Tou Fakafiafia Pea Ke Tou Fakavikiviki Ki Te ʼAtua ʼi Te ʼu Fakatahi
Talu mai te kamataʼaga ʼo te ʼu taʼu 1880 neʼe fakatokagaʼi e te kau Ako ʼo te Tohi-Tapu ʼe mole tonu ke gata ʼaki pe tanatou fakatahi mo tonatou ʼu tēhina Kilisitiano ʼi tanatou ʼu fono ʼi te koga meʼa ʼaē ʼe nātou nonofo ai, kae ʼe toe ʼaoga foki ke nātou feʼiloʼiʼaki mo tonatou ʼu tēhina mai te tahi ʼu potu fenua. Koia neʼe nātou fakatuʼutuʼu ai ke fai te ʼu fakatahi ʼi te taʼu fuli maʼa te kau Ako ʼo te Tohi-Tapu ʼo kamata ʼi Amelika, pea ki muli age neʼe fai foki te fakatuʼutuʼu ʼaia ʼi Kanata. Neʼe ko he ʼu temi fakafiafia ʼaia ʼi te faʼahi fakalaumālie; neʼe lahi ai tanatou maʼu te ako faka Tohi-Tapu lolotoga te ʼu ʼaho ʼaia ʼe nātou fakatahi ai, pea neʼe nātou leleiʼia te ʼu temi ʼaia ke feala ai hanatou fefakaloto mālohiʼi ʼaki ia nātou. Ko te papitema ʼo nātou ʼaē kua nātou kau ki te moʼoni, neʼe liliu ia ko he koga maʼuhiga tuʼumaʼu ʼo te ʼu fakatahi ʼaia. Ko te ʼu Fakatahi ʼaia neʼe toe fakaʼaogaʼi foki moʼo fai ʼo he fagonogono lahi ki te hahaʼi.—Loma 1:11, 12.
Ia ʼaho nei ko te kau Fakamoʼoni ʼa Sehova ʼe nātou fai tuʼumaʼu te ʼu fakatahi. ʼI te agamāhani ko kokelekasio e 18 ki te 25 ʼe fakatahiʼi ko te silikosikilipisio, ʼe ʼaʼahi, peʼe gāue kiai ia te ʼu tagata taupau faka silikosikilipisio. ʼO tuʼa lua ʼi te taʼu, ʼe fakatuʼutuʼu ke fai he ʼu fakatahi, peʼe ko he koga ʼo te silikosikilipisio, ʼo fakatahitahi ʼi te Moeaki peʼe ko te ʼAhotapu.
ʼO tuʼa tahi ʼi te taʼu, ʼe fai te ʼu fakatahi lalahi ʼe ʼaho tolu peʼe ʼaho fā, ʼe higoa ko te ʼu fakatahi faka tisitilike, ʼe fai ʼi te ʼu fenua kehekehe, ʼo feala ke ina fakatahitahiʼi te ʼu lauʼi afe hahaʼi ʼi he koga meʼa e tahi. Ko te ʼu fakatahi ʼaia ʼe kau ki te tuputupu ʼo te kau Fakamoʼoni ʼa Sehova ʼi te faʼahi fakalaumālie pea mo niʼihi age hahaʼi ʼe fia logo ki tanatou ʼu gāue, pea ko te ʼu fakatahi ʼaia ʼe ko he fakamoʼoni ia ki te hahaʼi.
Ko te polokalama ʼo te ʼu fakatahi ʼaia ʼe teuteuʼi e te Kolesi Pule ʼa te kau Fakamoʼoni ʼa Sehova pea ʼe fakatafito ki te ʼu meʼa ʼaē ʼe ʼaoga ki te kau Fakamoʼoni ʼi te malamanei. ʼE fai ai te ʼu akonaki, te ʼu fai palalau, pea mo he ʼu faʼifaʼitaki, ko tona ʼu koga kehekehe ʼe fai e te ʼu taupau faka silikosikilipisio pea mo te kau Fakamoʼoni fakapotopoto ʼe fili ʼi te ʼu kokelekasio. ʼE fai foki e te hahaʼi kehekehe tanatou ʼu fakamatala ʼo fakahā ai pe neʼe feafeaʼi tanatou maʼuli faka Kilisitiano ʼi te malamanei agakovi ʼaenī, peʼe nātou fakamatala te ʼu fua ʼo tonatou minisitelio. ʼI te ʼu fakatahi faka tisitilike ʼe ʼi ai tonatou koga makehe, ʼe fai ai—te ʼu gaoʼi ʼo te temi muʼa peʼe ʼo te temi nei, ʼe fakahā ai peʼe feafeaʼi te tauʼi e te kau Kilisitiano te ʼu faigataʼaʼia ʼo totatou temi.
ʼE ʼi ai foki mo te meʼa kai pea mo te meʼa ʼinu. Ko te faʼahi ʼaia ʼe faka fealagia ai kia nātou ʼaē ʼi te fakatahi ke nātou maʼu he temi ke nātou fakafiafia ai. Ko te ʼu gāue fuli ʼaē ʼe ʼaoga ki te fakatuʼutuʼu ʼo te ʼu fakatahi ʼaia ʼe fai e te kau Fakamoʼoni ʼa Sehova ʼe nātou foaki noa tonatou temi. Ko te lue ʼo te koga meʼa peʼe ko te fale ʼaē ʼe fai ai te fakatahi pea mo ʼihi age ʼu meʼa ʼe totogi ʼaki te ʼu meʼa ʼofa. ʼE mole totogi te ulu ki te fakatahi, pea ʼe mole fai he tānaki falā.
ʼE feala ke fakahā atu e te kokelekasio ʼa te kau Fakamoʼoni ʼa Sehova ʼo tokotou kolo te ʼaho pea mo te hola ʼaē ʼe fai ai te ʼu fakatahi ʼi tokotou koga meʼa. ʼE fakahā atu anai te fakatuʼutuʼu ʼo ʼuhiga mo te meʼa feʼaluʼaki ʼo feiā aipe ki te meʼa nofo.
Ko te ʼu fakatahi ʼaia ʼe tokoni ki te kau Fakamoʼoni ʼa Sehova pea mo te hahaʼi ʼaē ʼe fakatahitahi mo nātou, ke ʼaua naʼa gata pe tonatou ʼofa ʼi tonatou kokelekasio, kae ke nātou ʼoʼofa ki te famili katoa ʼo te ʼu tēhina.—1 Petelo 2:17.
• Koteā te ʼu lelei neʼe maʼu e te kau Ako ʼuluaki ʼo te Tohi-Tapu ʼi tanatou ʼu fakatahi?
• Fakamatala te fakatuʼutuʼu pea mo te polokalama ʼo te ʼu fakatahi faka silikosikilipisio pea mo te ʼu fakatahi faka tisitilike.
[Paki ʼo te pasina 18]
Ko te gaoʼi faka Tohi-Tapu ʼi te fakatahi faka tisitilike, ʼi Amelika
Ko te fakatahi faka malamanei, ʼi Polonia
Ko te fakatahi faka malamanei, ʼi Alasatine
Ko te fakatahi faka silikosikilipisio, ʼi Saponia
Ko te ʼu telekē ʼe nātou toʼo tanatou ʼu tohi faka Tohi-Tapu, ʼi Suisi
Te ʼu papitema ʼi te fakatahi faka malamanei, ʼi Afelika Saute
Ko te fakahā ʼo te tohi foʼou, ʼi Kanata
Ko te ʼu telekē ʼe lolotoga hihiva, ʼi Sepania