Tou Haga Kumi Muʼa Te Puleʼaga ʼo Te ʼAtua—ʼAki Hatatou Momoli Tuʼumaʼu He ʼu Sakilifisio Fakavikiviki
1 Ko nātou ʼaē ʼe nātou haga kumi muʼa te Puleʼaga ʼe nātou teuteu tuʼumaʼu ke nātou palalau kia Sehova pea ke nātou fakahā tona Puleʼaga. (Pes. 145:11-13) ʼI te ʼaho fuli ʼe tou maʼu te ʼu faigamālie ke tou tapuaki ai tona huafa pea mo fakahā ia te logo lelei. (Pes. 96:2) Ko te fakavikiviki kia Sehova neʼe ko he meʼa fakatupu fiafia ki te tagata fai pesalemo ʼaē neʼe ina ʼui fēnei: “Ki te ʼAtua ʼe mātou momoli anai ki ai te ʼu fakavikiviki ʼi te lolotoga ʼo te ʼaho.” (Pes. 44:8) Kapau ʼe ia tatou te manatu ʼaia, ʼe tou holi anai ke tou kau tuʼumaʼu ki te minisitelio ʼo te Puleʼaga.
2 Neʼe mole fakatuʼutuʼu e Sehova te lahi ʼo te temi ʼaē ʼe tonu ke tou fakaʼaogaʼi ʼi te minisitelio, kae ʼe ina fakaloto mālohiʼi tatou ke tou fakavikiviki ia ia “tuʼumaʼu.” (Hep. 13:15) Kapau ʼe faigamālie totatou ʼaluʼaga takitokotahi, ʼe tonu ke tou fakatuʼutuʼu he temi ke tou fakaʼaogaʼi moʼo fakavikiviki ʼo Sehova ʼi te vāhaʼa fuli. Ko nātou fuli ʼaē kua nātou fai te faʼahi ʼaia, ʼe feala hanatou fakatuʼutuʼu ke nātou pionie vaeluaʼi temi ʼi he lakaga peʼe ke nātou fai hoholo. Ko nātou ʼaē kua pionie vaeluaʼi temi e lagi feala ke nātou pionie katoa. Kapau ʼe fia palalau te ʼu tagata ʼāfea mo tatou ʼo ʼuhiga mo tatatou gāue, ʼe feala hatatou fakalogo pea ke tou sivisivi fakalelei totatou ʼaluʼaga peʼe feala ke tou pionie.
3 Logope la totatou ʼu ʼaluʼaga takitokotahi, ʼe feala koa la hatatou fakatuputupu tatatou sakilifisio fakavikiviki? Ko te faiva ʼe tupu mai te loto fakafetaʼi. Ko te ako takitokotahi ʼo te Folafola ʼa te ʼAtua, ʼe ina taupau maʼu te loto fakafetaʼi. Ko te ʼu fono ʼo te kokelekasio, ʼe nātou uga tatou ke tou fakahā totatou loto fakafetaʼi ʼi he ʼu faʼahi kehekehe. Ko te fakatahi lelei mo nātou ʼaē ʼe nātou fakavikiviki ʼe feala ke ‘uga ai tatou ki te ʼu gāue lelei.’ (Hep. 10:24) Ko te fakaʼaogaʼi lahi ʼo te ʼu fakatuʼutuʼu ʼaē ʼe foaki mai e te kokelekasio, e lagi feala ai ke tou fakatuputupu tatatou ʼu sakilifisio fakavikiviki.
4 Ko te fafine polofeta ko Ana neʼe ina tuku he faʼifaʼitaki lelei ʼi tana gāue ʼaē kia Sehova. Logope la tona kua taʼu 84, neʼe “mole puli ia ʼi he ʼaho ʼi te fale lotu, ʼo ina fai te tauhi tapu ʼi te po mo te ʼaho.” (Luka 2:37) Neʼe kau ia ki te ʼu gāue ʼo te kokelekasio mo tona nefesi katoa, ʼo tupu ai tona fiafia lahi. Ko te fakamatala ʼa te Tohi-Tapu ʼo ʼuhiga mo tana gāue agatonu ʼe ina fakaloto mālohiʼi tatou ʼi te temi nei.
5 Neʼe fakaloto mālohiʼi e Paulo ia nātou ʼaē ‘ ʼe mālohi ke nātou fua ia te ʼu vaivai ʼo nātou ʼaē ʼe mole mālohi.’ (Lom. 15:1) E lagi ʼe ʼi ai niʼihi ʼi tokotou kokelekasio ʼe feala ke koutou tokoni kia nātou pea mo fakaloto mālohiʼi. E ʼaoga pe ke koutou fakaafe ia ia ke koutou fai faka mafola. E lagi ʼaoga ki he kaugā faka mafola he tokoni ki tona feʼāveʼaki peʼe ke koutou gāue tahi mo ia. Lagi ko he tahi ʼe lotovaivai anai, pea ʼe feala ke koutou tokoni ki ai ke feala hana toe maʼu tana faiva ʼi te gāue ki te Puleʼaga. (1 Tes. 5:14) Ko tokotou lotolelei ke koutou “vaevae mo te kau maʼoniʼoni ʼo mulimuli ki te ʼu meʼa ʼaē ʼe ʼaoga kia nātou” ʼe fakahā ai tokotou lotolelei ke tuputupu takotou fakavikiviki ia te huafa ʼo Sehova.—Lom. 12:13.
6 ʼE faigataʼa te lau ʼo te ʼu meʼa fuli ʼaē neʼe kua ʼosi fai e Sehova pea mo te meʼa ka ina fai anai maʼa tatou. ʼE mole he meʼa ʼe feala ke tou fai moʼo liufaki ʼo te ʼu tapuakina ʼaia. Ko te ʼu tupuʼaga tāfito la ʼaia, ʼe tonu ai ke ‘fakavikiviki te ʼu meʼa fuli ʼe mānava kia Sehova’!—Pes. 150:6.