.—Mateo 28:19, 20; Maleko 13:10.

ʼE Akoʼi Nātou ʼi Te ʼu Fono Lalahi

19. Koteā te ʼu fakatahi lalahi ʼaē ʼe fakatuʼutuʼu e te “tagata kaugana” ʼi te taʼu fuli?

¹⁹ Ia taʼu ʼe lauʼi teau tupu, neʼe fakatuʼutuʼu e te ‘tagata kaugana agatonu’ te ʼu fakatahi moʼo foaki te akonaki pea mo he fakaloto mālohi makehe ki te kau Kilisitiano moʼoni. Ko te ʼu fono lalahi e tolu ʼe fai ʼi te taʼu fuli. ʼE ʼi ai te fakatahi makehe ʼaho tahi, ko te ʼu kokelekasio ʼaē ʼe fakatahitahi kiai, pea ʼe nātou faʼufaʼu te foʼi silikosikilipisio. ʼI te lolotoga ʼo te taʼu, ko te ʼu silikosikilipisio ʼe nātou toe fakatahitahi ia ʼaho e lua pea ʼe toʼo ko te fakatahi faka silikosikilipisio. ʼO hilifaki atu kiai te fakatahi faka tisitilike, ʼe ko te ʼu silikosikilipisio ʼaē ʼe fakatahi ai. ʼI ʼihi temi, ʼe feala pe ke ʼi ai he ʼu fakatahi faka malamanei. Ko te ʼu fakatahi lalahi ʼaia mo te kau Fakamoʼoni ʼe fakaafe, mai te ʼu fenua kehekehe, ʼe ko he ʼu fakatahi ʼe nātou fakamālohiʼi moʼoni te tui ʼa te hahaʼi ʼa Sehova!—Vakaʼi ia Teutalonome 16:16.

20. Koteā ʼaē neʼe faka maʼuhigaʼi fakalelei ʼi te ʼu fakatahi lalahi ʼa te kau Fakamoʼoni ʼa Sehova?

²⁰ ʼI te 1922, e lagi ko te toko 10 000 hahaʼi neʼe nātou fakatahi ʼi Cedar Point, Ohio, U.S.A., neʼe leleiʼia e te kau telekasio te fakaloto mālohi ʼaenī ʼa te tēhina: “Ko te ʼaho ʼaenī ʼo te ʼu ʼaho fuli. Koʼeni, ʼe pule te Hau! Ko koutou tana hahaʼi ʼave logo. Koia ʼaē, koutou kalagaʼi, kalagaʼi, kalagaʼi, te Hau pea mo tona puleʼaga.” Ko te ʼu taʼi fakatahi lalahi ʼaia neʼe nātou fakahā te maʼuhiga ʼaē ʼo te gāue fai faka mafola. Ohage la, ʼi te fakatahi faka malamanei ʼi te Kolo ʼo New York ʼi te taʼu 1953, neʼe tala ai te fakatuʼu ʼo te polokalama ako ʼi te ʼu kokelekasio fuli ʼo ʼuhiga mo te minisitelio ʼi te ʼu ʼapi. ʼE lahi te ʼu fenua neʼe fua lelei ai te fagonogono ʼo te Puleʼaga ʼi tanatou fakahoko ʼo te faʼahi ʼaia.

Akoʼi e Te ʼAtua Ke Nātou Faiakonaki

21. Koteā te pilivilesio ʼe tou tali pea mo tonu ke tou fakahoko?

²¹ ʼE ʼi ai te polokalama faiakonaki taulekaleka ʼa Sehova ʼi te kele ia ʼaho nei! Ko nātou fuli ʼaē ʼe nātou muliʼi lelei te akonaki ʼaia ʼe feala ke akoʼi nātou e te ʼAtua, ei, ʼe feala ke nātou kau ia nātou ʼaē neʼe foaki kiai “te lea ʼo nātou neʼe akoʼi.” ʼE ko he pilivilesio hakita kau ki te faleako ʼa te ʼAtua! Kae, ka tou tali te pilivilesio ʼaia, ʼe tonu ke tou fakahoko. Neʼe akoʼi e Sehova ia Sesu ke toe feala pe ke ina akoʼi mo niʼihi, pea neʼe akoʼi e Sesu tana kau tisipulo ke toe feala pe kia nātou ke nātou hoko atu te gāue ʼaia ʼo mulimuli pe ki te meʼa ʼaē neʼe ina fai kae ʼo lahi age leva ia. ʼO toe feiā pe, neʼe akoʼi tatou e te polokalama akonaki ʼa Sehova ʼaki te fakatuʼutuʼu ʼaē ke tou akoʼi mo niʼihi.—Soane 6:45; 14:12; 2 Kolonito 5:20, 21; 6:1; 2 Timoteo 2:2.

22. (a) Koteā te ʼu fihifihia neʼe felāveʼi mo Moisese pea mo Selemia, kae neʼe feafeaʼi te fakatokatokaʼi ʼo te faʼahi ʼaia? (b) Koteā te falala ʼe feala ke tou maʼu ko te ʼAtua ʼe tokaga anai ia ke hoko te fagonogono ʼo te Puleʼaga?

²² ʼE koutou ʼui koa ohage ko Moisese, “Mole ʼau faiva ʼi te lea,” peʼe ohage ko Selemia, “ ʼE mole ʼau poto lelei ʼi te palalau”? ʼE tokoniʼi anai pe koutou e Sehova ohage ko tana tokoniʼi ia nāua. Neʼe ʼui maʼana kia Moisese: “Ko ʼau ʼe ʼau nofo anai mo tou gutu.” Pea kia Selemia neʼe ina ʼui fēnei: “ ʼAua naʼa ke mataku . . . ʼE ʼau nofo mo koe.” (Ekesote 4:10-12; Selemia 1:6-8) ʼI te temi ʼaē neʼe fia fakalogologo ai e te kau takitaki lotu tana ʼu tisipulo, neʼe ʼui maʼa Sesu: “Kapau ʼe fakalogologo ia nātou ʼaenī, pea ʼe kalaga anai te ʼu maka.” (Luka 19:40) Kae neʼe mole kalaga te ʼu maka, pea neʼe mole he ʼaoga ke nātou fai te faʼahi ʼaia ʼi te temi ʼaia koteʼuhi neʼe fakaʼaogaʼi e Sehova tana kau ako moʼo fakahā te logo ʼo tona Puleʼaga.

ʼE Feala Koa Hakotou Tali?

◻ Koteā te ʼu felogoi lelei ʼe hoko ʼi Te Tagata Faiako mo tana kau ako ʼe faka maʼuhigaʼi lelei ia Isaia kapite 50?

◻ Neʼe feafeaʼi te fakahoko e Sehova ke mafola te polokalama faiakonaki?

◻ Koteā te tahi ʼu fakatuʼutuʼu ʼo ʼuhiga mo te polokalama faiakonaki ʼa Sehova?

◻ He koʼe koa ʼe ko he pilivilesio taulekaleka te kau ʼaē ki te polokalama faiakonaki ʼa Sehova?

[Paki ʼo te pasina 16]

ʼI te agamāhani ko te ʼu tali fakamalotoloto ʼaē ʼe fai e te ʼu tamaliki ʼe fakatupu lotomālohi ki te hahaʼi lalahi