Tou Fakaʼaogaʼi Fakalelei Te Kaupepa Foʼou
1 ʼI tatatou fakatahi faka tisitilike neʼe hoki ʼosi age, neʼe tou fiafia ʼi tatatou maʼu te kaupepa foʼou Mokā Mate He Tahi ʼe Tou ʼOfa Mamahi Ai. ʼE tonu ke ʼaoga ki te hahaʼi kehekehe, koteʼuhi ʼe mamahi te tokolahi ʼi te mate ʼo he tahi neʼe nātou ʼofa mamahi ai. ʼE faigafua tona tufa ʼaki te fakaʼaogaʼi ʼo tona ʼu paki. ʼI te pasina 29 ʼaē ʼe tuʼu ai te paki ʼo Lasalo ʼi tona fakatuʼuake neʼe fakahā ai e Sesu tona “loto ʼaē ke molehi te ʼu mamahi tupu mai te mate.” Ko te paki ʼi te ʼu pasina ʼaē ʼe hoa mai, ʼe nātou fakahāhā ia te fakatuʼuake ʼi te mālama foʼou. ʼOfa pe ke fiafia te ʼu loto ʼo nātou ʼaē ʼe mamahi ʼaki te paki ʼaia!
2 Ko te kaupepa ʼaenī ʼe ko he tokoni lahi moʼo fakaloto mālohiʼi ʼo te hahaʼi ʼaē ʼe mamahi. Neʼe fai moʼo kamata ʼo he ʼu fai palalau. Ko te ʼu fehuʼi moʼo fakahā ʼo te ʼu manatu tāfito neʼe fakaʼiloga keheʼi ʼi te fakaʼosi ʼo te alatike kae ʼe mole tuʼu ia ʼi te lalo pasina. ʼE feala ke koutou fakaʼaogaʼi “Te ʼu fehuʼi ke fakakaukauʼi” mo kapau ʼe koutou fakatokagaʼi ʼe ʼaoga tāfito kia ia ʼaē ʼe ako mo koutou.
3 Mokā koutou fai he ʼu ʼaʼahi, koutou fili he ʼu puani ʼi te kaupepa ke koutou palalau kiai. E lagi ʼe koutou leleiʼia anai te fakahā kia ia ʼaē ʼe palalau mo koutou te tānakiʼaga ʼo te ʼu kupu tāfito ʼi te pasina 2 pea koutou fehuʼi ki ai pe koteā te kupu ʼe loto ke koulua palalau kiai. Ke koutou tokaga lelei ki te meʼa ʼe ʼaoga kia nātou takitokotahi. Koutou faka fealagia age ki ai ke ina fakahā atu tana ʼu manatu, pea koutou fakahā age te manatu fakaloto mālohi ʼe foaki mai ʼi te kaupepa ʼaia. Ko te faʼahi takitahi ʼe lahi tana fakaʼaogaʼi te ʼu vaega faka Tohi-Tapu moʼo fakatafito ʼo tatatou ʼamanaki.
4 Ko te kupu tāfito ʼi te pasina 5, “ ʼE ʼi Ai Te ʼAmanaki Moʼoni,” ʼe ina faka maʼuhigaʼi te ʼamanaki fakaloto mālohi ʼa te kau mate ʼo fakatafito ki te Tohi-Tapu. Ko te faʼahi ʼaia ʼe ina uga ai te fia logo ke hoko atu ʼaki te faʼahi “Ko Te ʼAmanaki Moʼoni Maʼa Te Kau Mate,” ʼe fakatafito ki te ʼu pasina 26 ki te 31. Ko te talanoa ʼi te pasina 27 ʼe tuʼu ai “Te ʼu Vaega Fakaloto Fīmālie.” Ko he tahi ʼe tau mo te mamahi ʼe vave anai tana ʼiloʼi ko Sehova ʼe “ko te ʼAtua ʼo te fakafimālie loto.”—2 Ko. 1:3-7.
5 Ko te ʼu faʼahi ʼe hoa mai kiai ʼe talanoa fakapotopoto ki te ʼu aga kehekehe ʼe felāveʼi mo ʼihi mokā mate he tahi neʼe ʼofa mamahi ai. ʼE nātou fakahā ai peʼe feafeaʼi te tauʼi ʼo te mamahi pea mo te faʼahiga tokoni ʼe feala ke foaki e ʼihi ʼi te ʼu temi ʼaia. Ko te talanoa ʼaē ʼe tuʼu ʼi te pasina 25 ko tona kupu “Tou Tokoni Ki Te ʼu Tamaliki Ke Nātou Mahino Ki Te Mate.” ʼE ko he tokoni moʼoni ki te ʼu mātuʼa ʼaē ʼe tau mo te faigataʼaʼia ʼaia.
6 Ke ia koutou te kaupepa ʼaia, pea ke koutou fakaʼaogaʼi ʼi te fagonogono faigamālie. E lagi ʼe koutou fia ʼaʼahi te ʼu fale mate ʼi tokotou telituale, ke feala ai hakotou fakaloto mālohi niʼihi ʼe tau mo te mamahi ʼaia. Peʼe ke koutou kamata palalau fakapotopoto ki niʼihi ʼe tau mo te mamahi ʼaia ʼi te ʼu tānuma mokā nātou ʼolo ʼo fakasiosio te tānuma ʼo he tahi neʼe nātou ʼofa mamahi ai.
7 ʼE tou fiafia heʼe tou ʼiloʼi ko Sehova ko te ʼAtua “ ʼe ina fakafimālie ia nātou ʼaē neʼe fakatō laloʼi.” (2 Ko. 7:6) ʼE tou fakatuʼutuʼu te faʼahi ʼaia, ko he pilivilesio tatatou kau ki te ‘fakafimālieʼi ʼo nātou ʼe tau mo te putu.’—Is. 61:2.