Ke Fua Lelei Kia Tatou Te ʼu Puani Foʼou ʼo Te ʼu Akonaki Ki Te Hahaʼi
1 Ko te hisitolia ʼa te kau Fakamoʼoni ʼa Sehova ʼo totatou temi, ʼe fakamatala lelei e te ʼu palalau ʼaē ia Tāʼaga Lea 4:18: “Ko te ala ʼo te kau faitotonu ʼe hage ko te mālama ʼo te ʼaho ʼaē ʼe mafoafoa māmālie ʼo aʼu ki te katoa ʼo te mālama ʼo te ʼaho.”
2 ʼO mulimuli ki te faʼahi ʼaia, ko te kokelekasio faka Kilisitiano ʼe hoholo tana maʼu te ʼu fakamatala ʼaoga pea mo te talanoa foʼou ʼo ʼuhiga mo te ʼu akonaki ʼa te Tohi-Tapu. (Mat. 24:45-47) E lagi ʼe feala ke koutou fakamatala he ʼu faʼifaʼitaki ʼo te faʼahi ʼaia neʼe koutou tāʼofi talu mai takotou fakatahitahi mo te kau Fakamoʼoni ʼa Sehova. Ko te ʼu fono ʼo te kokelekasio, ʼo kau ai mo te ʼu akonaki ki te hahaʼi, ʼe tokoni kia tatou ke tou mulimuli lelei ki te mālama ʼo te moʼoni ʼaē kua tuputupu.
3 Te ʼu Manatu Tāfito Neʼe Toe Vakaʼi: Mole heʼeki faʼa fualoa, neʼe fakafoʼou e te Sosiete te ʼu manatu ʼo te ʼu akonaki ki te hahaʼi. Ko te manatu foʼou neʼe fakahā ʼi te ʼu akonaki ʼaia, pea ko he ʼu puani maʼuhiga kua ʼosi fakamahino. Kapau neʼe maʼu e te kokelekasio he fua lelei katoa mai te talanoa foʼou ʼaia, ko te ʼu tēhina ʼaē ʼe nātou fai anai te ʼu akonaki ki te hahaʼi ʼe tonu ke nātou fakaʼaogaʼi pe te ʼu manatu ʼaē neʼe fakahā fakamuli.
4 ʼAki te fakatuʼutuʼu ʼaē ke maʼu he ʼu lelei ʼe lahi age ʼi te ʼu akonaki ki te hahaʼi, koutou vakaʼi te ʼu kupu tāfito ʼo te ʼu akonaki ʼaē ʼe tonu ke fai. ʼI muʼa ʼo takotou ʼolo ki te Fono ki te Hahaʼi, koutou fakamanatu te puani fakamuli ʼo te talanoa faka teokalatike ki te faʼahi ʼaia. ʼOsi ʼaia, ʼi takotou fakalogo ki te akonaki, ʼe feala hakotou ʼiloʼi fakatomuʼa te fakaʼaluʼalu ʼo te talanoa ʼaia. Koutou tohi he manatu foʼou ʼo ʼuhiga mo te faʼahiga fakahā ʼo te ʼu moʼoni ʼaia ke feala hona fakaʼaogaʼi ʼi he temi ki muli age. Ko te faʼahi ʼaia ʼe koutou ʼiloʼi papau ai ʼe koutou maʼu he fua lelei lahi age mai te puani foʼou ʼo te ʼu akonaki ki te hahaʼi.
5 Ko Te ʼu Akonaki Ki Te Hahaʼi ʼe Tonu Ke Fakamahino Ai te ʼu Manatu Tāfito Pea Mo Uga Ai Te Hahaʼi ʼAē ʼe Fakalogo: ʼI te temi ʼaē neʼe palalau ai Sesu, neʼe malave ʼi te loto ʼo te hahaʼi ʼaē ʼe fakalogo kia te ia. ʼI te fakaʼosi ʼo te Akonaki ʼa Sesu ʼi te Moʼuga, te akonaki logona ʼaē neʼe ina fai ki te hahaʼi, ohage ko tona fakamatala fēnei ia Mateo 7:28: “Neʼe ōfo ai te hahaʼi ʼi tana taʼi faʼahiga fai akonaki.”
6 ʼAki te manatuʼi tuʼumaʼu ʼo te faʼifaʼitaki ʼa Sesu, ko te ʼu kolesi ʼo te ʼu tagata ʼāfea ʼe tonu ke nātou fakaʼaogaʼi te fakapotopoto mokā nātou hinoʼi he ʼu tēhina foʼou moʼo fai ʼo he akonaki, ʼo nātou hinoʼi pe ia nātou ʼaē ʼe fai akonaki lelei, ʼaē ʼe nātou muliʼi fakalelei te ʼu fakatuʼutuʼu ʼa te Sosiete, pea ʼe feala hanatou faiga ke tokaga ia nātou ʼaē ʼe fakalogo ki te akonaki. Ko te ʼu tēhina ʼaē neʼe tuku kia nātou te pilivilesio ʼaē ko te fai ʼo te ʼu akonaki ki te hahaʼi, ʼe tonu ke nātou faiga ke nātou fakaʼaogaʼi tonatou faiva palalau, ʼo nātou tali he ʼu tokoni pea mo te ʼu manatu ʼe foaki atu e te ʼu tagata ʼāfea.
7 Ohage ko tona fakakikite ia Isaia 65:13, 14, ko te koloaʼia fakalaumālie ʼa te hahaʼi ʼo te ʼAtua ʼe ʼāsili lahi age. Ko te fakatuʼutuʼu ʼo ʼuhiga mo te ʼu akonaki ki te hahaʼi ʼe ko he ʼu faʼahi ʼaia ke “akoʼi tatou e Sehova.”—Is. 54:13.