Ko Te Folafola ʼa Te ʼAtua ʼe Mālohi
1 Neʼe lahi ʼaupito te uga e te Tohi-Tapu te maʼuli ʼo te lauʼi miliona hahaʼi. Ko te meʼa ʼaē ʼe talanoa ia kiai ʼe lahi age tona mālohi ʼi he tohi neʼe fai e te tagata. (Hep. 4:12) Tou vakaʼi muʼa te meʼa neʼe ina fai maʼa tatou. ʼE moʼoni, ko tona maʼuhiga ʼe mole feala hona fakatatau.
2 Ko te kau Fakamoʼoni ʼa Sehova ko te kau ako pea mo te hahaʼi lagolago tāfito ʼo te Tohi-Tapu. ʼE tonu ke tou tokagaʼi ia te lau ʼo te Tohi-Tapu ohage he koga maʼuhiga ʼo tatatou polokalama faka teokalatike māhani, ʼo tou fakamuʼamuʼa te faʼahi ʼaia, ʼi te televisio pea mo ʼihi age ʼu fiafia.
3 Tou Fakamāmāhani ʼo Fai Te Faʼahi ʼAia: Ko te hahaʼi ʼa Sehova ʼe nātou fakafuafua ko te lau tuʼumaʼu ʼo te Tohi-Tapu tuʼumaʼu ʼe mālohi ʼaupito. Talu mai te ʼu taʼu, neʼe tohi te fakaʼiloga ʼi te Fale gāue ʼi Brooklyn ʼo fakaloto mālohiʼi te hahaʼi ʼo fēnei “Ke Koutou Lau Te Folafola ʼa Te ʼAtua Ia Te Tohi-Tapu ʼi Te ʼAho Fuli.” ʼE fakamaʼua kia nātou ʼaē neʼe hoki hū ki te Petele ke nātou lau te Tohi-Tapu katoa lolotoga tonatou ʼuluaki taʼu ʼaē ʼi te Petele.
4 Logope la takotou maʼumaʼua, ʼe koutou taupau koa te polokalama lau Tohi-Tapu ʼo te vāhaʼa fuli ʼo te Ako ʼo Te Minisitelio Faka Teokalatike? Kapau neʼe mole heʼeki koutou fai te faʼahi ʼaia, he koʼe ʼe mole koutou faigaʼi ʼi te māhina ko Novepeli? Ko te lau ʼo te Tohi-Tapu ʼo te māhina katoa ʼo Novepeli ʼe kamata mai ia Faka au 23 ki te 36, ʼaē ʼe fakamaʼua ai ke tou lau te ʼu pasina e tolu peʼe fā ʼi te vāhaʼa. Ko ʼihi ʼe nātou fakatuʼutuʼu ke nātou lau he ʼu kiʼi pasina ʼi te ʼaho fuli, lagi ʼi te uhu peʼe ʼi te afiafi ʼi muʼa ʼo tanatou momoe. Tatau aipe pe koteā takotou fakatuʼutuʼu, ko te meʼa ʼaē ʼe maʼuhiga, ke koutou maʼu he ʼu fua lelei ʼe ʼaoga ki tokotou maʼuli, ʼaki takotou lau tuʼumaʼu te Folafola ʼa te ʼAtua.
5 Tou Tufa Te Tohi-Tapu ʼi Novepeli: Tokolahi te hahaʼi ʼe kei nātou fakaʼapaʼapa ki te Tohi-Tapu pea ʼe nātou lotolelei ʼo fakalogo mokā tou lau age te Tohi-Tapu. Lolotoga te māhina ko Novepeli ʼe tou tufa anai te Tohi-Tapu Traduction du monde nouveau pea mo te tohi Mauli O Heegata. Ko te tufa ʼaia ʼe ko he meʼa lelei ʼaupito moʼo fakahā ki te hahaʼi ʼaē ʼe fakamalotoloto ke nātou ʼiloʼi te maʼuhiga ʼo te Folafola ʼa te ʼAtua. Ke tou fakahā fakafiafia te ʼu tohi ʼaia.
6 Tou teuteuʼi he ʼu manatu ʼe ʼaoga moʼo fakamahino ʼo te Tohi-Tapu Traduction du monde nouveau, ko te faʼahi ʼaia ʼe ina uga anai te hahaʼi ke nātou fia toʼo te Tohi-Tapu. Tou faka maʼuhigaʼi te ʼu manatu ʼaē ʼe ʼaoga tāfito. ʼE feala hakotou fakahā age he manatu ʼi te koga ʼaē ʼo te “Sujets de conversation bibliques” pea ke koutou faka ʼalutahi mo te tohi Mauli O Heegata. Peʼe lagi koutou fakahā te maʼuhiga ʼo te kumiʼaga ʼo te ʼu kupu tāfito faka Tohi-Tapu ʼaē ʼe pasina 102, moʼo fakahā kia ia ʼaē ʼe lautohi, ʼe faigafua tana maʼu te ʼu vaega ʼaē ʼe māhani ia kiai. Ko ʼihi kau faka mafola e lagi nātou fia fakaʼiloga keheʼi te pasina ʼaē ʼe tuʼu ai te ʼu tohi ʼo te Tohi-Tapu, moʼo fakahā tonatou ʼaoga ʼi te ako ʼo te Tohi-Tapu.
7 Tou tokakaga ʼo fakahā, ko te Tohi-Tapu Traduction du monde nouveau ʼaē neʼe fakaliliu ʼi te lea fakafalani ʼo te temi ʼaenī ʼe faigafua tatatou mahino kiai. ʼE lelei he fakatatau ʼo te Tohi-Tapu ʼaia mo te ʼu fakaliliu ʼaē kua lahi tona fakaʼaogaʼi, ʼo te vaega ʼo Mateo 5:3 pea mo 1 Kolonito 10:25. Ko te Tohi-Tapu Traduction du monde nouveau ʼe ina fakaʼaogaʼi tuʼa 7 210 te huafa ʼo te ʼAtua, ko Sehova.
8 Io, ko te Tohi-Tapu ʼe ko te Folafola ʼa te ʼAtua. Kapau ʼe tou lau te Tohi-Tapu, ʼo tou faka tui kiai, pea mo tou maʼuliʼi te ʼu tokoni ʼaē ʼe tuʼu ʼi ai, ʼe tou maʼu anai te ʼu tapuakina lahi. Neʼe fai te Tohi-Tapu moʼo foaki mai kia tatou he ako pea mo he ʼamanaki. (Lom. 15:4) ʼE maʼuhiga tatatou lau te Tohi-Tapu ʼi te ʼaho fuli pea ke tou teuteu ʼo fakaʼaogaʼi moʼo akoʼi ʼo niʼihi.