Tou Tufa Te Tohi Les jeunes sʼinterrogent
1 Logope la ko te tufa ʼo te māhina ʼaenī ko te tohi Révélation: dénouement, ʼe feala pe ke koutou fakatuʼutuʼu ke koutou tufa te tohi Les jeunes sʼinterrogent mokā ʼe koutou palalau ki he tāmai, he faʼe peʼe ko he tūpulaga ʼe tuʼania ʼo ʼuhiga mo te ʼu faigataʼaʼia ʼe tau mo te kau tūpulaga.
2 Kapau ʼe koutou fakasiosio ʼe ʼaoga ke koutou ʼui age he manatu fēnei:
◼ “ ʼE mole faigafua te tuputupu ʼi te ʼu temi faigataʼa ʼaenī. ʼE tau te kau tūpulaga mo te ʼu faʼahiga meʼa foʼou ʼe fakamaʼua ai kia nātou ke nātou fai he ʼu tonu maʼuhiga. ‘ ʼE tonu koa ke ʼau ʼinu kava? Pe ko te fakaʼaogaʼi ʼo te ʼu toloke? Koteā te aga ʼe tonu ke fai ki he taʼahine peʼe ki he tama?’ Mokā fai fehuʼi te kau tūpulaga ʼo ʼuhiga mo te ʼu fehuʼi tāfito ʼaia, ʼe nātou tautau felāveʼi mo te ʼu tali ʼe fefakafeagai. ʼI takotou manatu ko te faʼahi fea koa ʼaē ʼe maliu ki ai te tokolahi moʼo maʼu ai ʼo hanatou tokoni? [Koutou tuku ke fai mai hana tali.] Ko te tohi ʼaenī, Les jeunes sʼinterrogent—Réponses pratiques, ʼe ina tuku mai he manatu ʼe ʼaoga. [Koutou fakatokagaʼi ia ia ki te tānakiʼaga ʼo te ʼu kupu, ʼe fakahā ai te ʼu manatu kehekehe.] ʼE ʼaoga ki te kau tūpulaga ke nātou maʼu he ʼu tali fakahagatonu pea mo totonu. Ko te ʼu tali ʼo te tohi ʼaenī ʼe ko te ʼu meʼa ʼaia ʼe talanoa kiai te Tohi-Tapu.”
3 Koʼeni te tahi faʼifaʼitaki ʼe feala ke koutou fakaʼaogaʼi:
◼ “ ʼE lahi te ʼu faigataʼaʼia ʼe tau mo te kau tūpulaga ia ʼaho nei. ʼE ʼaoga kia nātou he tokoni moʼo tauʼi fakalelei ʼo te faʼahi ʼaia. ʼI tatatou faiga fakalelei ʼaē ke feala hatatou tokoni kia nātou, ʼe mole tou kumi koa he meʼa moʼo foaki ʼo he taki ʼe ʼaoga? [Koutou tuku ke fai mai hana tali.] Ko ʼihi ʼu faigataʼaʼia mālohi ʼe haʼu mai ʼihi ʼu tūpulaga, tonatou ʼu kaumeʼa. Koutou fakatokagaʼi te ʼu paki ʼi te ʼu pasina 76 pea mo te 77 ʼo te tohi ʼaenī. [Koutou fakatokagaʼi ia ia ki te ʼu kupu ʼo te ʼu paki ʼaia pea mo te ʼu palakalafe ʼaē ʼe tohi faka italike ʼi te pasina 77.] Ko te ʼu pasina ki muli mai ʼo te kapite ʼaenī ʼe talanoa ki te ʼu tali fakahagatonu pea mo ʼaoga.”
4 ʼE mahino papau ia ko te ʼu temi ʼaenī ko “te ʼu temi maʼuhiga ʼaupito mo faigataʼa,” tāfito ki te kau tūpulaga. (2 Tim. 3:1) Ko te tohi Les jeunes sʼinterrogent ʼe feala ke tokoni lelei ki he tūpulaga ke ina tauʼi fakalelei te ʼu faigataʼaʼia ia ʼaho nei. Ko te ʼu kapite e 39 ʼe lahi ai te ʼu faʼifaʼitaki, pea ko te ʼu alatike ʼe totonu pea mo ʼaoga. Koia ʼi te temi fuli pe ʼe faigamālie ai kia koutou, ʼe tonu ke koutou fakaʼaogaʼi te tohi lelei ʼaenī.