Ko Te Kau Fakamoʼoni ʼa Sehova ʼe Nātou Fai Anai Te ʼu Fakatahi Faka Malamanei
Ko te Kolesi Pule ʼo te kau Fakamoʼoni ʼa Sehova ʼe ina fakatuʼutuʼu ke ina fai te ʼu fakatahi faka malamanei ʼi te taʼu 1998. Neʼe tali ʼaki he loto fiafia te logo ʼaia ʼi te fono ʼaē ʼe fai ʼi te taʼu fuli ʼa te Watch Tower Bible and Tract Society of Pennsylvania, ʼaē neʼe fai ʼi te Fale Fakatahi ʼi Jersey City, ʼi te Moeaki, ʼaho 5 ʼo ʼOketopeli 1996.
ʼO hilifaki ki te ʼu fakatahi faka tisitilike ʼaē ʼe fai ʼi te agamāhani, ʼe fai anai te ʼu fakatahi faka malamanei ʼi Amelika ʼo te Potu Tokelau lolotoga te vaelua ʼo te taʼu 1998. ʼE fakaʼamu ʼaki te ʼu fakatahi ʼaia, ke maʼopoʼopo mai te toko lauʼi teau afe kau Fakamoʼoni mai te ʼu potu kehekehe ʼo te kele. Moʼo faka fealagia ke lahi te ʼu fenua ʼaē ka kau anai kiai, ko te ʼu filiale fuli ʼi te ʼu filiale e 100 tupu ʼo te Watch Tower Society, ʼe nātou vaevae anai tanatou kau telekē ke nātou ʼolo ki te ʼu kolo ʼo Amelika ʼo te Potu Tokelau ʼaē kua fakatuʼutuʼu ke fai ai te fakatahi faka malamanei.
ʼE mahino ia, ʼe mole feala anai kia nātou fuli ʼaē ʼe fia ʼolo ki Amelika ʼo te Potu Tokelau ke nātou ʼolo kiai. Kae ʼe feala anai ki te toko lauʼi afe hahaʼi ke nātou kau ki he fakatahi faka malamanei ʼe mole faʼa mamaʼo mo tonatou fenua. ʼE fai te ʼu fakatuʼutuʼu ke hoko te ʼu fakatahi faka malamanei ʼi te ʼu fenua e lua peʼe tolu ʼi Eulopa pea mo te tahi ʼu fakatahi ʼi Afelika, ʼi Asia, ʼi Amelika Latina, ʼi te Potu Toga ʼo te Pasifika pea ʼi te ʼu Caraïbes.
ʼI tona temi tonu, ko te ʼu filiale ʼo te Sosiete ʼe nātou fakahā anai ki te ʼu kokelekasio te ʼu higoa ʼo te ʼu kolo ʼaē ʼe fakaafe nātou ke ʼolo kiai. ʼE fakahā anai te ʼu ʼaho ʼaē ka fai ai te fakatahi, pea mo te ʼu fakatuʼutuʼu ʼaē ka fai anai moʼo filifili ʼo te ʼu tēhina mo tuagaʼane ʼaē ka kau anai ki te fakatahi ʼaia. Ko nātou ʼaē ʼe nātou fia tohi hanatou pepa ke nātou kau ki te fakatahi, ʼe tonu ke nātou kamata tānaki kehe hanatou falā ʼo ʼuhiga mo te ʼu fakatahi makehe ʼaia.
Ko te kau Fakamoʼoni ʼa Sehova fuli ʼi te kele katoa ʼe nātou talitali ki te ʼu fakatahi faka malamanei ʼaia ʼaē ka hoko ʼi te 1998. ʼE tatau anai te polokalama ʼo te ʼu fakatahi faka tisitilike ʼaē ka fai ʼi te ʼu fenua fuli.