ʼE Akoʼi Tatou Ke Tou Fai Te Finegalo ʼo Sehova
“Akoʼi ʼau ke ʼau fai tou finegalo, heʼe ko koe toku ʼAtua.”—Pesalemo 143:10.
1, 2. (a) Ko te temi fea ʼaē ʼe tonu ke tou ako ai, pea ʼe tou ako ʼaki te manatu fea? (b) He koʼe ʼe maʼuhiga ke akoʼi tatou e Sehova?
ʼI TE ʼaho fuli ʼaē ʼe maʼuli ai pea mo gāue ai he tahi, ʼe feala ke ina ako he meʼa ʼe ʼaoga kia ia. ʼE moʼoni te faʼahi ʼaia kia koutou pea mo ʼihi. Kae koteā te meʼa ʼaē ʼe hoko ʼi te mate? ʼI te ʼaluʼaga ʼaia, ʼe mole he meʼa ʼe feala ke tou ako ai. ʼE ʼui lelei e te Tohi-Tapu, ko nātou ʼaē kua mamate “ ʼe mole kei nātou ʼiloʼi he meʼa e tahi.” ʼE mole ʼi ai he ʼatamai mālama ʼi te Seole, te potu ʼaē ʼe ʼolo fuli ki ai te hahaʼi. (Tagata Tānaki 9:5, 10) Ko tona faka ʼuhiga koa ʼe mole hona ʼaoga ʼo te ʼu meʼa ʼaē ʼe tou ako, tatatou maʼu ʼo te ʼatamai mālama? ʼE fakalogo te faʼahi ʼaia ki te meʼa ʼaē ʼe akoʼi mai kia tatou, pea mo tatatou faʼahiga fakaʼaogaʼi ʼo te meʼa ʼaia.
2 Kapau ʼe akoʼi mai pe kia tatou te ʼu meʼa ʼo te mālama, ʼe mole tou maʼu anai he ka haʼu ʼe heʼegata. Kae meʼa fakafiafia foki, ʼe akoʼi ki te lauʼi miliona hahaʼi ʼi te ʼu fenua kehekehe, te finegalo ʼo te ʼAtua ʼaki te ʼamanaki ʼaē ki te maʼuli heʼegata. Ko te tafitoʼaga ʼo te ʼamanaki ʼaia ʼe ko te akoʼi ʼo tatou e Sehova, te Matapuna ʼo te ʼatamai mālama ʼaē ʼe ina foaki te maʼuli heʼegata.—Pesalemo 94:9-12.
3. (a) He koʼe ʼe feala ke tou ʼui ko Sesu neʼe ko ia ʼaē neʼe ʼuluaki akoʼi e te ʼAtua? (b) Koteā te fakamoʼoni ʼaē ʼe tou maʼu ʼe akoʼi anai te hahaʼi e Sehova, pea koteā anai tona fua?
3 Ko te ʼAlo ʼulu tokotahi ʼa te ʼAtua, ia ia ʼaē neʼe ina ʼuluaki akoʼi, neʼe akoʼi kia te ia ke ina fai te finegalo ʼo tana Tāmai. (Tāʼaga Lea 8:22-30; Soane 8:28) Ki muli age, neʼe fakahā e Sesu ko te lauʼi miliate hahaʼi ʼe akoʼi anai nātou e tana Tāmai. Koteā te ʼamanaki maʼa nātou ʼaē ʼe akoʼi e te ʼAtua? Neʼe ʼui fēnei e Sesu: “ ʼE tohi ʼi te ʼu Polofeta: ‘Pea ʼe akoʼi anai ia nātou fuli e Sehova.’ Ko ʼaē neʼe fagono ki te Tāmai pea mo ina ako, ʼe haʼu ia kia te ʼau. ʼE ʼau tala moʼoni atu kia koutou: Ko ʼaē ʼe tui, ʼe ina maʼu ia te maʼuli heʼegata.”—Soane 6:45-47.
4. ʼE lave feafeaʼi te faiako fakaʼatua ki te lauʼi miliona hahaʼi, pea koteā te ʼamanaki ʼaē ʼe nātou maʼu?
4 Neʼe fai e Sesu te ʼu palalau ʼaē ʼe tuʼu ʼi te vaega ʼo Isaia 54:13, ʼaē neʼe fai ki te ʼohoana fakatā ʼo te ʼAtua, te Sione ʼaē ʼi selo. ʼE faka ʼuhiga tāfito te lea faka polofeta ʼaia ki tona ʼu foha, te toko 144 000 ʼu tisipulo ʼa Sesu Kilisito ʼaē neʼe fakanofo ʼaki te laumālie. Ko te toe ʼo te ʼu foha fakalaumālie ʼaia, ʼe gāue ʼi te temi nei, ʼo ina takitaki te polokalama faiako ʼi te malamanei katoa. ʼAki te faʼahi ʼaia, ko te hahaʼi ʼe lauʼi miliona ʼe nātou faʼufaʼu te “toe hahaʼi tokolahi” ʼe toe akoʼi mo nātou e Sehova. ʼE nātou maʼu te ʼamanaki makehe ʼaē ko te akoʼi ʼo nātou ʼo heʼegata. ʼO feafeaʼi? ʼE nātou ʼamanaki hāo ʼi te “mamahi lahi” ʼaē ʼe fakaōvi mai, pea mo nātou maʼu te maʼuli heʼegata ʼi te palatiso ʼi te kele.—Fakahā 7:9, 10, 13-17.
ʼE Faka Maʼuhigaʼi Te Fai ʼo Te Finegalo ʼo Te ʼAtua
5. (a) Koteā te vaega ʼo te taʼu 1997? (b) Koteā te manatu ʼaē ʼe tonu ke tou maʼu ʼo ʼuhiga mo te kau ki te ʼu fono faka Kilisitiano?
5 Lolotoga te taʼu 1997, ʼi te ʼu kokelekasio e 80 000 tupu ʼi te malamanei katoa, ʼe manatuʼi anai e te kau Fakamoʼoni ʼa Sehova te ʼu ʼuluaki palalau ʼaenī ʼo te vaega ʼo te Pesalemo 143:10: “Akoʼi ʼau ke ʼau fai tou finegalo.” ʼE ko te vaega ʼaia ʼaē ka fakaʼaogaʼi ʼi te taʼu 1997. Ko te ʼu palalau ʼaia, ʼaē ka fakatuʼu lelei anai ʼi te ʼu Fale ʼo te Puleʼaga, ʼe nātou fakamanatuʼi mai anai kia tatou ʼe ko te potu maʼuhiga ʼaē ʼe tou maʼu ai te ako fakaʼatua ʼe ko te ʼu fono ʼo te kokelekasio, pea ʼe feala ai ke tou kau ki te polokalama ako ʼe fai hoholo. ʼI tatatou fakatahitahi mo totatou ʼu tēhina ʼi te ʼu fono ke akoʼi tatou e totatou Faiako Lahi, ʼe feala ke tou maʼu te manatu ʼaē neʼe maʼu e te tagata fai pesalemo, ʼaē neʼe ina tohi fēnei: “Neʼe ʼau fiafia ʼi tanatou ʼui ʼaē kia ʼau: ‘Tou ʼolo ki te ʼapi ʼo Sehova.’ ”—Pesalemo 122:1; Isaia 30:20.
6. Koteā ʼaē ʼe tou mālama kiai ʼaki te ʼu palalau ʼa Tavite?
6 Ei, ʼe tou loto ke akoʼi tatou ke tou fai te finegalo ʼo te ʼAtua, kae mole ko te finegalo ʼo totatou fili te Tevolo, pe ko te finegalo ʼo te tagata heʼe haohaoa. Koia, ʼe tou ʼiloʼi te ʼAtua ʼaē ʼe tou atolasio pea mo tauhi ki ai, ohage ko Tavite ʼaē neʼe ina ʼui fēnei: “Heʼe ko koe ko toku ʼAtua. Ko tou laumālie ʼe lelei; ʼofa pe ke ina taki ʼau ʼi te fenua ʼo te faitotonu.” (Pesalemo 143:10) Neʼe mole fia faifaitahi ia Tavite mo te hahaʼi ʼaē ʼe faikākā, kae neʼe fia nofo ia ʼi te potu ʼaē ʼe fakahoko ai te tauhi kia Sehova. (Pesalemo 26:4-6) Neʼe takitaki e te laumālie ʼa te ʼAtua tona ala, koia neʼe feala ai ke haʼele ia Tavite ʼi te ʼu ala ʼo te faitotonu.—Pesalemo 17:5; 23:3.
7. Neʼe gāue feafeaʼi te laumālie ʼa te ʼAtua ki te kokelekasio faka Kilisitiano?
7 Ko te Tavite Lahi, ia Sesu Kilisito, neʼe ina fakapapau ki te kau ʼapositolo, ʼe akoʼi anai kia nātou e te laumālie maʼoniʼoni ia meʼa fuli pea mo ina fakamanatuʼi age anai kia nātou ia meʼa fuli ʼaē neʼe ina tala age kia nātou. (Soane 14:26) Talu mai te Penikosite, neʼe fakahā māmālie e Sehova “te ʼu meʼa loloto ʼa te ʼAtua” ʼaē ʼe tuʼu ʼi tana Folafola. (1 Kolonito 2:10-13) Neʼe ina fakahoko te faʼahi ʼaia ʼaki te meʼa faka felogoi fakahāhā ʼaē neʼe fakahigoaʼi e Sesu ko “te tagata kaugana agatonu mo poto.” ʼE ina foaki te meʼa kai fakalaumālie ʼaē ʼe fakaʼaogaʼi ʼi te polokalama ako, ki te ʼu kokelekasio ʼo te hahaʼi ʼa te ʼAtua ʼi te malamanei katoa.—Mateo 24:45-47.
ʼE Tou Ako Te Finegalo ʼo Te ʼAtua ʼi Tatatou ʼu Fono
8. He koʼe ʼe maʼuhiga ke tou kau ki te Ako ʼo Te Tule Leʼo?
8 Ko te Ako ʼo te ʼu alatike ʼo Te Tule Leʼo ʼaē ʼe fai ʼi te vāhaʼa fuli ʼi te ʼu kokelekasio, ʼe tautau talanoa ki te maʼuliʼi ʼo te ʼu pelesepeto ʼo te Tohi-Tapu. ʼE mahino papau ia ʼe tokoni te ʼu alatike ʼaia kia tatou ke tou kātakiʼi te ʼu faigataʼaʼia ʼo te maʼuli. ʼE vakavakaʼi ʼi te tahi ʼu ako te ʼu moʼoni fakalaumālie loloto pe ko te ʼu lea faka polofeta ʼo te Tohi-Tapu. ʼE lahi te ʼu meʼa ʼaē ʼe akoʼi mai kia tatou ʼi te ʼu fono ʼaia. ʼE lahi te ʼu fenua, ʼe tokolahi ʼaupito te hahaʼi ʼaē ʼe ʼōmai ki te ʼu fono ʼaē ʼe fai ʼi te ʼu Fale ʼo te Puleʼaga. Kae ʼi te tahi ʼu fenua, ʼe mole kei hahaʼi ia nātou ʼaē ʼe ʼolo ki te ʼu fono. ʼI takotou manatu, koteā tona tupuʼaga? Neʼe lagi tuku e ʼihi tanatou gāue ke ina toʼo te temi ʼaē ʼe tonu ke nātou fakaʼaogaʼi ki tanatou fakatahitahi tuʼumaʼu “moʼo uga ki te ʼofa pea mo te ʼu gāue matalelei.” Peʼe lagi lahi te temi ʼaē ʼe nātou fakaʼaogaʼi ki te ʼu fakafiafia, peʼe ko te sioʼi ʼo te televisio, ʼo mole feala ai tanatou ʼolo ʼo fono, ʼuhi ko te lahi fau ʼo tonatou ʼu maʼumaʼua. Koutou manatuʼi te tokoni ʼaē ʼe haʼu mai te ʼAtua ia Hepeleo 10:23-25. ʼE mole maʼuhiga age koa la tatatou fakatahitahi ki te ako fakaʼatua ʼi te temi nei, tāfito la ʼi tatatou “sio [ʼaē] ki te fakaōviōvi mai ʼo te ʼaho”?
9. (a) ʼE ʼaoga feafeaʼi kia tatou te Fono Gāue ʼi te minisitelio? (b) Koteā te aga ʼaē ʼe tonu ke tou maʼu ʼo ʼuhiga mo te fai faka mafola?
9 ʼI totatou ʼu maʼua ʼaē ʼe maʼuhiga, ʼe kau kiai tatatou tauhi ki te ʼAtua ʼi totatou ʼuhiga kau minisi. ʼE fakatuʼutuʼu te Fono Gāue ke ina akoʼi tatou ʼo ʼuhiga mo tatatou faʼahiga fakahoko fakalelei ia te gāue ʼaia. ʼE tou ako tatatou faʼahiga fakaōvi ki te hahaʼi, te ʼu palalau ʼaē ʼe tonu ke tou fai, te meʼa ʼaē ʼe tonu ke tou fai mo kapau ʼe nātou tali lelei te moʼoni, pea mo te meʼa ʼaē ʼe tonu ke tou fai mo kapau ʼe fakafisi te hahaʼi ki tatatou logo. (Luka 10:1-11) ʼI te fono ʼaia ʼaē ʼe fai ʼi te vāhaʼa fuli, ʼe tou palalau ai ki te ʼu faʼahiga fai lelei ʼo te fai faka mafola pea mo fakahā te potu ʼaia ʼi te ʼu faʼifaʼitaki, pea ʼe ina teuteuʼi lelei tatou ke tou felāveʼi mo te hahaʼi ʼi tatatou ʼolo ʼi te ʼu ʼapi, pea mo tatatou fai faka mafola ʼi te ʼu ala, mo te ʼu tauʼaga motokā, mo te ʼu kā, mo te ʼu malaʼe vakalele, ʼi te ʼu fale koloā, peʼe ʼi te ʼu faleako. ʼO ʼalutahi mo tatatou kole ʼaenī: “Akoʼi ʼau ke ʼau fai tou finegalo,” ʼe tou loto anai ke tou fakaʼaogaʼi te ʼu faigamālie fuli moʼo fai ohage ko tona fakaloto mālohiʼi fēnei tatou e totatou Pule: “Ke mū tokotou mālama ʼi muʼa ʼo te hahaʼi, koteʼuhi ke nātou . . . faka kolōlia ai ki takotou Tāmai ʼaē ʼe ʼi selo.”—Mateo 5:16.
10. ʼE lava feafeaʼi ke tou tokoni moʼoni kia nātou ʼaē ʼe ‘tau mo nātou’?
10 ʼI te ʼu fono ʼaia ʼo te kokelekasio, ʼe toe akoʼi foki tatou ke tou fai he ʼu tisipulo. ʼI te temi ʼaē ʼe fia ʼiloʼi ai e he tahi te moʼoni, peʼe kapau ʼe tou tuku he tohi, ko tatatou fakatuʼutuʼu ʼi tatatou fai te ʼu ʼaʼahi, ʼe ko te kamata ʼo he ʼu ako Tohi-Tapu. Ko tona faka ʼuhiga ʼaē, ʼe tatau mo te kau tisipulo ʼaē neʼe ‘nonofo mo te hahaʼi ʼaē ʼe tau mo nātou,’ ke akoʼi nātou ki te ʼu meʼa ʼaē neʼe fakatotonu age e Sesu. (Mateo 10:11; 28:19, 20) ʼI tatatou maʼu he ʼu tokoni lelei, ohage ko te tohi ʼo Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe tou maʼu moʼoni ai ia meʼa fuli moʼo fakahoko lelei tatatou minisitelio. (2 Timoteo 4:5) ʼI te ʼu vāhaʼa fuli ʼaē ʼe koutou kau ai ki te Fono Gāue pea mo te Ako ʼo Te Minisitelio Faka Teokalatike, koutou faiga ke koutou mahino pea mo koutou fakaʼaogaʼi te ʼu puani ʼaē ʼe ʼaoga, ʼaē ʼe ina fakaliliu koutou ko he ʼu minisi ʼa te ʼAtua ʼe popoto lelei ʼi te fakahoko ʼo tona finegalo.—2 Kolonito 3:3, 5; 4:1, 2.
11. Neʼe fakahā feafeaʼi e ʼihi tanatou falala ki te ʼu palalau ʼaē ʼe tuʼu ia Mateo 6:33?
11 ʼE ko te finegalo ʼo te ʼAtua ʼaē ke tou “haga kumi muʼa te puleʼaga pea mo tana faitotonu.” (Mateo 6:33) Koutou fai te fehuʼi ʼaenī kia koutou: ‘ ʼE ʼau maʼuliʼi feafeaʼi anai te pelesepeto ʼaenī mo kapau ʼe toʼo e taku gāue [pe ko te gāue ʼo toku ʼohoana] te temi ʼaē ʼe tonu ke ʼau kau ai ki te ʼu fono?’ Tokolahi ia nātou ʼaē kua fakapotopoto ʼi te faʼahi fakalaumālie, ʼe nātou fakatuʼutuʼu ke nātou palalau ki tonatou ʼu patolo ʼo ʼuhiga mo te faʼahi ʼaia. Neʼe fakahā e te pionie katoa ki tona patolo ʼe tonu ke ina toʼo hona temi ʼi te ʼu vāhaʼa fuli, ke feala hana kau ki te ʼu fono ʼo te kokelekasio. Neʼe ina tali lelei te kole ʼaia. Kae ʼi tana fia ʼiloʼi ʼaē pe koteā te ʼu meʼa ʼaē ʼe fai ʼi te ʼu fono ʼaia, neʼe ina kole ke kau kiai. ʼI te fono, neʼe ina logoʼi te fakahā ʼo te fakatahi faka tisitilike ʼaē ka vave hoko. Ko te meʼa ʼaē neʼe hoko, neʼe fakatuʼutuʼu e te patolo ke kau ʼi he ʼaho katoa ki te fakatahi ʼaia. Koteā te ako ʼaē ʼe koutou tāʼofi ʼaki te ʼaluʼaga ʼaia?
ʼE Akoʼi e Te ʼu Mātuʼa Aga Faka Lotu Te Finegalo ʼo Te ʼAtua
12. Ke akoʼi ki te fānau te finegalo ʼo Sehova, koteā ʼaē ʼe tonu ke fai e te ʼu mātuʼa Kilisitiano ʼaki he faʼa kātaki pea mo he lotomālohi?
12 Kae ʼe mole gata pe ki te ʼu fono ʼo te kokelekasio pea mo te ʼu fakatahi ʼaē ʼe akoʼi ai tatou ke tou fai te finegalo ʼo te ʼAtua. Neʼe fakatotonu ki te ʼu mātuʼa ke nātou akoʼi, mo akonakiʼi tanatou ʼu fānau ke nātou fakavikiviki kia Sehova pea mo fai tona finegalo. (Pesalemo 148:12, 13; Tāʼaga Lea 22:6, 15) Ko te fai ʼo te faʼahi ʼaia, ʼe fakamaʼua kiai ke tou ʼave tatatou ʼu fānau “liliki” ki te ʼu fono, ke feala hanatou ‘fakalogo pea mo ako.’ Kae e feafeaʼi takotou akoʼi nātou ʼaki te ʼu tohi taputapu ʼi tokotou loto fale? (Teutalonome 31:12; 2 Timoteo 3:15) Tokolahi te ʼu famili neʼe nātou kamata fakalelei tanatou ʼu polokalama ako Tohi-Tapu faka famili, kae neʼe nātou tuku ke holo te ako ʼaia peʼe tōtō tanatou fai te ako. Neʼe kua hoko koa kia koutou te meʼa ʼaia? ʼE koutou manatu anai koa ʼe mole ʼaoga ia kia koutou te tokoni ʼaē ke fai tuʼumaʼu he ako, peʼe koutou manatu anai koa ʼe kehe tokotou famili, pea ʼe mole ʼi ai anai hona fua kiai? Tatau aipe pe koteā te ʼaluʼaga ʼaē ʼe tau mo koutou, ko koutou ʼaē ko te ʼu mātuʼa koutou toe vakaʼi te ʼu alatike lelei ʼaenī: “Ko Te Tofiʼa Fakalaumālie Koloaʼia” pea mo te alatike “Te ʼu Tapuakina ʼo Te Faʼa Kātaki” ʼi Te Tule Leʼo ʼo te ʼaho 1 ʼo ʼAukusito 1995.
13. ʼE lava feafeaʼi ke fua lelei ki te ʼu famili tanatou vakavakaʼi te vaega Tohi-Tapu ʼo te ʼaho?
13 ʼE fakaloto mālohiʼi te ʼu famili ke nātou fai māhani te vakaʼi ʼo te vaega faka Tohi-Tapu ʼo te ʼaho ʼaē ʼe tuʼu ʼi te tohi Tou Vakaʼi Te Tohi-Tapu ʼi Te ʼAho Fuli. Ko te lau ʼo te vaega pea mo tona fakamatala ʼe lelei, kae ʼe toe lelei age mo kapau ʼe fai he ʼu fakamatala ki te koga tohi ʼaia, pea mo maʼuliʼi. Ohage la, kapau ʼe koutou vakaʼi te vaega ʼo Efesi 5:15-17, ʼe feala ke fakakaukauʼi e te famili peʼe feafeaʼi te ‘totogi ʼo te temi faigamālie’ ki te ako takitokotahi, mo kau ki te fai faka mafola ʼi te temi katoa, pea mo tokaga ki te tahi ʼu gāue faka teokalatike. Ei, ko te fai palalau faka famili ki te vaega ʼo te ʼaho, ʼe feala anai ke ina taki ai he tahi pe ko he tokolahi, ke “haga mahino [katoa age] ki te finegalo ʼa Sehova.”
14. Ohage ko tona fakahā ia Teutalonome 6:6, 7, ʼe tonu ke feafeaʼi te ako ʼaē ʼe fai e te ʼu mātuʼa, pea koteā ʼaē ʼe tonu ke nātou fai?
14 ʼE tonu ke tokakaga te ʼu mātuʼa ke fai tuʼumaʼu te ako ʼo tanatou ʼu fānau. (Teutalonome 6:6, 7) Kae ʼe mole faka ʼuhiga pe ia ke nātou fakatonutonuʼi peʼe ke nātou puleʼi tanatou ʼu tamaliki. ʼE toe ʼaoga foki ke fagono te tāmai pea mo te faʼe, ke feala ai ke nā ʼiloʼi te ʼu meʼa ʼaē ʼe tonu ke fakamahino, ke fakamālamaʼi, te ʼu meʼa ʼaē ʼe tonu ke fakamahino ʼaki he ʼu fakatā, peʼe ke toe fakamanatuʼi age. ʼI te tahi famili Kilisitiano, ʼe uga e te ʼu mātuʼa te fai palalau faʼifaʼitaliha, ʼo nā fakaloto mālohiʼi tanā fānau ke nātou fai he ʼu fehuʼi ʼo ʼuhiga mo te ʼu meʼa ʼaē ʼe mole nātou mahino kiai, pe ko te ʼu meʼa ʼaē ʼe nātou tuʼania kiai. Neʼe nā ʼiloʼi ai neʼe faigataʼa ki tanā tama veliveli tana mahino ko Sehova ʼe mole hona kamataʼaga. Neʼe fakaʼaogaʼi e te ʼu mātuʼa te ʼu manatu mai te ʼu tohi ʼo te Sosiete Watch Tower, ʼo nā fakahā ko te temi pea mo te ʼatulaulau ʼe mole ʼi ai honā gataʼaga. Neʼe ʼaoga te faʼahi ʼaia moʼo fakatā te manatu ʼaia, pea neʼe fiafia ai tanā tama. Koia, koutou toʼo he temi moʼo tali lelei ʼaki te Tohi-Tapu ki te ʼu fehuʼi ʼo takotou ʼu fānau, ʼo koutou tokoni kia nātou ke nātou mahino ko te ako ʼo te fai ʼo te finegalo ʼo te ʼAtua, ʼe feala ke nātou fiafia lahi ai. Koteā te tahi ʼu meʼa ʼaē ʼe akoʼi ia ʼaho nei ki te hahaʼi ʼa te ʼAtua, ki te kau tūpulaga pea mo nātou matutuʼa?
ʼE Akoʼi Tatou Ke Tou ʼOfa Pea Mo Tou Tauʼi
15. Ko te temi fea ʼaē ʼe feala ke ʼahiʼahiʼi ai te moʼoni ʼo tatatou ʼofa ki totatou ʼu tēhina?
15 ʼO ʼalutahi mo te fakatotonu foʼou ʼa Sesu, ʼe “akoʼi tatou e te ʼAtua ke tou feʼofaniʼaki.” (1 Tesalonika 4:9) ʼI te temi ʼaē ʼe tokalelei ai te ʼu meʼa pea mo fakaʼaluʼalu lelei, ʼe lagi tou manatu ʼe tou ʼofa ki ʼotatou ʼu tēhina fuli. Kae koteā koa te meʼa ʼaē ʼe hoko mokā malaga he ʼu fihifihia, peʼe tou liliu ʼo ʼiʼita ʼuhi ko te meʼa ʼaē ʼe ʼui peʼe fai e he tahi Kilisitiano? ʼI te temi ʼaia, ʼe lagi ʼahiʼahiʼi ai te moʼoni ʼo tatatou ʼofa. (Vakaʼi ia 2 Kolonito 8:8.) Koteā te meʼa ʼaē ʼe akoʼi mai kia tatou e te Tohi-Tapu ke tou fai ʼi te ʼu taʼi ʼaluʼaga ʼaia? Ko te meʼa e tahi ʼe tonu ke tou fai, ke tou fakahā te ʼofa ʼi tona ʼuhiga katoa. (1 Petelo 4:8) ʼE mole tonu anai ke tou manatu pe kia tatou, ʼo tou ʼiʼita ʼi he ʼu kiʼi hala veliveli, peʼe tou tokakaga ki te kovi ʼaē neʼe fai mai kia tatou, kae ʼe tonu ke tou tuku te ʼofa ke ina ʼuʼufi te ʼu tuʼuga agahala. (1 Kolonito 13:5) ʼE tou ʼiloʼi ʼe ko te finegalo ʼaia ʼo te ʼAtua, koteʼuhi ʼe akoʼi mai e tana Folafola.
16. (a) Ko te faʼahiga tau feafeaʼi ʼaē ʼe akoʼi ki te kau Kilisitiano ke nātou kau kiai? (b) ʼE tou maʼu feafeaʼi te ʼu meʼa ʼaē ʼe ʼaoga kia tatou ʼo ʼuhiga mo te tau ʼaia?
16 Logope la ko te tokolahi ʼe mole nātou fakapipiki te ʼofa pea mo te tau, ko te tau ʼe ko te tahi ʼaia meʼa ʼe akoʼi mai kia tatou, kae ʼe ko he tau ia ʼe kehe mo te tau māhani. Neʼe ʼiloʼi e Tavite neʼe tonu ke akoʼi ia ia e Sehova ke poto ʼi te tau, heʼe ʼi te temi ʼaia neʼe tau moʼoni mo te ʼu fili ʼo Iselaele. (1 Samuele 17:45-51; 19:8; 1 Hau 5:3; Pesalemo 144:1) Kae e feafeaʼi ki tatatou tau ia ʼaho nei? Ko tatatou ʼu mahafu tau ʼe mole ko he ʼu mahafu tau moʼoni. (2 Kolonito 10:4) Ko tatatou tau ʼe ko he tau fakalaumālie, koia ʼe ʼaoga ai kia tatou ke tou maʼu te teu tau fakalaumālie. (Efesi 6:10-13) ʼAki tana Folafola pea mo tana hahaʼi, tana kokelekasio, ʼe akoʼi tatou e Sehova ke tou mālo ʼi te tau fakalaumālie.
17. (a) Koteā te ʼu faʼahiga meʼa ʼaē ʼe fakaʼaogaʼi e te Tevolo moʼo fakahēʼi tatou? (b) Koteā te ʼu meʼa ʼaē ʼe tonu ke tou tekeʼi ʼaki he aga fakapotopoto?
17 ʼAki he faiva kākā, ʼe tautau fakaʼaogaʼi e te Tevolo te ʼu meʼa ʼo te mālama, te kau ʼaposita, pea mo ʼihi hahaʼi ʼe fakafeagai ki te moʼoni, moʼo fakahēʼi ʼo tatou ki he tahi ʼu meʼa. (1 Timoteo 6:3-5, 11; Tito 3:9-11) ʼE hage ia ʼe sio ʼe feala ke mālo ia tatou ʼaki tana tauʼi fakahagatonu tatou, koia ʼe ina faiga ke tou fakahā tatatou meo peʼe ko tatatou fai he ʼu fehuʼi vale, ʼe mole honatou ʼaoga ʼi te faʼahi fakalaumālie. Ohage ko he kau tagata tau ʼe nonofo tokaga, ʼe tonu ke tou nonofo tokaga ki te ʼu tuʼutāmaki ʼaia ʼi tatatou tauʼi te ʼu meʼa ʼaia ʼaē ʼe fai mai kia tatou.—1 Timoteo 1:3, 4.
18. Koteā te faka ʼuhiga ʼo te ʼui ʼaē ʼe mole tonu ke tou maʼuli maʼa tatou totonu pe?
18 ʼE mole tou lagolago ki te ʼu holi ʼo te tagata peʼe ki te finegalo ʼo te ʼu puleʼaga. Neʼe akoʼi tatou e Sehova ʼaki te faʼifaʼitaki ʼa Sesu, ʼe mole kei tonu ke tou maʼuʼuli maʼa tatou totonu pe, kae ʼe tonu ke tou maʼu te manatu ʼaē neʼe maʼu e Sesu Kilisito, pea mo maʼuʼuli moʼo fai ʼo te finegalo ʼo te ʼAtua. (2 Kolonito 5:14, 15) ʼI te temi muʼa, neʼe lagi tou maʼu he faʼahiga maʼuli ʼe mole fakapotopoto, mo fakalialia, ʼo pulinoa ai te temi maʼuhiga. Ko te ʼu meʼa ʼaē ʼe hoko ʼi te mālama agakovi ʼaenī, ko te ʼu fakafiafia fakavalevale, te ʼinu fakavale, pea mo te aga heʼeʼaoga. ʼI te temi nei ʼaē kua akoʼi ai tatou ke tou fai te finegalo ʼo te ʼAtua, ʼe mole tou loto fakafetaʼi koa la ʼi tatatou mavae mai te mālama kovi ʼaenī? Koia, tou tau mālohi ʼi te faʼahi fakalaumālie ke ʼaua naʼa tou pipiki ki te ʼu aga ʼuli ʼo te mālama.—1 Petelo 4:1-3.
ʼE Akoʼi Tatou Ke Fua Lelei Kia Tatou
19. Koteā te ʼu lelei ʼaē ʼe tou maʼu ʼi tatatou akoʼi ia te finegalo ʼo Sehova pea mo tatatou maʼuliʼi?
19 ʼE maʼua ke tou fakamoʼoni ko te akoʼi ʼo tatou ke tou fai te finegalo ʼo Sehova ʼe ʼaoga lahi kia tatou. Koia, ʼe tonu ke tou tokakaga lelei ke tou ako pea mo tou muliʼi te ʼu fakatotonu ʼaē ʼe tuku mai e tona ʼAlo, mo tana Folafola, pea mo tana hahaʼi, tana kokelekasio. (Isaia 48:17, 18; Hepeleo 2:1) Kapau ʼe tou fai te faʼahi ʼaia, pea ʼe tou lotomālohi anai ke tou tutuʼu mālohi ʼi te ʼu temi fakamataku ʼaenī pea mo tou hāo mai te ʼu tuʼutāmaki ʼaē ka hoko. (Mateo 7:24-27) Māʼiape la ʼi te temi nei, ʼe leleiʼia anai tatou e te ʼAtua mo kapau ʼe tou fai tona finegalo, pea mo tou ʼiloʼi papau ʼe tali anai ki ʼatatou ʼu faikole. (Soane 9:31; 1 Soane 3:22) Pea ʼe tou maʼu anai te fiafia moʼoni.—Soane 13:17.
20. Koteā te meʼa ʼaē ʼe lelei anai ke koutou metitasio kiai, ʼi takotou vakaʼi te vaega Tohi-Tapu ʼo te taʼu 1997?
20 Lolotoga te taʼu 1997, ʼe tou maʼu anai he faigamālie ke tou lau pea mo vakavakaʼi te vaega Tohi-Tapu ʼo te taʼu, ia Pesalemo 143:10, ʼaē ʼe ʼui fēnei ai: “Akoʼi ʼau ke ʼau fai tou finegalo.” ʼI tatatou fai te faʼahi ʼaia, tou fakaʼaogaʼi he ʼu lakaga ke tou fakakaukauʼi te ʼu meʼa ʼaē neʼe fai e te ʼAtua moʼo akoʼi ʼo tatou, ohage ko tona tuʼu ʼi ʼoluga. Pea tou fakaʼaogaʼi te taʼi metitasio ʼaia ki te ʼu palalau ʼaia, ohage ko he uga ʼo tatou ke tou fai he meʼa, ʼo tou manatuʼi tuʼumaʼu te kole ʼaia, ʼi tatatou ʼiloʼi ʼaē ko “ ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.”—1 Soane 2:17.
ʼE Koutou Tali Feafeaʼi Anai?
◻ Ia ʼaho nei, ko ai ʼaē ʼe akoʼi ke nātou fai te finegalo ʼo Sehova?
◻ ʼE tonu ke lave feafeaʼi kia tatou te vaega ʼo Pesalemo 143:10 lolotoga te taʼu 1997?
◻ ʼE akoʼi feafeaʼi tatou ke tou fai te finegalo ʼo Sehova?
◻ Koteā ʼaē ʼe fakamaʼua ki te ʼu mātuʼa Kilisitiano ʼi tanatou akoʼi tanatou fānau?