Koteā ʼAē ʼe Maʼuhiga Tāfito ʼi Tokotou Maʼuli?

“Fakahā mai kia te ʼau te ala ʼaē ʼe tonu ke ʼau haʼele ai.”​—Pesalemo 143⁠:⁠8.

1. Koteā ʼaē neʼe ʼui fakaʼosi e te Hau ko Salomone ʼo ʼuhiga mo te ʼu meʼa ʼaē ʼe kumi pea mo fakahoko e te tagata?

ʼE MAHINO ia ʼe kua koutou ʼiloʼi lelei ʼe lahi te ʼu gāue pea mo te ʼu tuʼania ʼi te maʼuli. Kapau ʼe koutou fakakaukauʼi te ʼu gāue pea mo te ʼu tuʼania ʼaia, pea ʼe feala ke koutou ʼiloʼi ai ko ʼihi ʼi te ʼu meʼa ʼaia ʼe maʼuhiga. Ko ʼihi ʼu gāue pea mo ʼihi ʼu tuʼania ʼe mole faʼa maʼuhiga peʼe vaʼiganoa. Ko takotou mahino ki te faʼahi ʼaia, ʼe faka ʼuhiga ai ʼe koutou manatu tahi mo te tagata poto lahi, ko te Hau ko Salomone. ʼI tana ʼosi fakasiosio te ʼu gāue fuli ʼo tona maʼuli, neʼe ina fakaʼosi fēnei tana ʼu palalau: “Manavasiʼi ki te ʼAtua moʼoni pea mo taupau tana ʼu fakatotonu. He koʼena te maʼua katoa ʼo te tagata.” (Tagata Tānaki 2:​4-9, 11; 12:13) Koteā te faka ʼuhiga ʼo te faʼahi ʼaia kia tatou ia ʼaho nei?

2. Koteā te fehuʼi maʼuhiga ʼaē ʼe tonu ke fai e te hahaʼi ʼaē ʼe manavasiʼi ki te ʼAtua, pea koteā te ʼu fehuʼi ʼaē ʼe pipiki kiai?

² Kapau ʼe koutou fia “manavasiʼi ki te ʼAtua moʼoni pea mo taupau tana ʼu fakatotonu,” koutou fai kia koutou te fehuʼi maʼuhiga ʼaenī, ‘Koteā ʼaē ʼe maʼuhiga tāfito ʼi toku maʼuli?’ ʼE moʼoni ʼe lagi mole koutou fai te fehuʼi ʼaia ʼi te ʼaho fuli pe, kae he koʼe koa ʼe mole koutou vakaʼi ʼi te temi nei? ʼI tona fakahagatonu, ʼe pipiki kiai te tahi ʼu fehuʼi, ohage la ‘ ʼE ʼau faka maʼuhigaʼi fau koa taku gāue peʼe ko te ʼu koloā? ʼE maʼuhiga koa kia ʼau toku loto fale, toku famili, pea mo nātou ʼaē ʼe ʼau ʼofa ai?’ ʼE feala ke fai e he tūpulaga te ʼu fehuʼi ʼaenī: ‘E lahi feafeaʼi koa taku tokaga ki te ako pea mo te temi ʼaē ʼe ʼau fakaʼaoga kiai? ʼI tona ʼaluʼaga moʼoni, ʼe ʼau ʼuluaki tokaga koa ki te meʼa ʼaē ʼau manako kiai, ki he faigaoʼi, ki he ʼu faʼahiga fakafiafia, pe ko he faʼahiga agaaga ʼo te poto ʼo te temi ʼaenī?’ Pea tatau aipe peʼe tou taʼu fia, peʼe feafeaʼi totatou ʼaluʼaga, ʼe tonu ke tou fai te fehuʼi ʼaenī: “ ʼE maʼuhiga feafeaʼi te tauhi ki te ʼAtua ʼi toku maʼuli?” ʼE lagi koutou ʼio anai ki te ʼui ʼaē ʼe ʼi ai te ʼu meʼa ʼe maʼuhiga tāfito. Kae ʼe tou maʼu feafeaʼi pea mo tou maʼu ʼifea te tokoni ʼaē ʼe ʼaoga kia tatou ke tou fai he ʼu fakatuʼutuʼu fakapotopoto ʼo ʼuhiga mo te ʼu meʼa ʼaē ʼe maʼuhiga tāfito?

3. Koteā tona faka ʼuhiga ki te kau Kilisitiano te fakatuʼutuʼu ʼo te ʼu meʼa ʼaē ʼe tonu ke fakamuʼamuʼa?

³ Ko te kupu “maʼuhiga tāfito,” ʼe faka ʼuhiga tāfito ki he meʼa ʼe fakamuʼamuʼa ia meʼa fuli, pe ko he meʼa ʼe tonu ke ʼuluaki fai. Tatau aipe pe ko koutou ko he Fakamoʼoni ʼa Sehova peʼe koutou kau ki te lauʼi miliona kau ako fakamalotoloto ʼo te Folafola ʼa te ʼAtua, koutou fakatokagaʼi te ʼu palalau moʼoni ʼaenī: “Kia meʼa fuli ʼe ʼi ai tona temi tuʼakoi, ei, ia he temi kia meʼa fuli ʼi te lalo lagi.” (Tagata Tānaki 3:1) Koia, ʼe kau kiai takotou fakahā he tokaga ʼofa ki takotou ʼu felogoi faka famili. (Kolose 3:​18-​21) ʼE kau ki te faʼahi ʼaia te maʼu ʼo he gāue ke feala hakotou taupau tokotou famili. (2 Tesalonika 3:​10-​12; 1 Timoteo 5:8) Pea moʼo fetogi, ʼe feala ke koutou toʼo he temi ke koutou fai ai te meʼa ʼaē ʼe koutou leleiʼia, pe ko he fakafiafia ʼi ʼihi temi. (Vakaʼi ia Maleko 6:​31.) Kae kapau ʼe koutou fakakaukau lelei, ʼe mole koutou fakatokagaʼi koa la ʼe mole he meʼa ʼi te ʼu meʼa ʼaia ʼe maʼuhiga tāfito ʼi te maʼuli? ʼE ʼi ai te tahi ia meʼa ʼe maʼuhiga age.

4. Koteā te pikipikiga ʼo Filipe 1:​9, 10 mo te fakatuʼutuʼu ʼo te ʼu meʼa ʼaē ʼe tonu ke fakamuʼamuʼa?

⁴ ʼE mahino papau ia, ʼe koutou fakamoʼoni anai ko te ʼu pelesepeto ʼo te Tohi-Tapu ʼe ko he ʼu tokoni maʼuhiga moʼo fakatuʼutuʼu te ʼu meʼa ʼaē ʼe maʼuhiga tāfito, pea mo fai he ʼu tonu fakapotopoto. Ohage la, ia Filipe 1⁠:​9, 10, ʼe uga te kau Kilisitiano ke nātou “tuputupu aipe ʼi te ʼatamai mālama totonu, pea mo tuputupu ʼi te sio totonu.” Koteā tona tupuʼaga? Neʼe ʼui fēnei e te ʼapositolo ko Paulo: “Ke feala hakotou ʼiloʼi papau te ʼu meʼa ʼaē ʼe maʼuhiga tāfito.” ʼE mole koa la he ʼuhiga ʼo te ʼu palalau ʼaia? ʼO fakatafito ki te ʼatamai mālama totonu, ko he Kilisitiano ʼe fakasiosio tonu ʼe feala ke ina ʼiloʼi te meʼa ʼaē ʼe tonu ke ina fakamuʼamuʼa ʼi tona maʼuli​—te meʼa ʼaē ʼe maʼuhiga tāfito.

Ko He Faʼifaʼitaki ʼi Te Meʼa ʼAē ʼe Maʼuhiga Tāfito

5. ʼI tana fakamatala te faʼifaʼitaki ʼaē neʼe tuku ki te kau Kilisitiano, ʼe fakahā feafeaʼi mai e te Tohi-Tapu te meʼa ʼaē neʼe fakamuʼamuʼa e Sesu ʼi tona maʼuli?

⁵ ʼE tou maʼu te faʼahi maʼuhiga ʼo te ʼatamai mālama ʼi te ʼu palalau ʼaenī ʼa te ʼapositolo ko Petelo: “Ko te ala ʼaia ʼaē neʼe pāuiʼi koutou kiai, koteʼuhi neʼe mamahi foki ia Kilisito maʼa koutou, ʼo ina tuku atu kia koutou he faʼifaʼitaki ke koutou mulimuli lelei ki tona ʼu tafuga vaʼe.” (1 Petelo 2:​21) Ei, ke feala hatatou ʼiloʼi pe koteā te ʼu meʼa ʼaē ʼe maʼuhiga tāfito ʼi te maʼuli, ʼe feala ke tou vakaʼi te manatu ʼa Sesu Kilisito ʼo ʼuhiga mo te faʼahi ʼaia. ʼE ʼui ʼi te lea faka polofeta ʼo ʼuhiga mo ia, ia Pesalemo 40⁠:8: “Neʼe ʼau fiafia, Ê toku ʼAtua, ʼi te fai ʼo tou finegalo, pea ko tau lao ʼe nofo loloto ia te ʼau.” Neʼe ina fai te ʼu palalau ʼaenī ʼaē ʼe tatau mo te manatu ʼaia: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau, pea mo ʼau fakaʼosi tana gāue.”​—Soane 4:​34; Hepeleo 12:2.

6. ʼE lava feafeaʼi hakotou maʼu he ʼu fua ʼe tatau mo te ʼu fua ʼaē neʼe maʼu e Sesu ʼi tana fakamuʼamuʼa te finegalo ʼo te ʼAtua?

⁶ Koutou fakatokagaʼi te manatu maʼuhiga ʼaenī, te fai ʼo te finegalo ʼo te ʼAtua. ʼE fakahā e te faʼifaʼitaki ʼa Sesu te meʼa ʼaē ʼe tonu ke fakamuʼamuʼa lelei e tana ʼu tisipulo ʼi tonatou maʼuli, he neʼe ina ʼui “ko ʼaē ʼe akoʼi fakalelei, ʼe liliu anai ia ohage ko ia ʼaē ʼe faiako.” (Luka 6:​40) Pea, ʼi te mulimuli ʼa Sesu ki te ʼu fakatuʼutuʼu ʼo tana Tāmai, neʼe ina fakahā neʼe “lahi [tana] fiafia” ʼi tana haga ʼo faka maʼuhiga te finegalo ʼo te ʼAtua. (Pesalemo 16:11; Gāue 2:​28) ʼE koutou mahino koa ki te faka ʼuhiga ʼo te faʼahi ʼaia? Kapau ʼe filifili e te kau tisipulo ʼa Sesu ke liliu ia te fai ʼo te finegalo ʼo te ʼAtua ko te meʼa maʼuhiga tāfito ʼaia ʼi tonatou maʼuli, ʼe ‘lahi anai tonatou fiafia’ pea mo nātou maʼu te ʼuhiga moʼoni ʼo te maʼuli. (1 Timoteo 6:19) Koia, ʼe lahi te ʼu meʼa ʼaē ʼe tupu ai tatatou fakamuʼamuʼa te fai ʼo te finegalo ʼo te ʼAtua.

7, 8. Koteā te ʼu ʼahiʼahiʼi ʼaē neʼe hoko kia Sesu, pea koteā te meʼa ʼaē ʼe feala ke tou ako mai ai?

⁷ ʼI te ʼosi fakahā ʼaē e Sesu kua ina foaki tona maʼuli moʼo fai ʼo te finegalo ʼo te ʼAtua, neʼe faiga e te Tevolo ke ina fakahalaʼi ia ia. ʼO feafeaʼi? ʼAki te ʼu fakahala e tolu. ʼI te lakaga fuli pe, neʼe tali fakahagatonu age ia Sesu ʼaki te ʼu palalau ʼe fakatafito ki te Tohi-Tapu. (Mateo 4:​1-​10) Kae neʼe ʼi ai te tahi ʼu ʼahiʼahi neʼe fakatalitali kia ia​—ko te ʼu fakataga, mo te ʼu fakalainoa, tona lavakiʼi e Sutasi, mo te ʼu tukugakoviʼi hala, pea mo tana mate ʼi te pou fakamamahi. Kae neʼe mole he ʼahiʼahi ʼi te ʼu ʼahiʼahi ʼaia neʼe ina fakatō te ʼAlo agatonu ʼa te ʼAtua. ʼI te lakaga maʼuhiga ʼo tona maʼuli, neʼe faikole fēnei ia Sesu: “Ke mole fai ki te meʼa ʼaē ʼe ʼau loto ki ai, kaʼe ke fai pe ki te meʼa ʼaē ʼe ke loto ki ai. . . . Ke fai pe tou finegalo.” (Mateo 26:39, 42) ʼE mole tonu koa la ke malave kia tatou te faʼifaʼitaki ʼaia ʼaē neʼe ina tuku mai, pea ke ina uga ai tatou ke tou “faʼa kātaki ʼi te faikole”?​—Loma 12:12.

⁸ Ei, ʼi te temi ʼaē ʼe tou fakatuʼutuʼu ai te ʼu meʼa ʼaē ʼe maʼuhiga tāfito ʼi te ʼu ʼuluaki maʼua, ʼe ʼaoga tāfito kia tatou te takitaki ʼa te ʼAtua, tāfito mo kapau ʼe tou felāveʼi mo te ʼu fili ʼo te moʼoni pea mo nātou ʼaē ʼe fakafeagai ki te finegalo ʼo te ʼAtua. Koutou manatuʼi te kole ʼo te Hau agatonu ko Tavite ke takitaki ia ia e te ʼAtua ʼi te temi ʼaē neʼe felāveʼi ai mo te ʼu fakafeagai ʼo te fili. ʼE tou mahino anai ki te faka ʼuhiga ʼo te faʼahi ʼaia ʼi tatatou vakaʼi te ʼu vaega ʼo Pesalemo 143. ʼE tonu ke tokoni te faʼahi ʼaia ke tou ʼiloʼi peʼe lava feafeaʼi hatatou fakamālohi totatou ʼu vāhaʼa takitokotahi mo Sehova, pea mo fakaloto mālohiʼi tatou ke tou haga fakamuʼamuʼa ʼi totatou maʼuli te fai ʼo te finegalo ʼo te ʼAtua.

ʼE Fagono Ia Sehova Ki Tatatou ʼu Faikole Pea ʼe Ina Tali Kiai

9. (a) Logope la ko Tavite neʼe ko he tagata agahala, koteā ʼaē neʼe hā ʼaki tana ʼu palalau pea mo te ʼu meʼa ʼaē neʼe ina fai? (b) He koʼe ʼe mole tonu ke tou fiu ʼi te fai ʼo te meʼa ʼaē ʼe totonu?

⁹ Logope la neʼe ko he tagata agahala, kae neʼe tui ia Tavite ʼe fakalogo ia Sehova ki tana faikole. Neʼe ina kole fēnei ʼaki he agavaivai: “Ê Sehova, fagono ki taku faikole; fakahaga mai tou taliga ki taku kole. ʼI tau agatonu, tali mai, ʼi tau faitotonu. Pea ʼaua naʼa ke fakamāuʼi tau kaugana; koteʼuhi ʼi ʼou muʼa ʼe mole he tahi ʼe feala ke faitotonu.” (Pesalemo 143:​1, 2) Neʼe mahino kia Tavite tona ʼuhiga heʼe haohaoa, kae neʼe katoa tona loto ki te ʼAtua. Koia, neʼe falala ai ʼe ina maʼu anai ʼi hona ʼaluʼaga faitotonu, he tali ki tana kole. ʼE mole fakaloto mālohiʼi koa la tatou ʼi te faʼahi ʼaia? Logope la ʼe mole tou aʼu ki te faitotonu ʼa te ʼAtua, ʼe feala ke tou tui papau ʼe fagono mai kia tatou mo kapau ʼe katoa totatou loto kia te ia. (Tagata Tānaki 7:​20; 1 Soane 5:​14) ʼI tatatou faʼa kātaki ʼi te faikole, ʼe tonu ke tou faiga ke tou “mālo aipe ʼi te agakovi ʼaki te agalelei” ʼi te ʼu ʼaho agakovi ʼaenī.​—Loma 12:20, 21; Sake 4:7.

10. He koʼe neʼe ʼi ai te ʼu lakaga neʼe lotohoha ai ia Tavite?

¹⁰ Neʼe ʼi ai te ʼu fili ʼo Tavite, ohage pe ko tatou. Neʼe ʼi ai te temi neʼe tuʼania ai ia Tavite ʼi tana hola mai ia Saulo, neʼe tonu ke ina kumi he ʼu koga meʼa neʼe mole feala ke maʼu ai ia ia e he tahi, pea ʼi tona ʼuhiga hau, neʼe hoha ia Tavite ʼuhi ko tona ʼu fili. Neʼe ina fakamatala te agaaga ʼo te lave ʼo te faʼahi ʼaia kia ia: “Neʼe kumi e toku ʼu fili toku nefesi . . . Neʼe tupu ai taku nofo ʼi te ʼu koga meʼa fakapōʼuli . . . Pea ʼe pogia toku laumālie ia te ʼau; ʼi te lotolotoiga ʼoʼoku, ʼe kua mate noa toku loto.” (Pesalemo 143:​3, 4) ʼE ʼi ai koa he tupuʼaga ke koutou logo feiā mo koutou?

11. Koteā te ʼu faigataʼaʼia ʼaē neʼe hoko ki te ʼu kaugana ʼa te ʼAtua ʼi totatou temi?

¹¹ Ko te fakafeagai tuʼumaʼu ʼa te ʼu fili, te ʼu ʼahiʼahiʼi ʼuhi ko te faigataʼaʼia ʼi te faʼahi ʼo te paʼaga, pe ko he mahaki kovi, pe ko he tahi age ʼu fihifihia fakatupu tuʼania, ʼe tupu ai te lotovaivai ʼa ʼihi ʼi te hahaʼi ʼa te ʼAtua. Tahi ʼaē meʼa, ʼi ʼihi lakaga, neʼe hage ʼe kua mate noa tonatou loto. ʼE hage ia neʼe nātou kalaga takitokotahi, ʼo fēnei: “ ʼUhi ʼaē neʼe ke fakahā mai kia te ʼau te ʼu tuʼuga tuʼania pea mo te ʼu malaʼia, ʼofa pe ke ke toe fakamaʼuli ʼau . . . ʼOfa pe ke ke ʼatakai ʼau pea mo fakaloto fīmālieʼi ʼau.” (Pesalemo 71:20, 21) Koteā koa te tokoni ʼaē ʼe foaki age kia nātou?

ʼE Lava Feafeaʼi Hatatou Tauʼi Te ʼu Faiga ʼa Te Fili

12. Neʼe tauʼi feafeaʼi e te Hau ko Tavite te tuʼutāmaki pea mo te ʼu ʼahiʼahiʼi ʼaē neʼe hoko kia ia?

¹² ʼE fakahā mai ia Pesalemo 143:5 te meʼa ʼaē neʼe fai e Tavite ʼi te temi ʼaē neʼe felāveʼi ai mo te tuʼutāmaki pea mo te ʼatu ʼu ʼahiʼahiʼi: “Neʼe ʼau manatuʼi te ʼu ʼaho ki muʼa atu; neʼe ʼau metitasio ki tau ʼu gāue fuli; ʼaki he lotolelei neʼe ʼau fia tokagaʼi tuʼumaʼu te ʼu gāue ʼo tou ʼu nima.” Neʼe manatuʼi e Tavite te ʼu felogoi ʼa te ʼAtua mo Tona ʼu kaugana, pea mo te faka ʼāteaina ʼaē neʼe hoko kia ia totonu. Neʼe metitasio ki te meʼa ʼaē neʼe fai e Sehova ʼuhi ko Tona huafa lahi. Ei, neʼe haga tokaga ia Tavite ki te ʼu gāue ʼa te ʼAtua.

13. Mokā tou felāveʼi mo ni ʼu ʼahiʼahi, ʼe tokoni feafeaʼi anai kia tatou tatatou fakakaukau ki te ʼu faʼifaʼitaki ʼo te temi muʼa pea mo te temi ʼaenī ke tou faʼa kātaki?

¹³ Neʼe tau fakamanatuʼi mai koa la kia tatou te ʼu felogoi ʼa te ʼAtua mo tana hahaʼi? ʼE mahino ia! ʼE kau ki te faʼahi ʼaia te ʼu fakamatala ʼaē neʼe fai e te ‘toe ʼao ʼo te kau fakamoʼoni’ ʼaē neʼe maʼuʼuli ʼi muʼa ʼo te temi faka Kilisitiano. (Hepeleo 11:32-​38; 12:1) Neʼe toe fakaloto mālohiʼi mo te kau Kilisitiano fakanofo ʼo te ʼuluaki sēkulō, ke nātou “haga manatuʼi te ʼu ʼuluaki ʼaho,” pea mo te ʼu meʼa ʼaē neʼe nātou kātakiʼi. (Hepeleo 10:32-​34) E feafeaʼi ki te ʼu meʼa ʼaē neʼe hoko ki te ʼu kaugana ʼa te ʼAtua ʼi totatou temi, ohage ko te ʼu fakamatala ʼaē ʼe tuʼu ʼi te tohi Les Témoins de Jéhovah: Prédicateurs du Royaume de Dieu?a Ko te ʼu fakamatala ʼaē neʼe tohi ai, pea mo te ʼu fakamatala ʼaē ʼe tuʼu ʼi te tahi ʼu tohi, ʼe feala ai ke tou toe manatuʼi te faʼahiga tokoni ʼaē neʼe fai e Sehova ki tana hahaʼi ke nātou kātakiʼi te tapuʼi ʼo te fai faka mafola, mo tonatou pilisoniʼi, mo te aga kovi ʼa te hahaʼi, mo te ʼu lotoʼā fakamamahi pea mo te ʼu gāue kinakina. Neʼe ʼi ai mo te ʼu fakataga neʼe hoko ʼi te ʼu fenua ʼaē ʼe hoko ai te tau, ohage ko Burundi, mo Libéria, mo Rwanda, pea mo te Iukoselavia ʼāfea. ʼI te temi ʼaē neʼe hoko ai te ʼu fakafeagai, neʼe faʼa kātaki te kau kaugana ʼa te ʼAtua ʼuhi ko te ʼu felogoi mālohi ʼaē neʼe nātou taupau mo Sehova. Neʼe tokoni kia nātou ʼaē neʼe nātou faka maʼuhigaʼi tāfito ʼi tonatou maʼuli te fai ʼo tona finegalo.

14. (a) Koteā te faʼifaʼitaki neʼe hā ai te tokoni ʼa te ʼAtua ki te tuagaʼane neʼe tau mo te ʼaluʼaga ʼe lagi tatau mo tatou? (b) Koteā ʼaē ʼe tou ako mai te faʼifaʼitaki ʼaia?

¹⁴ Kae, ʼe lagi koutou ʼui anai neʼe mole heʼeki hoko kia koutou he aga mālohi feiā, pea ʼe lagi koutou manatu ʼe mole hoko anai kia koutou he meʼa feiā. Kae ko te tokoni ʼa te ʼAtua ki tana hahaʼi, neʼe mole ina fai pe ʼi te ʼu lakaga ʼaē neʼe nātou tuʼutāmakiʼia ai. Neʼe tokoni ki te hahaʼi tokolahi ʼi te ʼu lakaga “māhani” ʼo te maʼuli. Koʼeni tona faʼifaʼitaki: ʼE kei koutou manatuʼi koa te paki ʼaē ʼe tuʼu ʼi ʼoluga, pea ʼe tokoni koa kia koutou ke koutou manatuʼi te ʼu aga ʼa te ʼAtua ki tana hahaʼi? Neʼe hā te paki ʼaia ʼi Te Tule Leʼo ʼo te ʼaho 1 ʼo Tesepeli 1996. Neʼe koutou lau koa te fakamatala ʼaē neʼe fai e Penelope Makris? ʼE ko he faʼifaʼitaki lelei ʼaupito ʼaia ʼo te nofo agatonu faka Kilisitiano! ʼE koutou manatuʼi koa la te ʼu meʼa ʼaē neʼe ina kātakiʼi mai tona ʼu kāiga, pe neʼe feafeaʼi tana tauʼi tona ʼu mahaki kovi, pea mo tana faiga lahi ʼaē ke nofo ʼi te minisitelio ʼi te temi katoa? Koteā takotou manatu ʼo ʼuhiga mo te ʼu fakapale ʼaē neʼe ina maʼu ʼi te ʼu meʼa ʼaē neʼe hoko kia ia ʼi Mytilène? ʼE ko te manatu maʼuhiga ʼaenī: ʼE tou faka ʼuhiga koa te ʼu taʼi faʼifaʼitaki ʼaia, ohage ko he tokoni kia tatou fuli ke tou fakatuʼutuʼu te ʼu meʼa ʼaē ʼe maʼuhiga tāfito, ʼo tou fakamuʼamuʼa ʼi totatou maʼuli te fai ʼo te finegalo ʼo te ʼAtua?

15. Koteā te tahi ʼu gāue neʼe fai e Sehova ʼaē ʼe tonu ke tou metitasio kiai?

¹⁵ ʼE fakaloto mālohiʼi tatou ke tou metitasio ki te ʼu gāue ʼa Sehova, ohage ko tona fai e Tavite. Moʼo fakahoko tana fakatuʼutuʼu, neʼe foaki e Sehova te fakamaʼuli ʼaki te mate ʼo tona ʼAlo, mo tana fakatuʼuake, pea mo tana faka kolōlia. (1 Timoteo 3:​16) Neʼe ina fakatuʼu tona Puleʼaga ʼi selo, ʼo ina fakamaʼa te lagi mai ia Satana mo tana ʼu temonio, pea mo ina toe fakatuʼu tana tauhi moʼoni ʼi te kele. (Fakahā 12:​7-​12) Neʼe ina fakatuʼu te palatiso fakalaumālie pea neʼe ina tapuakina tana hahaʼi, ʼo ina fakatuputupu nātou. (Isaia 35:​1-​10; 60:22) ʼI te temi nei, ʼe fai e tana hahaʼi te faka mafola fakamuli ʼi muʼa ʼo te hoko ʼo te mamahi lahi. (Fakahā 14:​6, 7) Ei, ʼe lahi te ʼu meʼa ʼe tonu ke tou metitasio kiai.

16. Koteā ʼaē ʼe fakaloto mālohiʼi tatou ke tou tokagaʼi, pea koteā te meʼa ʼaē ka ina uga anai tatou ke tou fai?

¹⁶ ʼE tou mahino lelei ki te fakatalakitupua ʼo te mālohi ʼo Sehova, mo kapau ʼe tou tokagaʼi te ʼu gāue ʼaē neʼe ina fai, kae mole tou hoha ki te ʼu meʼa ʼaē ʼe faiga e te tagata ke ina fai. Kae, ko te ʼu gāue ʼaia ʼe mole faka tuʼakoi pe ki te ʼu meʼa fakaofoofo ʼaē neʼe ina fakatupu ʼi te lagi pea mo te kele. (Sopo 37:14; Pesalemo 19:1; 104:24) ʼE kau ki tana ʼu gāue fakaofoofo tana faka ʼāteainaʼi tana hahaʼi mai tonatou ʼu fili agakovi, ohage ko tona fakahā ʼi te ʼu meʼa ʼaē neʼe hoko ki tana hahaʼi ʼaē neʼe ina fili ʼi te temi muʼa.​—Ekesote 14:31; 15:6.

Tou ʼIloʼi Te Ala ʼAē ʼe Tonu Ke Tou Haʼele Ai

17. Neʼe felogoi feafeaʼi ia Tavite mo Sehova, pea he koʼe ʼe feala ke fakaloto fīmālieʼi tatou e te faʼahi ʼaia?

¹⁷ Neʼe kole tokoni ia Tavite ʼi tana sio ʼaē kua faigataʼa tona maʼuli, ʼo ina ʼui fēnei: “Neʼe ʼau faka mafao ʼoku ʼu nima kia te koe; ko toku nefesi ʼe hage maʼa koe ko he kele kua magemage. Ê tali fakavilivili mai, Ê Sehova. Kua aʼu toku ʼatamai ki tona fakaʼosi. ʼAua naʼa ke fakaū tou fofoga kia te ʼau, naʼa tonu anai ke ʼau hage ko nātou ʼaē ʼe nātou hifo ki te luo.” (Pesalemo 143:​6, 7) Neʼe ʼiloʼi e Tavite, ʼi tona ʼuhiga agahala, neʼe tokaga te ʼAtua ki te ʼaluʼaga ʼaē neʼe tau mo ia. (Pesalemo 31:7) ʼI ʼihi temi, ʼe lagi tou logoʼi mo tatou kua tou tō ki lalo ʼi te faʼahi fakalaumālie. Kae ʼe ʼi ai te ʼamanaki. Ko Sehova, ʼaē ʼe fagono ki tatatou ʼu faikole, ʼe feala ke ina toe fakatuʼu vave tatou, ʼo ina fakaloto fīmālieʼi tatou ʼaki te kau tagata ʼāfea agaʼofa, mo te ʼu alatike ʼi Te Tule Leʼo, pe ko he ʼu koga ʼi te ʼu fono neʼe tō tonu mo te ʼu meʼa ʼaē neʼe ʼaoga kia tatou.​—Isaia 32:​1, 2.

18, 19. (a) Koteā ʼaē ʼe tonu ke tou kole fakamalotoloto kia Sehova? (b) Koteā ʼaē ʼe feala ke tou tui papau kiai?

¹⁸ Ko tatatou falala ʼaē kia Sehova, ʼe ina uga tatou ke tou kole fēnei kia te ia: “Fai ke ʼau logo ki tou manavaʼofa, he neʼe ʼau tuku taku falala kia te koe. Fakahā mai kia te ʼau te ala ʼaē ʼe tonu ke ʼau haʼele ai.” (Pesalemo 143:8) Neʼe ina līaki koa ia te tuagaʼane ko Makris, ʼaē neʼe nofo tokotahi ʼi te motu ʼo Grèce? ʼE ina līaki anai koa koutou ʼi takotou faka maʼuhigaʼi ʼi tokotou maʼuli te fai ʼo tona finegalo? ʼE loto e te Tevolo pea mo tana ʼu temonio ke nātou tāʼofi, peʼe ke nātou fakagata ʼosi tatatou gāue ʼaē ko te kalagaʼi ʼo te Puleʼaga ʼo te ʼAtua. Tatau aipe peʼe tou gāue ʼi te ʼu fenua ʼaē ʼe fakagafua ai te tauhi moʼoni, peʼe kapau ʼe tou gāue ʼi te ʼu fenua ʼaē ʼe tapuʼi ai, ʼe ʼalutahi tatatou ʼu kole ʼaē ʼe tou fai ʼi te logo tahi, mo te kole ʼaē neʼe fai fēnei e Tavite: “Hāofaki ʼau mai toku ʼu fili, Ê Sehova. Neʼe ʼau nono ʼi ʼou tafa.” (Pesalemo 143:9) ʼE tou hāo anai mai te ʼu malaʼia fakalaumālie, mo kapau ʼe tou nonofo ʼi te koga meʼa fakalilolilo ʼo te Māʼoluga.​—Pesalemo 91:1.

¹⁹ ʼE mālohi tatatou tui ki te meʼa ʼaē ʼe maʼuhiga tāfito. (Loma 12:​1, 2) Koia, tou tauʼi te ʼu faiga ʼa te mālama ʼaē ke ina fakatuʼutuʼu maʼa tatou te ʼu meʼa ʼaē ʼe ina ʼui ʼe maʼuhiga, ʼi te manatu fakatagata. Tou haga fakahā ʼi te ʼu faʼahi fuli ʼo totatou maʼuli te meʼa ʼaē ʼe tou ʼiloʼi ʼe maʼuhiga tāfito, ʼaē ko te fai ʼo te finegalo ʼo te ʼAtua.​—Mateo 6:​10; 7:​21.

20. (a) Koteā ʼaē neʼe tou ako ʼo ʼuhiga mo Tavite ia Pesalemo 143:​1-9? (b) ʼE fakahā feafeaʼi e te kau Kilisitiano ʼo te temi ʼaenī te manatu ʼa Tavite?

²⁰ Ko te ʼu ʼuluaki vaega ʼaē e hiva ʼo te Pesalemo 143, ʼe nātou fakahā mai te ʼu felogoi lelei ʼa Tavite mo Sehova. ʼI te temi ʼaē neʼe tauʼi ai ia ia e tona ʼu fili, neʼe mole tuʼania ʼi te kole ki te ʼAtua he takitaki. Neʼe ina fakahā te ʼu meʼa ʼaē ʼi tona loto, ʼo kumi he tokoni ʼo ʼuhiga mo te ala ʼaē ʼe tonu ke haʼele ai. Ia ʼaho nei, ʼe toe feiā mo te toe ʼo te kau fakanofo ʼi te kele pea mo tanatou ʼu kaugā gāue. ʼE maʼuhiga kia nātou tanatou ʼu felogoi mo Sehova, pea ʼe nātou kole kia te ia he takitaki. ʼE nātou haga fakamuʼamuʼa te fai ʼo te finegalo ʼa te ʼAtua, logope la te ʼu fakataga ʼaē ʼe fakahoko kia nātou e te Tevolo pea mo te mālama.

21. He koʼe ʼe maʼuhiga ke tou tuku he faʼifaʼitaki lelei, mo kapau ʼe tou akoʼi ki te hahaʼi te meʼa ʼaē ʼe tonu ke maʼuhiga tāfito ʼi tonatou maʼuli?

²¹ Ko te lauʼi miliona hahaʼi ʼaē ʼe nātou ako te Tohi-Tapu mo te kau Fakamoʼoni ʼa Sehova, ʼe tonu ke mahino kia nātou, ko te meʼa ʼaē ʼe maʼuhiga tāfito ʼe ko te fakamuʼamuʼa ʼo te fai ʼo te finegalo ʼo te ʼAtua. ʼE feala ke tou tokoni kia nātou ke nātou mahino ki te faʼahi ʼaia, ʼo tou palalau ki te kapite 13 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼaē ʼe fakahā lelei ai te ʼu pelesepeto ʼaē ʼe tonu ke muliʼi ke feala ai hanatou liliu ko he ʼu hahaʼi ʼe nātou fakalogo ki te Folafola.b ʼE mahino papau ia, ʼe tonu ke nātou sio ʼe tou foaki he faʼifaʼitaki lelei ʼo ʼuhiga mo te meʼa ʼaē ʼe tou akoʼi age kia nātou. Hili kiai he kiʼi temi nounou, pea ʼe nātou ʼiloʼi anai mo nātou te ala ʼaē ʼe tonu ke nātou haʼele ai. ʼI te mahino ʼaē ʼo te toko miliona hahaʼi ʼaia ki te meʼa ʼaē ʼe tonu ke nātou fakamuʼamuʼa tāfito ʼi tonatou maʼuli, ʼe uga ai anai te tokolahi ʼo nātou ʼaia ke nātou foaki tonatou maʼuli ki te ʼAtua pea mo nātou papitema. Ki muli age, ʼe feala ke tokoni te kokelekasio kia nātou ke nātou haga haʼele ʼi te ala ʼo te maʼuli.

22. Koteā te ʼu fehuʼi ʼaē ka tou vakaʼi anai ʼi te alatike ʼaē ka hoa mai?

²² Kua ʼiloʼi e te tokolahi ʼe ko te finegalo ʼo te ʼAtua ʼaē ʼe tonu ke maʼuhiga tāfito ʼi tonatou maʼuli. Kae, e feafeaʼi te akoʼi māmālie e Sehova tana ʼu kaugana ke nātou fai tona finegalo? Koteā te ʼu lelei ʼaē ʼe nātou maʼu ʼaki te ako ʼaia? ʼE tou vakaʼi anai te ʼu fehuʼi ʼaia ʼi te alatike ʼaē ka hoa mai, pea mo tou fai palalau anai ki te vaega tāfito, ia Pesalemo 143⁠:​10.

[Nota ʼi te lalo pasina]

Koteā Anai Takotou Tali?

◻ Kapau ʼe tou maʼuliʼi te tokoni ʼaē ia Filipe 1:​9, 10, ʼe lava feafeaʼi anai hatatou fakatuʼutuʼu te ʼu meʼa ʼaē ʼe tonu ke fakamuʼamuʼa?

◻ Neʼe fakahā feafeaʼi e Sesu te meʼa ʼaē neʼe maʼuhiga tāfito kia ia ʼi tona maʼuli?

◻ Koteā te ako ʼe tou maʼu ʼi te ʼu meʼa ʼaē neʼe fai e Tavite, ʼi te temi ʼaē neʼe felāveʼi ai mo te ʼu ʼahiʼahi?

◻ ʼE tokoni feafeaʼi kia tatou ia Pesalemo 143⁠:​1-9 ia ʼaho nei?

◻ Koteā ʼaē ʼe tonu ke maʼuhiga tāfito ʼi totatou maʼuli?

[Paki ʼo te pasina 10]

Neʼe fakamoʼoni e te ʼu gāue ʼa Tavite tana falala kia Sehova

[Haʼuʼaga ʼo te paki]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s