Ko Te ʼu Fono Gāue ʼo ʼOketopeli
Vāhaʼa ʼe Kamata ʼi Te 3 ʼOketopeli
Katiko 180
10 mn: Ko te ʼu logo ki te kokelekasio pea mo te ʼu Tonu ʼo Te Minisitelio ʼo Te Puleʼaga. Fakamanatuʼi kia nātou fuli ʼaē ʼi te fono ke nātou ʼaumai tanatou kaupepa lahi Mokā Mate He Tahi ʼe Tou ʼOfa Mamahi Ai ʼi te Fono gāue ʼi te vāhaʼa ka haʼu.
17 mn: “Ko Te Temi ʼAenī.” ʼO fai ʼaki te ʼu fehuʼi pea mo te ʼu tali. ʼO kau kiai mo te ʼu manatu ʼo te kupu tāfito “Ke koutou fai he ʼu fakatuʼutuʼu fakalaumālie” ʼi te ʼu pasina 5 ʼo Te Minisitelio ʼo Te Puleʼaga ʼo Novepeli 1993.
18 mn: “Tou Tokaga ʼo Tufa Te ʼu Nusipepa Lolotoga Te Māhina Ko ʼOketopeli.” Fai palalau mo nātou ʼaē ʼi te fono. Fai he ʼu faʼifaʼitaki e lua neʼe teuteuʼi lelei, ʼo fakahā ai peʼe feafeaʼi te fakaʼaogaʼi ʼo te ʼu nusipepa moʼo kamata ʼo he ʼu fai palalau. Fakahā te maʼuhiga ʼo te tufa ʼo te ʼu nusipepa ki te hahaʼi fuli ʼaki te fakatuʼutuʼu ke tou fai he apone, peʼe ke tou kamata tuku ki he tahi he nusipepa pea ke tou ʼolo ʼo tuʼumaʼu ʼo ʼave kiai te nusipepa foʼou.
Katiko 212 pea mo te faikole fakaʼosi.
Vāhaʼa ʼe Kamata ʼi Te 10 ʼOketopeli
Katiko 51
10 mn: Ko te ʼu logo ki te kokelekasio. Lau ʼo te falā pea mo te ʼu fakamālo ʼo ʼuhiga mo te ʼu meʼa ʼofa.
20 mn: “Parents, aidez vos enfants!” (ʼU mātuʼa, koutou tokoniʼi takotou fānau!) Akonaki ʼe fai e he tagata ʼāfea ʼo fakatafito ki te ʼu alatike e tolu ʼo te Réveillez-vous! (fakafalani) ʼo te ʼaho 8 ʼo ʼAukusito. Fakahā tona ʼaoga ki totatou telituale. Fakafehuʼi fakanounou he tahi ʼi te ʼu mātuʼa neʼe palalau mo te kau faiako peʼe ko ni pule ʼo te ʼu faleako. Fakahā peʼe feafeaʼi te tokoni ʼa te ʼu mātuʼa ki tanatou fānau.
15 mn: “Tou Fakaʼaogaʼi Fakalelei Te Kaupepa Foʼou.” Fai palalau ki te alatike mo nātou ʼaē ʼi te fono. Fakahāhā te ʼu faʼahi ʼo te kaupepa, pea mo foaki he ʼu tokoni ʼo fakahā ai peʼe feafeaʼi tona fakaʼaogaʼi moʼo fakafimālie ʼo te hahaʼi ʼaē ʼe lotomamahi.
Katiko 46 pea mo te faikole fakaʼosi.
Vāhaʼa ʼe Kamata ʼi Te 17 ʼOketopeli
Katiko 48
10 mn: Ko te ʼu logo ki te kokelekasio. Logo faka teokalatike.
15 mn: ʼAua Naʼa Tou Fiu ʼi Te Fai ʼo Te Meʼa ʼAē ʼe Lelei. Akonaki ʼe fai e he tagata ʼāfea. Ko te gaʼegaʼe fakalaumālie ʼe feala ke ina fakavaivai tatatou fiafia pea mo tatatou faiva ʼi te gāue kia Sehova. Toe vakaʼi he ʼu faʼahiga meʼa ke fai moʼo fakafoʼou ʼo totatou mālohi fakalaumālie ʼaki te tokoni ʼa te ʼu manatu ʼo Te Tule Leʼo (fakafalani) ʼo te ʼaho 15 ʼo Sanualio 1986 ʼi te pasina 19 (vakaʼi te talanoa). Fakahā te maʼuhiga ʼo te lagolago mo te loto katoa ki te ʼu gāue ʼo te kokelekasio.
20 mn: “ ʼAki Te ʼOfa, Tou Tokoni Kia Nātou ʼAē ʼe Fia Logo.” Fai palalau mo nātou ʼaē ʼi te fono. Fai he ʼu faʼifaʼitaki e lua ʼo fakaʼaogaʼi te ʼu manatu ʼi te alatike. Fakamanatuʼi kia nātou fuli ʼaē ʼi te fono ke fakahā te apone ʼi tatatou ʼuluaki ʼaʼahi. ʼE feala hatatou toe fakahā age foki mo te apone ki te ʼu māhina e ono ki te falā 500.
Katiko 204 pea mo te faikole fakaʼosi.
Vāhaʼa ʼe Kamata ʼi Te 24 ʼOketopeli
Katiko 181
12 mn: Ko te ʼu logo ki te kokelekasio. Toe vakaʼi “Ko He Fono Moʼo Fakaloto Mālohiʼi ʼo Tatou ʼi Te Faʼahi Fakalaumālie.” Fakamanatuʼi kia nātou fuli ʼaē ʼe ʼi te fono, ia te maʼuhiga ʼo te teuteu fakatomuʼa ʼo te ako pea ke nātou ʼolo tuʼumaʼu kiai.
15 mn: Neʼe koutou fakatuʼutuʼu koa ia te lahi ʼo te ʼu nusipepa? Ko te ʼu nusipepa ʼaē ko Te Tule Leʼo pea mo te Réveillez-vous! ko te ʼu tokoni maʼuhiga moʼo fakahā ʼo te logo ʼo te Puleʼaga. ʼE tonu ke tou fakahā ʼi te temi fuli pe. Ko Te Minisitelio ʼo Te Puleʼaga ʼo Maio 1984 ʼe ina fakatokagaʼi te kau fai faka mafola takitokotahi “ke nātou fakatuʼutuʼu te lahi ʼo tanatou ʼu nusipepa . . . ʼo nātou fakatuʼutuʼu te lahi ʼo te nusipepa takitahi.” Kapau ʼe mole tou fai te puleʼaki ʼaia ʼe feala ke ʼosi tatatou ʼu nusipepa pea tou maʼu pe leva te ʼu kiʼi pepa lotu peʼe ko te ʼu kaupepa. ʼE lelei anai ki te famili takitokotahi ke nātou fakatuʼutuʼu ʼo nātou fakaʼui hanatou ʼu nusipepa. Ko te ʼu fakaʼui nusipepa ʼe fai ʼi te faʼahi ʼaē ʼe tuku ai te ʼu nusipepa. Ke tou tokaga ʼo tou ʼolo ʼo toʼo tatatou ʼu nusipepa ʼi te vāhaʼa fuli. Koutou fakahā te ʼu fua lelei ʼo te fakaʼui nusipepa.
18 mn: “Tou Haga Kumi Muʼa Te Puleʼaga ʼo Te ʼAtua—ʼAki Hatatou Momoli Tuʼumaʼu He ʼu Sakilifisio Fakavikiviki.” ʼO fai ʼaki he ʼu fehuʼi pea mo he ʼu tali. Fakahā he ʼu fakatuʼutuʼu fakapotopoto ʼe ʼaoga ke tou fai takitokotahi. Palalau ki te ʼu meʼa ʼe feala ke tou fai moʼo tokoniʼi ʼo niʼihi.
Katiko 43 pea mo te faikole fakaʼosi.
Vāhaʼa ʼe Kamata ʼi Te 31 ʼOketopeli
Katiko 14
12 mn: Ko te ʼu logo ki te kokelekasio. ʼAki te ʼu ʼaho mālōlō ʼi Novepeli mo Tesepeli, ʼe fakaloto mālohiʼi tatou fuli ke tou fakakaukauʼi te gāue pionie vaeluaʼi temi. Fakahā he ʼu manatu ʼo ʼuhiga mo te temi ʼe feala ke tou maʼu moʼo fai ʼo te faʼahi ʼaia.
15 mn: Ko te ʼu logo ʼe ʼaoga ki te kokelekasio. Peʼe ko he akonaki e fai e he tagata ʼāfea ʼo fakatafito ki te alatike ʼo Te Tule Leʼo ʼo te ʼaho 15 ʼo Maio 1994, ko tona kupu tāfito “ ʼE Feala Koa Hakotou Maʼuliʼi Te Faʼa Kātaki? ʼi te ʼu pasina 21 ki te 23.
18 mn: Tou tufa te Tohi-Tapu Traduction du monde nouveau ʼi Novepeli. Koteʼuhi e tokolahi ʼe nātou maʼu ia te Tohi-Tapu, koia ʼe ʼaoga ke tou fakahā kia nātou pe koʼe ʼe maʼuhiga age ia te Tohi-Tapu Traduction du monde nouveau. Tou fakaʼaogaʼi te tohi “Toute Écriture est inspirée de Dieu et utile” (ʼi te ʼu pasina 319 ki te 320, ʼi te ʼu palakalafe 1 ki te 6). Tou fakamahino pe koʼe ʼe ina fakaʼaogaʼi te huafa ʼo Sehova, pea ke tou fakahā age he ʼu faʼifaʼitaki ʼo ʼuhiga mo tona fakaʼaogaʼi ʼi te lea ʼo te temi nei. Tou fakaʼiloga he ʼu manatu ʼaoga ʼi te fakaʼosi ʼo te Tohi-Tapu, ohage la ko te “Kumiʼaga ʼo te ʼu kupu faka Tohi-Tapu,” ʼaē ʼe tou fakaʼaogaʼi ʼi te agamāhani. Ko te “Pasina ʼe tuʼu ai te ʼu tohi ʼo te Tohi-Tapu” ʼe ina fakahā te higoa ʼo ia ʼaē neʼe ina fai te tohi pea mo te koga meʼa neʼe fai ai, pea mo te temi neʼe tohi ai, ʼo feiā aipe mo te loaloaga ʼo te fai ʼo te tohi. Tou fakaʼaogaʼi te tohi Comment raisonner (ʼi te pasina 52, ʼi te kupu tāfito “Les prophéties bibliques aident à comprendre la signification des conditions mondiales”), pea ke tou fakahā peʼe feafeaʼi te kamata ʼo he fai palalau faka Tohi-Tapu ʼo fakatafito kia Soane 17:3 pea mo Pesalemo 37:10, 11, 29. Ko he kaugā faka mafola faiva ʼe ina fai he faʼifaʼitaki ʼo fakahā ai peʼe feafeaʼi te fakahā ʼo te Tohi-Tapu Traduction du monde nouveau pea mo te tohi E Feala Keke Mauli O Heegata Ite Palatiso Ite Kele! ʼi totatou telituale.
Katiko 165 pea mo te faikole fakaʼosi.