ʼE Koutou Sio Koa Ki He Tahi ʼe ʼAoga Ki Ai He Tokoni?
1 ʼE fakamatalatala ia Sehova ohage ko He Tahi ʼe Tokoni, pea ʼe ko he Holaʼaga. ʼE tou ʼiloʼi ʼe feala ke tou kumi tokoni ki ai ʼi te ʼu temi ʼaē ʼe ʼaoga ai pea ʼe tokoni anai kia tatou. (Pes. 18:2; 46:1) ʼE feala hatatou muliʼi te kalitate matalelei ʼaia ʼo tou tokoni kia nātou ʼaē ʼe tou sisio atu ʼe ʼaoga kiai.
2 Koteā ʼaē ʼe ina uga he tahi ke ina fai he faiga makehe moʼo tokoni ki he tahi kehe? Tokolahi te hahaʼi ʼe nātou fakamoʼoni ko te aga ʼaia, ʼe ko he agaʼofa ia pea mo manavaʼofa. ʼE mahino ʼe fakaloto mālohiʼi tatou e te Folafola ʼa te ʼAtua ke tou fai te aga ʼaia. (Lom. 15:1) Neʼe uga tatou e Paulo ke ‘ ʼaua naʼa tou tokakaga pe ki te ʼu meʼa ʼa tatou totonu, kae ke tou toe tokakaga pe foki ki te ʼu meʼa ʼa ʼihi.’—Filp. 2:4.
3 Ko te fai ʼo te aga ʼaia ʼe ko he meʼa ia ʼe feala ke tou maʼu fuli ai te fiafia. (Gāue 20:35) Neʼe fakahā lelei e Paulo te tūpulaga ko Timoteo ohage ko he faʼifaʼitaki ʼo he tahi ʼe “tokaga lelei ki te ʼu meʼa ʼo ʼuhiga mo” tona ʼu tēhina. (Filp. 2:20) Ko he meʼa lelei hatatou maʼu ʼi te ʼu kokelekasio ʼo te temi nei he kau tūpulaga tokolahi ʼe nātou maʼu te aga ʼaia. Peʼe tou tūpulaga peʼe kua tou matutuʼa, ʼe ʼi ai te ʼu meʼa ʼe feala ke tou fai mo kapau ʼe tou sio ki he tahi ʼe ʼaoga kiai he faʼahiga tokoni.
4 Kua koutou fakatokagaʼi koa ʼe ʼi ai ʼihi ʼe ʼaoga ke tokoni age, kae lagi feala ke hikihiki te faʼahiga tokoni ke lelei age? Lagi ko he tēhina peʼe ko he tuagaʼane neʼe ʼi te lopitali, pea neʼe ʼolo age te ʼu Fakamoʼoni ʼo nātou ʼaʼahi ia ia, peʼe ko he tahi ʼe mole mafai hana meʼa, kae neʼe mole he tahi moʼo fai te ʼu fekau ʼaoga pea moʼo tokoni age ki te fai ʼo te ʼu gāue ʼo tona loto fale. ʼE tokagaʼi e Sesu ia nātou ʼaē ʼe nātou tauhi kia Sehova ʼi tonatou ʼuhiga ʼaē ʼe nātou kau ki he famili ʼe fetokaga moʼoni ʼaki. (Maleko 3:33-35) ʼI te lea fakatātā ʼo te ʼu ōvi mo te ʼu tao, neʼe ina fakahā ko nātou ʼaia ʼe nātou fakafiafia ʼi te toʼomataʼu ʼo te ʼofa ʼo te Hau, ʼuhi ko tanatou tokoni ki te ʼu tēhina ʼo te Hau.—Mat. 25:40.
5 Koteā Te Tokoni ʼAē ʼe Feala Ke ʼAu Fai? Koteā ʼaē ʼe feala ke fai mokā ʼe ʼi ai moʼoni he tahi ʼe ʼaoga ke tokoni ki ai? ʼE feala koa ke tou fai he fakatuʼutuʼu ke tou tokoni ʼi he faʼahiga ʼaluʼaga? Lagi ʼe ʼi ai niʼihi ʼe matutuʼa ʼe ʼaoga kia nātou he fakaloto mālohi, kae ʼe mole honatou ʼu kaumeʼa ʼe nātou feʼiloʼi lelei ʼaki moʼo tokoni kia nātou. E lagi ʼe ʼi ai he kau tūpulaga ʼe ʼaoga kia nātou he tokoni. Ko he famili mo tana fānau kaugamālie, ʼe nātou foʼou, e lagi nātou ʼōmai ki te Fale ʼo te Puleʼaga, kae ko ia ʼaē ʼe ina fai tanatou ako ʼe mole kau ʼi te fono. ʼE feala pe ke nātou leleiʼia ke ʼi ai he tahi ʼe lotolelei moʼo tokoni kia nātou mo te fānau.
6 ʼAki te tuputupu ʼo totatou ʼofa ki te moʼoni pea mo te kautahi ʼa Sehova, ʼe toe tuputupu ai foki mo tatatou fakafetaʼi pea mo tatatou tokaga ki niʼihi ʼi te kokelekasio. Neʼe fakaloto mālohiʼi tatou e Paulo ke tou tuputupu ʼi te faʼahi ʼaia. (2 Ko. 6:11-13) Neʼe fakaʼiloga e Sesu ko tatatou fakahā te feʼofaʼofani ʼe ko te meʼa ʼuluaki ʼaia ʼe tou fakahā moʼoni ai ko tatou ko ʼana ʼu tisipulo.—Soane 13:35.
7 Koia ka tou sio ki he tahi ʼe ʼaoga ki ai he tokoni, ʼe tonu ke uga tatou e te ʼofa fakamalotoloto ki ʼotatou ʼu tēhina pea mo te kokelekasio, ke tou fai he ʼu fakatuʼutuʼu moʼo tokoni ʼi te ʼaluʼaga ʼo te ʼu meʼa ʼaē ʼe tou lavaʼi. (Kal. 6:9, 10) Ko te tokaga ki niʼihi ʼe ina fakatahiʼi tatou ki he ʼu noʼo ʼo te ʼofa pea mo te logo tahi. (1 Ko. 10:24) ʼAki tona fai ʼaia, ʼe tou fai te meʼa ʼaē ʼe tou lavaʼi moʼo tokoni ki ʼaē ʼe ʼaoga ki ai he tokoni ʼi te kokelekasio.