He Koʼe Koa ʼe ʼAoga—Ke Sivi Tatou e Sehova?
1 Ko tatou fuli ʼe tou fia fai ki he maʼuli mālōlō ʼe lelei. ʼE ina fakatupu fiafia ai te maʼuli. Kae, tokolahi ia nātou ʼaē ʼe lelei tonatou maʼuli mālōlō ʼe nātou tautau vakaʼi mahaki. Koteā tona tupuʼaga? ʼE nātou faigaʼi ke nātou ʼiloʼi he fihifihia ʼi tonatou maʼuli mālōlō ke feala ai hanatou fakafuafua te faitoʼo ʼe ʼaoga kiai. ʼE toe maʼuhiga ʼaupito age tatatou hāofaki totatou maʼuli mālōlō ʼi te faʼahi fakalaumālie. Ko te ʼofa ʼo Sehova ʼe fakalogo ki tatatou nofo “mālohi ʼi te tui.”—Tito 1:13.
2 ʼI te temi nei ʼe ko te temi ʼe lelei ke sivi ai tatou e Sehova. Koteā tona tupuʼaga? Koteʼuhi ʼe nofo Sehova ʼi tona fale lotu maʼoniʼoni, pea ʼe ina sivi te loto ʼo te tagata fuli. (Pes. 11:4, 5; Taag. 17:3) Ohage ko Tavite, tou kole kia Sehova ke ina sivi fakaleleiʼi tatou: “Sivi ʼau, Ê Sehova, pea ke ke ʼahiʼahi ʼau; fakamaʼa toku ʼu ifiifi pea mo toku loto.”—Pes. 26:2.
3 ʼE tonu ke tou tokakaga ki te ʼu ʼahiʼahi ʼo totatou maʼuli mālōlō ʼi te faʼahi fakalaumālie, ʼaē ʼe feala ke haʼu mai ia tatou ʼuhi ko totatou kakano agahala. ʼE tokoni fēnei mai ia Tāʼaga Lea 4:23: “ ʼI te ʼu meʼa maʼuhiga fuli ʼaē ʼe tonu ke tou taupau, ke ke hāofaki tou loto, heʼe ko ia ko te ʼu matapuna ʼo te maʼuli.”
4 Ko totatou maʼuli mālōlō ʼi te faʼahi fakalaumālie ʼe feala foki ke ʼahiʼahiʼi e te mālama aga fakahehema, pea mo aga fakalialia ʼaē ʼe ʼi ʼotatou tafaʼaki. Kapau ʼe tou fakagafua ia tatou ke tou fakaōvi ki te tuʼu agakovi ʼaenī, ʼe feala ai hatatou kamata maʼu tana ʼu manatu pea mo tou mulimuli ki tana ʼu aga. Peʼe feala ke tou mulimuli ki te faʼahiga maʼuli ʼo te mālama pea ʼe feala ke fakakiviʼi tatou e te laumālie ʼo te mālama.—Ef. 2:2, 3.
5 ʼE feala ke fakaʼaogaʼi e Satana te fakataga peʼe ko te fakafeagai fakahagatonu moʼo maumauʼi ʼo tatou ʼi te faʼahi fakalaumālie. Kae, ko te meʼa lahi ʼe ina tautau fai, ʼe ina fakaʼaoga te ʼu meʼa fakalalata ʼa te mālama moʼo fakahalaʼi ʼo tatou. ʼE fakaloto mālohiʼi tatou e Petelo ke tou ‘nonofo ʼalaʼala pea ke tou nonofo tokaga,’ ʼuhi ko Satana “ ʼe hage ko he laione ʼe gugulu, ʼe feʼaluʼaki ke ina kai he tahi.” ʼE fakaloto mālohiʼi tatou ke tou ‘tekeʼi fakamālohi ia ia ʼaki te tui.’—1 Pe. 5:8, 9.
6 ʼE ʼaoga ke tou hāofaki totatou maʼuli mālōlō ʼi te faʼahi fakalaumālie, ʼo taupau tatatou tui mālohi ʼaki tatatou fakaloto mālohiʼi ʼi te ʼaho fuli. ʼE fakatokagaʼi tatou e te ʼapositolo ko Paulo ke hoholo atu tatatou ʼahiʼahiʼi tatatou tui. Ohage pe ko tatatou fakapotopoto ʼo maʼuliʼi te tokoni ʼe foaki mai e he tōketā poto, ʼe ʼaoga foki ke tou fakalogo kia Sehova mokā ʼe Ina sivi tatou ʼi te faʼahi fakalaumālie, ʼo fakahā mai te fihifihia ʼaē ʼe tonu ke fakatonutonuʼi. Ko te faʼahi ʼaia ʼe faka fealagia ai ke “fakatonutonuʼi” tatou—2 Ko. 13:5, 11.
7 ʼE mahino ia ko Sehova ʼe ko te Tōketā lahi. Ko tana sivi ʼe totonu tuʼumaʼu. ʼE ina ʼiloʼi lelei te meʼa ʼaē ʼe ʼaoga kia tatou. ʼAki tana Folafola pea mo ‘te kaugana agatonu,’ ʼe ina foaki mai he meʼa kai fakalaumālie haohaoa. (Mat. 24:45; 1 Tim. 4:6) Ko te kai tuʼumaʼu ʼo te meʼa kai fakalaumālie ʼaia ʼi totatou ʼapi pea mo te ʼu fono ʼo te kokelekasio, ʼe faka fealagia ai kia tatou ke tou maʼu he maʼuli mālōlō ʼi te faʼahi fakalaumālie. Ko te gāue tuʼumaʼu ʼi te minisitelio pea mo he tahi age gāue faka Kilisitiano ʼe toe ʼaoga pe foki. Koia la ʼaē, ʼe tou leleiʼia ai totatou sivi tuʼumaʼu ʼaē e Sehova, ʼo tou ʼiloʼi papau ʼe ina taupau anai tatou ke lelei age totatou maʼuli mālōlō ʼi te faʼahi fakalaumālie.