ʼE ʼi Ai Totatou Maʼua
1 Neʼe fakatotonu e Sesu ki tana kau tisipulo ke nātou “fai ni ʼu tisipulo ʼi te hahaʼi ʼo te ʼu fenua fuli pe.” (Mat. 28:19) ʼI te ʼu fenua e 232 pea mo te ʼu motu, ko te toko nima miliona tupu ʼe nātou fakavikiviki kia Sehova ʼAtua, pea ʼe nātou fakahā lelei ʼe nātou fakahoko te fakatotonu ʼa Sesu. Kae e feafeaʼi kia tatou takitokotahi? ʼE tou fakahoko fakamalotoloto koa te maʼua ʼaē ko te fai faka mafola?
2 Ko Te Maʼua ʼe Tonu Ke Fai: Ko he maʼua ʼe ko “he fakatotonu ke kita fakahoko he ʼu gāue neʼe kua ʼosi hinoʼi mai.” Neʼe fakatotonu mai e Kilisito ke tou fai faka mafola. (Gāue 10:42) Neʼe mahino ki te ʼapositolo ko Paulo ʼe ko he maʼua kia ia ke ina tala te logo lelei. (1 Ko. 9:16) Koʼeni te faʼifaʼitaki: Koutou fakakaukau muʼa ʼe koutou kau ʼi te kau gāue ʼo he sitima ʼe lolotoga moū. ʼE fakatotonu atu e te kapiteni ke koutou fakahā ki te hahaʼi ʼo te sitima pea ke koutou taki ia nātou ki te ʼu kiʼi vaka liliki. ʼE koutou meʼa noaʼi anai koa te fakatotonu ʼaia, ʼo koutou tokaga pe koutou ʼo hāofaki tokotou maʼuli? Kailoa. ʼE fakalogo te maʼuli ʼo te hahaʼi kia koutou. ʼE tuʼutāmakiʼia tonatou maʼuli. ʼE tonu ke koutou fakahoko tokotou maʼua ʼaē ko te tokoni kia nātou.
3 ʼE fakatotonu mai e te ʼAtua ke tou fakahā te fakatokaga. Kua vave pe te pulihi e Sehova te tuʼu ʼo te ʼu faʼahiga meʼa agakovi ʼaenī. Ko te lauʼi miliona hahaʼi ʼe mole ʼiloʼi papau peʼe nātou hāo anai peʼe kailoa. ʼE lelei anai koa ke tou meʼa noaʼi te maʼuli ʼo te hahaʼi, kae ke tou hāofaki pe totatou maʼuli? Kailoa. ʼE tonu ke tou tokoni ʼo hāofaki te maʼuli ʼo te hahaʼi.—1 Tim. 4:16.
4 Ko Te ʼu Faʼifaʼitaki Agatonu ʼe Tonu Ke Tou Mulimuli Kiai: Neʼe logoʼi e te polofeta ko Esekiele ʼi tona loto, ʼe maʼua ke ina fakahā te logo moʼo fakatokagaʼi ʼo te kau Iselaelite heʼe faitotonu. Neʼe fakatokagaʼi age e Sehova ia ia ʼo ʼuhiga mo te meʼa ʼaē ka hoko mo kapau ʼe mole ina fai te meʼa ʼaē neʼe ina fakatotonu age: “Kapau ʼe ʼau ʼui age ki he tahi ʼe agakovi, ‘ ʼE ke mate moʼoni anai,’ pea kapau ʼe mole ke fakatokagaʼi ia ia . . . , ko te tagata agakovi, ʼe mate anai ia ʼi tana hala, kae ko tona toto ʼe ʼau fakaʼui atu anai kia koe.” (Esk. 3:18) Neʼe agatonu ia Esekiele, ʼo ina fakahoko tona maʼua, logope la te ʼu fakafeagai ʼaē neʼe hoko kia ia. Koia, ʼe mahino neʼe fiafia ʼi te temi ʼaē neʼe hoko ai te ʼu fakamāu ʼa Sehova.
5 ʼI he ʼu sēkulō ki muli age, neʼe talanoa te ʼapositolo ko Paulo ki tona maʼua ʼaē ko te fai faka mafola. Neʼe ina ʼui fēnei: “ ʼE ʼau maʼa ʼi te toto ʼo te tagata fuli pe, he neʼe mole ʼau fakatātāʼofi ia ʼau ʼi te fakahā atu kia koutou te tokoni fuli ʼa te ʼAtua.” Neʼe fai faka mafola ia Paulo ʼi muʼa ʼo te hahaʼi pea ʼi te ʼu ʼapi, koteʼuhi neʼe mahino kia ia, kapau ʼe mole ina fai te faʼahi ʼaia, pea ʼe lākahala anai ia ia ʼi muʼa ʼo te ʼAtua, kapau ʼe mamate te hahaʼi ʼaia.—Gāue 20:20, 26, 27.
6 ʼE tou fakahoko koa totatou maʼua ohage ko Esekiele? ʼE tou faiga mālohi koa ʼo fai faka mafola ohage ko te meʼa ʼaē neʼe fai e Paulo? ʼE tatau totatou maʼua mo te maʼua ʼaē neʼe tuku age kia nāua. ʼE tonu ke tou haga fakahoko totatou maʼua ʼaē ko te fakatokagaʼi ʼo te hahaʼi, logope la tanatou mole fia logo, pea mo te fakafeagai ʼaē ʼe nātou fai mai peʼe ko te ʼu fakataga. ʼE kei toe te ʼu hahaʼi ʼe lauʼi afe tupu ʼe feala ke nātou tali te logo ʼo te Puleʼaga pea ʼe nātou ʼui fēnei: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.” (Sakl. 8:23) ʼOfa pe ke uga tatou e totatou ʼofa ki te ʼAtua pea mo totatou ʼofa ki te hahaʼi, ke hoko atu tatatou fai te gāue. Ko totatou maʼua ko te fai faka mafola!