Tou Kau Ki Te Gāue ʼAē ʼe Mole Toe Fai Anai
1 ʼI te tahi ʼu temi ʼo te hisitolia ʼo te malamanei, neʼe tonu ke fakaʼauha e Sehova tona ʼu fili. Kae, ʼuhi ko tona manavaʼofa, neʼe ina foaki ki te hahaʼi faitotonu te fealagia ʼaē ke nātou hāo ʼi te ʼu fakaʼauha ʼaia. (Pes. 103:13) Neʼe fakalogo tonatou maʼuli ki tanatou faʼahiga tali ʼo tona manavaʼofa.
2 Ohage la, ʼi muʼa ʼo te hoko ʼo te Tulivio ʼi te taʼu 2370 ʼi muʼa ʼo totatou temi, ko Noe neʼe ko te “tagata fai faka mafola faitotonu.” Ko te hahaʼi ʼaē neʼe mamate, neʼe ko nātou ʼaē neʼe nātou meʼa noaʼi te fakatokaga fakaʼatua. (2 Pe. 2:5; Hep. 11:7) ʼI muʼa ʼo te fakaʼauha ʼo Selusalemi ʼi te taʼu 70 ʼo totatou temi, neʼe fakahā fakalelei e Sesu te gāue ʼaē ʼe tonu ke fai ke feala ai he hāofaki ʼo te hahaʼi ia muʼa ʼo te hoko mai ʼo te tuʼutāmaki ʼaia ki te kolo. Ko nātou fuli ʼaē neʼe nātou fakafisi ki te logo ʼaia neʼe nātou tau mo te ʼu fua kovi ʼo tanatou fakafisi ʼaia. (Luka 21:20-24) Ko te ʼu fakatokaga pea mo te ʼu fakamāu fakaʼatua ʼaia, neʼe tuʼa lahi tona fakahoko lolotoga te hisitolia.
3 Ko Te Gāue Fakatokaga Ia ʼAho Nei: Kua fualoa te fakahā e Sehova ʼe ina fakahoko anai tona hāūhāū ki te tuʼu agakovi ʼo te ʼu faʼahiga meʼa ʼaenī, pea ʼe hāo pe anai te hahaʼi agavaivai. (Sof. 2:2, 3; 3:8) Kua vave ʼosi te temi ʼaē ʼe ʼaoga moʼo faka mafola ʼo te fakatokaga ʼaia! Kua fakaōvi mai te “mamahi lahi,” pea ʼe tātānaki te hahaʼi agavaivai ʼi te temi nei. ʼIo, ko te “gāueʼaga” ʼe kua “hihina ia ki te tānaki ʼo te taʼukai.” Koia, ʼe mole he tahi age gāue ʼe feala ke fakatatau mo te gāue maʼuhiga ʼaenī pea ʼe tonu ke tou foimo fai.—Mat. 24:14, 21, 22; Soane 4:35.
4 ʼE tonu ke tou kau ki te fakahāhā ʼo te fakatokaga ʼaē ʼe fai ʼi te temi ʼaenī ki te hahaʼi, tatau aipe “peʼe nātou fakalogo anai peʼe nātou fakafisi anai.” Ko te gāue ʼaia neʼe fakamaʼuaʼi mai e te ʼAtua, pea ʼe mole tonu ke tou meʼa noaʼi. (Esk. 2:4, 5; 3:17, 18) Ko tatatou kau katoa ki te gāue ʼaia ʼe fakahā ʼaki ai totatou ʼofa mālohi ki te ʼAtua, tatatou tokaga fakamalotoloto ki totatou tatau, pea mo tatatou tui mālohi ki totatou Fakamaʼuli, ʼaē ko Sesu Kilisito.
5 ʼE Ko He Temi ʼAenī Ke Tou Gāue Ai: ʼI te ʼosi ʼo te ʼu fakaʼauha ʼaē neʼe fakahoko e Sehova ʼi te temi muʼa, neʼe toe hoko atu pe te ʼu agakovi koteʼuhi neʼe kei gāue ia Satana pea mo tana ʼu temonio. Kae ʼe kehe anai ʼi te temi ʼaenī. ʼE molehi anai te ʼu gāue ʼa Satana. ʼE mole toe ʼaoga anai ke fai he fakatokaga ʼi te kele katoa ʼo ʼuhiga mo he “mamahi lahi.” (Fkhā. 7:14; Loma 16: 20) ʼE tou maʼu te pilivilesio makehe ʼaē ko te kau ki he gāue ʼe mole toe fai anai. ʼE ko te temi ʼaenī ʼaē ʼe tonu ke tou fakaʼaogaʼi fakalelei ai te fealagia ʼaia.
6 ʼO ʼuhiga mo tana fai faka mafola, neʼe ʼui fēnei e te ʼapositolo ko Paulo ʼaki he tui mālohi: “ ʼE ʼau maʼa ʼi te toto ʼo te tagata fuli pe.” (Gāue 20:26) Neʼe mole feala ke ʼui e he tahi neʼe mole ina fai te gāue ʼaē ko te fakatokaga ʼo te hahaʼi. Koteā tona tupuʼaga? Koteʼuhi neʼe feala ke ina ʼui ʼo ʼuhiga mo tona minisitelio: “ ʼE ʼau gāue kinakina ʼuhi ko te faʼahi ʼaia, ʼo ʼau faiga mālohi.” (Kol. 1:29) Tou maʼu mo tatou te fiafia ʼaia, ʼo tou kau ki te fakahoko ʼo te gāue ʼaia ʼaē ʼe mole toe fai anai!—2 Tim. 2:15.