Tou Fai Ia Meʼa Fuli Moʼo Faka Kolōliaʼi ʼo Te ʼAtua
1 ʼE fakaloto mālohi tatatou fakatahitahi mo ʼotatou ʼu tēhina pea mo tuagaʼane! (1 Ko. 16:17, 18) ʼE tou fai te faʼahi ʼaia ʼi te ʼu fono, ʼi te ʼu fakatahi, pea ʼi te minisitelio. ʼE tou fakatahitahi foki mo nātou ʼi ʼihi temi ʼe faigamālie, ohage la mokā tou fakaafe mai nātou ki totatou ʼapi. ʼAki tatatou fai te faʼahi ʼaia, ʼe tou fakahā ai te tali kāiga pea ʼe tou fefakaloto mālohiʼaki. (Lom. 12:13; 1 Pe. 4:9) Mokā tou fakatuʼutuʼu he kaitahi ʼo he ʼohoana, tou manatuʼi te tokoni lelei ʼaē ʼe tuʼu ʼi Te Tule Leʼo (fakafalani) ʼo te ʼaho 15 ʼo Sūlio 1984.
2 Te Fakatuʼutuʼu ʼo He ʼu Temi Fakafiafia: Peʼe tou ‘kakai peʼe tou ʼiʼinu peʼe ko he faʼahiga meʼa pe ʼe tou fai,’ ʼe tonu ke tou “fai ia meʼa fuli moʼo faka kolōliaʼi ʼo te ʼAtua.” (1 Ko. 10:31-33) Ko ʼihi ʼe mole nātou mulimuli ki te tokoni ʼaenī, pea ʼe hoholo aipe te tuputupu ʼo te ʼu fihifihia, koteʼuhi ʼe kaugamālie fau te ʼu fakafiafia pea ʼe faigataʼa foki tona fakaʼaluʼalu lelei. ʼI ʼihi ʼaluʼaga, neʼe fakaafe te lauʼi teau hahaʼi ki te ʼu fakatahi lalahi neʼe ʼiloga ai te ʼu aga ʼo te mālama. ʼI ʼihi temi, ʼe fakaʼui kia nātou ʼaē ʼe kau ki te fakatahi ʼaia ke nātou totogi tanatou hū ki te fakatahi, peʼe ke nātou totogi he tahi ʼu faʼahiga meʼa. Ko te ʼu taʼi fakafiafia ʼaia ʼe tatau pe mo te ʼu fakafiafia fakamālama, ʼaē ʼe mole ʼalutahi tana manatu mo te aga fakaʼapaʼapa pea mo te ʼu pelesepeto ʼa te Tohi-Tapu.—Lom. 13:13, 14; Ef. 5:15-20.
3 Neʼe fakahāhā ko te tokolahi ʼo te kau Fakamoʼoni neʼe nātou lue te ʼu koga meʼa, moʼo fai ai tanatou ʼu fakafiafia ʼaē ʼe mole lelei pea neʼe ʼalutahi mo te mālama pea neʼe mole lelei tona fakaʼaluʼalu. Ko te ʼu faʼahiga fakatahi ʼaia neʼe fakatuʼutuʼu ko te ʼu fakaʼosi vāhaʼa ʼa “te kau Fakamoʼoni ʼa Sehova,” ʼo fai ʼi te ʼu otele pea mo te tahi ʼu koga meʼa māhani. ʼUhi ko te faigataʼa ʼo te fakaʼaluʼalu fakalelei ʼo te ʼu kūtuga ʼaia ʼe kaugamālie, ʼe tuputupu ai te ʼu fihifihia. Ko te logoaʼa, te ʼinu kava fakavalevale, ʼo feiā aipe ki te aga heʼeʼaoga ʼe tautau hoko ai. (Ef. 5:3, 4) Ko te ʼu fakafiafia ʼaē ʼe hoko ai te ʼu taʼi aga ʼaia ʼe mole nātou faka maʼuhigaʼi ai ia Sehova. Kae, ʼe nātou fakatupu ufiufi ki te matagafua ʼo te kokelekasio pea mo fakatupu tūkia ki niʼihi.—1 Ko. 10:23, 24, 29.
4 ʼE fakaloto mālohiʼi te kau Kilisitiano ke nātou fakahā te tali kāiga, kae ʼe tonu ke nātou fakatuʼutuʼu tāfito ke nātou fefakaloto mālohiʼaki ʼi te faʼahi fakalaumālie. (Lom. 1:11, 12) Ko te ʼu fakatahitahi ʼaē ʼe mole faʼa hahaʼi ʼe lelei age ia. Ko te tohi Notre ministère ʼe ina ʼui fēnei ʼi te pasina 135: “ ʼI ʼihi temi, ʼe lahi te ʼu famili ʼe fakaafe ki he ʼapi ke nātou fakatahitahi mo te kau Kilisitiano. . . . ʼAki te aga fakapotopoto, ko nātou ʼaē ʼe fai fakaafe ʼe tonu ke nātou tokakaga ki te meʼa ka hoko ʼi te faʼahi ʼaia. ʼI tanatou manatuʼi te faʼahi ʼaia, ko te kau Kilisitiano ʼaē ʼe fakasiosio poto ʼe nātou fakapotopoto ʼo faka tuʼakoi te hahaʼi ʼaē ʼe fakaafe pea mo te loaloaga ʼo te fakafiafia ʼaia.” Neʼe fakahā e Sesu ʼe mole ʼaoga te fai ʼo he ʼu meʼa lalahi, mo kapau ʼe tou fakatuʼutuʼu ke tou fakaloto mālohiʼi ʼo tatatou ʼu kaumeʼa ʼi te faʼahi fakalaumālie.—Luka 10:40-42.
5 ʼE ko he meʼa lelei tatatou fakahā te tali kāiga ki ʼotatou ʼu kaumeʼa faka Kilisitiano. Kae, ʼe lahi te kehekehe ʼo te fakafiafia ʼaē ʼe fai ʼi totatou ʼapi pea mo te ʼu fakatahi lalahi ʼaē ʼe fai ʼi te ʼu fale neʼe lue ki te faʼahi ʼaia, ʼaē ʼe hā ai te aga ʼa te mālama. ʼI takotou fakaafe niʼihi ki tokotou ʼapi, ʼe tonu ke koutou ʼiloʼi papau ko tokotou maʼua ko te tokaga kia nātou.—Vakaʼi Te Tule Leʼo ʼo te ʼaho 15 ʼo ʼAukusito 1992, ʼi te ʼu pasina 17 ki te 20.
6 ʼE moʼoni, ʼe tapuakina tatou e Sehova mo ʼotatou ʼu tēhina ʼaē ʼe tou fefakaloto mālohiʼi, ʼo uga tatou ke hoholo atu tatatou ʼu gāue ʼe lelei. (Mat. 5:16; 1 Pe. 2:12) ʼAki tatatou fakahā te agavaivai pea mo te fakapotopoto ʼi totatou ʼu temi fakafiafia, ʼe tou faka kolōliaʼi tuʼumaʼu anai totatou ʼAtua pea ʼe tou fakaloto mālohiʼi anai niʼihi.—Lom. 15:2.