Te ʼu Fakatahi Faka Malamanei Ki Te Taʼu 2003
ʼI TE Moeaki ʼaho 6 ʼo ʼOketopeli 2001, ko te fakatahi ʼaē ʼe fai ʼi te taʼu fuli e te Watch Tower Bible and Tract Society of Pennsylvania neʼe fai ʼi Jersey City, ʼi New Jersey, ʼi Amelika. Hili te fono ʼaia, neʼe nātou fakalogo fakatahi mo te kau fakaafe ki he polokalama makehe. ʼI te ʼaho ake, ko te tahi ʼu fono neʼe fai ia kolo e fā ʼo Kanata pea mo Amelika, pea neʼe tala fēnei ai e te Kolesi Pule ʼa te kau Fakamoʼoni ʼa Sehova ʼi tanatou akonaki fakaʼosi:
“ ʼI tatatou sio ki te ka haʼu, ʼe maʼuhiga ʼaupito ke ʼaua naʼa līaki e te hahaʼi fuli ʼa te ʼAtua tanatou fakatahitahi. Neʼe fakaloto mālohi e te ʼapositolo ko Paulo ke tou fai tāfito te faʼahi ʼaia, pea ke tou fefakaloto mālohiʼaki, koteʼuhi kua ōvi mai te ʼaho lahi pea mo fakamataku ʼa Sehova. (Hepeleo 10:24, 25) ʼO mulimuli ki te fakatotonu faka Tohi-Tapu ʼaia, ʼe tou fakaʼamu ke tou fai tatatou ʼu fakatahi faka tisitilike ʼi te ʼu potu fuli pe ʼo te malamanei ʼi te taʼu ka haʼu [2002]. Pea ʼi te taʼu 2003, kapau ko te finegalo ʼo Sehova, ʼe lagi feala ke fai he ʼu fakatahi faka malamanei makehe ʼi ʼihi potu ʼo te kele. ʼE ko te temi ʼaenī ke tou nonofo ʼalaʼala ai pea mo nofo tokaga, ʼo tou tokagaʼi te fakaʼaluʼalu ʼo te ʼu meʼa ʼaē ʼe hoko ʼi te kele.”
Logola te tuputupu ʼo te loto mahalohalo pea mo te ʼu fihifihia ʼi te tuʼu ʼaenī ʼaē kua vave fakaʼosi, kae ʼe tonu ke haʼele ki muʼa te gāue ʼa te hahaʼi ʼa te ʼAtua. Ko te logo lelei ʼo te Puleʼaga, ʼo kau kiai mo te fakatokaga ʼa te Tohi-Tapu, ʼe tonu ke tala ki te ʼu puleʼaga fuli pe, mo te ʼu telepi, mo te ʼu lea pea mo te hahaʼi, ʼo kole kia nātou ke nātou ‘manavasiʼi ki te ʼAtua pea mo nātou faka kolōlia kia te ia, heʼe kua hoko mai te hola ʼo tana fakamāu.’ (Apokalipesi 14:6, 7) Koia ʼo mulimuli ki te finegalo ʼo totatou Tāmai ʼi selo pea mo tona lotolelei, ʼe fakatuʼutuʼu ke fai ʼi te taʼu 2003 he ʼu fakatahi faka malamanei ʼi he ʼu potu kehekehe.
Moʼo kamata ʼe vakaʼi ke fai te ʼu fakatahi ʼaia ʼi ʼihi kolo ʼo te Potu Noleto ʼo Amelika pea ki muli age ʼi Eulopa. ʼI te lolotoga ʼo te taʼu 2003, ʼe fakatuʼutuʼu anai ke ʼolo he ʼu telekē ki he ʼu kolo ʼi Asia; pea ʼi te fakaʼosi ʼo te taʼu, ko te tahi ʼu kūtuga ʼe ʼolo anai ki Afelika, mo te Potu Saute ʼo Amelika, pea mo te Pasifika. ʼE kole anai ki ʼihi filiale ke nātou faka tuʼakoi te kau telekē ʼaē ka ʼolo ki te ʼu fenua ʼaē ka fai ai te fakatahi, heʼe mole feala anai ke fakaafe te hahaʼi fuli. Kae ʼe fakaloto mālohiʼi anai ke tuʼakoi te ʼu telekē ʼo te ʼu fenua kehekehe ʼi te ʼu potu ʼaē ka nātou ʼolo kiai.
ʼE maʼu anai e te ʼu kokelekasio ʼa te kau Fakamoʼoni ʼa Sehova he tahi ʼu manatu ʼo ʼuhiga mo te ʼu fakatahi ʼaia. Ko te ʼu ʼaho tonu pea mo te ʼu kolo ʼaē ʼe feala ke ʼolo kiai te ʼu telekē, ʼe fakahā anai e te filiale. ʼE mole maʼua ke koutou faitohi peʼe koutou kumikumi te faʼahi ʼaia ʼi te temi nei.
Ko nātou ʼaē ka filifili ko he ʼu telekē ʼe tonu anai ko he kau Fakamoʼoni kua papitema, ʼe nātou tuku he faʼifaʼitaki lelei pea mo ʼofa ki te ʼu tēhina mo te ʼu tuagaʼane ʼo te fenua ʼaē ka ʼolo kiai. Pea ko te ʼu tēhina pea mo tuagaʼane ʼo te fenua ʼaia, ʼe nātou maʼu anai te ʼu fealagia ke nātou tali ʼaki te ʼofa te hahaʼi ka ʼōmai pea mo fai te tali kāiga moʼoni. (Hepeleo 13:1, 2) ʼE hoko ai anai “he fefakaloto mālohiʼaki.” (Loma 1:11, 12, MN ) ʼE foaki anai he tahi ʼu manatu ʼo ʼuhiga mo te ʼu fakatuʼutuʼu ʼaia ki te ʼu filiale ʼaē ka fakaafe ke nātou fekauʼi he ʼu telekē ki te ʼu fenua ʼaia.
Ohage ko te agamāhani, ʼi te teitei malamanei katoa, ʼe fakatuʼutuʼu anai he ʼu fakatahi faka tisitilike ʼaho tolu. ʼI tatatou fakatahitahi ʼaia, ʼe tou maʼu fuli anai te fealagia ke tou ‘fakalogo, mo ako, pea mo maʼu ai he ʼu fakaloto mālohi.’ (Teutalonome 31:12; 1 Kolonito 14:31) ʼE foaki anai e te faʼahi ʼaia he fealagia ke “ ʼahiʼahi pea mo . . . vakaʼi ko Sehova ʼe lelei.” (Pesalemo 34:8) ʼI te ʼu fakatahi faka malamanei fuli, ʼo feiā ʼi te ʼu fakatahi faka tisitilike, ʼe ʼōmai anai te kau misionea, ko ʼihi ia nātou ʼe nātou kau anai ki te polokalama.
ʼI te taʼu ʼaenī, ʼe tou fiafia ʼuhi ko te ʼu Fakatahi Faka Tisitilike “Te Kau Fai Faka Mafola Faiva ʼo Te Puleʼaga,” ʼaē ʼe ina uga anai tatou ke lahi tatatou fai faka mafola. ʼI tatatou fai te faʼahi ʼaia, ʼe mahino ia ʼe lahi anai tatatou fakaʼamu ki te ʼu meʼa ʼaē ka foaki mai e Sehova ʼi te taʼu ka haʼu. ʼE tokoni mai anai ke tou ‘nonofo fakaonoono, pea mo tou nofo teuteu’ ʼuhi ko te ʼu temi faigataʼa pea mo nounou ʼaenī.—Mateo 24:42-44.