Tou Tokoni Ki Niʼihi Ke Nātou Maʼu Te Fakaloto Fīmālie
1 ʼE lahi te ʼu hahaʼi kua nātou pipiko ʼi te logo ki te ʼu tuʼutāmaki, te ʼu tau, te ʼu fai fakapō, pea mo te mamahi. Kae, ʼe mole talanoa tuʼa tahi te ʼu tala logo ia ʼaho nei ki te fakaloto fīmālie, ʼaē ʼe ko he meʼa ʼe ʼaoga moʼoni ki te hahaʼi. Ko te fakaloto fīmālie ko tona faka ʼuhiga ko te “foaki ʼo he mālohi pea mo he falala ki” pea mo “te faigafua ʼo te mamahi peʼe ko te lotohoha ʼo” he tahi. ʼI totatou ʼuhiga Fakamoʼoni ʼa Sehova, ʼe tou maʼu ia meʼa fuli moʼo tokoni ki te hahaʼi ʼi te faʼahi ʼaia. (2 Ko. 1:3, 4) Ko tatatou ʼu kaupepa lalahi ʼaē ʼe fakatafito ki te Tohi-Tapu ʼaē ka tou tufa anai ʼi Sūlio pea mo ʼAukusito, ʼe maʼu ai te ʼu logo fakaloto fīmālie ʼo te moʼoni. (Loma 15:4) Koʼeni he ʼu tokoni ʼo ʼuhiga mo te tufa ʼo te ʼu kaupepa ʼaia ʼi te ʼu ʼaluʼaga kehekehe:
2 ʼE feala ke liliu he tuʼutāmaki ko he fealagia moʼo fai ʼo te fagonogono pea moʼo foaki ki niʼihi te fakaloto fīmālie, lagi ʼe feala ke koutou ʼui age fēnei:
◼ “Mokā hoko te ʼu meʼa ʼaia, ʼe feʼekeʼaki e ʼihi peʼe maʼuli moʼoni koa te ʼAtua, pea kapau ʼe maʼuli, pea ʼe tokaga koa ia kia tatou. Koteā tau manatu? [Tuku ke fai atu hana tali.] Ko he faʼahi ke tou ʼiloʼi ai, pe ʼi ai he ʼAtua, ʼe ko te fakaʼaogaʼi ʼo te lao ʼe ʼiloʼi lelei e te hahaʼi.” Koutou lau ia Hepeleo 3:4. Koutou fakatokagaʼi he tahi ʼu meʼa ʼi ʼotatou tafa ʼe hā lelei ai neʼe maʼua ke faʼu e he tahi. Pea koutou hoko atu fēnei: “ ʼE ʼi ai taku kaupepa ʼe ʼau ʼiloʼi ʼe ke maʼu anai te fakaloto fīmālie ʼi ai. Ko tona kupu tāfito ʼE tokaga moʼoni koa te ʼAtua kia tatou? [Lau te ʼu fehuʼi ʼe tuʼu ʼi te takafi ʼo te kaupepa.] ʼE maʼu ai te ʼu fakamoʼoni ʼe hā ai ʼe maʼuli moʼoni te ʼAtua, kae ʼe toe fakahā ai kua vave pe anai tana fakagata te ʼu ʼaluʼaga heʼe faitotonu ʼaē ʼe tau mo tatou ia ʼaho nei. ʼE ʼau fia tuku atu te kaupepa ke ke lau, ko tona totogi fakaʼofa ko te 50.” Koutou fakatuʼutuʼu ke koutou toe liliu ʼo ʼaʼahi ia ia.
3 ʼI te ʼaʼahi, ʼe feala ke koutou ʼui fēnei:
◼ “Neʼe tā palalau ʼo ʼuhiga mo te fakamoʼoni ʼaē ʼe maʼuli te ʼAtua ʼi taku tuku atu te kaupepa ʼaē ʼE tokaga moʼoni koa te ʼAtua kia tatou? Lagi neʼe ke fakatokagaʼi te puani ʼaia ʼi te pasina 7. [Fakahā age te paki pea mo talanoa fakanounou ki te palakalafe 15.] Ko te faʼifaʼitaki ʼaenī ʼe ko he faʼifaʼitaki ʼe hā ai ʼe maʼuli moʼoni te ʼAtua. [Lau te palakalafe 27 ʼo te pasina 9.] Ko te ako ʼo te Tohi-Tapu neʼe tokoni kia ʼau ke ʼau tauʼi te ʼu fihifihia ʼo toku maʼuli ʼi te ʼaho fuli, koteʼuhi ʼe ina foaki mai te manatu ʼa te ʼAtua ʼo ʼuhiga mo te ʼu faʼahi ʼaia.” Tou fakahā age peʼe feafeaʼi te fai ʼo te ako.
4 ʼE lagi koutou fia fakaʼaogaʼi te kaupepa “Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa?” ʼE feala ke koutou fakamālo ki ai pea mo koutou ʼui age:
◼ “ ʼE lahi ia nātou ʼaē ʼe nātou feʼekeʼaki peʼe ko te hahaʼi mamate ʼe nātou ʼolo ki he mālama fakalaumālie.” Tou fakaʼaogaʼi te hisitolia ʼi te pasina 2 ki te 3 pea tou ʼui fēnei: “Ko te ʼu akonaki ʼaia ʼe maʼu ʼi te ʼu potu fuli ʼo te malamanei. Kae ko te fehuʼi ʼaē ʼe maʼuhiga ʼaupito: Koteā koa te ʼui ʼa te Folafola ʼa te ʼAtua, te Tohi-Tapu ʼo ʼuhiga mo te faʼahi ʼaia?” Tou lau te lua palakalafe ʼo te pasina 4 ʼo te kaupepa. Tou fehuʼi age ki ai pe koteā tana manatu, pea tou faka fealagia ke ina fai mai hana tali. Pea, tou lau age he vaega Tohi-Tapu ʼi te pasina 5. ʼOsi ʼaia, pea tou fakamahino age te fakatuʼutuʼu ʼo te kaupepa ʼaia, pea tou tuku age ki ai ki te 50.
5 ʼI takotou toe ʼaʼahi, ʼe lagi feala ke koutou fai te palalau ʼaenī moʼo kamata he ako Tohi-Tapu:
◼ “ ʼE ʼau fia vaevae mo koe te tahi vaega faka Tohi-Tapu ʼe fakahā ai te meʼa ʼaē ka hoko anai mokā mate he tahi. Ia Senesi 2:7, neʼe fakakikite e te ʼAtua te meʼa neʼe hoko kia Atama mo Eva ʼi te ʼosi ʼo tanā mamate. [Lau te palakalafe 4 ʼo te pasina 4 ʼi te kaupepa Te ʼu laumālie ʼo te kau mate.] Koia, neʼe mole nā liliu ko he ʼu laumālie. Koteā tau manatu ʼo ʼuhiga mo te meʼa neʼe hoko kia nāua? [Tuku ke fai atu hana tali.] Ko te hahaʼi ʼaē ʼe nātou fia ʼiloʼi te tupuʼaga ʼo te mate ʼe nātou ako te Folafola ʼa te ʼAtua, te Tohi-Tapu. ʼE ʼau fia foaki atu te fealagia ʼaia ke feala hau ako te Tohi-Tapu.” Tou fakamahino age ko te ako Tohi-Tapu ʼe mole totogi pea tou fai he ʼu fakatuʼutuʼu moʼo kamata ʼo te ako.
6 ʼI te fakahā ʼo te kaupepa “Kote puleaga ae ka ina fakatuu anai te Palatiso,” ʼe feala ke koutou fehuʼi age:
◼ “Koteā anai tau manatu ʼo ʼuhiga mo te mālama mo kapau neʼe puleʼi tokotahi pe e te ʼAtua? [Tuku ke fai atu hana tali.] Ko te pule ʼa te ʼAtua ki te kele ʼe ko te meʼa tāfito ʼaia ʼe tou faikole kiai mokā tou lau te kole ʼaē ko te Tāmai ʼe ʼi selo, ʼaē neʼe akoʼi mai e Sesu Kilisito. [Fuli age ki te pasina 3, pea tou lau te ʼuluaki palakalafe, ʼaē ʼe tuʼu ai ia Mateo 6:10.] Kapau ʼe ke fia maʼuli ʼi he mālama fēnei, pea ʼe tonu anai ke ke lau te kaupepa ʼaenī.” Koutou foaki age te kaupepa ki te 50.
7 Kapau neʼe koutou tuku te kaupepa “Kote puleaga ae ka ina fakatuu anai te Palatiso,” ʼe feala ke koutou ʼui age fēnei:
◼ “Neʼe ʼau manatuʼi tatā fai palalau talu mai ai, pea neʼe ʼau manatuʼi te ʼu vaega Tohi-Tapu e lua ʼe ʼau fia vaevae mo koe. ʼE lagi ke manatuʼi neʼe tā palalau ʼo ʼuhiga mo te pule ʼa te ʼAtua ki te kele. ʼI te Tohi-Tapu, neʼe fakapapau mai e Sehova ʼAtua ʼe hoko anai te faʼahi ʼaia. [Lau ia Taniela 2:44.] ʼE ke tui koa ʼe hoko moʼoni anai te faʼahi ʼaia? [Tuku ke fai atu hana tali.] Fagono mai muʼa ki te meʼa ʼaē neʼe ʼui e te ʼAtua ʼo ʼuhiga mo tana fealagia ʼaē ke ina fakahoko tana fakapapau. [Lau ia Isaia 55:11.] ʼE mole fakaloto mālohiʼi koa la ia tatou ke tou tuku tatatou falala ki te Puleʼaga ʼo te ʼAtua? Kae ʼe fakahoko anai koa e te ʼAtua tana fakapapau ʼafea?” Koutou fakamahino age ʼe koutou tali anai ki te fehuʼi ʼaia ʼi takotou toe liliu mai.
8 ʼOfa pe ke tou fai te meʼa ʼaē ʼe lelei ʼi te ʼu māhina ʼaē ka hoa mai, ke feala ai hatatou mulimuli kia Sesu ʼo ‘fakaloto fīmālieʼi ia nātou fuli ʼaē ʼe putu.’—Isaia 61:2.